20 Dec. 2021

ਇਨਕਮ ਟੈਕਸ ਦੀ ਰੇਡ ਮਗਰੋਂ ਅਖਲੇਸ਼ ਨੇ ਕਿਹਾ, “ ਈ.ਡੀ.ਤੇ ਸੀ.ਬੀ.ਆਈ. ਵੀ ਆਉਣਗੀਆਂ-ਇਕ ਖ਼ਬਰ

ਇਬਤਦਾਏ ਇਸ਼ਕ ਹੈ ਰੋਤਾ ਹੈ ਕਿਆ, ਆਗੇ ਆਗੇ ਦੇਖੀਏ ਹੋਤਾ ਹੈ ਕਿਆ।

ਪੰਜਾਬ ਦੀ ਖੁਸ਼ਹਾਲੀ ਲਈ ਮੇਰੀ ਤੇ ਚੰਨੀ ਦੀ ਬਲਦਾਂ ਦੀ ਜੋੜੀ- ਸਿੱਧੂ

ਢੁੱਡਾਂ ਮਾਰਦੇ ਬੱਗਾ ਤੇ ਸਾਵਾ, ਜੱਟ ਨੂੰ ਫਾਲ਼ ਦੇਣਗੇ।

ਰਾਜਨੀਤੀ ਦਾ ਧਰਮ ‘ਤੇ ਭਾਰੂ ਪੈਣਾ ਮੰਦਭਾਗਾ- ਸੁਖਦੇਵ ਸਿੰਘ ਢੀਂਡਸਾ

ਅਜੇ ਕੱਲ੍ਹ ਤੱਕ ਤਾਂ ਤੁਸੀਂ ਵੀ ਇਸੇ ਚਿੱਕੜ ਵਿਚ ਤਾਰੀਆਂ ਲਾਉਂਦੇ ਸੀ।

ਅਕਾਲੀ –ਬਸਪਾ ਗੱਠਜੋੜ 1996 ਵਾਲ਼ਾ ਇਤਿਹਾਸ ਦੁਹਰਾਏਗਾ- ਪ੍ਰਕਾਸ਼ ਸਿੰਘ ਬਾਦਲ

ਫੇਰ ਤਾਂ ਬਸਪਾ ਵਾਲਿਉ ਆਪਣੇ ਆਪਣੇ ਬਿਸਤਰੇ ਬੰਨ੍ਹਣੇ ਸ਼ੁਰੂ ਕਰ ਲਉ।

ਪੰਜਾਬ ਕਾਂਗਰਸ ਵਿਚ ਮੁੜ ਵਧਣ ਲੱਗਿਆ ਟਕਰਾਅ- ਇਕ ਖ਼ਬਰ

ਕੂੰਡੇ ਟੁੱਟ ਗਏ ਘੋਟਣੇ ਭੱਜ ਗਏ, ਤਕੀਏ ਮਲੰਗ ਲੜ ਪਏ।

ਪੰਜਾਬ ‘ਚ ਗੁੰਡਾ ਰਾਜ ਚੱਲ ਰਿਹੈ- ਸੁਖਬੀਰ ਬਾਦਲ

ਸ਼ੁਰੂ ਕੀਹਨੇ ਕੀਤਾ ਸੀ ਬਈ ਬਾਦਲ ਸਿਆਂ?

ਮੈਟਰੋਮੈਨ ਈ. ਸ਼੍ਰੀਧਰਨ ਨੇ ਭਾਜਪਾ ਨੂੰ ਅਲਵਿਦਾ ਕਹੀ- ਇਕ ਖ਼ਬਰ

ਆਹ ਲੈ ਚੁੱਕ ਫੜ ਮਿੱਤਰਾ, ਸਾਡੇ ਝਾਂਜਰਾਂ ਮੇਚ ਨਾ ਆਈਆਂ।

ਜਦੋਂ ਚੋਣਾਂ ਆਉਂਦੀਆਂ ਹਨ, ਕੇਜਰੀਵਾਲ਼ ਪੰਜਾਬ ‘ਚ ਆ ਟਪਕਦੇ ਹਨ- ਹਰਸਿਮਰਤ

ਕਿਉਂ ਬੀਬਾ ਜੀ, ਤੁਸੀਂ ਬੈਅ ਕਰਵਾਇਆ ਹੋਇਐ ਪੰਜਾਬ?

2022 ਦੀਆਂ ਚੋਣਾਂ ਜਿੱਤ ਕੇ ਭਾਜਪਾ ਪੰਜਾਬ ‘ਚ ਸਰਕਾਰ ਬਣਾਏਗੀ- ਸਿਰਸਾ

ਬੋਲਿਆ ਨੀ ਬੋਲਿਆ..........ਬੋਲਿਆ।

ਅਜੈ ਮਿਸ਼ਰਾ ਦੇ ਅਸਤੀਫ਼ੇ ਦੀ ਵਿਰੋਧੀ ਧਿਰ ਦੀ ਮੰਗ ਨੂੰ ਭਾਜਪਾ ਨੇ ਕੀਤਾ ਖ਼ਾਰਜ- ਇਕ ਖ਼ਬਰ

ਛੋਟਾ ਦਿਉਰ ਭਾਬੀਆਂ ਦਾ ਗਹਿਣਾ, ਰੰਨਾਂ ਵਿਚ ਮੇਲ੍ਹਦਾ ਫਿਰੇ।

ਪਛੜੇ ਲੋਕਾਂ ਨੂੰ ਸਮਰੱਥ ਬਣਾਉਣਾ ਸਰਕਾਰ ਦੀ ਤਰਜੀਹ- ਮੋਦੀ

ਬਸ ਲਗੇ ਰਹੋ ਮੋਦੀ ਸਾਹਿਬ ਸਮਰੱਥਾ ਤਾਂ ਸੰਭਾਲ਼ੀ ਨਹੀਂ ਜਾਣੀ ਲੋਕਾਂ ਤੋਂ!

ਕੈਪਟਨ ਭਾਜਪਾ ਆਗੂਆਂ ਨਾਲ਼ ਚਰਚਾ ਲਈ ਤਿੰਨ ਦਿਨ ਦੇ ਦੌਰੇ ‘ਤੇ ਦਿੱਲੀ ਪਹੁੰਚੇ- ਇਕ ਖ਼ਬਰ

ਮੇਰੀ ਬਾਂਹਿ ਨਾ ਛੋੜੀਂ ਜੀ, ਮੈਂ ਲੜ ਲਾਗੀ ਤੇਰੇ।

ਨਵਜੋਤ ਸਿੱਧੂ ਦੀ ਕੇਜਰੀਵਾਲ ਨੂੰ ਬਹਿਸ ਕਰਨ ਲਈ ਚੁਣੌਤੀ- ਇਕ ਖ਼ਬਰ

ਟੁੱਟ ਪੈਣੇ ਨੇ ਜਲੇਬੀ ਮਾਰੀ, ਅੱਖ ਵਿਚ ਤੇਲ ਪੈ ਗਿਆ।

ਕਿਸਾਨਾਂ ਨੂੰ ਖੇਤੀ ਕਾਨੂੰਨਾਂ ਦੇ ਫ਼ਾਇਦੇ ਦੱਸਣੇ ਜਾਰੀ ਰੱਖਣਗੇ ਭਾਜਪਾ ਵਰਕਰ- ਤੋਮਰ

ਯਾਨੀ ਕਿ ਰੱਸੀ ਸੜ ਗਈ ਪਰ ਵੱਟ ਨਹੀਂ ਗਿਆ।

ਲੋਕਾਂ ਨੂੰ ਅੱਖਰ ਗਿਆਨ ਦੇਣਾ ਪੜ੍ਹੇ-ਲਿਖੇ ਨੌਜੁਆਨਾਂ ਦੀ ਜ਼ਿੰਮੇਵਾਰੀ- ਉੱਪ ਰਾਸ਼ਟਰਪਤੀ

ਤੇ ਤੁਸੀਂ ਹਰ ਸਾਲ ਸਿੱਖਿਆ ਦਾ ਬਜਟ ਘਟਾਈ ਜਾਉ।

12.12.2021

ਭਾਜਪਾ ਨਾਲ ਗੱਠਜੋੜ ਅਕਾਲੀ ਦਲ (ਸੰਯੁਕਤ) ਵਿਚ ਨਾ ਬਣੀ ਸਹਿਮਤੀ- ਇਕ ਖ਼ਬਰ

ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ।

ਕਿਸਾਨਾਂ ਖ਼ਿਲਾਫ਼ ਕੇਸ ਵਾਪਸ ਲੈਣੇ ਰਾਜਾਂ ਦਾ ਵਿਸ਼ਾ ਹੈ- ਤੋਮਰ

ਖੇਤੀ-ਬਾੜੀ ਵੀ ਤਾਂ ਰਾਜਾਂ ਦਾ ਵਿਸ਼ਾ ਸੀ, ਉੱਥੇ ਕਿਉਂ ਟੰਗ ਅੜਾਈ ਸੀ ਤੋਮਰ ਸਾਬ?

