15 Sep. 2020

ਸੁਮੇਧ ਸੈਣੀ ਦੀ ਗ੍ਰਿਫ਼ਤਾਰੀ ਨੂੰ ਲੈ ਕੇ ਪ੍ਰਸ਼ਾਸਨ ‘ਤੇ ਟਿਕੀਆਂ ਲੋਕਾਂ ਦੀਆਂ ਨਜ਼ਰਾਂ- ਇਕ ਖ਼ਬਰ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

ਸੁਖਬੀਰ ਬਾਦਲ ਸਪਸ਼ਟ ਕਰੇ ਕਿ ਖੇਤੀ ਆਰਡੀਨੈਂਸ ਕਿਸਾਨ ਪੱਖੀ ਹਨ ਕਿ ਕਿਸਾਨ ਮਾਰੂ- ਬਾਜਵਾ
ਸੱਪ ਦੇ ਮੂੰਹ ‘ਚ ਕਿਰਲੀ, ਖਾਵੇ ਤਾਂ ਕੋਹੜੀ ਛੱਡੇ ਤਾਂ ਕਲੰਕੀ।

ਮਾਲੀ ਸੰਕਟ ਦੇ ਬਾਵਜੂਦ ਦਿੱਲੀ ਕਮੇਟੀ ਥੋਕ ਦੇ ਭਾਅ ਚੇਅਰਮੈਨੀਆਂ ਕਿਉਂ ਵੰਡ ਰਹੀ ਹੈ?- ਜੀ.ਕੇ.
ਜੀ.ਕੇ. ਸਾਬ ਅਲ੍ਹਕ ਵਛੇਰਿਆਂ ਨੂੰ ਖੁੰਡੇ ਨਾਲ ਬੰਨ੍ਹ ਕੇ ਰੱਖਣਾ ਪੈਂਦੈ।

ਕੰਗਨਾ ਰਣੌਤ ਦੇ ਦਫ਼ਤਰ ਨੂੰ ਢਾਉਣ ਵਿਚ ਸੂਬਾ ਸਰਕਾਰ ਦਾ ਕੋਈ ਹੱਥ ਨਹੀਂ- ਸ਼ਰਦ ਪਵਾਰ
ਭਾਈਆ ਪਵਾਰ ਲਗਦੈ ਤੂੰ ਵੀ ਵੱਡੇ ਬਾਦਲ ਦਾ ਜੂਠਾ ਖਾ ਲਿਐ।

ਸ਼੍ਰੋਮਣੀ ਕਮੇਟੀ ਦੇ ਜਨਰਲ ਇਜਲਾਸ ਵਿਚ ਹਰੇਕ ਮੈਂਬਰ ਨੂੰ ਬੋਲਣ ਦਾ ਅਧਿਕਾਰ ਹੋਵੇਗਾ- ਲੌਂਗੋਵਾਲ
ਪਰ ਉਹ ਬੋਲੇਗਾ ਉਹੀ ਜੋ ਉਸ ਨੂੰ ਲਿਖ ਕੇ ਦਿਤਾ ਜਾਵੇਗਾ।

ਕੈਪਟਨ ਦੀ ਲੀਡਰਸ਼ਿੱਪ ‘ਚ ਪੰਜਾਬ ‘ਚ ਤਰੱਕੀ ਦੀ ਰਫ਼ਤਾਰ ਹੋਈ ਸੁਸਤ-ਸੁਖਬੀਰ ਬਾਦਲ
ਤੁਸੀਂ ਹੁਣ ਨੂੰ ਕੈਲੇਫ਼ੋਰਨੀਆਂ ਬਣਾ ਦੇਣਾ ਸੀ।

ਗੁਰੂ ਗ੍ਰੰਥ ਸਾਹਿਬ ਦੇ ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਸਿਆਸਤ ਬੰਦ ਕਰ ਦੇਣੀ ਚਾਹੀਦੀ ਹੈ- ਲੌਂਗੋਵਾਲ
ਤੁਸੀਂ ਭੈੜੀਆਂ ਕਰਤੂਤਾਂ ਬੰਦ ਕਰ ਦਿਉ ਲੋਕ ਸਿਆਸਤ ਕਰਨੀ ਬੰਦ ਕਰ ਦੇਣਗੇ।

