3 Aug. 2021

ਨਵਜੋਤ ਸਿੱਧੂ ਨੇ ਪੰਜਾਬ ਲਈ ਕੈਪਟਨ ਅੱਗੇ ਰੱਖੇ ਪੰਜ ਨੁਕਤੇ- ਇਕ ਖ਼ਬਰ

ਵਿਹੜੇ ਲਾ ਤ੍ਰਿਵੈਣੀ, ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ।

ਦਿੱਲੀ ਪੁਲਿਸ ਵਲੋਂ ਰਾਜਸਥਾਨ ਦੀ ਲੇਡੀ ਡੌਨ ਗ੍ਰਿਫ਼ਤਾਰ- ਇਕ ਖ਼ਬਰ

ਸੀਟੀ ‘ਤੇ ਸੀਟੀ ਵੱਜਦੀ, ਜਦੋਂ ਮੈਂ ਗਿੱਧੇ ਵਿਚ ਆਈ।

ਐਨ.ਜੀ.ਟੀ.ਵਲੋਂ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਨੂੰ ਇਕ ਲੱਖ ਦਾ ਜ਼ੁਰਮਾਨਾ- ਇਕ ਖ਼ਬਰ

ਬੋਰਡ ਨੂੰ ਕਾਹਦਾ ਜ਼ੁਰਮਾਨਾ, ‘ਟੀਕਾ’ ਤਾਂ ਲੋਕਾਂ ਨੂੰ ਲੱਗਿਐ।

ਬਸਪਾ ਪੰਜਾਬ ਪ੍ਰਧਾਨ ਨੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨਾਲ ਕੀਤੀ ਮੁਲਾਕਾਤ-ਇਕ ਖ਼ਬਰ

ਸਿੱਖ ਲਉ ਬਾਬੇ ਤੋਂ ਕੋਈ ਤਿਕੜਮਬਾਜ਼ੀ, ਬੜਾ ਤਜਰਬੈ ਉਸ ਨੂੰ ਏਸ ਲਾਈਨ ਦਾ।

ਲੋਕ ਸਭਾ ‘ਚ ਹੰਗਾਮੇ ਦੌਰਾਨ ਸਰਕਾਰ ਨੇ ਬਿਨਾਂ ਬਹਿਸ ਹੀ ਕਰਵਾਏ ਦੋ ਬਿੱਲ ਪਾਸ-ਇਕ ਖ਼ਬਰ

ਜਿੱਥੇ ਮਰਜ਼ੀ ਨਿਸ਼ਾਨੇ ਲਾ, ਹੁਣ ਤੇਰੇ ਦਿਨ ਬੱਲੀਏ।

ਗੋਲਕ ਦੁਰਵਰਤੋਂ ਮਾਮਲੇ ‘ਚ ਬਾਦਲ ਸਿੱਖਾਂ ਦੀ ਬਦਨਾਮੀ ਕਿਉਂ ਕਰਵਾ ਰਹੇ ਹਨ? –ਸਰਬਜੀਤ ਸਿੰਘ ਭੂਟਾਨੀ

ਕਿਉਂਕਿ ਬਾਦਲਾਂ ਦਾ ਮਾਟੋ ਹੈ”: ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਕਿਸਾਨ ਅੰਨਦਾਤਾ ਹੈ, ਭਾਜਪਾ ਉਸ ਪ੍ਰਤੀ ਵਫ਼ਾਦਾਰੀ ਵਿਖਾਵੇ- ਸੰਜੇ ਸਿੰਘ

ਵਫ਼ਾਦਾਰੀ ਹੈ ਕੁਰਸੀ ਨਾਲ ਸਾਡੀ, ਵਫ਼ਾਦਾਰੀ ਹੋਰ ਅਸੀਂ ਜਾਣਦੇ ਨਹੀਂ।

‘ਆਪ’ ਕੋਲ ਗੱਠਜੋੜ ਦੀ ਪੇਸ਼ਕਸ਼ ਲੈ ਕੇ ਜਾਣ ਦੀ ਗੱਲ ਕੋਰੀ ਅਫ਼ਵਾਹ- ਸੁਖਦੇਵ ਸਿੰਘ ਢੀਂਡਸਾ

ਐਵੇਂ ਰੌਲ਼ਾ ਪੈ ਗਿਆ, ਬਸ ਐਵੇਂ ਰੌਲਾ ਪੈ ਗਿਆ।

ਸੰਨ 2030 ਤੱਕ ਸਥਾਈ ਵਿਕਾਸ ਦੇ ਟੀਚੇ ਹਾਸਲ ਕਰਨ ਲਈ ਖੇਤੀ ਸੈਕਟਰ ਜ਼ਰੀਆ- ਤੋਮਰ

ਇਸੇ ਲਈ ਤਾਂ ਇਹਨੂੰ ਕਿਸਾਨਾਂ ਤੋਂ ਖੋਹ ਕੇ ਤੁਸੀਂ ਕਾਰਪੋਰੇਟਾਂ ਨੂੰ ਸੌਂਪਣਾ ਚਾਹੁੰਦੇ ਹੋ।

ਕਰਤਾਰ ਪੁਰ ਲਾਂਘਾ ਮੁੜ ਖੋਲ੍ਹਿਆ ਜਾਵੇ- ਕੈਪਟਨ ਅਮਰਿੰਦਰ ਸਿੰਘ

ਸੋਚ ਲਉ ਕੈਪਟਨ ਸਾਹਿਬ, ਤੁਹਾਨੂੰ ਉਧਰਲੇ ਪਾਸਿਓਂ ਖ਼ਤਰੇ ਦਾ ਡਰ ਰਹਿੰਦੈ।

ਅਮਰੀਕਾ ਨੇ ਅਫ਼ਗਾਨਿਸਤਾਨ ਦੀ ਸਥਿਤੀ ਨੂੰ ਬੇਹੱਦ ਗੰਭੀਰ ਬਣਾਇਆ- ਇਮਰਾਨ ਖ਼ਾਨ

‘ਸਰਦਾਰੀਆਂ’ ਇੰਜ ਹੀ ਕਾਇਮ ਰੱਖਣੀਆਂ ਪੈਂਦੀਆਂ, ਖ਼ਾਨ ਸਾਹਿਬ।

 ਮੇਘਾਲਿਆ ਦੇ ਭਾਜਪਾ ਮੰਤਰੀ ਵਲੋਂ ਲੋਕਾਂ ਨੂੰ ਹੋਰ ਵਧੇਰੇ ਗਊ ਮਾਸ ਖਾਣ ਦੀ ਸਲਾਹ- ਇਕ ਖ਼ਬਰ

ਸ਼ੁਕਰ ਐ ਕਿਤੇ ਗੋਬਰ ਨੂੰ ਤੜਕਾ ਲਗਾਉਣ ਦੀ ਸਲਾਹ ਨਹੀਂ ਦਿੱਤੀ।

ਦਲਿਤ ਨੂੰ ਡਿਪਟੀ ਮੁੱਖ ਮੰਤਰੀ ਬਣਾਉਣ ਦਾ ਦਸ ਸਾਲ ਬਾਦਲਾਂ ਨੂੰ ਚੇਤਾ ਕਿਉਂ ਨਾ ਆਇਆ?- ਡੈਨੀ

ਹੁਣ ਤੂੰ ਕਿਧਰ ਗਿਆ, ਜੇਠ ਬੋਲੀਆਂ ਮਾਰੇ।

ਪੈਗਾਸਸ ਮੁੱਦੇ ‘ਤੇ ਸਰਕਾਰ ਕਦੋਂ ਤੱਕ ਸੱਚ ਲੁਕਾਉਂਦੀ ਰਹੇਗੀ?- ਚਿਦੰਬਰਮ

ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਮੇਰੇ ਅਤੇ ਮੁੱਖ ਮੰਤਰੀ ਦੇ ਸਬੰਧ ਸੁਖਾਵੇਂ- ਅਨਿਲ ਵਿਜ

ਭਾਈ ਮੰਜਾ ਕੱਸ ਕੇ ਬੁਣੀਂ, ਅਸਾਂ ਦੋਂਹ ਜਣਿਆਂ ਨੇ ਸੌਣਾ।

ਬੇਅਦਬੀ ਕਾਂਡ: ਚਾਰ ਡੇਰਾ ਪ੍ਰੇਮੀਆਂ ਨੂੰ ਇਕ ਤੋਂ ਬਾਅਦ ਦੂਜੇ ਕੇਸ ਵਿਚ ਵੀ ਮਿਲੀ ਜ਼ਮਾਨਤ- ਇਕ ਖ਼ਬਰ