ਭਾਜਪਾ ਨੇ ਹੁਣ ਕ੍ਰਿਸ਼ਨ ਜਨਮ ਭੂਮੀ ਦਾ ਮੁੱਦਾ ਉਠਾਇਆ- ਇਕ ਖ਼ਬਰ

ਬਈ ਅਗਲੀਆਂ ਚੋਣਾਂ ਵਿਚ ਕੋਈ ਮੁੱਦਾ ਵੀ ਤਾਂ ਹੋਣਾ ਚਾਹੀਦਾ ਵੋਟਾਂ ਲੈਣ ਲਈ।

ਸੁੱਚਾ ਸਿੰਘ ਛੋਟੇਪੁਰ ਅਕਾਲੀ ਦਲ ਬਾਦਲ ‘ਚ ਹੋਏ ਸ਼ਾਮਲ- ਇਕ ਖ਼ਬਰ

ਰੁੱਖਾਂ, ਪੌਣ, ਪਰਿੰਦਿਆਂ ਡਿੱਠੀ, ਜੋ ਨਾਲ਼ ਯੂਸਫ਼ ਦੇ ਬੀਤੀ।

ਮੋਦੀ ਸਰਕਾਰ ਦਾ ਹੰਕਾਰ ਹਾਰ ਗਿਆ ਤੇ ਲੋਕਤੰਤਰ ਦੀ ਜਿੱਤ ਹੋਈ- ਕਾਂਗਰਸ

ਤੀਲੀ ਵਾਲ਼ੀ ਖਾਲ ਟੱਪ ਗਈ, ਲੌਂਗ ਵਾਲ਼ੀ ਨੇ ਭੰਨਾ ਲਏ ਗੋਡੇ।

ਵਿਕਾਸ ਕਾਰਜਾਂ ਲਈ ਫੰਡਾਂ ਦੀ ਕੋਈ ਕਮੀ ਨਹੀਂ- ਚੰਨੀ

ਪੱਲੇ ਨਹੀਂ ਧੇਲਾ, ਕਰਦੀ ਮੇਲਾ ਮੇਲਾ।

ਸ਼ਹੀਦ ਕਿਸਾਨਾਂ ਨੂੰ ਸੰਸਦ ਸ਼ਰਧਾਂਜਲੀ ਦੇਵੇ- ਹਰਸਿਮਰਤ ਬਾਦ

ਲਹੂ ਲਗਾ ਕੇ ਚੀਚੀ ਨੂੰ, ਮੈਂ ਵੀ ਸ਼ਹੀਦ ਹੋ ਜਾਵਾਂ।

ਕੰਗਣਾ ਰਣੌਤ ਨੇ ਦਿੱਲੀ ਵਿਧਾਨ ਸਭਾ ਕਮੇਟੀ ਸਾਹਮਣੇ ਪੇਸ਼ ਹੋਣ ਲਈ ਹੋਰ ਸਮਾਂ ਮੰਗਿਆ- ਇਕ ਖ਼ਬਰ

ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਸਰਕਾਰ ਆਉਣ ‘ਤੇ ਸਿੱਖਿਆ ਤੇ ਸਿਹਤ ਵਿਚ ਵੱਡੇ ਕਾਰਜ ਕਰਾਂਗੇ-ਸੁਖਬੀਰ ਬਾਦਲ

ਯਾਨੀ ਕਿ ਹੁਣ ਆਟੇ ਦਾਲ਼ ਨਾਲ਼ ਆਲੂ ਖੁਆ ਖੁਆ ਕੇ ਲੋਕਾਂ ਨੂੰ ਮੋਟੇ ਕਰਾਂਗੇ।

ਵੋਟਾਂ ਬਟੋਰਨ ਲਈ ਭਾਜਪਾ ਗਾਇਕਾਂ ਦਾ ਸਹਾਰਾ ਲੈ ਰਹੀ ਹੈ- ਇਕ ਖ਼ਬਰ

ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

ਕੈਪਟਨ ਦੇ ਦਫ਼ਤਰ ਦੇ ਉਦਘਾਟਨ ਸਮੇਂ 7 ਮੋਬਾਈਲ ਫੂਨ ਚੋਰੀ- ਇਕ ਖ਼ਬਰ

ਚੋਰਾਂ ਨੂੰ ਮੋਰ।

ਅਕਾਲੀ-ਬਸਪਾ ਸਰਕਾਰ ਬਣਨ ‘ਤੇ ਟਿਊਬਵੈੱਲਾਂ ਦੇ ਕੁਨੈਕਸ਼ਨ ਦੇਵਾਂਗੇ- ਸੁਖਬੀਰ ਬਾਦਲ

ਯਾਨੀ ਕਿ ਪੰਜਾਬ ਵਿਚ ਪਾਣੀ ਦੀ ਇਕ ਤਿੱਪ ਵੀ ਰਹਿਣ ਨਹੀਂ ਦੇਣੀ। 

ਅਕਾਲੀ, ਕਾਂਗਰਸੀ ਤੇ ਬਸਪਾ ਆਗੂ ਭਾਜਪਾ ‘ਚ ਸ਼ਾਮਲ- ਅਸ਼ਵਨੀ ਕੁਮਾਰ

ਵਾਰਸ ਸ਼ਾਹ ਮੀਆਂ ਚੰਦ ਰੋਜ਼ ਅੰਦਰ, ਖੇੜੇ ਮੇਲ ਕੇ ਜੰਞ ਲੈ ਆਂਵਦੇ ਨੇ।

ਮੇਰੇ ਵਾਂਗ ਪੰਜਾਬ ਦੀ ਮੌਜੂਦਾ ਸਰਕਾਰ ਵੀ ਅਪਣੇ ਵਾਅਦੇ ਪੂਰੇ ਕਰੇ-ਕੈਪਟਨ ਅਮਰਿੰਦਰ

ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸੱਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਪਹਿਲਾਂ ਮੰਗਾਂ ਪੂਰੀਆਂ ਹੋਣ ਫਿਰ ਮੋਰਚੇ ਹਟਾਵਾਂਗੇ- ਸੰਯੁਕਤ ਕਿਸਾਨ ਮੋਰਚਾ

ਵਿਹੜੇ ਖੇੜਿਆਂ ਦੇ ਤਿਲਕਣਬਾਜ਼ੀਆਂ ਨੇ, ਜ਼ਰਾ ਸੋਚ ਕੇ ਕਦਮ ਟਿਕਾਵਣਾ ਈ।

06 Dec. 2021

ਕੈਪਟਨ ਅਮਰਿੰਦਰ ਸਿੰਘ ਨੇ ਹਰਿਆਣੇ ਦੇ ਮੁੱਖ ਮੰਤਰੀ ਨਾਲ ਕੀਤੀ ਮੁਲਾਕਾਤ-ਇਕ ਖ਼ਬਰ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਪੰਜਾਬ ਰਾਜਨੀਤੀ: ਆਪਣੇ ਹੀ ਆਪਣਿਆਂ ਨੂੰ ਹੇਠਾਂ ਲਗਾਉਣ ਲੱਗੇ- ਇਕ ਖ਼ਬਰ

ਇਸ ਘਰ ਕੋ ਆਗ ਲਗ ਗਈ ਘਰ ਕੇ ਚਿਰਾਗ਼ ਸੇ।

ਵਿਜੀਲੈਂਸ ਜਾਂਚ ਕਰਵਾ ਕੇ ਦਸ ਹਜ਼ਾਰ ਕਾਂਗਰਸੀਆਂ ਨੂੰ ਜੇਲ੍ਹ ਭੇਜਾਂਗੇ-ਸੁਖਬੀਰ ਬਾਦਲ

ਹੁਣ ਤੁਸੀਂ ਰੇਡੀਉ ਗੱਪਿਸਤਾਨ ਤੋਂ ਤਾਜ਼ੀਆਂ ਤਾਜ਼ੀਆਂ ਗੱਪਾਂ ਸੁਣੋ।

ਆਉਣ ਵਾਲ਼ੀਆਂ ਚੋਣਾਂ ਵਿਚ ਮੈਂ ਮੁੱਖ ਮੰਤਰੀ ਦਾ ਚਿਹਰਾ ਨਹੀਂ ਹਾਂ- ਕੈਪਟਨ

ਦਾਖੇ ਹੱਥ ਨਾ ਅੱਪੜੇ, ਆਖੇ ਥੂ ਕੌੜੀ।

ਕੇਜਰੀਵਾਲ ਦੇ ਧੋਖੇ ਤੇ ਝੂਠ ਤੋਂ ਸੁਚੇਤ ਰਹਿਣ ਪੰਜਾਬੀ- ਮਨਜਿੰਦਰ ਸਿਰਸਾ

ਛੱਜ ਤਾਂ ਬੋਲੇ ਏਥੇ ਛਾਨਣੀ ਹੀ ਸਲਾਹਾਂ ਦੇਈ ਜਾਂਦੀ ਐ।

ਕੈਪਟਨ ਨਾਲ਼ ਹੁਣ ਗ਼ਿਲੇ ਸ਼ਿਕਵੇ ਦੂਰ ਹੋ ਗਏ ਹਨ- ਖੱਟਰ

ਉਂਜ ਵੇਖਣ ਨੂੰ ਅਸੀਂ ਦੋ, ਤੇਰੀ ਮੇਰੀ ਇਕ ਜਿੰਦੜੀ।

ਚੰਨੀ ਸਰਕਾਰ ਨੇ ਵਿਧਾਇਕ ਦਾ ਕਾਕਾ ਲਾਇਆ ਅਫ਼ਸਰ-ਇਕ ਖ਼ਬਰ

ਅੰਨਾਂ ਵੰਡੇ ਰਿਉੜੀਆਂ.................................

ਅਕਾਲੀ ਦਲ ਦੀ ਭਾਸ਼ਾ ਨਾ ਬੋਲਣ ਜਥੇਦਾਰ- ਪਰਮਜੀਤ ਸਿੰਘ ਸਰਨਾ

ਸਰਨਾ ਸਾਹਿਬ, “ ਜਿਸ ਦੀ ਖਾਈਏ ਦਾਲ-ਭਾਤ, ਉਸ ਦੀ ਕਰੀਏ ਬਾਤ”