ਲੋਕ ਇਨਸਾਫ਼ ਪਾਰਟੀ ਵਲੋਂ ਘੇਰਿਆ ਜਾਵੇਗਾ ਕੈਪਟਨ ਦਾ ਮੋਤੀ ਮਹਿਲ-  ਤਲਵਿੰਦਰ ਸਿੰਘ ਮਾਨ
ਮੋਤੀ ਮਹਿਲ ‘ਚੋਂ ਛਿੱਕੂ ਲੈਣੈ, ਫਾਰਮ ਹਾਊਸ ‘ਤੇ ਜਾਉ ਪਿਆਰਿਓ।

ਪੰਜਾਬ ਸਰਕਾਰ ਨੇ ਨਿਜੀ ਸਕੂਲਾਂ ਨੂੰ ਮਾਨਤਾ ਦੇਣ ਦੀ ਵਿਧੀ ਨੂੰ ਬਣਾਇਆ ਸੁਖਾਲਾ- ਇਕ ਖ਼ਬਰ
ਤਾਂ ਕਿ ਜਿਹੜਾ ਮਰਜ਼ੀ ਲੱਲੀ-ਛੱਲੀ ਸਕੂਲ ਖੋਲ੍ਹ ਕੇ ਮਾਪਿਆਂ ਨੂੰ ਲੁੱਟ ਸਕੇ।

ਕੰਗਨਾ ਦਾ ਬੰਗਲਾ ਢਾਉਣ ਪਿੱਛੇ ਕੋਈ ਲੁਕਵਾਂ ਏਜੰਡਾ ਨਹੀਂ- ਸ਼ਿਵ ਸੈਨਾ
ਐਵੇਂ ਸ਼ੁਗਲ ਸ਼ੁਗਲ ‘ਚ ਮਾਂਜਾ ਫਿਰ ਗਿਆ ਸਾਥੋਂ।

ਸਾਲ ਕੁ ਔਖੇ ਸੌਖੇ ਕੱਟ ਲਉ, ਸੱਤਾ ‘ਚ ਆ ਕੇ ਨਕਸ਼ੇ ਬਦਲ ਦਿਆਂਗੇ-ਸੁਖਬੀਰ ਬਾਦਲ
ਕੁੰਡੀਆਂ ਲਾ ਕੇ ਜਿੰਨੀ ਮਰਜ਼ੀ ਬਿਜਲੀ ਫੂਕਿਓ।

ਸ਼੍ਰੋਮਣੀ ਕਮੇਟੀ ਨੂੰ ਢਾਅ ਲਾਉਣ ਵਾਲੇ ਆਪਣੇ ਮਕਸਦ ‘ਚ ਕਾਮਯਾਬ ਨਹੀਂ ਹੋਣਗੇ- ਲੌਂਗੋਵਾਲ
ਬਰਬਾਦਿ ਗ਼ੁਲਿਸਤਾਂ ਕਰਨੇ ਕੋ ਬਸ ਏਕ ਹੀ ਉੱਲੂ ਕਾਫੀ ਹੈ,
ਹਰ ਸ਼ਾਖ ਪੇ ਉਲੂ ਬੈਠਾ ਹੈ ਅੰਜਾਮੇ- ਗੁਲਿਸਤਾਂ ਕਿਆ ਹੋਗਾ।

ਵਜ਼ੀਫ਼ਾ ਘੁਟਾਲਾ: ਕਾਂਗਰਸ ਹਾਈਕਮਾਂਡ ਨੂੰ ਵੀ ਪੈਸਾ ਮਿਲਿਆ- ਸੁਖਬੀਰ ਬਾਦਲ
ਜਿਹੜੇ ਵਜ਼ੀਫ਼ਾ ਘੁਟਾਲੇ ਤੁਹਾਡੇ ਵੇਲੇ ਹੋਏ, ਉਹਨਾਂ ਦੇ ਪੈਸੇ ਕਿਸ ਨੂੰ ਮਿਲੇ ਸੀ?