ਸਾਡੇ ਰਾਖੇ ਨੀਲੀਆਂ ਵਾਲੇ, ਅਸੀਂ ਫ਼ਿਕਰ ਕੋਈ ਨਾ ਕਰਦੇ।

27 July 2021

ਸਿੱਧੂ ਦੇ ਤਾਜਪੋਸ਼ੀ ਸਮਾਗਮ ‘ਚ ਕੈਪਟਨ ਦੇ ਪੁੱਜਣ ਬਾਰੇ ਸ਼ਸ਼ੋਪੰਜ ਕਾਇਮ- ਇਕ ਖ਼ਬਰ

ਸੱਪ ਦੇ ਮੂੰਹ ‘ਚ ਕਿਰਲੀ। 

ਸਿੱਖਿਆ ਵਿਭਾਗ ਦਾ ਜੂਨੀਅਰ ਸਹਾਇਕ ਇਕ ਲੱਖ ਰੁਪਏ ਦੀ ਰਿਸ਼ਵਤ ਲੈਂਦਾ ਕਾਬੂ- ਇਕ ਖ਼ਬਰ

ਇਹਨੇ ਵੀ ਸੌਂਹ ਖਾਧੀ ਹੋਣੀ ਐ ਕਿ ਇਕ ਲੱਖ ਤੋਂ ਘੱਟ ਨਹੀਂ ਲੈਣੇ। 

ਸੰਸਦ ਭਵਨ ਨੇੜੇ ਕਿਸਾਨ ਮੋਰਚੇ ਨੇ ਆਪਣੀ ਸੰਸਦ ਦਾ ਇਜਲਾਸ ਕੀਤਾ ਸ਼ੁਰੂ- ਇਕ ਖ਼ਬਰ

ਤੇਰੇ ਸਾਹਮਣੇ ਸਿਆਪਾ ਕਰਨਾ, ਵਾਰ ਵਾਰ ਦੁਖ ਦੱਸਣਾ।

ਲਾੜੇ ਨੂੰ 4 ਕਿਲੋਮੀਟਰ ਤੱਕ ਆਪਣੇ ਨਾਲ ਭਜਾ ਕੇ ਲੈ ਗਈ ਘੋੜੀ- ਇਕ ਖ਼ਬਰ

ਘੋੜੀ ਨੇ ਤਾਂ ਮੁੰਡੇ ਨੂੰ ਮੌਕਾ ਦਿਤਾ ਕਿ ਜੇ ਬਚ ਸਕਦੈਂ ਤਾਂ ਬਚ ਜਾ ਮੱਖਣਾ।

ਸੁਖਬੀਰ ਬਾਦਲ ਵਲੋਂ ਮੀਡੀਆ ਅਦਾਰਿਆਂ ‘ਤੇ ਆਮਦਨ ਕਰ ਵਿਭਾਗ ਦੇ ਛਾਪਿਆਂ ਦੀ ਨਿਖੇਧੀ-ਇਕ ਖ਼ਬਰ

ਹਾਇ ਓਏ ਕਿਤੇ ਇਹ ਬਲਾ ਸਾਡੇ ਵਲ ਨਾ ਆ ਜਾਵੇ।

ਖੇਤੀ ਕਾਨੂੰਨ ਲਾਗੂ ਕਰਵਾਉਣ ਵਿਚ ਬਾਦਲ ਪਰਵਾਰ ਦਾ ਵੱਡਾ ਹਿੱਸਾ- ਸਿਮਰਜੀਤ ਸਿੰਘ ਬੈਂਸ

 ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਸਿੱਧੂ ਨੇ ਸ੍ਰੀ ਦਰਬਾਰ ਸਾਹਿਬ ਆ ਕੇ ਸ਼ਕਤੀ ਪ੍ਰਦਰਸ਼ਨ ਕੀਤਾ- ਬੀਬੀ ਜਗੀਰ ਕੌਰ

ਬੀਬੀ ਜਦੋਂ ਬਾਦਲ ਆਪਣੇ ਨਾਲ ‘ਫੌਜ’ ਲੈ ਕੇ ਆਉਂਦੇ ਆ, ਉਹ ਨਹੀਂ ਦਿਸਦੇ?

ਸੁਖਬੀਰ ਬਾਦਲ ਨੇ ਮਟਕਾ ਚੌਂਕ ‘ਚ ਬੈਠੇ ਬਾਬਾ ਲਾਭ ਸਿੰਘ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਰੱਬਾ! ਕੀ ਕੀ ਡਰਾਮੇ ਕਰਵਾਏਂਗਾ ਸਾਡੇ ਕੋਲੋਂ।

ਆਪ ਦੇ ਤਿੰਨ ਵਿਧਾਇਕ ਪਹਿਲਾਂ ‘ਕੈਪਟਨ ਦਰ” ਅਤੇ ਹੁਣ ‘ਸਿੱਧੂ ਦਰ”  ‘ਤੇ ਭਟਕ ਰਹੇ ਹਨ- ਆਪ ਆਗੂ

ਫਰੀਦਾ ਬਾਰਿ ਪਰਾਇਐ ਬੈਸਣਾ ਸਾਈ ਮੁਝੇ ਨਾ ਦੇ।

ਸਭ ਵਿਰੋਧੀ ਮੈਂਬਰਾਂ ਉੱਤੇ ਕਿਸਾਨ ਮੋਰਚੇ ਦੀ ਪੂਰੀ ਨਜ਼ਰ- ਰਾਜੇਵਾਲ

ਚੌਕੀਦਾਰੀ ਲੈ ਲੈ ਮਿੱਤਰਾ, ਤੇਰੇ ਲਗਦੇ ਨੇ ਬੋਲ ਪਿਆਰੇ।

ਭਾਰਤ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਪਾਰਲੀਮੈਂਟ ਦੇ ਬਰਾਬਰ ਕਿਸਾਨਾਂ ਨੇ ਸੰਸਦ ਚਲਾਈ-ਇਕ ਖ਼ਬਰ

ਮੈਨੂੰ ਬਗਲੀ ਸਿਖਾ ਦੇ ਗਲ਼ ਪਾਉਣੀ, ਚੱਲੂੰਗੀ ਤੇਰੇ ਨਾਲ ਜੋਗੀਆ।

 ਦੇਸ਼ ਦੀ ਅਰਥਵਿਵਸਥਾ ਲਈ ਅੱਗੋਂ ਰਾਹ ਹੋਰ ਵੀ ਚੁਣੌਤੀ ਭਰਿਆ- ਡਾ. ਮਨਮੋਹਨ ਸਿੰਘ

ਅੱਜ ਕੌਣ ਪੁੱਛੇ ਰਾਂਝੇ ਚਾਕ ਤਾਈਂ, ਬੇਗ਼ਮ ਹੀਰ ਤੇ ਸੈਦਾ ਨਵਾਬ ਹੋਇਆ।

ਸੜਕ ‘ਤੇ ਬੈਠਦੇ ਲਾਵਾਰਿਸ ਪਸ਼ੂਆਂ ਤੋਂ ਰਾਹਗੀਰ ਪ੍ਰੇਸ਼ਾਨ- ਇਕ ਖ਼ਬਰ

ਕਰੋੜਾਂ ਰੁਪਏ ਦਾ ‘ਗਊ ਟੈਕਸ’ ਕਿੱਥੇ ਜਾਂਦੈ ਬਈ? ਸਰਕਾਰ ਦੱਸੇ ਲੋਕਾਂ ਨੂੰ।

ਕਿਸਾਨ ਕਿਸੇ ਸਖ਼ਤੀ ਤੋਂ ਡਰਨ ਵਾਲ਼ੇ ਨਹੀਂ- ਟਿਕੈਤ

ਭੂਰਾ ਬੋਤਾ ਮੇਰੇ ਵੀਰ ਦਾ, ਰੇਲ ਦੇ ਬਰਾਬਰ ਜਾਂਦਾ।

19 July 2021

ਸ਼ਤਰੂਘਨ ਸਿਨਹਾ ਦੇ ਤ੍ਰਿਣਮੂਲ ਕਾਂਗਰਸ ‘ਚ ਜਾਣ ਦੇ ਚਰਚੇ- ਇਕ ਖ਼ਬਰ

ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

 ਕਿਸਾਨਾਂ ਦੀਆਂ ਗ੍ਰਿਫ਼ਤਾਰੀਆ ਨਾਲ ਕਿਸਾਨ ਅੰਦੋਲਨ ਹੋਵੇਗਾ ਹੋਰ ਤਿੱਖਾ- ਟਿਕੈਤ

ਜਿਉਂ ਜਿਉਂ ਮੰਨੂੰ ਵੱਢਦਾ, ਅਸੀਂ ਦੂਣ ਸਵਾਏ ਹੋਏ।

ਭਾਜਪਾ ਦੇ ਅੰਤ ਦਾ ਕਾਰਨ ਬਣੇਗਾ ਕਿਸਾਨ ਅੰਦੋਲਨ- ਕਿਸਾਨ ਮੋਰਚਾ

ਇਨ੍ਹਾਂ ਸੁਹਣਿਆਂ ਮੂੰਹਾਂ ‘ਤੇ ਖ਼ਾਕ ਪੈਣੀ, ਕੁੰਡੇ ਲੱਗਣੇ ਅੰਤ ਹਵੇਲੀਆਂ ਨੂੰ।

ਸਿੱਧੂ ਹੱਥ ਪੰਜਾਬ ਕਾਂਗਰਸ ਦੀ ਵਾਗਡੋਰ ਦੇਣ ਨਾਲ਼ ਕਾਂਗਰਸ ਦਮ ਤੋੜ ਦੇਵੇਗੀ- ਕੈਪਟਨ

ਦਾਖੇ ਹੱਥ ਨਾ ਅੱਪੜੇ, ਆਖੇ ਥੂ ਕੌੜੀ।

ਕਿਸਾਨਾਂ ਦੀ ਆਵਾਜ਼ ਬਣਨਾ ਸੰਸਦ ਮੈਂਬਰਾਂ ਦੀ ਜ਼ਿੰਮੇਵਾਰੀ ਅਤੇ ਧਰਮ- ਭਗਵੰਤ ਮਾਨ

ਸਿਆਸਤ ਖੇਡ ਹੈ ਗਿਣਤੀਆਂ ਮਿਣਤੀਆਂ ਦੀ, ਧਰਮ ਤੇ ਫ਼ਰਜ਼ ਨੂੰ ਕੌਣ ਪਛਾਣਦਾ ਏ।

ਭਾਜਪਾ ਤੋਂ ਡਰਨ ਵਾਲੇ ਕਾਂਗਰਸ ਛੱਡ ਕੇ ਚਲੇ ਜਾਣ- ਰਾਹੁਲ ਗਾਂਧੀ

ਸੁੱਤੀ ਨਾ ਜਗਾਈਂ ਮਿੱਤਰਾ, ਸਾਨੂੰ ਲੱਡੂਆਂ ਤੋਂ ਨੀਂਦ ਪਿਆਰੀ।

ਡੇਰਾ ਮੁਖੀ ਨੂੰ ਬਚਾਉਣ ਦੇ ਯਤਨ ਨਾ ਕਰੇ ਪੰਜਾਬ ਸਰਕਾਰ- ਸ਼੍ਰੋਮਣੀ ਕਮੇਟੀ

ਉਲਟਾ ਚੋਰ ਕੋਤਵਾਲ ਕੋ ਡਾਂਟੇ।

ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਨੇ ‘ਹਿੰਦੂ’ ਪੱਤਾ ਖੇਡਣ ਦਾ ਫ਼ੈਸਲਾ ਕੀਤਾ- ਇਕ ਖ਼ਬਰ