ਸ਼੍ਰੋਮਣੀ ਕਮੇਟੀ ਦੇ ਕੰਮਾਂ ਦੀ ਨਿਗਰਾਨੀ ਲਈ ਬਣਨਗੀਆਂ ਸਬ-ਕਮੇਟੀਆਂ- ਇਕ ਖ਼ਬਰ

ਕਮੇਟੀਆਂ ਬਣਾ ਲਉ, ਜੋ ਮਰਜ਼ੀ ਕਰ ਲਉ, ਆਰਡਰ ਤਾਂ ਚੰਡੀਗੜ੍ਹੋਂ ਹੀ ਆਉਣੇ ਨੇ।

ਬੰਗਲਾ ਸਾਹਿਬ ਮੱਥਾ ਟੇਕਣ ਜਾਂਦੇ ਨਿਹੰਗ ਸਿੰਘਾਂ ਨੂੰ ਦਿੱਲੀ ਪੁਲਿਸ ਨੇ ਰੋਕਿਆ-ਇਕ ਖ਼ਬਰ

ਨਹਿਰੂ ਵਲੋਂ ਸਿੱਖਾਂ ਨੂੰ ਦਿਤਾ ਹੋਇਆ ਨਿੱਘ ਮਾਣੋ।

ਸਿਰਸਾ ਨੂੰ ਬੰਦੂਕ ਨਾਲ਼ ਡਰਾ ਕੇ ਭਾਜਪਾ ‘ਚ ਸ਼ਾਮਲ ਕੀਤਾ- ਸੁਖਬੀਰ ਬਾਦਲ

ਸ਼ਾਇਦ ਭਾਜਪਾ ਵਾਲ਼ੇ ਬੰਦੂਕ ਵੀ ਸੁਖਬੀਰ ਬਾਦਲ ਪਾਸੋਂ ਹੀ ਲੈ ਕੇ ਗਏ ਹਨ।

ਕਿਸਾਨਾਂ ਦੀ ਆਮਦਨ ਲਗਾਤਾਰ ਵਧ ਰਹੀ ਹੈ-ਤੋਮਰ

ਸਬੂਤ ਹਾਜ਼ਰ ਹੈ: ਮਹਾਂਰਾਸ਼ਟਰ ‘ਚ 11 ਕੁਇੰਟਲ ਪਿਆਜ਼ ਵੇਚ ਕੇ ਕਿਸਾਨ ਨੂੰ ਬਚੇ 13 ਰੁਪਏ।  

ਭਾਜਪਾ ਨਾਲ਼ ਸ਼ਰਤਾਂ ਤਹਿਤ ਗੱਠਜੋੜ ਕਰਾਂਗੇ- ਸੁਖਦੇਵ ਸਿੰਘ ਢੀਂਡਸਾ

ਪੈਰੀਂ ਝਾਂਜਰਾਂ ਗਲੀ ਦੇ ਵਿਚ ਗਾਰਾ, ਘਰ ਤੇਰਾ ਦੂਰ ਮਿਤਰਾ।

ਚੰਨੀ, ਸਿੱਧੂ ਤੇ ਰੰਧਾਵਾ ਨੇ ਮੇਰੀ ਪਿੱਠ ਵਿਚ ਛੁਰਾ ਮਾਰਿਆ- ਕੈਪਟਨ ਅਮਰਿੰਦਰ ਸਿੰਘ

ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲਾ ਤਿਲਕ ਪਿਆ।

ਪੰਜਾਬ ਵਿਚ ਦਲ ਬਦਲੀ ਕਰਵਾਉਣ ਲਈ ਸ਼ਾਹ-ਮੋਦੀ ਜੋੜੀ ਸਰਗਰਮ- ਇਕ ਖ਼ਬਰ

ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

30 Nov. 2021

400 ਸਾਲ ਤੋਂ ਪਟਿਆਲਾ ਸਾਡੇ ਨਾਲ਼ ਰਿਹੈ, ਮੈਂ ਪਟਿਆਲ਼ੇ ਤੋਂ ਹੀ ਚੋਣ ਲੜਾਂਗਾ- ਕੈਪਟਨ
ਪਟਾਕਾ ਪੈ ਗਿਆ ਪਟਿਆਲ਼ੇ, ਤੇਰੇ ਮੇਅਰ ਨੂੰ ਕੱਢ ਕੇ ਲਾ ‘ਤੇ ਤਾਲ਼ੇ।

ਵਿਧਾਨ ਸਭਾ ਚੋਣਾਂ ਨਾ ਹੁੰਦੀਆਂ ਤਾਂ ਖੇਤੀ ਕਾਨੂੰਨ ਵਾਪਸ ਨਾ ਹੁੰਦੇ- ਸ਼ਰਦ ਪਵਾਰ
ਮਰਦੀ ਨੇ ਅੱਕ ਚੱਬਿਆ, ਹਾਰ ਕੇ ਜੇਠ ਨਾਲ਼ ਲਾਈਆਂ।

ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਪੰਜਾਬ ਹਿਤੈਸ਼ੀ ਨਹੀਂ- ਪ੍ਰਕਾਸ਼ ਸਿੰਘ ਬਾਦਲ
ਨੌਂ ਸੌ ਚੂਹਾ ਕੇ ਬਿੱਲੀ ਹੱਜ ਨੂੰ ਚੱਲੀ।

ਬੇਜ਼ਮੀਨੇ ਕਿਸਾਨਾਂ ਤੇ ਮਜ਼ਦੂਰਾਂ ਨੂੰ ਕਰਜ਼ਾ ਮੁਆਫ਼ੀ ਦੀ ਰਕਮ ਤੁਰਤ ਦੇਵੇ ਸਰਕਾਰ- ਪ੍ਰਮਿੰਦਰ ਢੀਂਡਸਾ
ਕੀ ਗੱਲ ਤੁਹਾਡੇ ਵੇਲੇ ਖ਼ਜ਼ਾਨੇ ਦੀਆਂ ਚਾਬੀਆਂ ਗੁਆਚੀਆਂ ਹੋਈਆਂ ਸੀ!

ਸੁਖਬੀਰ ਬਾਦਲ ਨੇ ਪਾਰਟੀ ਦੀ ਸੀਨੀਅਰ ਲੀਡਰਸ਼ਿੱਪ ਨਾਲ਼ ਦਿਤੀ ਗ੍ਰਿਫ਼ਤਾਰੀ- ਇਕ ਖ਼ਬਰ
ਸੁਖਬੀਰ ਸਿਆਂ ਇਹ ਧਰਨੇ ਧੁਰਨੇ ਵਿਹਲੇ ਬੰਦਿਆਂ ਦੇ ਕੰਮ ਹੁੰਦੇ ਆ, ਛੱਡ ਪੁਠੇ ਕੰਮ।

ਰਾਮੂਵਾਲੀਆ ਨੇ ‘ਲੋਕ ਭਲਾਈ ਪਾਰਟੀ’ ਮੁੜ ਸੁਰਜੀਤ ਕੀਤੀ- ਇਕ ਖ਼ਬਰ
ਬੇਹੀ ਕੜ੍ਹੀ ਵਿਚ ਉਬਾਲ਼।

ਸੂਬਿਆਂ ਦੇ ਅਧਿਕਾਰ ਖੇਤਰ ’ਚ ਵਧ ਰਹੀ ਦਖ਼ਲਅੰਦਾਜ਼ੀ ਪੁਆੜੇ ਦੀ ਜੜ੍ਹ- ਚੰਦੂਮਾਜਰਾ
ਜਦੋਂ ਬੀ. ਜੇ. ਪੀ. ਨਾਲ਼ ਨਜ਼ਾਰੇ ਲੈਂਦੇ ਸੀ ਉਦੋਂ ਦਖ਼ਲਅੰਦਾਜ਼ੀ ਨਹੀਂ ਦਿਸੀ ਤੁਹਾਨੂੰ।

ਕਸ਼ਮੀਰ ਰੱਖਣਾ ਚਾਹੁੰਦੇ ਹੋ ਤਾਂ ਧਾਰਾ 370 ਬਹਾਲ ਕਰੋ ਤੇ ਕਸ਼ਮੀਰ ਮਸਲਾ ਹੱਲ ਕਰੋ- ਮਹਿਬੂਬਾ ਮੁਫ਼ਤੀ
ਵੇ ਲੈ ਦੇ ਮੈਨੂੰ ਮਖ਼ਮਲ ਦੀ ,ਪੱਖੀ ਘੁੰਗਰੂਆਂ ਵਾਲ਼ੀ।

ਮੁੱਖ ਮੰਤਰੀ ਖੱਟਰ ਨੇ ਨਰਿੰਦਰ ਮੋਦੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ
ਛੜੇ ਬੈਠ ਕੇ ਸਲਾਹਾਂ ਕਰਦੇ, ਕੌਣ ਕੌਣ ਹੋਈਆਂ ਰੰਡੀਆਂ।

ਪੰਜਾਬ ਵਿਰੁੱਧ ਕੀਤੇ ਗਏ ਗੁਨਾਹਾਂ ਦੀ ਕੀਮਤ ਬਾਦਲਾਂ ਨੂੰ ਜ਼ਰੂਰ ਚੁਕਾਉਣੀ ਪਵੇਗੀ- ਚੰਨੀ
ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫਿਰ ਕੀ ਜਵਾਬ ਦੇਵੇਂਗਾ।

ਮਿੱਤਰਾਂ ਨੇ ਹੋਰ ਮਚਾਉਣੇ, ਜਿਹੜੇ ਸਾਥੋਂ ਮਚਦੇ ਆ- ਕੈਪਟਨ ਅਮਰਿੰਦਰ ਸਿੰਘ
ਪਿੱਪਲ ਦਿਆ ਪੱਤਿਆ ਵੇ, ਕੇਹੀ ਖੜ ਖੜ ਲਾਈ ਆ...............