ਮੈਂ ਟਰੰਪ ‘ਤੇ ਬਿਲਕੁਲ ਭਰੋਸਾ ਨਹੀਂ ਕਰਦੀ-ਕਮਲਾ ਹੈਰਿਸ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਪਾਵਨ ਸਰੂਪਾਂ ਦੇ ਮਾਮਲੇ ‘ਚ ਕੋਝੀ ਸਿਆਸਤ ਕਰਨ ਵਾਲ਼ੇ ਕਾਮਯਾਬ ਨਹੀਂ ਹੋਣਗੇ- ਸ਼ਰਨਜੀਤ ਢਿੱਲੋਂ
ਉਲਟਾ ਚੋਰ ਕੋਤਵਾਲ ਕੋ ਡਾਂਟੇ।

07 Sep. 2020

ਵਜ਼ੀਫ਼ਾ ਘੁਟਾਲਾ: ਹਰਸਿਮਰਤ ਨੇ ਅਮਰਿੰਦਰ ‘ਤੇ ਲਾਏ ਨਿਸ਼ਾਨੇ-ਇਕ ਖ਼ਬਰ
ਜਿੱਥੇ ਮਰਜ਼ੀ ਨਿਸ਼ਾਨੇ ਲਾ, ਹੁਣ ਤੇਰੇ ਦਿਨ ਬੱਲੀਏ।

ਆਪਣੀ ਪਾਰਟੀ ਦੀ ਸਰਕਾਰ ਨੂੰ ਦੂਲੋਂ ਨੇ ਫਿਰ ਘੇਰਿਆ- ਇਕ ਖ਼ਬਰ
ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲੀਏ।

ਖੇਤੀ ਆਰਡੀਨੈਂਸਾਂ ਦੇ ਹੱਕ ‘ਚ ਬਿਆਨ ਦੇਣ ਲਈ ਬਾਦਲ ਆਪਣੀ ਮਜਬੂਰੀ ਦੱਸੇ- ਜਾਖੜ
ਕੁੰਜੀਆਂ ਦੱਸ ਦਿੰਨੀ ਆਂ, ਮੇਰੇ ਪੁੱਤ ਦੇ ਛਵ੍ਹੀ ਨਾ ਮਾਰੀਂ ।

ਅਰੂਸਾ ਦੇ ਵੀਜ਼ੇ ਦੀ ਸਥਿਤੀ ਜਨਤਕ ਕੀਤੀ ਜਾਵੇ- ਭਗਵੰਤ ਮਾਨ
ਮੁੰਡੇ ਤੈਨੂੰ ਰੋਜ਼ ਪੁੱਛਦੇ, ਇਹ ਪੰਜੇਬਾਂ ਵਾਲ਼ੀ ਕੌਣ ਏ।

ਭਾਰਤ ਚੀਨ ਵਿਵਾਦ ਦੌਰਾਨ ਪਾਕਿ ਨਾਜਾਇਜ਼ ਫ਼ਾਇਦਾ ਉਠਾਉਣ ਦੀ ਕੋਸ਼ਿਸ਼ ਨਾ ਕਰੇ- ਫੌਜ ਮੁਖੀ ਰਾਵਤ
ਆਮ ਆਦਮੀ ਪਾਰਟੀ ਦੀ ਰੁਚੀ ਸਿਰਫ਼ ਆਪਣੇ ਸਿਆਸੀ ਏਜੰਡੇ ‘ਚ- ਅਮਰਿੰਦਰ ਸਿੰਘ
ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਪਠਾਨਕੋਟ ‘ਚ ਬੇਰੋਜ਼ਗਾਰ ਨੌਜਵਾਨਾਂ ਨੇ ਸੰਨੀ ਦਿਓਲ ਖ਼ਿਲਾਫ਼ ਕੀਤਾ ਮੁਜ਼ਾਹਰਾ- ਇਕ ਖ਼ਬਰ
ਉਹ ਵੀ ਦਿਨ ਯਾਦ ਕਰੋ ਜਦੋਂ ਸੰਨੀ ਦੇ ਰੋਡ ਸ਼ੋਅ ‘ਚ ਭੰਗੜਾ ਪਾਉਂਦੇ ਸੀ।

ਬਾਦਲਾਂ ਨੂੰ ਕਿਸਾਨੀ ਨਾਲੋਂ ਪਰਵਾਰ ਦੀ ਕੁਰਸੀ ਪਿਆਰੀ- ਜਾਖੜ
ਕਾਲ਼ਾ ਦਿਓਰ ਕੱਜਲ ਦੀ ਧਾਰੀ, ਅੱਖੀਆਂ ‘ਚ ਪਾਈ ਰੱਖਦੀ।