ਜਿਨ੍ਹਾਂ ਰਾਹਾਂ ਦੀ ਮੈਂ ਸਾਰ ਨਾ ਜਾਣਾਂ, ਉਹਨੀਂ ਰਾਹੀਂ ਵੇ ਮੈਨੂੰ ਤੁਰਨਾ ਪਿਆ।

ਕਾਂਗਰਸ ਜਾਣ ਬੁਝ ਕੇ ਡੇਰਾ ਸਿਰਸਾ ਮੁਖੀ ਖ਼ਿਲਾਫ਼ ਕਾਰਵਾਈ ਨਹੀਂ ਕਰ ਰਹੀ- ਬਾਦਲ ਅਕਾਲੀ ਦਲ

ਨਿੱਕਾ ਦਿਉਰ ਮੇਰਾ ਖੰਡ ਦਾ ਖਿਡੌਣਾ, ਮੈਂ ਸਾਂਭ ਸਾਂਭ ਰੱਖਦੀ ਫਿਰਾਂ।

ਭਾਜਪਾ ਵਰਕਰ ਚੋਣਾਂ ਲਈ ਕਮਰਕੱਸੇ ਕਰਨ- ਅਸ਼ਵਨੀ ਕੁਮਾਰ

ਚੜ੍ਹ ਜਾਉ ਬੱਚਿਓ ਸੂਲ਼ੀ, ਰਾਮ ਭਲੀ ਕਰੇਗਾ।

ਵੋਟਾਂ ਲਈ ਸੌਦਾ ਸਾਧ ਦਾ ਨਾਮ ਸਰਕਾਰ ਅਤੇ ਸਿਆਸਤਦਾਨਾਂ ਨੇ ਕੇਸ ‘ਚੋਂ ਕਢਵਾਇਆ- ਜਥੇਦਾਰ

ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਸੰਸਦ ਭਵਨ ਦੇ ਬਾਹਰ ਕਿਸਾਨ ਚਲਾਉਣਗੇ ਆਪਣੀ ਸੰਸਦ- ਇਕ ਖ਼ਬਰ

ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ, ਦਾਰੂ ਪੀ ਕੇ ਮਿੱਤਰਾਂ ਨੇ।

ਸਰਕਾਰ ਬਦਲਣ ਨਾਲ਼ ਸਿਰਫ਼ ਪੱਗਾਂ ਦੇ ਰੰਗ ਬਦਲੇ- ਭਗਵੰਤ ਮਾਨ

ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਪੰਜਾਬ ‘ਚ ਰਾਸ਼ਟਰਪਤੀ ਰਾਜ ਲਾਗੂ ਕਰ ਕੇ ਕੇਂਦਰੀ ਫੋਰਸ ਤੈਨਾਤ ਕੀਤੀ ਜਾਵੇ- ਮਦਨ ਮੋਹਨ ਮਿੱਤਲ

ਤੇਰੇ ਵਿਚ ਸਾਰਾ ਬੰਦਿਆ ਕਸੂਰ ਸੀ, ਬੀਜ ਕੇ ਤੇ ਅੱਕ ਭਾਲ਼ਦਾ ਖਜੂਰ ਜੀ।

13 July 2021

ਪਟਰੌਲ ਡੀਜ਼ਲ ਦੀਆਂ ਵਧੀਆਂ ਕੀਮਤਾਂ ਨੇ ਹਰ ਵਰਗ ਦਾ ਬਜਟ ਵਿਗਾੜਿਆ-ਯਸ਼ਪਾਲ ਰਾਣਾ ਬੇ.ਕੇ.ਯੂ

ਰਾਣਾ ਜੀ ਹਰ ਕਿਸੇ ਦਾ ਨਹੀਂ, ਕਈਆਂ ਦੇ ਤਾਂ ਵਾਰੇ ਨਿਆਰੇ ਹੋ ਰਹੇ ਐ।

ਪ੍ਰਾਈਵੇਟ ਥਰਮਲ ਪਾਰਟੀਆਂ ਨਾਲ ਕੀਤੇ ਬਿਜਲੀ ਸਮਝੌਤੇ ਜਾਇਜ਼ ਹਨ- ਸੁਖਬੀਰ ਬਾਦਲ

ਗੀਤਾਂ ਨੂੰ ਜ਼ਹਿਰ ਪਿਲਾਉਂਦੇ ਨੇ, ਸਾਡੇ ਲਹੂ ਦੇ ਵਿਚ ਨਹਾਉਂਦੇ ਨੇ।

ਭਾਜਪਾ ਨੇ ਸਾਬਕਾ ਮੰਤਰੀ ਅਨਿਲ ਜੋਸ਼ੀ ਨੂੰ ਪਾਰਟੀ’ਚੋਂ ਬਾਹਰ ਦਾ ਰਾਸਤਾ ਦਿਖਾਇਆ- ਇਕ ਖ਼ਬਰ

ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਮੁੱਖ ਮੰਤਰੀ ਕਿਸਾਨਾਂ ਦੀ ਭਲਾਈ ਲਈ ਹਮੇਸ਼ਾ ਵਚਨਬੱਧ- ਕੈਪਟਨ ਸੰਦੀਪ ਸੰਧੂ

ਏਸੇ ਲਈ ਤਾਂ ਮੁੱਖ ਮੰਤਰੀ ਸਾਹਿਬ ਅੰਬਾਨੀਆਂ ਅਡਾਨੀਆਂ ਨਾਲ ਮੀਟਿੰਗਾਂ ਕਰਦੇ ਰਹੇ ਐ।

ਚੰਡੀਗੜ੍ਹ ‘ਚ ਗੁਜ਼ਾਰੇ ਜੋਗੀ ਤਨਖ਼ਾਹ ਮੰਗਦੇ ਅਧਿਆਪਕਾਂ ਤੇ ਵਰ੍ਹੀਆਂ ਡਾਂਗਾਂ-ਇਕ ਖ਼ਬਰ

ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦੇ ਹੱਕ ਮਾਰ ਕੇ।

ਮੁੱਖ ਮੰਤਰੀ ਦੀ ਨਾਕਾਮੀ ਲਈ ਅਫ਼ਸਰਾਂ ਨੂੰ ਨਿਸ਼ਾਨਾਂ ਬਣਾਉਣਾ ਗ਼ਲਤ- ਮਲੂਕਾ

ਕੀ ਲਗਦੇ ਸੰਤੀਏ ਤੇਰੇ, ਜਿਹਨਾਂ ਨੂੰ ਰਾਤੀਂ ਖੰਡ ਪਾਈ ਸੀ।

ਕਰਤਾਰ ਪੁਰ ਲਾਂਘਾ ਨਾ ਖੋਲ੍ਹਣ ਪਿੱਛੇ ਕੇਂਦਰ ਦੀ ਨੀਅਤ ਸ਼ੱਕੀ- ਜਥੇਦਾਰ ਹਰਪ੍ਰੀਤ ਸਿੰਘ

ਉੱਤੋਂ ਮੁੰਡਾ ਹੱਸ ਬੋਲਦਾ ਪਰ ਦਿਲ ‘ਚ ਰੱਖੇ ਬੇਈਮਾਨੀ।

ਮਮਤਾ ਨੇ ਕਿਹਾ ਕਿ ਪੱਛਮੀ ਬੰਗਾਲ ‘ਚ ਮਨਾਇਆ ਜਾਵੇਗਾ ‘ਖੇਲਾ ਹੋਬੇ ਦਿਵਸ’-ਇਕ ਖ਼ਬਰ

ਮੁੰਡੇ ਮੈਨੂੰ ਸਾਰੇ ਪੁੱਛਦੇ, ਇਹ ਪੰਜੇਬਾਂ ਵਾਲ਼ੀ ਕੌਣ ਏ।

ਅਕਾਲੀਆਂ ਤੇ ਕਾਂਗਰਸੀਆਂ ਨੇ ਮਹਿੰਗੀ ਬਿਜਲੀ ਖ਼ਰੀਦ ਕੇ ਲੋਕ ਲੁੱਟੇ- ਅਮਨ ਅਰੋੜਾ

ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ। 

ਵਜ਼ਾਰਤੀ ਵਾਧਾ ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਨੂੰ ਨਹੀਂ ਢੱਕ ਸਕਦਾ- ਮਾਇਆਵਤੀ

ਡਿਗੀ ਖੋਤੇ ਤੋਂ, ਗੁੱਸਾ ਘੁਮਿਆਰ ‘ਤੇ।

ਪੀ.ਟੀ.ਆਈ. ਵਲੋਂ ਨਵੇਂ ਆਈ.ਟੀ.ਨੇਮਾਂ ਨੂੰ ਹਾਈਕੋਰਟ ਵਿਚ ਚੁਣੌਤੀ- ਇਕ ਖ਼ਬਰ

ਪੀੜ੍ਹੀ ਉੱਤੇ ਬਹਿ ਜਾ ਵੀਰਨਾ, ਸੱਸ ਚੰਦਰੀ ਦੇ ਰੁਦਨ ਸੁਣਾਵਾਂ।

 ਸੰਘ ਦੀ ਵਿਚਾਰਧਾਰਾ ਹਮੇਸ਼ਾ ਤੋਂ ਸ਼ਾਂਤੀ ਅਤੇ ਭਾਈਚਾਰੇ ਨਾਲ਼ ਭਰਪੂਰ- ਕੇਂਦਰੀ ਮੰਤਰੀ ਮੁਖ਼ਤਾਰ ਨਕਵੀ

ਤਾਬੇਦਾਰ ਆਂ ਧੁਰੋਂ ਅਸੀਂ ਤੇਰੇ, ਜਿੱਥੇ ਮਰਜ਼ੀ ਲੁਆ ਲੈ ਅੰਗੂਠਾ।

ਲਾਲੂ ਪ੍ਰਸਾਦ ਯਾਦਵ ਨੇ ਨਿਤੀਸ਼ ਅਤੇ ਮੋਦੀ ‘ਤੇ ਨਿਸ਼ਾਨਾ ਸਾਧਿਆ-ਇਕ ਖ਼ਬਰ

ਤੂੰ ਹੋਰ ਨਾ ਮਾਰੀਂ ਮਿਰਜ਼ਿਆ, ਤੇਰੇ ਬੜੇ ਗ਼ਜ਼ਬ ਦੇ ਤੀਰ।

 ਸ਼ਰਾਬ ਦੀਆਂ ਬੰਦ 12 ਬੋਤਲਾਂ ਖੋਲ੍ਹ ਕੇ ਚੂਹੇ ਪੀ ਗਏ-ਇਕ ਖ਼ਬਰ

ਕੁਝ ਸਾਲ ਹੋਏ ਬਿਹਾਰ ਵਿਚ ਚੂਹਿਆਂ ਨੇ ਸ਼ਰਾਬ ਦਾ ਸਾਰਾ ਗੁਦਾਮ ਪੀ ਲਿਆ ਸੀ।

ਸੁਪਰੀਮ ਕੋਰਟ ਹੈਰਾਨ ਹੈ ਕਿ ਆਈ.ਟੀ. ਐਕਟ ਦੀ ਇਕ ਧਾਰਾ ਖਤਮ ਕੀਤੇ ਜਾਣ ਦੇ ਬਾਵਜੂਦ ਪੁਲਿਸ ਕੇਸ ਦਰਜ ਕਰ ਰਹੀ ਹੈ-ਇਕ ਖ਼ਬਰ