ਸ਼ਰਾਬ, ਰੇਤਾ ਅਤੇ ਕੇਬਲ ਮਾਫ਼ੀਆ ‘ਤੇ ਸਖ਼ਤੀ ਦਾ ਅਸਰ ਕਿਉਂ ਨਹੀਂ ਹੋ ਰਿਹਾ-ਇਕ ਸਵਾਲ
ਕਿਹੜੀ ਸਖ਼ਤੀ ਬਈ? ਕਾਂ ਟੰਗੋ ਦੋ ਚਾਰ, ਦੇਖੋ ਫੇਰ ਅਸਰ ਹੁੰਦਾ।

ਪ੍ਰਦੂਸ਼ਣ ਫ਼ੈਲਾ ਕੇ ਦੁਨੀਆਂ ਨੂੰ ਕੀ ਸੁਨੇਹਾ ਦੇ ਰਹੇ ਹਾਂ ਅਸ਼ੀਂ- ਸੁਪਰੀਮ ਕੋਰਟ
ਕਿ ਅਸੀਂ ਸਵੱਛ ਭਾਰਤ ਅਭਿਆਨ ਚਲਾ ਰਹੇ ਹਾਂ।

ਉਤਰਾਖੰਡ ਤੇ ਯੂ.ਪੀ. ਵਿਚ ਭਾਜਪਾ ਲਈ ਪ੍ਰਚਾਰ ਕਰਾਂਗਾ-ਕੈਪਟਨ ਅਮਰਿੰਦਰ ਸਿੰਘ
ਛਪੜੀ ‘ਚ ਡੁੱਬ ਮਰਿਆ, ਮੁੰਡਾ ਚਹੁੰ ਪੱਤਣਾਂ ਦਾ ਤਾਰੂ।

ਕਿਸੇ ਵੀ ਕੀਮਤ ‘ਤੇ ਹੁਣ ਭਾਜਪਾ ਅਤੇ ਅਕਾਲੀ ਦਲ ਵਿਚਾਲੇ ਸਮਝੌਤਾ ਨਹੀਂ ਹੋਵੇਗਾ-ਹਰਜੀਤ ਗਰੇਵਾਲ
ਹੁਣ ਤੇਰੀ ਸਾਡੀ ਬਸ ਵੇ, ਦੱਸ ਕਿੱਥੇ ਗਿਆ ਸੈਂ।

21 Nov. 2021

ਕਾਂਗਰਸੀਆਂ ਨੇ ਨਾਕਾਮੀਆਂ ਦਾ ਠੀਕਰਾ ਕੈਪਟਨ ਸਿਰ ਭੰਨਣ ਲਈ ਚੰਨੀ ਨੂੰ ਸੀ.ਐਮ. ਬਣਾਇਆ- ਸੁਖਬੀਰ

ਤੈਨੂੰ ਤਾਪ ਚੜ੍ਹੇ, ਮੈਂ ਹੂੰਗਾਂ।

ਕਾਂਗਰਸ ਵਿਚ ਹੁਣ ਵਾਪਸੀ ਦਾ ਸਵਾਲ ਹੀ ਨਹੀਂ – ਕੈਪਟਨ ਅਮਰਿੰਦਰ ਸਿੰਘ

ਲੈ ਚਲ ਵੇ ਮਿੱਤਰਾ, ਮੈਂ ਨਾ ਨਾਨਕੇ ਰਹਿੰਦੀ।

ਕਿਸਾਨਾਂ ਨੂੰ ਵਧਾਈ ਜੋ ਭਾਜਪਾ ਦੇ ਜ਼ੁਲਮ ਅੱਗੇ ਨਾ ਥਿੜਕੇ- ਮਮਤਾ ਬੈਨਰਜੀ

ਵੀਰ ਮੇਰੇ ਸਭ ਸਿਦਕੀ ਸੂਰੇ, ਜੰਗ ਵਿਚ ਧੁੰਮਾਂ ਪਾਉਂਦੇ।

ਖੇਤੀ ਕਾਨੂੰਨ ਥੋਪਣ ਲਈ ਭਾਜਪਾ, ਬਾਦਲ ਅਤੇ ਕੈਪਟਨ ਬਰਾਬਰ ਦੇ ਜ਼ਿੰਮੇਵਾਰ- ਹਰਪਾਲ ਚੀਮਾ

ਕਲਜੋਗਣ ਤਿਕੜੀ ਨੇ, ਦੁਸ਼ਮਣ ਨਾਲ਼ ਨਿਭਾਈ।

ਕੈਪਟਨ ਦੀ ਭਾਜਪਾ ਨਾਲ਼ ਮਿਲੇ ਹੋਏ ਹੋਣ ਦੀ ਗੱਲ ਹੋਈ ਜੱਗ ਜ਼ਾਹਰ- ਬੀਬੀ ਭੱਠਲ

ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਖੱਟਰ ਵਲੋਂ ਕਿਸਾਨਾਂ ਨੂੰ ਅੰਦੋਲਨ ਖ਼ਤਮ ਕਰਨ ਦੀ ਅਪੀਲ- ਖੱਟਰ

ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਸ਼ਾਂਤਮਈ ਅੰਦੋਲਨ ਨੇ ਇਕ ਨਵੀਂ ਮਿਸਾਲ ਕਾਇਮ ਕੀਤੀ- ਕੇਂਦਰੀ ਲੇਖਕ ਸਭਾ

ਸੁੱਚਿਆਂ ਰੁਮਾਲਾਂ ਨੂੰ, ਲਾ ਦੇ ਧੰਨ ਕੁਰੇ ਗੋਟਾ।

ਪੰਜਾਬੀ ਜ਼ੁਬਾਨ ਦੇ ਮੁੜ ਸੁਨਹਿਰੀ ਦਿਨ ਪਰਤਣ ਦੀ ਆਸ ਬੱਝੀ- ਇਕ ਖ਼ਬਰ

ਆਓ ਨੀਂ ਸਈਓ ਰਲ਼ ਵੇਖਣ ਚਲੀਏ, ਰਾਂਝੇ ਖੂਹਾ ਲਵਾਇਆ ਈ।

ਸਿੱਧੂ ਅਤੇ ਚੰਨੀ ਦਾ ਮੇਲ-ਮਿਲਾਪ ਮਜਬੂਰੀ ਹੈ ਪਰ ਦਿਲ ਨਹੀਂ ਮਿਲਦੇ- ਰਵਨੀਤ ਬਿੱਟੂ

ਧਾੜ ਪਵੇ ਉਨ੍ਹਾਂ ਵਿਚੋਲਿਆਂ ਨੂੰ, ਊਠ ਬੱਕਰੀ ਦਾ ਨਰੜ ਕਰਾ ਦਿੰਦੇ।

ਕਾਂਗਰਸ ਟਿਕਟ ਲਈ ਜਿੱਤਣ ਦੀ ਸਮਰੱਥਾ ਅਤੇ ਮੈਰਿਟ ਮੁੱਖ ਸ਼ਰਤ ਹੋਵੇਗੀ- ਸਿੱਧੂ

ਬੂਹੇ ਆਣ ਲੱਥੀ ਜੰਞ ਖੇੜਿਆਂ ਦੀ, ਅੰਦਰ ਹੀਰ ਦੀਆਂ ਹੋਣ ਤਿਆਰੀਆਂ ਜੀ।

ਲੋਕਾਂ ਨੂੰ ਅਜੇ ਵੀ ਮਿਲ ਰਹੀ ਹੈ ਕਈ ਗੁਣਾਂ ਮਹਿੰਗੀ ਰੇਤ- ਇਕ ਖ਼ਬਰ

ਮੂੰਹ ਚੁੰਮਾਂ, ਟੁੱਕ ਨਾ ਦੇਵਾਂ, ਖਾਵੋ ਪੁੱਤ ਬਥੇਰੀਆਂ।

ਪੰਜਾਬ ਨੇ ਦੇਸ਼ ਦੇ ਇਤਿਹਾਸ ਵਿਚ ਹਮੇਸ਼ਾ ਅਹਿਮ ਭੂਮਿਕਾ ਨਿਭਾਈ- ਰਾਸ਼ਟਰਪਤੀ

ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹੀਓ ਮੇਰਾ ਵੀਰ ਕੁੜੀਓ।

ਟੀ.ਵੀ. ‘ਤੇ ਬਹਿਸਾਂ ਵਧੇਰੇ ਪ੍ਰਦੂਸ਼ਣ ਫ਼ੈਲਾ ਰਹੀਆਂ ਨੇ- ਸੁਪਰੀਮ ਕੋਰਟ

ਹਰ ਪਾਸੇ ਚੁਆਤੀ ਲਾਉਂਦੇ ਨੇ, ਸਾਡੇ ਲਹੂ ਦੇ ਵਿਚ ਨਹਾਉਂਦੇ ਨੇ।

ਐਮ.ਪੀ. ਪ੍ਰਨੀਤ ਕੌਰ ਦੀ ਚੰਨੀ ਨਾਲ ਮੁਲਾਕਾਤ ਨੇ ਨਵੇਂ ਚਰਚੇ ਛੇੜੇ- ਇਕ ਖ਼ਬਰ

ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

ਸ਼੍ਰੋਮਣੀ ਕਮੇਟੀ ਦੇ ਪ੍ਰਧਾਨ ਦੀ ਚੋਣ ਲਈ ਜੋੜ-ਤੋੜ ਸ਼ੁਰੂ- ਇਕ ਖ਼ਬਰ

ਜੋੜਾਂ ਤੋੜਾਂ ਨੇ ਉੱਥੇ ਕੀ ਕਰਨਾ, ਜਿੱਥੇ ਚੱਲਣਾਂ ਲਿਫ਼ਾਫ਼ੇ ਦਾ ਜ਼ੋਰ ਮੀਆਂ।

ਪ੍ਰਕਾਸ਼ ਸਿੰਘ ਬਾਦਲ ਵਲੋਂ ਮੀਰੀ-ਪੀਰੀ ਸਿਧਾਂਤ ਨੂੰ ਬਚਾਉਣ ਦਾ ਸੱਦਾ-ਇਕ ਖ਼ਬਰ

ਹੁਣ ਮਿਹਰ ਮੁਹੱਬਤਾਂ ਲੋੜਨਾਂ ਏਂ, ਸਾਡੇ ਸੀਨੇ ‘ਚ ਮਾਰ ਕੇ ਕਟਾਰ ਬੰਦਿਆ।

ਪੰਜ ਸਿਤਾਰਾ ਹੋਟਲਾਂ ‘ਚ ਬੈਠ ਕੇ ਕਿਸਾਨਾਂ ਨੂੰ ਦੋਸ਼ ਦੇਣਾ ਆਸਾਨ- ਸੁਪਰੀਮ ਕੋਰਟ

ਨੀ ਚਰਖ਼ਾ ਬੋਲ ਪਿਆ, ਹਰ ਗੱਲ ਨਾਲ਼ ਭਰਦਾ ਹੁੰਗਾਰੇ।

14 Oct. 2021

ਬਹਿਬਲ ਕਲਾਂ ਗੋਲੀਕਾਂਡ: ਐਸ.ਪੀ. ਵਿਕਰਮਜੀਤ ਸਿੰਘ ਦੀ ਬਹਾਲੀ ਦੇ ਹੁਕਮ ਕੈਪਟਨ ਨੇ ਦਿਤੇ-ਰੰਧਾਵਾ

ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਪਟਿਆਲਾ ‘ਚ ਕਾਂਗਰਸ ਨੇ ਲਿਆ ਅਮਰਿੰਦਰ ਦੀ ਹਾਰ ਯਕੀਨੀ ਬਣਾਉਣ ਦਾ ਅਹਿਦ- ਇਕ ਖ਼ਬਰ

ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲ਼ੀਏ।

ਸੁਖਬੀਰ ਬਾਦਲ ਨੂੰ ਫਸਾਉਣ ਲਈ ਕਾਂਗਰਸ ਸਰਕਾਰ ਨੇ ਸਾਜ਼ਿਸ਼ ਘੜੀ- ਚੰਦੂਮਾਜਰਾ

ਹੁੰਦਾ ਰੱਬ ਨਹੀਂ ਕਿਸੇ ਦਾ ਵੈਰੀ, ਵੈਰੀ ਤੇਰੇ ਐਬ ਬੰਦਿਆ।

ਵਿਧਾਨ ਸਭਾ ‘ਚ ਮੁੱਖ ਮੰਤਰੀ ਚੰਨੀ ਦੀਆਂ ਟਿੱਪਣੀਆਂ ‘ਤੇ ਅਕਾਲੀਆਂ ਵਲੋਂ ਹੰਗਾਮਾ- ਇਕ ਖ਼ਬਰ

ਜਦੋਂ ਸੱਚੀਆਂ ਸੁਣਾਈਆਂ ਨੀਂ ਬੜਾ ਦੁਖ ਲੱਗਿਆ, ਬੜਾ ਦੁਖ ਲੱਗਿਆ।

ਰੁਪਿੰਦਰ ਰੂਬੀ ਤੋਂ ਬਾਅਦ ਆਪ ਵਿਧਾਇਕ ਜਗਤਾਰ ਸਿੰਘ ਜੱਗਾ ਵੀ ਕਾਂਗਰਸ ਦੇ ਪਾਲੇ ਵਿਚ ਗਿਆ- ਇਕ ਖ਼ਬਰ

ਸਾਡਾ ਚਿੜੀਆਂ ਦਾ ਚੰਬਾ ਵੇ, ਬਾਬਲ ਅਸਾਂ ਉਡ ਜਾਣਾ।

ਸੁਖਬੀਰ ਜਲਾਲਾਬਾਦ ਤੋਂ ਜਿੱਤ ਕੇ ਬਣਨਗੇ ਮੁੱਖ ਮੰਤਰੀ- ਹਰਸਿਮਰਤ ਬਾਦਲ

ਤੇ ਮੈਂ ਵੀ ਹੁਣ ਦਿੱਲੀ ਛੱਡ ਕੇ ਪੰਜਾਬ ‘ਚ ਆ ਕੇ ਉੱਪ ਮੁੱਖ ਮੰਤਰੀ ਬਣੂੰ।

ਕਾਂਗਰਸ ਨੇ ਬੇਅਦਬੀ ਮਾਮਲਿਆਂ ਦਾ ਸਿਆਸੀਕਰਣ ਕੀਤਾ-ਬੀਬੀ ਜਗੀਰ ਕੌਰ

ਬੀਬੀ ਜੀ ਇਹ ਤਾਂ ਤੁਹਾਡੇ ਮਾਲਕਾਂ ਵਲੋਂ ਹੀ ਸ਼ੁਰੂ ਕਰ ਦਿਤਾ ਗਿਆ ਸੀ।

ਮੰਨ ਗਏ ਗੁਰੂ: ਚੰਨੀ ਨੇ ਬੋਲ ਪੁਗਾਏ, ਸਿੱਧੂ ਨੇ ਬੋਲ ਪੁਗਾਏ- ਇਕ ਖ਼ਬਰ

ਚੰਨੀ ਨੇ ਦਿਉਲ ਘਰੇ ਤੋਰਿਆ, ਲਗਦੈ ਸਹੋਤੇ ਦੇ ਵੀ ਥੋੜ੍ਹੇ ਦਿਨ ਹੋਰ ਆ।

ਅਸ਼ਵਨੀ ਸ਼ਰਮਾ ਨੇ ਹਾਈ ਕਮਾਨ ਦੇ ਆਗੂਆਂ ਨੂੰ ਦੱਸੇ ਪੰਜਾਬ ਦੇ ਸਿਆਸੀ ਹਾਲਾਤ- ਇਕ ਖ਼ਬਰ

ਝਾਕਦੀ ਦੀ ਅੱਖ ਪੱਕ ਗਈ, ਕਦੇ ਪਾ ਵਤਨਾਂ ਵਲ ਫੇਰਾ।

ਕੈਪਟਨ ਨੂੰ ਵੱਡੇ ਦਿਲ ਨਾਲ ਹਾਈ ਕਮਾਨ ਦਾ ਫ਼ੈਸਲਾ ਪ੍ਰਵਾਨ ਕਰਨਾ ਚਾਹੀਦਾ ਸੀ- ਬੀਬੀ ਭੱਠਲ

ਰੋਟੀ ਮੇਰਾ ਯਾਰ ਖਾ ਗਿਆ, ਦਾਣੇ ਚੱਬ ਲੈ ਪਤੀਲੇ ਦਿਆ ਢੱਕਣਾ।

ਸੰਯੁਕਤ ਕਿਸਾਨ ਮੋਰਚੇ ਵਲੋਂ 29 ਨਵੰਬਰ ਤੋਂ ਸੰਸਦ ਵਲ ਮਾਰਚ ਕਰਨ ਦਾ ਐਲਾਨ- ਇਕ ਖ਼ਬਰ

ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੇਂਗਾ।

ਸਿੱਧੂ ਤੇ ਚੰਨੀ ਨੇ ਗਿਲੇ-ਸ਼ਿਕਵੇ ਭੁਲਾ ਕੇ ਇਕ ਦੂਜੇ ‘ਚ ਵਿਸ਼ਵਾਸ ਪ੍ਰਗਟ ਕੀਤਾ- ਇਕ ਖ਼ਬਰ

ਚੰਨ ਛੁਪ ਗਿਆ ਟਹਿਕਦੇ ਤਾਰੇ, ਇਕ ਮੰਜੇ ਹੋ ਚਲੀਏ।

ਤੇਲ ਦੀਆਂ ਵਧੀਆਂ ਕੀਮਤਾਂ ਨਾਲ਼ ਇਕੱਠੇ ਹੋਏ ਚਾਰ ਲੱਖ ਪੌਂਡ ਕੇਂਦਰ ਰਾਜਾਂ ਨੂੰ ਵੰਡੇ- ਮਮਤਾ ਬੈਨਰਜੀ