ਬਦ ਤੋਂ ਬਦਤਰ ਹੋਈ ਕਾਨੂੰਨ ਅਵਸਥਾ, ਜੰਗਲ ਰਾਜ ਵਰਗੇ ਹਾਲਾਤ- ‘ਆਪ ਪਾਰਟੀ’
ਕਾਂ ਬਾਗ਼ ਦੇ ਵਿਚ ਕਲੋਲ ਕਰਦੇ, ਕੂੜਾ ਫੋਲਣੇ ਨੂੰ ਇਥੇ ਮੋਰ ਕੀਤੇ।

ਬਿਜਲੀ ਸਮਝੌਤੇ: ਪੰਜਾਬ ਨੂੰ ਅੱਠ ਹਜ਼ਾਰ ਕਰੋੜ ਦਾ ਨਵਾਂ ਝਟਕਾ- ਇਕ ਖ਼ਬਰ
ਸੀਟੀ ਵਿਚ ਆਂਦਰਾਂ ਦੇ ਵੱਜਦੀ, ਕੰਨ ਲਾ ਕੇ ਸੁਣ ਅੜੀਏ।

ਪਾਕਿਸਤਾਨ ਸਰਕਾਰ ਹੁਣ ਭੰਗ ਦੀ ਖੇਤੀ ਕਰੇਗੀ- ਫਵਾਦ ਚੌਧਰੀ
ਥੱਲੇ ਕੂੰਡਾ ਉੱਤੇ ਘੋਟਣਾ, ਦੋਹਾਂ ਦਾ ਰਗੜਾ ਸਹਿੰਦੀ।

ਤਾਕਤ ਦੀ ਦੁਰਵਰਤੋਂ ਨਾਲ ਵਿਚਾਰ ਦਬਾਏ ਜਾਂਦੇ ਹਨ- ਪ੍ਰਸ਼ਾਂਤ ਭੂਸ਼ਨ
ਕਾਦਰਯਾਰ ਅਣਹੋਣੀਆਂ ਕਰਨ ਜਿਹੜੇ, ਆਖਰਵਾਰ ਉਹਨਾਂ ਪੱਛੋਤਾਵਣਾ ਜੀ।

ਪੁਲਿਸ ਨੇ ਕੈਪਟਨ ਦੀ ਰਿਹਾਇਸ਼ ਵਲ ਜਾਂਦੇ ਮੋਟੀਵੇਟਰਾਂ ਦੇ ‘ਮੌਰ’ ਸੇਕੇ- ਇਕ ਖ਼ਬਰ
ਮੋਟੀਵੇਸ਼ਨ ਵੀ ਤਾਂ ਚੈੱਕ ਕਰਨੀ ਐ ਕਿਸੇ ਤਰ੍ਹਾਂ ਬਈ ।

ਖੇਤੀ ਆਰਡੀਨੈਂਸ ਬਿਲਕੁਲ ਠੀਕ ਹੈ- ਪ੍ਰਕਾਸ਼ ਸਿੰਘ ਬਾਦਲ
ਭਾਈਆ ਏਸ ਉਮਰੇ ਤਾਂ ਕੁਝ ਪੁੰਨ ਖੱਟ ਲੈ ਸੱਚ ਬੋਲ ਕੇ।

ਕੈਪਟਨ ਵਲੋਂ ਕੇਜਰੀਵਾਲ ਨੂੰ ਪੰਜਾਬ ਤੋਂ ਦੂਰ ਰਹਿਣ ਦੀ ਨਸੀਹਤ- ਇਕ ਖਬਰ
ਹੱਥ ਸੋਚ ਕੇ ਗੰਦਲ਼ ਨੂੰ ਪਾਈਂ, ਕਿਹੜੀ ਏਂ ਤੂੰ ਸਾਗ ਤੋੜਦੀ।

30 Aug. 2020

ਹਰਿਆਣੇ ‘ਚ ਬੇਅਦਬੀ ਦੇ ਦੋਸ਼ੀਆਂ ਨੂੰ ਦੁਬਾਰਾ ਜ਼ਮਾਨਤ ਮਿਲਣ ‘ਤੇ ਸਿੱਖ ਹਲਕੇ ਹੈਰਾਨ-ਇਕ ਖ਼ਬਰ
ਹੈਰਾਨੀ ਵਾਲੀ ਕਿਹੜੀ ਗੱਲ ਹੈ ਜੀ, ਰਾਜ ਤਾਂ ਦੇਖੋ ਕੌਣ ਕਰ ਰਹੇ ਐ।