ਜੇ ਚੂਹੇ ਬੰਦ ਬੋਤਲਾਂ ਖੋਲ੍ਹ ਕੇ ਦਾਰੂ ਪੀ ਸਕਦੇ ਐ ਤਾਂ ਕੇਸ ਰਜਿਸਟਰ ਕਰਨੇ ਤਾਂ ਬਹੁਤ ਸੌਖਾ ਕੰਮ ਐ।

ਬਾਦਲ ਸਰਕਾਰ ਬੇਅਦਬੀ ਕਾਂਡ ਦੀ ਜਾਂਚ ਲਈ ਗੰਭੀਰ ਨਹੀਂ ਸੀ- ਜਸਟਿਸ ਜ਼ੋਰਾ ਸਿੰਘ

ਮਰਦ ਬੇਦਰਦਾਂ ਦਾ, ਮੈਨੂੰ ਲਗਦਾ ਬੁਰਾ ਪ੍ਰਛਾਵਾਂ।

04 July 2021

ਅਕਾਲੀ ਦਲ ਅਤੇ ਬਸਪਾ ਵਰਕਰਾਂ ਵਲੋਂ ਸੂਬੇ ਭਰ ‘ਚ ਬਿਜਲੀ ਦਫ਼ਤਰਾਂ ਅੱਗੇ ਰੋਸ ਮੁਜਾਹਰੇ-ਇਕ ਖ਼ਬਰ

ਸੁਖਬੀਰ ਸਿਆਂ ਕਿਹੜੇ ਪੰਗੇ ‘ਚ ਪੈ ਗਿਐਂ, ਇਹ ਧਰਨੇ, ਮੁਜਾਹਰੇ ਤਾਂ ਵਿਹਲੇ ਬੰਦਿਆਂ ਦਾ ਕੰਮ ਹੁੰਦੈ। 

 ਵਿਤ ਮੰਤਰੀ ਨੂੰ ਅਰਥਚਾਰੇ ਦੀ ਕੋਈ ਸਮਝ ਨਹੀਂ, ਫਿਰ ਦਿਤੀ ‘ਕਰਜ਼ੇ ਦੀ ਖ਼ੁਰਾਕ’-ਕਾਂਗਰਸ

ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਸਿੱਖ ਲੜਕੀਆਂ ਨੂੰ ਧਰਮ ‘ਚ ਪਰਿਪੱਕ ਕਰਨ ਲਈ ਲਗਾਏ ਜਾਣਗੇ ਗੁਰਮਤਿ ਕੈਂਪ-ਜਥੇਦਾਰ

ਜਥੇਦਾਰ ਜੀ, ਬੀਬੀ ਜਗੀਰ ਕੌਰ ਨੂੰ ਸੰਭਾਲੋ ਇਹ ਜ਼ਿੰਮੇਵਾਰੀ।

ਸੁਖਬੀਰ ਬਾਦਲ ਵਲੋਂ ਨਾਜਾਇਜ਼ ਖਣਨ ਖੇਤਰ ਦਾ ਦੌਰਾ- ਇਕ ਖ਼ਬਰ

ਬਈ ਲੋਕ ਕਹਿੰਦੇ ਆ ਕਿ ਸੁਖਬੀਰ ਦੇਖਣ ਜਾਂਦਾ ਕਿ ਰਾਜੇ ਨੇ ਉਹਦੇ ਜੋਗੀ ਰੇਤਾ ਛੱਡੀ ਕਿ ਨਹੀਂ।

ਅਕਾਲੀ-ਭਾਜਪਾ ਸਰਕਾਰ ਦੇ ਬਿਜਲੀ ਖ਼ਰੀਦ ਸਮਝੌਤੇ ਸਮੀਖਿਆ ਅਧੀਨ- ਕੈਪਟਨ

ਬੜੀ ਦੇਰ ਕਰ ਦੀ ਮਿਹਰਬਾਂ ਆਤੇ ਆਤੇ।

ਡਾ. ਨਵਜੋਤ ਕੌਰ ਸਿੱਧੂ ਨੇ ਸੁਖਬੀਰ ਬਾਦਲ ਨੂੰ ਲਿਆ ਕਰੜੇ ਹੱਥੀਂ-ਇਕ ਖ਼ਬਰ

ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭਰਿੰਡ ਬਣ ਕੇ।

ਬਿਹਾਰ ’ਚ ਅਫ਼ਸਰਸ਼ਾਹੀ ਤੋਂ ਤੰਗ ਮੰਤਰੀ ਨੇ ਕੀਤੀ ਅਸਤੀਫ਼ੇ ਦੀ ਪੇਸ਼ਕਸ਼- ਇਕ ਖ਼ਬਰ

 ਭੱਠ ਪਿਆ ਸੋਨਾ, ਜਿਹੜਾ ਕੰਨਾਂ ਨੂੰ ਖਾਵੇ।

ਅੰਦੋਲਨ ਕਰ ਰਹੇ ਲੋਕ ਅਸਲ ਵਿਚ ਕਿਸਾਨ ਨਹੀਂ ਹਨ- ਖੱਟਰ

ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਨਵਜੋਤ ਸਿੱਧੂ ‘ਦਿਸ਼ਾਹੀਣ ਮਿਜ਼ਾਈਲ’ ਕਿਤੇ ਵੀ ਡਿਗ ਸਕਦੀ ਹੈ- ਸੁਖਬੀਰ ਬਾਦਲ

ਰਾਤ ਹਨੇਰੀ ਮਾਏਂ ਨੀਂ ਬੀਂਡੇ ਬੋਲਦੇ, ਮੈਨੂੰ ਡਰ ‘ਕੱਲੀ ਨੂੰ ਆਵੇ।

ਕੈਪਟਨ ਅਮਰਿੰਦਰ ਸਿੰਘ ਅੱਜ ਕੁਝ ਹੋਰ ਕਾਂਗਰਸੀ ਆਗੂਆਂ ਨਾਲ਼ ਲੰਚ ਕਰਨਗੇ- ਇਕ ਖ਼ਬਰ

ਹਾਏ ਓਏ ਕੈਪਟਨ ਦੀਆਂ ਮਜਬੂਰੀਆਂ, ਖੁਆਉਣੀਆਂ ਪੈ ਗਈਆਂ ਨੇ ਚੂਰੀਆਂ।

ਉੱਤਰਾਖੰਡ ਦੇ ਮੁੱਖ ਮੰਤਰੀ ਤੀਰਥ ਸਿੰਘ ਰਾਵਤ ਨੇ ਦਿਤਾ ਅਸਤੀਫ਼ਾ- ਇਕ ਖ਼ਬਰ

ਆਹ ਲੈ ਸਾਂਭ ਲੈ ਸੈਦੇ ਦੀਏ ਨਾਰੇ, ਮੈਥੋਂ ਨਹੀਂ ਮੱਝਾਂ ਚਾਰ ਹੁੰਦੀਆਂ।

ਪੁਲਿਸ ਵਿਭਾਗ ਵਿਚ 10500 ਕਰਮਚਾਰੀ ਜਲਦੀ ਭਰਤੀ ਕੀਤੇ ਜਾਣਗੇ-ਡੀ.ਜੀ.ਪੀ.

ਵੀ.ਆਈ. ਪੀ. ਲੋਕਾਂ ਦੀ ਰਾਖੀ ਕਰਨ ਤੇ ਬੇਰੋਜ਼ਗਾਰਾਂ ਦੇ ਡਾਂਗ ਫੇਰਨ ਲਈ।

ਕੋਟਕਪੂਰਾ ਗੋਲੀਕਾਂਡ ‘ਚ ਬਾਦਲ ਅਤੇ ਸੁਖਬੀਰ ਨੂੰ ਘਸੀਟਣਾ ਠੀਕ ਨਹੀਂ- ਮਿੱਤਲ

ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੀ ਭਾਵੇਂ ਜਿੰਦ ਕੱਢ ਲੈ।

ਸਾਥੋਂ ਪਹਿਲਾਂ ਹੀ ਹਫ਼ੜਾ ਦਫ਼ੜੀ ‘ਚ ਕੇਜਰੀਵਾਲ ਨੇ ਬਿਜਲੀ ਦਾ ਐਲਾਨ ਕਰ ਦਿਤਾ- ਚਰਨਜੀਤ ਚੰਨੀ

ਚੰਨੀ ਜੀ, ਲੜਾਈ ਦੇ ਢਾਈ ਫੱਟ ਹੁੰਦੇ ਐ, ਜਿਹੜਾ ਪਹਿਲਾਂ ਮਾਰ ਗਿਆ ਉਹ ਜੇਤੂ।

ਨਕਲੀ ਟੀਕਾਕਰਨ ਦੇ ਕੇਸਾਂ ਵਿਚ ‘ਵੱਡੀਆਂ ਮੱਛੀਆਂ’ ਨੂੰ ਫੜਿਆ ਜਾਵੇ- ਹਾਈ ਕੋਰਟ

ਹਾਈ ਕੋਰਟ ਜੀ, ਜਾਲ਼ ‘ਚ ਮਘੋਰੇ ਬਹੁਤ ਵੱਡੇ ਵੱਡੇ ਐ, ਵੱਡੀ ਮੱਛੀ ਨਹੀਂ ਹੱਥ ਆਉਂਦੀ।

ਪੰਜਾਬ ਨੂੰ ਕੰਗਾਲ ਕਰ ਰਹੇ ਹਨ ਬਿਜਲੀ ਸਮਝੌਤੇ-ਭਗਵੰਤ ਮਾਨ

ਮੈਂ ਤਾਂ ਹੋ ਗਈ ਹਕੀਮ ਜੀ , ਅੱਗੇ ਨਾਲ਼ੋਂ ਤੰਗ।

28 June 2021

ਕੋਰੋਨਾ ਮਿਰਤਕਾਂ ਦੇ ਪਰਵਾਰਾਂ ਨੂੰ ਮੁਆਵਜ਼ਾ ਦੇਣ ਤੋਂ ਮੁਕਰੀ ਕੇਂਦਰ ਸਰਕਾਰ- ਇਕ ਖ਼ਬਰ

ਕਸਮੇਂ, ਵਾਅਦੇ, ਪ੍ਰਣ ਔਰ ਵਚਨ.......ਜੁਮਲੇ ਹੈਂ ਜੁਮਲੋਂ ਕਾ ਕਿਆ। 

ਪੰਜਾਬ ਕਾਂਗਰਸ ਦਾ ਰੇੜਕਾ ਹਾਲੇ ਵੀ ਨਹੀਂ ਮੁੱਕਿਆ- ਇਕ ਖ਼ਬਰ

ਮੋੜੀਂ ਮੋੜੀਂ ਵੇ ਗੁਲਜ਼ਾਰੀ, ਭੇਡਾਂ ਦੂਰ ਗਈਆਂ। 

ਬਿਜਲੀ ਦੇ ਗ਼ਲਤ ਸਮਝੌਤੇ ਕਰਨ ਵਾਲਿਆਂ ਦੇ ਖ਼ਿਲਾਫ਼ ਫੌਜਦਾਰੀ ਕਾਰਵਾਈ ਹੋਵੇ- ਜਾਖੜ

ਤੁਸੀਂ ਵਾਅਦਾ ਕਰ ਕੇ ਸਮਝੌਤੇ ਕੈਂਸਲ ਕਿਉਂ ਨਾ ਕੀਤੇ ਜਾਖੜ ਸਾਬ? 