ਇੱਲਾਂ ਦੇ ਆਲ੍ਹਣੇ ‘ਚੋਂ ਮਾਸ ਲੱਭ ਰਹੇ ਹੋ ਬੀਬੀ ਜੀ।

ਰਾਜਪਾਲ ਦੇ ਅਹੁਦੇ ਤੋਂ ਹਟਾਏ ਜਾਣ ਤੋਂ ਨਹੀਂ ਡਰਦਾ- ਸਤਿਆਪਾਲ ਮਲਿਕ

ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਕਨੌੜ ਝੱਲਣੀ।

ਸੁਪਰੀਮ ਕੋਰਟ ਲਖੀਮ ਪੁਰ ਖੀਰੀ ਦੀ ਹੋ ਰਹੀ ਜਾਂਚ ਤੋਂ ਖੁਸ਼ ਨਹੀਂ-ਇਕ ਖ਼ਬਰ

ਸੱਸ ਮੇਰੀ ਦਾ ਐਡਾ ਚੂੜਾ, ਵਿਚੋਂ ਕਿਰਦੀ ਰੇਤ, ਸੱਸੇ ਕੰਜਰੀਏ ਸ਼ੀਸ਼ਾ ਲੈ ਕੇ ਦੇਖ।

ਮਨਜਿੰਦਰ ਸਿਰਸਾ ਨੇ ਸਰਨਾ ਭਰਾਵਾਂ ਤੇ ਜੀ.ਕੇ. ਖ਼ਿਲਾਫ਼ ਜਥੇਦਾਰ ਤੋਂ ਕਾਰਵਾਈ ਮੰਗੀ- ਇਕ ਖ਼ਬਰ

ਲੂਣਾਂ ਅਰਜ਼ ਗੁਜ਼ਾਰੇ ਸਲਵਾਨ ਨੂੰ, ਕਰ ਦੇ ਪੂਰਨ ਜਲਦ ਹਲਾਲ।

07 Nov. 2021

ਯੂ.ਪੀ.’ਚ ਪ੍ਰਿਯੰਕਾ ਗਾਂਧੀ ਦੀ ‘ਹਨੇਰੀ’ ਝੁੱਲਣ ਦਾ ਦਾਅਵਾ- ਇਕ ਖ਼ਬਰ

ਸੀਟੀ ਤੇ ਸੀਟੀ ਵੱਜੇ, ਜਦੋਂ ਮੈਂ ਗਿੱਧੇ ਵਿਚ ਆਈ।

ਮੁਲਾਜ਼ਮਾਂ ਤੇ ਪੈਨਸ਼ਨਰਾਂ ਨੇ ਸਰਕਾਰ ਦੇ ਲਾਰਿਆਂ ਦੀ ਪੰਡ ਫੂਕੀ- ਇਕ ਖ਼ਬਰ

ਤੇਰਾ ਲਾਰਾ ਵੇ ਸ਼ਰਾਬੀਆਂ ਦੀ ਗੱਪ ਵਰਗਾ।

ਪੰਜਾਬ ਵਿਚ ਸਿੱਖਾਂ ਦਾ ਕੋਈ ਧਰਮ ਪ੍ਰੀਵਰਤਨ ਨਹੀਂ ਹੋਇਆ- ਬੀਬੀ ਜਾਗੀਰ ਕੌਰ

ਬੀਬੀ ਜੀ ਆਪਣੀਆਂ ਅੱਖਾਂ ਕਿਸੇ ਚੰਗੇ ਜਿਹੇ ਡਾਕਟਰ ਨੂੰ ਦਿਖਾਉ। 

ਡੀ.ਐੱਸ.ਪੀ. ਨੇ ਧਰਨਾਕਾਰੀ ਕਿਸਾਨਾਂ ਨੂੰ ਦੀਵਾਲੀ ‘ਤੇ ਮਠਿਆਈਆਂ ਵੰਡੀਆਂ-ਇਕ ਖ਼ਬਰ

ਡੀ.ਐਸ.ਪੀ. ਸਿਆਂ ਦੇਖੀਂ ਕਿਤੇ ਤੇਰੇ ‘ਤੇ ਦੇਸ਼-ਧ੍ਰੋਹ ਦਾ ਮੁਕੱਦਮਾ ਹੀ ਨਾ ਦਰਜ ਹੋ ਜਾਵੇ।

ਕੈਪਟਨ ਨੂੰ ਕਿਸਾਨਾਂ ਦੀਆਂ ਸ਼ਹੀਦੀਆਂ ਦਾ ਮੁੱਲ ਨਹੀਂ ਵੱਟਣ ਦਿਆਂਗੇ- ਚੜੂਨੀ

ਟੁੰਡੇ ਕਿਸੇ ਦੇ ਨਾਲ਼ ਕੀ ਯੁੱਧ ਕਰਨਾ, ਲੰਗੜੇ ਸਿਖਰ ਪਹਾੜ ਦੇ ਜਾਣ ਨਾਹੀਂ।

ਬਾਦਲ ਪਰਿਵਾਰ ਨੇ ਸ਼ਹੀਦ ਕਿਸਾਨਾਂ ਦੀ ਯਾਦ ਵਿਚ ਦੀਵੇ ਬਾਲ਼ੇ-ਇਕ ਖ਼ਬਰ

ਪਿੱਛੋਂ ਆਖਦੇ ਰੱਬਾ ਤੂੰ ਸੁਖ ਰੱਖੀਂ, ਲਾ ਕੇ ਰੂਈਂ ਦੇ ਨਾਲ਼ ਅੰਗਾਰਿਆਂ ਨੂੰ।

ਸਰਕਾਰ ਬਣਨ ‘ਤੇ ਦੰਗਾ ਪੀੜਤ ਡੀਵੈਲਪਮੈਂਟ ਬੋਰਡ ਬਣਾਉਣ ਦਾ ਵਾਅਦਾ- ਸੁਖਬੀਰ ਬਾਦਲ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ ,ਜੱਟਾਂ ਨੇ ਕਰੀਰ ਪੁੱਟ ਲਏ।

ਨਵਜੋਤ ਸਿੱਧੂ ਦੇ ਮੁੱਦੇ ਤਾਂ ਠੀਕ ਪਰ ਸ਼ਬਦਾਵਲੀ ਗ਼ਲਤ- ਪਰਮਿੰਦਰ ਸਿੰਘ ਢੀਂਡਸਾ

ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦਾ, ਮਗਰੋਂ ਮਾਰਦਾ ਗੋਡਾ।

ਕਾਂਗਰਸ ਵਲੋਂ ਪ੍ਰਸ਼ਾਂਤ ਕਿਸ਼ੋਰ ਦੀਆਂ ਲਈਆਂ ਜਾ ਸਕਦੀਆਂ ਹਨ ਸੇਵਾਵਾਂ-ਇਕ ਖ਼ਬਰ

ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਨਵਜੋਤ ਸਿੱਧੂ ਨੇ ਮੁੜ ਕੈਪਟਨ ਅਮਰਿੰਦਰ ਸਿੰਘ ‘ਤੇ ਸੇਧਿਆ ਨਿਸ਼ਾਨਾ- ਇਕ ਖ਼ਬਰ