ਮੋਦੀ ਨੇ ਮੋਰਾਂ ਨੂੰ ਦਾਣੇ ਖਿਲਾਉਣ ਦੀ ਆਪਣੀ ਵੀਡੀਓ ਸ਼ੇਅਰ ਕੀਤੀ-ਇਕ ਖ਼ਬਰ
ਨੀਂ ਮੈਂ ਤਲੀਆਂ ਤੇ ਚੋਗ ਚੁਗਾਵਾਂ ਮਿੱਤਰਾਂ ਦੇ ਤਿੱਤਰਾਂ ਨੂੰ।

ਅਦਾਲਤ ਦੀ ਮਾਣਹਾਨੀ: ਪ੍ਰਸ਼ਾਂਤ ਭੂਸ਼ਨ ਨੇ ਮਾਫ਼ੀ ਮੰਗਣ ਤੋਂ ਕੀਤਾ ਇਨਕਾਰ-ਇਕ ਖ਼ਬਰ
ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ. ਤੇਰੀ ਨਾ ਮੁਥਾਜ ਝੱਲਣੀ।

ਪੰਜਾਬ ਕੋਲ਼ ਪੈਸਾ ਨਹੀਂ, ਕੇਂਦਰ ਕੁਝ ਦੇਣ ਨੂੰ ਤਿਆਰ ਨਹੀਂ, ਕੀ ਕਰੇ ਪੰਜਾਬ?- ਇਕ ਸਵਾਲ
ਚਿੜੀ ਵਿਚਾਰੀ ਕੀ ਕਰੇ, ਠੰਡਾ ਪਾਣੀ ਪੀ ਮਰੇ।

ਲੰਗਾਹ ਨੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਚੌਥੀ ਵਾਰ ਕੀਤੀ ਫ਼ਰਿਆਦ- ਇਕ ਖ਼ਬਰ
ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਜਥੇਦਾਰ ਵਲੋਂ ਸ਼੍ਰੋਮਣੀ ਕਮੇਟੀ ਨੂੰ ਆਦੇਸ਼ ਕਿ ਉਹ ਸਰੂਪਾਂ ਦੇ ਮਾਮਲੇ ‘ਚ ਦੋਸ਼ੀਆਂ ਵਿਰੁੱਧ ਕਾਰਵਾਈ ਕਰੇ-ਇਕ ਖ਼ਬਰ
ਵਾਹ ਬਈ ਵਾਹ! ਚੋਰਾਂ ਨੂੰ ਕਿਹਾ ਜਾ ਰਿਹੈ ਕਿ ਚੋਰ ਫੜੋ।

ਪਿੰਡਾਂ ‘ਚ ਅਕਾਲੀ- ਭਾਜਪਾ ਸੰਸਦ ਮੈਂਬਰਾਂ ਤੇ ਵਿਧਾਇਕਾਂ ਦਾ ਦਾਖ਼ਲਾ ਬੰਦ ਕਰਨਗੇ ਕਿਸਾਨ- ਇਕ ਖ਼ਬਰ`
ਬਾਣੀਆਂ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।
ਸ਼੍ਰੋਮਣੀ ਕਮੇਟੀ ਨੂੰ ਭੰਗ ਕਰ ਕੇ ਰਿਸੀਵਰ ਲਗਾਉ- ਟਕਸਾਲੀ ਅਕਾਲੀ ਦਲ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਅਰਥਚਾਰੇ ਨੂੰ ਪੈਰਾਂ ਸਿਰ ਕਰਨ ਲਈ ਵਿਆਪਕ ਸੁਧਾਰਾਂ ਦੀ ਲੋੜ- ਆਰ.ਬੀ.ਆਈ.
ਨੀਂ ਐਡਾ ਤੇਰਾ ਕਿਹੜਾ ਦਰਦੀ, ਸੁੱਤੀ ਪਈ ਨੂੰ ਪੱਖੀ ਦੀ ਝੱਲ ਮਾਰੇ।

ਦਿੱਲੀ ਦੰਗੇ: ਪੁਲਿਸ ਅਤੇ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਨਾ ਕਰਨ ਦਾ ਦੋਸ਼- ਇਕ ਖ਼ਬਰ
ਗੋਰੇ ਰੰਗ ‘ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