ਪਾਣੀ ਦੀਆਂ ਬੁਛਾੜਾਂ ਵੀ ਨਾ ਰੋਕ ਸਕੀਆਂ ਕਿਸਾਨਾਂ ਦਾ ਰਾਹ-ਇਕ ਖ਼ਬਰ

ਪਾਣੀ ਵਾਰ ਬੰਨੇ ਦੀਏ ਮਾਏਂ, ਬੰਨਾ ਤੇਰਾ ਬਾਹਰ ਖੜ੍ਹਾ।

ਟਰੰਪ ਨੇ ਮੁੜ ਚੋਣਾਂ ‘ਚ ਹੇਰਾ ਫੇਰੀ ਹੋਣ ਦਾ ਰੋਣਾ ਰੋਇਆ- ਇਕ ਖ਼ਬਰ

ਟੁੱਟ ਪੈਣੇ ਦਰਜੀ ਨੇ, ਮੇਰੀ ਰੱਖ ਲਈ ਸੁੱਥਣ ‘ਚੋਂ ਟਾਕੀ।

ਨਵਜੋਤ ਸਿੱਧੂ ਨੂੰ ਉੱਪ ਮੁੱਖ ਮੰਤਰੀ ਬਣਾਉਣ ਲਈ ਰਾਜ਼ੀ ਨਹੀਂ ਕੈਪਟਨ- ਇਕ ਖ਼ਬਰ

ਆਉਂਦੀ ਜਾਂਦੀ ਨੂੰ ਘੜਾ ਚੁਕਾਉਂਦਾ, ਮਗਰੋਂ ਮਾਰਦਾ ਗੋਡਾ।

ਅਕਾਲੀ-ਬਸਪਾ ਗੱਠਜੋੜ ਵਲੋਂ ਕਾਂਗਰਸ ਸਰਕਾਰ ਵਿਰੁੱਧ ਘੜਾ ਭੰਨ ਪ੍ਰਦਰਸ਼ਨ- ਇਕ ਖ਼ਬਰ

ਗੁੱਸਾ ਨਾ ਕਰ ਨੀਂ, ਗੁੱਸਾ ਸਿਹਤ ਲਈ ਮਾੜਾ।

ਐੱਸ.ਆਈ.ਟੀ. ਜਾਂਚ: ਕੇਸ ਪੁਰਾਣਾ ਹੈ, ਹੁਣ ਉਮਰ ਹੋ ਗਈ ਹੈ ਕੁਝ ਯਾਦ ਨਹੀਂ –ਬਾਦਲ

 ਨਰਮ ਸਰੀਰਾਂ ਨੂੰ, ਪੈ ਗਏ ਮਾਮਲੇ ਭਾਰੀ।

ਰਾਹੁਲ ਤੇ ਸੋਨੀਆ ਗਾਂਧੀ ਨੂੰ ਮਿਲੇ ਬਿਨਾਂ ਹੀ ਕੈਪਟਨ ਨੂੰ ਵਾਪਸ ਪਰਤਣਾ ਪਿਆ- ਇਕ ਖ਼ਬਰ

ਬੜੇ ਬੇਆਬਰੂ ਹੋ ਕਰ ਤਿਰੇ ਕੂਚੇ ਸੇ ਹਮ ਨਿਕਲੇ।

ਮੈਨੂੰ ਨਜ਼ਰ ਅੰਦਾਜ਼ ਨਹੀਂ ਦਰਕਿਨਾਰ ਕੀਤਾ ਗਿਆ- ਮਾਸਟਰ ਮੋਹਨ ਲਾਲ

ਅੱਖਾਂ ਗਹਿਰੀਆਂ ਤੇ ਮੁੱਖ ਕੁਮਲਾਏ, ਜਿਹਨਾਂ ਦੇ ਰਾਤੀਂ ਯਾਰ ਵਿਛੜੇ।

ਕੀ ਅਕਾਲੀ ਦਲ ਸੰਯੁਕਤ ਲਈ ‘ਆਪ’ ਨਾਲ ਗੱਠਜੋੜ ਕਰਨਾ ਮਜਬੂਰੀ ਬਣ ਗਈ ਹੈ?- ਇਕ ਖ਼ਬਰ

ਪਾਰ ਪੱਤਣੋਂ ਯਾਰ ਨੂੰ ਮਿਲਣਾ, ਪਾਰ ਲੰਘਾ ਦੇ ਘੜਿਆ।

ਅੰਦੋਲਨ ਦੀ ਥਾਂ ਕਿਸਾਨ ਖੇਤੀ ਕਾਨੂੰਨਾਂ ਬਾਰੇ ਜਾਣਕਾਰੀ ਹਾਸਲ ਕਰਨ- ਖੱਟਰ

ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ।

ਪ੍ਰਿਯੰਕਾ ਗਾਂਧੀ ਯੂ.ਪੀ. ਵਿਧਾਨ ਸਭਾ ਚੋਣਾਂ ਲਈ ਇਕ ਵੱਡਾ ਚਿਹਰਾ- ਸਲਮਾਨ ਖ਼ੁਰਸ਼ੀਦ

ਜੀ ਰੰਗ ਬਰਸ ਰਿਹਾ, ਮਾਤਾ ਦੇ ਦਰਬਾਰ।

ਸਿੱਖ ਕਤਲੇਆਮ ਪੀੜਤਾਂ ਵਲੋਂ ਸੁਖਬੀਰ ਬਾਦਲ ਨਾਲ ਮੁਲਾਕਾਤ- ਇਕ ਖ਼ਬਰ

ਵਿਹੜੇ ਖੇੜਿਆਂ ਦੇ ਤਿਲਕਣਬਾਜ਼ੀਆਂ ਨੇ, ਜ਼ਰਾ ਸੋਚ ਕੇ ਕਦਮ ਉਠਾਇਉ ਜੀ।

ਕਾਂਗਰਸ ਹਾਈ ਕਮਾਨ ਨੇ ਕੈਪਟਨ ਨੂੰ ਦਿੱਲੀ ਸੱਦਿਆ- ਇਕ ਖ਼ਬਰ

ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਦਰਬਾਰ ‘ਚ ਪੇਸ਼ ਹੋ ਬਈ ਓ!

ਕੇਜਰੀਵਾਲ ਨੇ ਖੁਦ ਅੰਮ੍ਰਿਤਸਰ ਆ ਕੇ ਕੁੰਵਰ ਵਿਜੈ ਪ੍ਰਤਾਪ ਸਿੰਘ ਨੂੰ ਪਾਰਟੀ ‘ਚ ਸ਼ਾਮਲ ਕੀਤਾ- ਇਕ ਖ਼ਬਰ

ਨੀ ਮੈਂ ਤਲ਼ੀਆਂ ‘ਤੇ ਚੋਗ ਚੁਗਾਵਾਂ, ਮਿੱਤਰਾਂ ਦੇ ਤਿੱਤਰਾਂ ਨੂੰ।

20 June 2021

ਰਾਮ ਮੰਦਰ ਜ਼ਮੀਨ ਘਪਲਾ: ਅਸੀਂ ਦੋਸ਼ਾਂ ਦੀ ਪ੍ਰਵਾਹ ਨਹੀਂ ਕਰਦੇ- ਮੰਦਰ ਟਰਸਟੀ

ਕੀ ਬਣੂ ਦੁਨੀਆਂ ਦਾ, ਸੱਚੇ ਪਾਤਸ਼ਾਹ ਵਾਹਿਗੁਰੂ ਜਾਣੇ। 

ਨੀਦਰਲੈਂਡ ਦੀ ਰਾਜਕੁਮਾਰੀ ਨੇ 14 ਕਰੋੜ ਦਾ ਸਾਲਾਨਾ ਭੱਤਾ ਲੈਣ ਤੋਂ ਕੀਤਾ ਇਨਕਾਰ-ਇਕ ਖ਼ਬਰ

ਬੀਬੀ ਇਹ ਪੈਸੇ ਭਾਰਤ ਦੇ ਸਿਆਸਤਦਾਨਾਂ ਨੂੰ ਭੇਜ ਦੇ, ਵਿਚਾਰਿਆਂ ਦਾ ਗੁਜ਼ਾਰਾ ਬੜਾ ਮੁਸ਼ਕਿਲ ਨਾਲ ਹੁੰਦੈ।  

ਕਾਂਸ਼ੀ ਰਾਮ ਗੇਟ ਦਾ ਵਿਰੋਧ ਕਰਨ ਵਾਲੇ ਅਕਾਲੀ ਹੁਣ ਮਜਬੂਰੀ ਬਸ ਬਸਪਾ ਨਾਲ ਸਮਝੌਤਾ ਕਰ ਰਹੇ ਹਨ- ਅਵਿਨਾਸ਼ ਚੰਦਰ