ਜਾਮਨੂੰ ਦੀ ਗਿਟਕ ਜਿਹਾ, ਮੇਰੇ ਸਾਹਮਣੇ ਧੜਾ ਧੜ ਬੋਲੇ।

ਮੀਂਹ ਪੈਣ ‘ਤੇ ਸਮਾਰਟ ਸਕੂਲ ’ਚ ਗੋਡੇ ਗੋਡੇ ਪਾਣੀ ਫਿਰਦੈ- ਇਕ ਖ਼ਬਰ

ਸੁਖਬੀਰ ਦੀ ਪਾਣੀ ਵਾਲ਼ੀ ਬਸ ਲੈ ਲਉ ਬਈ, ਵਿਹਲੀ ਹੀ ਖੜ੍ਹੀ ਐ।

ਬਿਜਲੀ ਸਮਝੌਤੇ ਰੱਦ ਕਰਨੇ ਏਨੇ ਸੌਖੇ ਨਹੀਂ- ਸੁਖਬੀਰ ਬਾਦਲ

ਇੰਜ ਕਹੋ ਕੇ ਸਾਡੀਆਂ ਦਿੱਤੀਆਂ ਗੰਢਾਂ ਖੋਲ੍ਹਣੀਆਂ ਏਨੀਆਂ ਸੌਖੀਆਂ ਨਹੀਂ।

ਸਰਕਾਰ ਨੇ ਬਿਜਲੀ ਸਸਤੀ ਕਰਨ ਦੇ ਨਾਂ ‘ਤੇ ਪੰਜਾਬੀਆਂ ਨਾਲ਼ ਧੋਖਾ ਕੀਤਾ- ਅਮਨ ਅਰੋੜਾ

ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ, ਜੱਗ ਭਾਵੇਂ ਕਰੇ ਨਿੰਦਿਆ।

ਚੰਨੀ ਨੇ ਅੱਧਾ ਪੰਜਾਬ ਬੀ.ਐੱਸ.ਐੱਫ. ਹਵਾਲੇ ਕੀਤਾ- ਹਰਸਿਮਰਤ ਬਾਦਲ

ਜਿਹਨੀਂ ਸਾਰਾ ਪੰਜਾਬ ਲੁੱਟਿਆ ਕੁਝ ਉਨ੍ਹਾਂ ਬਾਰੇ ਵੀ ਕਹੋ ਬੀਬੀ ਜੀ।

ਸੋਨੀਆ ਗਾਂਧੀ ਨੇ ਕੈਪਟਨ ਅਮਰਿੰਦਰ ਸਿੰਘ ਦਾ ਅਸਤੀਫ਼ਾ ਕੀਤਾ ਮੰਨਜ਼ੂਰ-ਇਕ ਖ਼ਬਰ

ਜੱਗ ਜੰਕਸ਼ਨ ਰੇਲਾਂ ਦਾ, ਗੱਡੀ ਇਕ ਆਵੇ ਇਕ ਜਾਵੇ।
                                                                                                    

ਅਖੀਰ ਕੈਪਟਨ ਨੇ ਆਪਣੀ ਵੱਖਰੀ ਪਾਰਟੀ ਬਣਾ ਹੀ ਲਈ- ਇਕ ਖ਼ਬਰ

ਬੁੱਢੀ ਘੋੜੀ, ਲਾਲ ਲਗਾਮ।  

31 OCT. 2021

ਪੰਜਾਬ ਨੂੰ ਆਪਣੇ ਅਸਲੀ ਮੁੱਦਿਆਂ ਵਲ ਵਾਪਸ ਆਉਣਾ ਹੀ ਪਵੇਗਾ- ਨਵਜੋਤ ਸਿੱਧੂ

ਵੀਰ ਵੇ ਮੁਰੱਬੇ ਵਾਲਿਆ, ਮੇਰਾ ਆਰਸੀ ਬਿਨਾਂ ਹੱਥ ਖਾਲੀ।

ਕਾਂਗਰਸ ਵਿਚ ਰਹਿਣ ਦਾ ਹੁਣ ਕੋਈ ਇਰਾਦਾ ਨਹੀਂ- ਕੈਪਟਨ

ਤੇਰੀ ਸਾਡੀ ਵੱਸ ਵੇ, ਹੁਣ ਮੈਂ ਨਾ ਤੇਰੇ ਰਹਿੰਦੀ।

ਰਿਜ਼ਰਵ ਬੈਂਕ ਦੇ ਗਵਰਨਰ ਦਾ ਕਾਰਜਕਾਲ ਤਿੰਨ ਸਾਲ ਵਧਾਇਆ- ਇਕ ਖ਼ਬਰ

ਆ ਵੇ ਨਾਜਰਾ ਜਾਹ ਵੇ ਨਾਜਰਾ, ਬੋਤਾ ਬੰਨ੍ਹ ਦਰਵਾਜ਼ੇ।

ਪੰਜਾਬ ਵਿਚ ਮਾਫ਼ੀਆ ਰਾਜ ਦੇ ਦਿਨ ਪੁੱਗੇ- ਚੰਨੀ

ਹੌਲ਼ੀ ਹੌਲ਼ੀ ਨੱਚ, ਜੰਡਿਆਲ਼ਾ ਨੇੜੇ ਈ ਆ।

ਸਰਕਾਰ ਨੇ ਕਿਸਾਨਾਂ ਨੂੰ ਰੋਕਣ ਲਈ ਲਗਾਏ ਹੋਏ ਨਾਕੇ ਢਾਉਣੇ ਸ਼ੁਰੂ ਕੀਤੇ-ਇਕ ਖ਼ਬਰ

ਹੱਥਾਂ ਨਾਲ਼ ਬਣਾਇਆ ਸੀ, ਪੈਰਾਂ ਨਾਲ਼ ਢਾਇਆ ਸੀ।

ਬਾਦਲ ਨੂੰ ਹੁਸ਼ਿਆਰਪੁਰ ਦੀ ਅਦਾਲਤ ‘ਚ ਪੇਸ਼ ਹੋਣ ਲਈ ਸੰਮਨ- ਇਕ ਖ਼ਬਰ

ਮੈਨੂੰ ਗਿੱਧੇ ਵਿਚ ਬਹੁਤਾ ਨਾ ਨਚਾਉ, ਪਿੰਡ ਮੇਰੇ ਸਹੁਰਿਆਂ ਦਾ।

ਪੈਗਾਸਸ: ਇਸਰਾਇਲੀ ਰਾਜਦੂਤ ਨੇ ਪਾਸਾ ਵੱਟਿਆ- ਇਕ ਖ਼ਬਰ

ਅੱਗ ਲਾਈ ਡੱਬੂ ਰੂੜੀਆਂ ‘ਤੇ।

ਪੰਜਾਬ ਕਾਂਗਰਸ ‘ਚ ਇਸ ਤਰ੍ਹਾਂ ਦਾ ਕਾਟੋ-ਕਲੇਸ਼ ਪਹਿਲਾਂ ਕਦੀ ਨਹੀਂ ਦੇਖਿਆ- ਮਨੀਸ਼ ਤਿਵਾੜੀ

ਕੂੰਡੇ ਟੁੱਟ ਗਏ ਘੋਟਣੇ ਭੱਜ ਗਏ, ਤਕੀਏ ਮਲੰਗ ਲੜ ਪਏ।

ਭਾਜਪਾ ਦੇ ਇਸ਼ਾਰੇ ‘ਤੇ ਕਿਸਾਨ ਅੰਦੋਲਨ ਨੂੰ ਬਦਨਾਮ ਕਰ ਰਹੇ ਹਨ ਕੈਪਟਨ ਅਮਰਿੰਦਰ ਸਿੰਘ-ਡੱਲੇਵਾਲ

ਚੁੱਕੀ ਹੋਈ ਪੰਚਾਂ ਦੀ, ਗਾਲ਼ ਬਿਨਾਂ ਨਾ ਬੋਲੇ।

ਪੰਜਾਬ ਸਰਕਾਰ ਨੇ ਕੈਪਟਨ ਦੀ ਰਿਹਾਇਸ਼ ਦੁਆਲਿਓਂ ਸੁਰੱਖਿਆ ਮੁਲਾਜ਼ਮ ਹਟਾਏ- ਇਕ ਖ਼ਬਰ

ਜਿਧਰ ਗਈਆਂ ਬੇੜੀਆਂ, ਉਧਰ ਗਏ ਮਲਾਹ।

70 ਸਾਲ ਤੋਂ  ਕਿਸਾਨਾਂ ਨਾਲ਼ ਬੇਇਨਸਾਫ਼ੀ ਹੋ ਰਹੀ ਹੈ, ਖੇਤੀ ਕਾਨੂੰਨਾਂ ਦਾ ਵਿਰੋਧ ਜਾਇਜ਼-ਮਲਿਕ

ਹੱਥ ਪਕੜ ਜੁੱਤੀ ਮੋਢੇ ਮਾਰ ਬੁੱਕਲ਼ , ਰਾਂਝਾ ਹੋ ਤੁਰਿਆ ਵਾਰਸ ਸ਼ਾਹ ਜੇਹਾ।

ਦਿੱਲੀ ਹਾਈਕੋਰਟ ਵਲੋਂ ਲਾਲਾ ਰਾਮਦੇਵ ਨੂੰ ਸੰਮਨ- ਇਕ ਖ਼ਬਰ

ਦਾਰੂ ਨਾ ਕਿਤਾਬ ਨਾ ਹੱਥ ਸ਼ੀਸ਼ੀ, ਆਖ ਕਾਹੇ ਦਾ ਵੈਦ ਸਦਾਉਂਦਾ ਏਂ।

ਸਰਨਾ ਗੁਰਦੁਆਰਿਆਂ ‘ਤੇ ਸਰਕਾਰੀ ਕਬਜ਼ੇ ਕਰਵਾਉਣੇ ਚਾਹੁੰਦੈ- ਮਨਜਿੰਦਰ ਸਿਰਸਾ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਕਾਂਗਰਸ ਦੀ ਮਜ਼ਬੂਤੀ ਲਈ ਨਿੱਜੀ ਹਿੱਤ ਛੱਡਣ ਆਗੂ- ਸੋਨੀਆ ਗਾਂਧੀ

ਜੇ ਰੁੱਖਾ ਹੀ ਖਾਣੈ, ਤਾਂ ਤੇਲੀ ਜ਼ਰੂਰ ਕਰਨੈ।

ਭਾਜਪਾ ਦੀ ਬੋਲੀ ਬੋਲਣ ਵਾਲ਼ੇ ਕੈਪਟਨ ਨੂੰ ‘ਛਾਂਗੇ’ ਕਾਂਗਰਸ- ਜਰਨੈਲ ਸਿੰਘ

ਲੁਕ ਛਿਪ ਲਾਈਆਂ ਪਰਗਟ ਹੋਈਆਂ, ਵੱਜ ਗਏ ਢੋਲ ਨਗਾਰੇ।

ਕੈਪਟਨ ਅਮਰਿੰਦਰ ਸਿੰਘ ਚੱਲਿਆ ਹੋਇਆ ਕਾਰਤੂਸ- ਨਵਜੋਤ ਸਿੱਧੂ

ਮੁੰਡਾ ਭੰਨਦਾ ਕਿਰਕ ਨਹੀਂ ਕਰਦਾ, ਮੇਰੀਆਂ ਬਰੀਕ ਚੂੜੀਆਂ।

25 OCT. 2021

ਰੈਲੀ ‘ਚ ਅਕਾਲੀ ਆਗੂਆਂ ਦੀਆਂ ਜੇਬਾਂ ਕੱਟੀਆਂ ਗਈਆਂ- ਇਕ ਖ਼ਬਰ

ਕਦੀ ਦਾਦੇ ਦੀਆਂ, ਕਦੇ ਪੋਤੇ ਦੀਆਂ।

ਅਕਾਲੀ ਦਲ ਨੇ ਹਮੇਸ਼ਾ ਪੰਜਾਬ ਦੇ ਹਿਤਾਂ ਦੀ ਰਾਖੀ ਕੀਤੀ- ਹਰਸਿਮਰਤ ਬਾਦਲ

ਪੰਜਾਬ ਨੂੰ ਕੰਗਾਲ ਕਰ ਕੇ।

ਅਰੂਸਾ ਬਦਲੇ ਕੈਪਟਨ ਅਤੇ ਸੁਖਜਿੰਦਰ ਬਾਜਵਾ ਮਿਹਣੋ ਮਿਹਣੀ- ਇਕ ਖ਼ਬਰ

ਜੱਗੇ ਬੱਗੇ ਦੀ ਗੰਡਾਸੀ ਖੜਕੇ, ਬੰਤੋ ਨਾਰ ਬਦਲੇ।

ਕੋਰੋਨਾ ਕਾਲ ‘ਚ ਕਿਸਾਨਾਂ ਨੇ ਸੰਭਾਲੀ ਸੀ ਦੇਸ਼ ਦੀ ਅਰਥ ਵਿਵਸਥਾ- ਨਰਿੰਦਰ ਮੋਦੀ

ਕੀ ਇਸੇ ਕਰ ਕੇ ਕਿਸਾਨ ਸੜਕਾਂ ‘ਤੇ ਰੋਲ਼ੇ ਜਾ ਰਹੇ ਹਨ?

ਨਿਹੰਗ ਅਮਨ ਸਿੰਘ ਦਾ ਬੁੱਢਾ ਦਲ ਨਾਲ਼ ਕੋਈ ਸਬੰਧ ਨਹੀਂ- ਬਾਬਾ ਮਾਨ ਸਿੰਘ

ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਟਰੰਪ ਵਲੋਂ ਆਪਣਾ ਹੀ ਸੋਸ਼ਲ ਮੀਡੀਆ ਮੰਚ ਸ਼ੁਰੂ ਕਰਨ ਦਾ ਐਲਾਨ- ਇਕ ਖ਼ਬਰ

ਘੜਾ ਚੁੱਕ ਲਊਂ ਪੱਟਾਂ ‘ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਇਮਰਾਨ ਖ਼ਾਨ ਨੇ ਤੋਹਫ਼ੇ ‘ਚ ਮਿਲੀ ਘੜੀ ਦਸ ਲੱਖ ਡਾਲਰ ਦੀ ਵੇਚੀ-ਇਕ ਖ਼ਬਰ

ਘਰ ਦੇ ਭਾਂਡੇ ਵੇਚ ਗਿਆ, ਮਰ ਜਾਣਾ ਅਮਲੀ।

ਮੈਂ ਚੋਣ ਲੜਨੀ ਏਂ ਜਾਂ ਨਹੀਂ, ਇਸ ਦਾ ਫ਼ੈਸਲਾ ਪਾਰਟੀ ਕਰੇਗੀ- ਪ੍ਰਕਾਸ਼ ਸਿੰਘ ਬਾਦਲ

ਕਿਹੜੀ ਪਾਰਟੀ ਬਾਦਲ ਸਾਬ?

ਰੇਹੜੀ ‘ਤੇ ਚਾਟ ਖਾ ਕੇ ਸੁਖਬੀਰ ਬਾਦਲ ਨੇ ਆਮ ਆਦਮੀ ਬਣਨ ਦੀ ਕੋਸ਼ਿਸ਼ ਕੀਤੀ- ਇਕ ਖ਼ਬਰ

ਸੁਖਬੀਰ ਸਿਆਂ ਤੇਰੇ ਕੋਲੋਂ ‘ਚੰਨੀ’ ਨਹੀਂ ਬਣਿਆਂ ਜਾਣਾ।

ਕਸ਼ਮੀਰ ‘ਚ ਹਿੰਸਾ ਰੋਕਣ ‘ਚ ਨਾਕਾਮ ਰਹੀ ਹੈ ਮੋਦੀ ਸਰਕਾਰ- ਰਾਹੁਲ ਗਾਂਧੀ

ਹਿੰਸਾ ਰੁਕ ਗਈ ਤਾਂ ਕੀ ਸਰਕਾਰ ਫਿਰ ਟੱਲੀਆਂ ਵਜਾਏਗੀ, ਰਾਹੁਲ ਸਾਬ!

ਸਿੰਘੂ ਘਟਨਾ ਦੀ ਜਾਂਚ ਲਈ ਸ਼੍ਰੋਮਣੀ ਕਮੇਟੀ ਨੇ ਟੀਮ ਬਣਾਈ- ਇਕ ਖ਼ਬਰ

ਹੁਣ ਤਾਈਂ ਬਣਾਈਆਂ ਕਮੇਟੀਆਂ ਦਾ ਹਿਸਾਬ ਤਾਂ ਦੇ ਦਿੰਦੇ ਪਹਿਲਾਂ ਬੀਬੀ ਜੀ!