ਐਂਬੂਲੈਂਸ ਦੇ ਪਹੁੰਚਣ ਲਈ ਛੱਤੀਸਗੜ੍ਹ ਦੇ 15 ਪਿੰਡਾਂ ‘ਚ ਸੜਕ ਹੀ ਨਹੀਂ- ਇਕ ਖ਼ਬਰ
ਕਾਲੇ ਦਾ ਇਕ ਛੱਪੜ ਸੁਣੀਂਦਾ, ਪਾਣੀ ਉਸਦਾ ਖਾਰਾ।

ਕੈਪਟਨ ਸਰਕਾਰ ਪੰਜਾਬ ਦੇ ਖੁਸ਼ਹਾਲ ਰਾਜ ਲਈ ਵਚਨਬੱਧ- ਲਖਬੀਰ ਸਸੰਘ ਬਮਾਲ
ਜੇ ਮਾਏਂ ਕੁਝ ਦਿਸਦਾ ਹੋਵੇ, ਥੋੜ੍ਹਾ ਕਰਾਂ ਅੰਦੇਸਾ।

ਖੇਤੀ ਆਰਡੀਨੈਂਸਾਂ ਬਾਰੇ ਸੁਖਬੀਰ ਦੇ ਬਿਆਨ ਦੇ ਉਲਟ ਸੁਰ ਬੋਲ ਰਹੇ ਹਨ ਚੰਦੂਮਾਜਰਾ- ਇਕ ਖ਼ਬਰ
ਅਜੇ ਮਿਹਰ ਮੁਹੱਬਤਾਂ ਲੋੜਨਾਂ ਏਂ, ਮੇਰੇ ਮਾਰ ਕੇ ਜਿਗਰ ਕਟਾਰ ਵੈਰੀ।

ਸਾਬਕਾ ਡੀ.ਜੀ.ਪੀ. ਸੁਮੇਧ ਸੈਣੀ ਨੂੰ ਨਹੀਂ ਮਿਲੀ ਰਾਹਤ- ਇਕ ਖ਼ਬਰ
ਕਾਲੀ ਤਿਤਰੀ ਕਮਾਦੋਂ ਨਿਕਲੀ, ਉਡਦੀ ਨੂੰ ਬਾਜ਼ ਪੈ ਗਿਆ।

23 Aug. 2020

ਆਪਸੀ ਫੁੱਟ ਕਰ ਕੇ ਪੰਜਾਬ ਕਾਂਗਰਸ ਨਿਰਾਸ਼ਾ ਦੇ ਆਲਮ ‘ਚ- ਇਕ ਖ਼ਬਰ
ਪੂਰਨ ਆਖਦਾ ਗ਼ਮੀ ਦਾ ਤਾਪ ਚੜ੍ਹਿਆ, ਜ਼ਿਮੀਂ ਉੱਤੇ ਨਾ ਲਗਦੇ ਪੈਰ ਮਾਤਾ।

ਪੀ.ਐਮ. ਕੇਅਰ ਫੰਡਾਂ ਨੂੰ ਪੜਚੋਲ ਤੋਂ ਛੁਪਾ ਰਹੀ ਹੈ ਸਰਕਾਰ- ਚਿਦੰਬਰਮ
ਵਾਰਸ ਸ਼ਾਹ ਲੁਕਾਈਏ ਜੱਗ ਕੋਲੋਂ ਭਾਵੇਂ ਆਪਣਾ ਹੀ ਗੁੜ ਖਾਈਏ ਜੀ।

ਇਸ ਵਾਰ ਪ੍ਰਮਿੰਦਰ ਸਿੰਘ ਢੀਂਡਸਾ ਵਿਧਾਨ ਸਭਾ ਸੈਸ਼ਨ ‘ਚ ਭਾਗ ਲੈਣ ਲਈ ਪੂਰੀ ਤਰ੍ਹਾਂ ਤਿਆਰ-ਇਕ ਖ਼ਬਰ
ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

ਪੰਜਾਬ ਦੇ ਪਾਣੀ ‘ਤੇ ਕਿਸੇ ਵੀ ਹੋਰ ਸੂਬੇ ਦਾ ਕੋਈ ਅਧਿਕਾਰ ਨਹੀਂ- ਢੀਂਡਸਾ
ਸੁੱਤੀ ਪਈ ਨੇ ਲੁਹਾਈਆਂ ਚੂੜੀਆਂ, ਅਜੇ ਵੀ ਘੁਰਾੜੇ ਮਾਰਦੀ।