ਅਵਿਨਾਸ਼ ਜੀ ਸਿਆਣੇ ਕਹਿੰਦੇ ਆ ਕਿ ਲੋੜ ਵੇਲੇ ....ਧੇ ਨੂੰ ਵੀ ਬਾਪ ਕਹਿਣਾ ਪੈਂਦੈ।

ਅਮਰੀਕਾ ਆਉਣ ਵਾਲੇ ਸ਼ਰਨਾਰਥੀਆਂ ਨੂੰ ਮਿਲੇਗੀ ਰਾਹਤ- ਬਾਇਡਨ

ਆ ਵੇ ਨਾਜਰਾ ਜਾਹ ਵੇ ਨਾਜਰਾ, ਬੋਤਾ ਬੰਨ੍ਹ ਦਰਵਾਜ਼ੇ।

ਕੇਂਦਰ ਸਰਕਾਰ ਕਿਸਾਨਾਂ ਦੇ ਸਬਰ ਦਾ ਇਮਤਿਹਾਨ ਨਾ ਲਵੇ- ਕਿਸਾਨ ਮੋਰਚਾ

ਬਦੀਆਂ ਨਾ ਕਰ ਵੇ, ਕੈ ਦਿਨ ਦੀ ਜ਼ਿੰਦਗਾਨੀ।       

ਕੈਨੇਡਾ ਰਹਿੰਦੇ ਵਿਅਕਤੀ ਦਾ ਪਲਾਟ ਪਿਓ ਤੇ ਭੈਣਾਂ ਨੇ ਧੋਖੇ ਨਾਲ ਵੇਚਿਆ-ਇਕ ਖ਼ਬਰ

ਯਮਲੇ ਨੇ ਤਾਂ ਹੀ ਗਾਇਆ ਸੀ: ਚਿੱਟਾ ਹੋ ਗਿਆ ਲਹੂ ਭਰਾਵੋ, ਚਿੱਟਾ ਹੋ ਗਿਆ ਲਹੂ।

ਕਿਸਾਨਾਂ ਦੀ ਹਮਾਇਤ ਵਿਚ ਉੱਤਰੀਆਂ ਕਈ ਟਰੇਡ ਯੂਨੀਅਨਾਂ- ਇਕ ਖ਼ਬਰ

ਮੁੰਡਾ ਤੇਰਾ ਮੈਂ ਚੁੱਕ ਲਊਂ, ਚਲ ਚਲੀਏ ਜਰਗ ਦੇ ਮੇਲੇ।

ਪੰਜਾਬ ਕਾਂਗਰਸ ਨੂੰ ਸੰਭਾਲਣ ਲਈ ਗੰਭੀਰ ਹੋਈ ਸੋਨੀਆ ਗਾਂਧੀ-ਇਕ ਖ਼ਬਰ

ਪੌੜੀ ਪੌੜੀ ਚੜ੍ਹਦੀ ਜਾਹ, ਜੈ ਮਾਤਾ ਦੀ ਕਰਦੀ ਜਾਹ।

ਗਿਆਨੀ ਮਾਨ ਸਿੰਘ ਆਪਣੇ ਨਾਲ਼ ਹੋਏ ਧੱਕੇ ਬਾਰੇ ਸੰਗਤਾਂ ਨੂੰ ਦੱਸਣ- ਸਰਚਾਂਦ ਸਿੰਘ ਖਿਆਲਾ

ਕੁਝ ਬੋਲ ਵੇ ਦਿਲਾਂ ਦੀ ਘੁੰਢੀ ਖੋਲ੍ਹ ਵੇ.................

ਪੰਜਾਬ ਨਾਲ ਸਬੰਧਤ ਕਈ ਸਿੱਖ ਸ਼ਖ਼ਸੀਅਤਾਂ ਭਾਜਪਾ ‘ਚ ਸ਼ਾਮਲ- ਇਕ ਖ਼ਬਰ

ਚੜ੍ਹ ਜਾਉ ਬੱਚਿਉ ਸੂਲੀ, ਰਾਮ ਭਲੀ ਕਰੇਗਾ।

2022 ਚੋਣਾਂ ਤੋਂ ਬਾਅਦ ਬਸਪਾ ਨੂੰ ਅਕਾਲੀਆਂ ਨਾਲ ਸਮਝੌਤਾ ਕਰ ਕੇ ਪਛਤਾਉਣਾ ਪਵੇਗਾ-ਢੀਂਡਸਾ

ਲਾ ਕੇ ਬਲੋਚਾਂ ਨਾਲ਼ ਯਾਰੀ, ਨੀਂ ਥਲ਼ਾਂ ਵਿਚ ਰੁਲ਼ ਜਾਏਂਗੀ।

ਕੇਂਦਰ ਸਰਕਾਰ ਨੇ ਮੁਕੁਲ ਰਾਏ ਦੀ ਜ਼ੈੱਡ ਸਕਿਉਰਿਟੀ ਵਾਪਸ ਲਈ-ਇਕ ਖ਼ਬਰ

ਯਾਰੀ ਲੱਗੀ ‘ਤੇ ਲੁਆ ‘ਤੇ ਤਖ਼ਤੇ, ਟੁੱਟੀ ‘ਤੇ ਚੁਗਾਠ ਪੁੱਟ ਲਈ।

ਚੀਨ ਆਲਮੀ ਸੁਰੱਖਿਆ ਲਈ ਚੁਣੌਤੀ- ਨਾਟੋ

ਸਭ ਪਾਸੇ ਪੁਆੜੇ ਪਾਉਂਦਾ, ਨੀਂ ਮਰ ਜਾਣਾ ਅਮਲੀ।

ਟਰੇਡ ਯੂਨੀਅਨਾਂ ਦੇ ਸਮਰਥਨ ਨਾਲ਼ ਕਿਸਾਨਾਂ ਦੇ ਹੌਸਲੇ ਬੁਲੰਦ- ਇਕ ਖ਼ਬਰ

ਤੇਰੇ ਪਿਆਰ ਵਿਚ ਰੰਗ ਲਈ ਵੇ, ਮੈਂ ਤਾਂ ਚੁੰਨੀ ਜੋਗੀਆ।

13 June 2021

ਕੁਰਸੀ ਲਈ ਖੱਟਰ ਅਤੇ ਵਿੱਜ ਦਰਮਿਆਨ ਠੰਢੀ ਜੰਗ ਜਾਰੀ-ਟਿਕੈਤ
ਕੁੰਢੀਆਂ ਦੇ ਸਿੰਗ ਫ਼ਸ ਗਏ, ਕੋਈ ਨਿੱਕਲੂ ਵੜੇਵੇਂ ਖਾਣੀ।

ਕੇਂਦਰ ਨੇ ਪੰਜਾਬ ਦਾ ਦਿਹਾਤੀ ਫੰਡ ਜਾਰੀ ਕਰਨ ਤੋਂ ਕੀਤੀ ਨਾਂਹ- ਇਕ ਖ਼ਬਰ
ਮੇਰਾ ਲੌਂਗ ਖੁਣੋਂ ਨੱਕ ਖਾਲੀ, ਆਪੂੰ ਸੂਟ ਪਾਵੇ ਦਸ ਲੱਖ ਦਾ।

ਐਸ.ਆਈ. ਟੀ. ਵਲੋਂ ਪ੍ਰਕਾਸ਼ ਸਿੰਘ ਬਾਦਲ ਤਲਬ- ਇਕ ਖ਼ਬਰ
ਭੱਜ ਲੈ ਭਾਈਆ ਮੇਦਾਂਤਾ ਨੂੰ।

ਅਧਿਆਪਕਾਂ ਤੇ ਮੁਲਾਜ਼ਮਾਂ ਨੂੰ ਪਹਿਲਾਂ ਅਕਾਲੀ/ਭਾਜਪਾ ਸਰਕਾਰ ਕੁੱਟਦੀ ਸੀ ਹੁਣ ਕਾਂਗਰਸ ਕੁੱਟਦੀ ਹੈ- ਪ੍ਰੋ. ਮੁਲਤਾਨੀ
ਬੁੜ੍ਹੀ ਮਰੀ, ਕੁੜੀ ਜੰਮ ਪਈ।

ਕੈਪਟਨ ਅਮਰਿੰਦਰ ਸਿੰਘ ਨੂੰ ਜਗਾਉਣ ਲਈ ਬੇਰੋਜ਼ਗਾਰ ਅਧਿਆਪਕਾਂ ਨੇ ਕੀਤੇ ਬੂਟ ਪਾਲਿਸ਼- ਇਕ ਖ਼ਬਰ
ਬੂਟ ਪਾਲਿਸ਼ਾਂ ਨਾਲੋਂ ਚੀਕੂ ਤੇ ਸੀਤਾ ਫ਼ਲ ਭੇਜ ਦਿੰਦੇ ਤਾਂ ਕੋਈ ਗੱਲ ਵੀ ਬਣਦੀ।

ਅਰਦਾਸ ਮੁੱਦਾ ਪੰਜਾਬ ਦਲਿਤ ਮੁੱਦੇ ਵਜੋਂ ਉਭਾਰਨਾ ਭਾਜਪਾ ਨੂੰ ਪੁੱਠਾ ਪਿਆ- ਇਕ ਖ਼ਬਰ
ਪੁੱਠਾ ਪੰਗਾ ਲੈ ਲਿਆ ਜੱਟੀਏ, ਬੋਕ ਦੇ ਸਿੰਙਾਂ ਨੂੰ ਹੱਥ ਲਾ ਕੇ।

ਅਕਾਲੀ ਦਲ ਦੀ ਸਰਕਾਰ ਬਣਨ ‘ਤੇ ਧਰਮਸੋਤ ਅਤੇ ਬਲਬੀਰ ਸਿੱਧੂ ਨੂੰ ਜੇਲ੍ਹ ਭੇਜਾਂਗੇ- ਸੁਖਬੀਰ ਬਾਦਲ
ਜਿਹੋ ਜਿਹਾ ਰਾਜੇ ਨੇ ਤੁਹਾਨੂੰ ਭੇਜਿਆ, ਲੋਕ ਸਮਝ ਗਏ ਤੁਹਾਡੀਆਂ ਲਿੱਚ-ਗੜਿੱਚੀਆਂ।

ਮੇਦਾਂਤਾ ਹਸਪਤਾਲ ‘ਚ ਦਾਖ਼ਲ ਸੌਦਾ ਸਾਧ ਨੂੰ ਮਿਲਣ ਲਈ ਪਹੁੰਚੀ ਹਨੀਪ੍ਰੀਤ—ਇਕ ਖ਼ਬਰ
ਚੁੱਕ ਚਰਖ਼ਾ ਗਲ਼ੀ ਦੇ ਵਿਚ ਡਾਹੁੰਦੀਆਂ ਜਿਨ੍ਹਾਂ ਨੂੰ ਲੋੜ ਮਿੱਤਰਾਂ ਦੀ।

ਅਸੈਂਬਲੀ ਚੋਣਾਂ ਵਿਚ ਪਾਰਟੀ ਦੀ ਕਾਰਗੁਜ਼ਾਰੀ ਦੀ ਵਿਆਪਕ ਸਮੀਖਿਆ ਹੋਵੇ-ਮੋਦੀ
ਛੜੇ ਬੈਠ ਕੇ ਸਲਾਹਾਂ ਕਰਦੇ, ਕੌਣ ਕੌਣ ਹੋਈਆਂ ਰੰਡੀਆਂ।