ਕੈਪਟਨ ਸ਼ੁਰੂ ਤੋਂ ਹੀ ਭਾਜਪਾ ਨਾਲ਼ ਮਿਲ ਕੇ ਚਲ ਰਹੇ ਸਨ- ਹਰਸਿਮਰਤ ਬਾਦਲ

ਬੀਬੀ ਜੀ ਇੰਜ ਕਹੋ ਕਿ ਕੈਪਟਨ ਭਾਜਪਾ ਤੇ ਬਾਦਲਾਂ ਨਾਲ਼ ਮਿਲ ਕੇ ਚਲ ਰਹੇ ਸਨ।

ਲਖੀਮ ਪੁਰ ਮਾਮਲੇ ‘ਚ ਸੁਪਰੀਮ ਕੋਰਟ ਨੇ ਫਿਰ ਯੂ.ਪੀ. ਸਰਕਾਰ ਨੂੰ ਪਾਈ ਝਾੜ- ਇਕ ਖ਼ਬਰ

ਦੋ ਪਈਆਂ ਕਿੱਧਰ ਗਈਆਂ ਸਦਕਾ ਢੂਈ ਦਾ।

ਭਾਜਪਾ ਨਾਲ਼ ਗੱਠਜੋੜ ‘ਚ ਕੁਝ ਵੀ ਗ਼ਲਤ ਨਹੀਂ- ਅਮਰਿੰਦਰ ਸਿੰਘ

ਗੱਠਜੋੜ ਤਾਂ ਪਹਿਲਾਂ ਹੀ ਸੀ ਹੁਣ ਆਂ ਬਸ ਰਸਮ ਹੀ ਨਿਭਾਉਣੀ ਹੈ।

ਚੰਨੀ ਨੂੰ ਆਗਾਮੀ ਚੋਣਾਂ ‘ਚ ਮੁੱਖ ਮੰਤਰੀ ਐਲਾਨਣ ਦੀ ਮੰਗ ਉੱਠੀ- ਇਕ ਖ਼ਬਰ

ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹੀਓ ਮੇਰਾ ਵੀਰ ਕੁੜੀਓ।

18 OCT. 2021

ਅਗਾਊਂ ਜ਼ਮਾਨਤ ਦੇਣ ਤੋਂ ਪਹਿਲਾਂ ਅਦਾਲਤ ਅਪਰਾਧ ਦੀ ਗੰਭੀਰਤਾ ਦੇਖੇ- ਸੁਪਰੀਮ ਕੋਰਟ

ਨਾ ਜੀ ਨਾ ! ਅਦਾਲਤ ਪਹਿਲਾਂ ਅਪਰਾਧੀ ਦੀ ਹੈਸੀਅਤ ਦੇਖੇ !

ਮੈਂ ਹੀ ਹਾਂ ਕਾਂਗਰਸ ਦੀ ਸਥਾਈ ਪ੍ਰਧਾਨ- ਸੋਨੀਆ ਗਾਂਧੀ

ਜੱਟੀ ਪੰਦਰਾਂ ਮੁਰੱਬਿਆਂ ਵਾਲ਼ੀ, ਵੱਟਾਂ ਉੱਤੇ ਫਿਰੇ ਮੇਲ੍ਹਦੀ।

ਪ੍ਰੱਗਿਆ ਠਾਕੁਰ ਦੀ ਕਬੱਡੀ ਖੇਡਦੀ ਤੇ ਡਾਂਸ ਕਰਦੀ ਦੀ ਵੀਡੀਓ ਵਾਇਰਲ- ਇਕ ਖ਼ਬਰ

ਗੋਰੇ ਰੰਗ ‘ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

ਪੰਜਾਬ ਵਿਚ ਰਾਜਸੀ ਪਾਰਟੀ ਬਣਾਉਣਗੇ ਚੜੂਨੀ- ਇਕ ਖ਼ਬਰ

ਛੂਟਤੀ ਨਹੀਂ ਹੈ ਕਾਫ਼ਿਰ, ਮੂੰਹ ਕੋ ਲਗੀ ਹੂਈ।

ਪੰਜਾਬ ਦੇ ਅਧਿਕਾਰਾਂ ਦੀ ਰੱਖਿਆ ਕਰਨ ‘ਚ ਫੇਲ੍ਹ ਮੁੱਖ ਮੰਤਰੀ ਚੰਨੀ ਦੇਣ ਅਸਤੀਫ਼ਾ- ਸੁਖਬੀਰ

ਸੁਣ ਲੈ ਨਿਹਾਲੀਏ ਚੋ...ਦੀਆਂ ਗੱਲਾਂ।

ਨਸ਼ਾ ਅਡਾਨੀ ਦੀ ਬੰਦਰਗਾਹ ਤੋਂ ਫੜਿਆ ਤੇ ਹਮਲਾ ਪੰਜਾਬ ‘ਤੇ ਬੋਲ ਦਿੱਤਾ- ਖਾਲੜਾ ਮਿਸ਼ਨ

ਆਂਡੇ ਕਿਤੇ ਤੇ ਕੁੜ ਕੁੜ ਕਿਤੇ।

ਪੰਜਾਬ ਅੰਦਰ 50 ਕਿਲੋਮੀਟਰ ਤੱਕ ਕਾਰਵਾਈ ਕਰਨ ਦੇ ਅਧਿਕਾਰ ਮਿਲੇ ਬੀ.ਐਸ.ਐਫ. ਨੂੰ-ਇਕ ਖ਼ਬਰ

ਚੰਨੀ ਸਾਹਿਬ ਗਏ ਸੀ ਨਮਾਜ਼ ਬਖ਼ਸ਼ਵਾਉਣ ਤੇ ਉਲਟਾ ਰੋਜ਼ੇ ਗਲ਼ ਪੈ ਗਏ।

ਈਸਾਈ ਮਿਸ਼ਨਰੀਆਂ ਵਲੋਂ ਸਿੱਖਾਂ ਦਾ ਧਰਮ ਪ੍ਰੀਵਰਤਨ ਕਰਵਾਇਆ ਜਾ ਰਿਹੈ- ਜਥੇਦਾਰ

ਜਥੇਦਾਰ ਜੀ, ਇਹ ਕਿਸ ਦੀ ਨਾਲਾਇਕੀ ਕਰ ਕੇ ਹੋ ਰਿਹੈ, ਜ਼ਰਾ ਇਹ ਵੀ ਦੱਸਣਾ ਜੀ।

ਮੁੱਦਿਆਂ ਦੇ ਮਾਮਲੇ ‘ਤੇ ਕੋਈ ਸਮਝੌਤਾ ਨਹੀਂ ਕਰਾਂਗਾ- ਸਿੱਧੂ

ਜਿਸ ਪੱਲੇ ਫੁੱਲ ਬੱਧੇ ਹੋਵਣ, ਆਵੇ ਬਾਸ ਰੁਮਾਲੋਂ।

ਲਖੀਮ ਪੁਰ ਖੀਰੀ ਦੀ ਘਟਨਾ ਨੂੰ ਇਸ ਕਰ ਕੇ ਨਹੀਂ ਚੁੱਕਣਾ ਚਾਹੀਦਾ ਕਿ ਉੱਥੇ ਭਾਜਪਾ ਦੀ ਸਰਕਾਰ ਹੈ- ਸੀਤਾਰਮਣ

ਜਦੋਂ ਸੱਚੀਆਂ ਸੁਣਾਈਆਂ ਨੀਂ, ਬੜਾ ਦੁਖ ਲੱਗਿਆ ਬੜਾ ਦੁਖ ਲੱਗਿਆ।

ਭਾਜਪਾ ਕਾਰਜਕਾਰਨੀ ‘ਚੋਂ ਬਾਹਰ ਹੋਣ ਨਾਲ ਕੋਈ ਫ਼ਰਕ ਨਹੀਂ ਪੈਂਦਾ- ਮੇਨਕਾ ਗਾਂਧੀ

ਨੀਂ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

ਮੈਜਿਸਟਰੇਟ ਨੇ ਅਸ਼ੀਸ਼ ਮਿਸ਼ਰਾ ਨੂੰ ਰਿਮਾਂਡ ਦੌਰਾਨ ਤੰਗ ਪ੍ਰੇਸ਼ਾਨ ਨਾ ਕਰਨ ਲਈ ਪੁਲਿਸ ਨੂੰ ਕਿਹਾ- ਇਕ ਖ਼ਬਰ

ਕਾਸ਼ ਕਿ ਇਹ ਹੁਕਮ ਭਾਰਤ ਦੀ ਸਾਰੀ ਪੁਲਿਸ ‘ਤੇ ਲਾਗੂ ਹੋਵੇ।

ਗਰੀਬਾਂ ਦੀ ਭਲਾਈ ਲਈ ਕੰਮ ਕਰ ਰਹੀ ਹੈ ਸਰਕਾਰ-ਅਮਿਤ ਸ਼ਾਹ

ਤਾਂ ਹੀ ਭਾਰਤ ਦਾ ਭੁੱਖਮਰੀ ਇੰਡੈਕਸ 94 ਤੋਂ 101 ‘ਤੇ ਪਹੁੰਚ ਗਿਆ। 

ਅਜੇ ਤੱਕ ਵੀ ਸੌਦਾ ਸਾਧ ਵਿਰੁੱਧ ਬਾਦਲਾਂ ਅਤੇ ਸ਼੍ਰੋਮਣੀ ਕਮੇਟੀ ਦਾ ਮੂੰਹ ਬੰਦ ਕਿਉਂ?- ਭਾਈ ਮਾਝੀ

ਕਾਲ਼ਾ ਦਿਉਰ ਕੱਜਲ ਦੀ ਧਾਰੀ, ਅੱਖੀਆਂ ‘ਚ ਪਾਈ ਰੱਖਦੀ।

ਭਾਜਪਾ ਦੀ ਸ਼ਹਿ ‘ਤੇ ਸੁਖਬੀਰ ਬਾਦਲ ਸਿਆਸੀ ਰੈਲੀਆਂ ਕਰ ਰਿਹੈ- ਰਾਜੇਵਾਲ

ਬਿੱਲੋ ਚੱਜ ਨਾ ਵਸਣ ਦੇ ਤੇਰੇ, ਕੱਤਣੀਂ ‘ਚ ਰੱਖੇਂ ਰਿਉੜੀਆਂ।