ਪੰਜਾਬ ਦੀ ਤਰੱਕੀ ਲਈ ਅਫ਼ਸਰਸ਼ਾਹੀ ਅਪਣਾ ਕੰਮ ਕਾਰ ਦਾ ਢੰਗ ਬਦਲੇ- ਕਰਨ ਰੰਧਾਵਾ
ਰੰਡੀਆਂ ਤਾਂ ਰੰਡ ਕੱਟ ਲੈਣ ਪਰ ਜੈਕਟਾਂ ਵਾਲ਼ੇ (ਰਾਜਸੀ ਨੇਤਾ) ਨਹੀਂ ਕੱਟਣ ਦਿੰਦੇ।

ਭਾਜਪਾ ਸਰਕਾਰ ਸੁਰਖੀਆਂ ‘ਚ ਰਹਿਣ ਦੀ ਚਾਹਵਾਨ ਪਰ ਕੰਮ ਨਹੀਂ ਕਰਨਾ ਚਾਹੁੰਦੀ- ਕਾਂਗਰਸ
ਚੁੱਲ੍ਹੇ ਚੌਂਕੇ ਹੱਥ ਨਾ ਲਾਵੇ, ਸੁਰਮਾ ਫਿਰੇ ਮਟਕਾਉਂਦੀ।

ਹਮਖ਼ਿਆਲੀਆਂ ਨਾਲ ਗੱਠਜੋੜ ਨਾ ਹੋਣ ਦੀ ਸੂਰਤ ਵਿਚ ਇਕੱਲੇ ਹੀ ਚੋਣਾਂ ਲੜਾਂਗੇ-ਢੀਂਡਸਾ
ਘੜਾ ਚੁੱਕ ਲਊਂ ਪੱਟਾਂ ‘ਤੇ ਹੱਥ ਧਰ ਕੇ , ਖਸਮਾਂ ਨੂੰ ਖਾਣ ਕੁੜੀਆਂ।

ਕਿਸਾਨਾਂ ਦੀ ਆਮਦਨ ਦੁੱਗਣੀ ਕਰਨ ਦੇ ਸਭ ਵਾਅਦੇ ਝੂਠੇ- ਦਰਸ਼ਨ ਪਾਲ
ਢਾਬ ਤੇਰੀ ਦਾ ਗੰਧਲਾ ਪਾਣੀ ਉਤੋਂ ਬੂਰ ਹਟਾਵਾਂ।

ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਸਿਆਸੀ ਦੌੜ ਹੋਈ ਤੇਜ਼- ਇਕ ਖ਼ਬਰ
ਨਿੱਕੀ ਨਿੱਕੀ ਕਣੀ ਦਾ ਮੀਂਹ ਵਰਸੇਂਦਾ, ਬੱਦਲਾਂ ਨੇ ਪਾ ਲਏ ਘੇਰੇ।

ਐਸ.ਜੀ.ਪੀ.ਸੀ. ਦੇ ਅਜਾਇਬ ਘਰ ‘ਚ ਧਰਮੀ ਫੋਜੀਆਂ ਦੀ ਜਗ੍ਹਾ ਡੇਰੇਦਾਰਾਂ ਦੀਆਂ ਤਸਵੀਰਾਂ ਕਿਉਂ?-ਦਲੇਰ ਸਿੰਘ ਡੋਡ
ਡੇਰੇਦਾਰਾਂ ਤੋਂ ਤਾਂ ਵੋਟਾਂ ਮਿਲਦੀਆਂ ਬਈ, ਧਰਮੀ ਫੌਜੀ ਵਿਚਾਰੇ ਕੀ ਦੇਣਗੇ।  

ਕੋਰੋਨਾ ਤੋਂ ਬਚਾਅ ਦਾ ਟੀਕਾ ਜਲਦੀ ਲਗਵਾਵਾਂਗਾ- ਰਾਮ ਦੇਵ
ਆਕੜਦੈਂ! ਅਸੀਂ ਸਾਨ੍ਹ ਹੁੰਨੇ ਆਂ। ਹੁਣ ਮੋਕ ਮਾਰਦੈਂ! ਗਊ ਦਾ ਜਾਇਆ ਜੁ ਹੋਇਆ।

07 June 2021

ਕੇਂਦਰ ਨੇ ਕੇਜਰੀਵਾਲ ਦੀ ਘਰ-ਘਰ ਰਾਸ਼ਨ ਦੀ ਸਕੀਮ ਰੋਕੀ-ਇਕ ਖ਼ਬਰ
ਨਾ ਬਈ ਨਾ! ਅਸੀਂ ਕੇਜਰੀਵਾਲ ਨੂੰ ਲੋਕਾਂ ‘ਤੇ ਇਹ ‘ਜ਼ੁਲਮ’ ਨਹੀਂ ਕਰਨ ਦੇਣਾ।

ਟੀਕਾਕਰਨ ਲਈ ਜਾਰੀ ਕੀਤੇ 35 ਹਜ਼ਾਰ ਕਰੋੜ ਰੁਪਏ ਕਿੱਥੇ ਗਏ?- ਪ੍ਰਿਅੰਕਾ ਗਾਂਧੀ
ਜਿਧਰ ਗਈਆਂ ਬੇੜੀਆਂ, ਉਧਰ ਗਏ ਮਲਾਹ।

ਹੁਣ ਵਿਧਾਇਕਾਂ ਦੇ ਪੁੱਤਰਾਂ ਨੂੰ ਹੀ ਮਿਲਣਗੀਆਂ ਸਰਕਾਰੀ ਨੌਕਰੀਆਂ- ਅਜੈ ਲਿਬੜਾ
ਅੰਨ੍ਹਾ ਵੰਡੇ ਰਿਉੜੀਆਂ ਮੁੜ ਮੁੜ ਆਪਣਿਆਂ ਨੂੰ ਦੇਹ।

ਪ੍ਰਾਈਵੇਟ ਹਸਪਤਾਲਾਂ ਨੂੰ ਕੋਰੋਨਾ ਵੈਕਸੀਨ ਵੇਚ ਰਹੀ ਹੈ ਕੈਪਟਨ ਸਰਕਾਰ- ਸੁਖਬੀਰ ਬਾਦਲ
ਪੰਜ ਛੇ ਮਹੀਨੇ ਰਹਿ ਗਏ ਸਾਰੇ, ਬਣਾ ਲੈਣ ਦੇ ਚਾਰ ਪੈਸੇ, ਕਾਹਨੂੰ ਢਿੱਡ ‘ਤੇ ਲੱਤ ਮਾਰਦੈਂ।

ਕਾਂਗਰਸ ਦਾ ਦੋਹਰਾ ਚਿਹਰਾ- ਵਿਧਾਇਕ ਨੇ ਰਿਲਾਇੰਸ ਪੰਪ ਦਾ ਕੀਤਾ ਉਦਘਾਟਨ- ਇਕ ਖ਼ਬਰ
ਹਾਥੀ ਦੇ ਦੰਦ ਖਾਣ ਦੇ ਹੋਰ ਦਿਖਾਉਣ ਦੇ ਹੋਰ।

ਪੰਜ ਦਿਨਾਂ ਬਾਅਦ ਵੀ ਡਿਗੇ ਦਰਖਤ ਨੂੰ ਸੜਕ ‘ਚੋਂ ਹਟਾਉਣ ਵਿਚ ਚੰਡੀਗੜ੍ਹ ਨਗਮ ਫੇਲ੍ਹ- ਇਕ ਖ਼ਬਰ
ਯਾਰ, ਇਕ ਅੱਧਾ ਐਕਸੀਡੈਂਟ ਤਾਂ ਹੋ ਲੈਣ ਦਿਉ, ਬਹੁਤ ਕਾਹਲੇ ਪੈ ਜਾਂਦੇ ਹੋ ਤੁਸੀਂ।

ਆਪਣੇ ਵਿਆਹ ਦੇ ਚਾਅ ਵਿਚ ਲਾੜੀ ਨੇ ਗੋਲੀ ਚਲਾਈ- ਇਕ ਖ਼ਬਰ
 ਮੈਂ ਕਿਹੜਾ ਤੇਰੇ ਨਾਲ਼ੋਂ ਘੱਟ ਮੁੰਡਿਆ, ਘੋੜਾ ਦੱਬਦੀ ਦੀ ਫ਼ੋਟੋ ਖਿੱਚ ਮੁੰਡਿਆ।

ਸਿੱਧੂ ਸਣੇ 25 ਵਿਧਾਇਕਾਂ ਨੇ ਕਾਂਗਰਸ ਕਮੇਟੀ ਸਾਹਮਣੇ ਰੱਖਿਆ ਆਪਣਾ ਪੱਖ- ਇਕ ਖ਼ਬਰ
ਸਾਡੀ ਕਦਰ ਕਿਸੇ ਨਾ ਜਾਣੀ ਜੀ, ਸਾਡੀ ਸੁਣ ਲਇਓ ਰਾਮ ਕਹਾਣੀ ਜੀ।

1984 ਦੇ ਸਰਕਾਰੀ ਤਸ਼ੱਦਦ ਦਾ ਰਿਕਾਰਡ ਅਕਾਲ ਤਖ਼ਤ ਵਲੋਂ ਇਕੱਠਾ ਕੀਤਾ ਜਾਵੇਗਾ- ਜਥੇਦਾਰ
ਜਥੇਦਾਰ ਜੀ, ਕੀ ਆਪਣੇ ਆਕਾਵਾਂ ਤੋਂ ਆਗਿਆ ਲੈ ਲਈ ਹੈ?

ਭਾਰਤੀ ਅਰਥਚਾਰੇ ਲਈ ਸਭ ਤੋਂ ਹਨ੍ਹੇਰਾ ਵਰ੍ਹਾ 2020-21-ਚਿਦੰਬਰਮ
ਗਰਦ ਚੜ੍ਹੀ ਆਸਮਾਨ ਨੂੰ, ਹੋਇਆ ਧੁੰਦੂਕਾਰਾ।

ਡਰ ਅਤੇ ਘਬਰਾਹਟ ਜਿਹੇ ਸ਼ਬਦ ਮੇਰੀ ਜ਼ਿੰਦਗੀ ਦੀ ਡਿਕਸ਼ਨਰੀ ਨਹੀਂ ਹਨ-ਜਥੇ:ਹਵਾਰਾ
ਸ਼ਾਹ ਮੁਹੰਮਦਾ ਸਿਰਾਂ ਦੀ ਲਾ ਬਾਜ਼ੀ, ਨਹੀਂ ਮੋੜਦੇ ਸੂਰਮੇ ਅੰਗ ਮੀਆਂ।

ਉੱਤਰ ਪ੍ਰਦੇਸ਼ ਦੀਆਂ ਚੋਣਾਂ ‘ਚ ਹਿੰਦੂ ਪੱਤਾ ਖੇਡੇਗੀ ਭਾਜਪਾ- ਇਕ ਖ਼ਬਰ
ਬੋਦੀ ਵਾਲ਼ਾ ਤਾਰਾ ਚੜ੍ਹਿਆ, ਘਰ ਘਰ ਹੋਣ ਵਿਚਾਰਾਂ।

ਕੈਪਟਨ ਅਤੇ ਬਾਗ਼ੀ ਧੜੇ ਦੀਆਂ ਨਜ਼ਰਾਂ ਗਾਂਧੀ ਪਰਵਾਰ ‘ਤੇ ਟਿਕੀਆਂ- ਇਕ ਖ਼ਬਰ
ਵਿਚ ਦਰਬਾਰ ਦੋਵੇਂ ਅਰਜ਼ ਕਰੇਂਦੇ, ਮਿਹਰ ਕਰੀਂ ਤੂੰ ਦਾਤੀਏ।

ਭਾਜਪਾ ਨੂੰ ਸਰਕਾਰ ਬਣਾਉਣ ਦਾ ਮੌਕਾ ਦੇਣ ਲਈ ਪੰਜਾਬੀ ਤਿਆਰ- ਦੁਸ਼ਿਅੰਤ ਗੌਤਮ
ਘੱਲਿਆ ਸੀ ਮੈਂ ਹੋਲ਼ਾਂ ਕਰਨ ਨੂੰ, ਸਾੜ ਲਿਆਇਆ ਦਾੜ੍ਹੀ।

31 ਮਈ 2021

ਕੋਰੋਨਾ ਦੇ ਸਰੋਤ ਸਬੰਧੀ ਅਮਰੀਕੀ ਮੀਡੀਆ ਦਾ ਚੀਨ ਵਲ ਪੁਖ਼ਤਾ ਇਸ਼ਾਰਾ- ਇਕ ਖ਼ਬਰ

ਵਾਰਸਸ਼ਾਹ ਹੈ ਚੁਗਲ ਦੀ ਸ਼ਕਲ ਕੈਦੋ, ਇਹ ਮੂਲ ਹੈ ਸਭ ਬਖੇੜਿਆਂ ਦਾ।

ਸਰਕਾਰ ਨੇ ਬਿਜਲੀ ਸਮਝੌਤਿਆਂ ਬਾਰੇ ਵ੍ਹਾਈਟ ਪੇਪਰ ਤੋਂ ਪਾਸਾ ਵੱਟਿਆ-ਇਕ ਖ਼ਬਰ

ਸੋਨੇ ਦੇ ਤਵੀਤ ਵਾਲੀਏ, ਤੇਰੀ ਹਰ ਮੱਸਿਆ ਬਦਨਾਮੀ।

ਮੋਦੀ ਸਰਕਾਰ ਨੇ ਕਿਸਾਨਾਂ ਦੇ ਜੀਵਨ ‘ਚ ਬਦਲਾਅ ਲਿਆਂਦਾ- ਜਾਵੜੇਕਰ

ਖਵਾਜੇ ਦਾ ਗਵਾਹ ਡੱਡੂ।

ਮੌਜੂਦਾ ਸਰਕਾਰ ਦਾ ਅਕਸ ਵਿਗਾੜਨ ਦੀ ਸਿਆਸੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ-ਜੈਸ਼ੰਕਰ

ਟੁੱਟ ਪੈਣੇ ਦਾ ਕੁਲੱਛਣਾ ਬੋਤਾ, ਚੜ੍ਹਦੀ ਨੂੰ ਵੱਢੇ ਦੰਦੀਆਂ।

ਮੋਦੀ ਰਾਜ ਵਿਚ ਕੇਂਦਰ ਅਤੇ ਸੂਬਿਆਂ ਦਰਮਿਆਨ ਵਧੀ ਤਲਖੀ- ਕਾਂਗਰਸੀ ਨੇਤਾ ਮੋਇਲੀ

ਚੰਨਣ ਦੇਹੀ ਆਪ ਗਵਾ ਲਈ, ਬਾਂਸਾਂ ਵਾਂਗੂੰ ਖਹਿ ਕੇ।

ਬਾਦਲਾਂ ਨੇ ਸ਼੍ਰੋਮਣੀ ਕਮੇਟੀ ਨੂੰ ਆਪਣੀ ਨਿਜੀ ਜਾਗੀਰ ਬਣਾਇਆ- ਬ੍ਰਹਮਪੁਰਾ

ਰਾਤੀਂ ਧਾੜ ਪਈ, ਲੁੱਟਿਆ ਤਖ਼ਤ ਹਜ਼ਾਰਾ।

ਕਾਂਗਰਸ ਦੀ ਪਾਟੋਧਾੜ ਰੋਕਣ ਲਈ ਹਰੀਸ਼ ਰਾਵਤ ਸਭ ਨੂੰ ਠੰਢਾ ਕਰ ਰਹੇ ਹਨ-ਇਕ ਖ਼ਬਰ

ਪਾ ਕੇ ਮੁੰਦਰਾਂ ਤੂੰ ਤੋਰ ਦੇ ਫ਼ਕੀਰ ਨੂੰ, ਤੇਰਾ ਕਿਹੜਾ ਮੁੱਲ ਲਗਦਾ।

ਦੇਸ਼ ਭਰ ‘ਚ ਹੋ ਰਹੇ ਵਿਰੋਧ ਤੋਂ ਸਬਕ ਲਵੇ ਭਾਜਪਾ-ਸੰਯੁਕਤ ਕਿਸਾਨ ਮੋਰਚਾ

ਪੀ ਸ਼ਰਾਬਾਂ ਤਖ਼ਤੋਂ ਲੱਥੇ ਰਾਜੇ ਰਾਜ ਗਵਾ ਕੇ, ਤਾਜ ਲੁਹਾ ਕੇ।

ਕਿਸੇ ਦੇ ਪਿਓ ‘ਚ ਦਮ ਨਹੀਂ ਜੋ ਮੈਨੂੰ ਗ੍ਰਿਫ਼ਤਾਰ ਕਰ ਸਕੇ- ਰਾਮਦੇਵ

ਮੈਂ ਸਲਵਾਰ ਪਹਿਨ ਉੜ ਜਾਊਂਗਾ, ਤੁਮ ਦੇਖਤੇ ਰਹੀਉ।

ਕਰੋਨਾ ਮਹਾਂਮਾਰੀ ਦੀ ਥਾਂ ਭਾਜਪਾ ਦਾ ਸਾਰਾ ਧਿਆਨ ਯੂ.ਪੀ. ਚੋਣਾਂ ਵਲ- ਸ਼ਿਵ ਸੈਨਾ

ਤਰਫ਼ ਮੁਲਕ ਦੇ ਨਹੀਂ ਖ਼ਿਆਲ ਤੇਰਾ, ਮਤਲਬ ਆਪਣੇ ਦਾ ਨਿਰਾ ਯਾਰ ਏਂ ਤੂੰ।

ਦੇਸ਼ ‘ਚ ਕੋਰੋਨਾ ਦੀ ਦੂਜੀ ਲਹਿਰ ਲਈ ਪ੍ਰਧਾਨ ਮੰਤਰੀ ਦੀ ‘ਨੌਟੰਕੀ’ ਜ਼ਿੰਮੇਵਾਰ-ਰਾਹੁਲ ਗਾਂਧੀ

ਕਾਂ ਬਾਗ਼ ਦੇ ਵਿਚ ਕਲੋਲ ਕਰਦੇ, ਕੂੜਾ ਫੋਲਣੇ ਦੇ ਉੱਤੇ ਮੋਰ ਕੀਤੇ।

ਚੋਣਾਂ ਵਾਲੇ ਹਰ ਸੂਬੇ ‘ਚ ਕਿਸਾਨਾਂ ਵਲੋਂ ਭਾਜਪਾ ਵਿਰੁੱਧ ਲਾਮਬੰਦੀ ਦਾ ਐਲਾਨ-ਇਕ ਖ਼ਬਰ

ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲੀਏ।

ਜੂਨ ਵਿਚ ਪੰਜਾਬ ਫੇਰੀ ‘ਤੇ ਅਮਿਤ ਸ਼ਾਹ ਦੇ ਆਉਣ ਦੀਆਂ ਕੰਨਸੋਆਂ- ਇਕ ਖ਼ਬਰ

ਆਪਣੇ ਆਪ ਨੂੰ ਖ਼ੁਦਾ ਕਹਾਵਨਾ ਏਂ, ਤੂੰ ਤਾਂ ਬੜਾ ਏਂ ਕੋਈ ਸ਼ੈਤਾਨ ਭਾਈ।

ਸਰਕਾਰ ਵਲੋਂ ਸਿੱਖਿਆ ਦਾ ਮਿਆਰ ਉੱਪਰ ਚੁੱਕਣ ਲਈ ਵਿਸ਼ੇਸ਼ ਉਪਰਾਲੇ- ਨਾਗਰਾ

ਦੇਖਿਉ ਕਿਤੇ ਏਨਾ ਨਾ ਚੁੱਕ ਦਿਉ ਕਿ ਹੇਠਾਂ ਉਤਾਰਨਾ ਮੁਸ਼ਕਿਲ ਹੋ ਜਾਵੇ।

ਮੋਦੀ ਸਾਹਿਬ ਜ਼ਿਦ ਛੱਡ ਕੇ ਕਿਸਾਨਾਂ ਦੀਆਂ ਮੰਗਾਂ ਮੰਨੋ- ਸੁਖਬੀਰ ਬਾਦਲ

ਪਿੱਛੋਂ ਆਖਦੇ ਰੱਬਾ ਤੂੰ ਸੁਖ ਰੱਖੀਂ, ਲਾ ਕੇ ਰੂਈਂ ਦੇ ਨਾਲ਼ ਅੰਗਾਰਿਆਂ ਨੂੰ।

ਮਨਪ੍ਰੀਤ ਬਾਦਲ ਨੇ ਖਜ਼ਾਨਾ ਮੰਤਰੀ ਸੀਤਾਰਮਨ ਨੂੰ ਖ਼ਤ ਲਿਖਿਆ- ਇਕ ਖ਼ਬਰ

ਕਦੇ ਚੁੱਕਦੀ ਨਹੀਂ ਫੋਨ ਮੇਰਾ ਵੈਰਨੇ, ਤਾਹੀਉਂ ਖ਼ਤ ਲਿਖਣਾ ਪਿਆ।