ਤਸਕਰਾਂ ਨੂੰ ਖੁੱਲ੍ਹ ਦੇਣ ਲਈ ਰਾਤ ਦਾ ਕਰਫਿਊ ਲਾਇਆ- ਆਪ ਪਾਰਟੀ
ਗਲ਼ੀਆਂ ਹੋਵਣ ਸੁੰਨੀਆਂ, ਵਿਚ ਮਿਰਜ਼ਾ ਯਾਰ ਫਿਰੇ।

ਪੰਜਾਬ ਸਰਕਾਰ ਦੀਆਂ ਬੈਠਕਾਂ ਦੀ ਗਿਣਤੀ 42 ਤੋਂ ਘਟ ਕੇ 12 ਰਹਿ ਗਈ- ਇਕ ਖ਼ਬਰ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਓਬਾਮਾ ਨੇ ਕੰਮ ਚੰਗਾ ਨਹੀਂ ਕੀਤਾ ਜਿਸ ਕਰ ਕੇ ਮੈਂ ਰਾਸ਼ਟਰਪਤੀ ਬਣਿਆ- ਟਰੰਪ
ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜੀਣ।

ਅਕਾਲੀ ਦਲ ਬਾਦਲ ਵਲੋਂ ਚੁੱਪ ਚੁਪੀਤੇ ਧਰਨਾ ਚੁੱਕੇ ਜਾਣ ਨੇ ਖੜ੍ਹੇ ਕੀਤੇ ਸਵਾਲ- ਇਕ ਖ਼ਬਰ
ਮਿੱਤਰਾਂ ਨੂੰ ਦਗ਼ਾ ਦੇਣੀਏ, ਕੀੜੇ ਪੈਣਗੇ ਮਰੇਂਗੀ ਸੱਪ ਲੜ ਕੇ।
ਅਕਾਲੀ ਅਤੇ ਭਾਜਪਾ ਨੇ ਇਕ ਦੂਜੇ ਦੇ ਧਰਨਿਆਂ ‘ਚ ਸ਼ਾਮਲ ਨਾ ਹੋਣ ਦੇ ਦਿਤੇ ਸੰਕੇਤ-ਇਕ ਖ਼ਬਰ
ਮੋਤੀ ਖਿੱਲਰ ਗਏ, ਚੁਗ ਲੈ ਕਬੂਤਰ ਬਣ ਕੇ।

ਸਿੱਟ ਦੀ ਜਾਂਚ ‘ਚ ਪ੍ਰਚਾਰਕ ਤੇ ਸਿੱਖ ਜਥੇਬੰਦੀਆਂ ਦੇ ਆਗੂ ਬੇਕਸੂਰ- ਇਕ ਖ਼ਬਰ
ਕੂੜ ਨਿਖੁਟੇ ਨਾਨਕਾ ਓੜਕਿ ਸਚਿ ਰਹੀ।

ਕਾਂਗਰਸੀਆਂ ਵਲੋਂ ਦੂਲੋ ਦੀ ਕੋਠੀ ਦਾ ਘਿਰਾਉ, ਜੰਮ ਕੇ ਕੀਤੀ ਨਾਹਰੇਬਾਜ਼ੀ- ਇਕ ਖ਼ਬਰ
ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਪ੍ਰਸ਼ਾਂਤ ਭੂਸ਼ਨ ਦੇ ਹੱਕ ‘ਚ ਨਿੱਤਰੇ ਸਮਾਜਕ ਕਾਰਕੁੰਨ- ਇਕ ਖ਼ਬਰ
ਸੁੱਚਿਆਂ ਰੁਮਾਲਾਂ ਨੂੰ, ਲਾ ਦੇ ਧੰਨ ਕੁਰੇ ਗੋਟਾ।

ਨਿਆਂਪਾਲਿਕਾ ਦੀ ਭਰੋਸੇਯੋਗਤਾ ‘ਤੇ ਉੱਠ ਰਹੇ ਹਨ ਸਵਾਲ- ਗਹਿਲੋਤ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਸਾਊਦੀ ਅਰਬ ਨੂੰ ਮਨਾਉਣ ਗਏ ਪਾਕਿ ਫੌਜ ਮੁਖੀ ਬਾਜਵਾ ਤੇ ਹਮੀਦ ਖਾਲੀ ਹੱਥ ਪਰਤੇ- ਇਕ ਖ਼ਬਰ
ਬੜੇ ਬੇਆਬਰੂ ਹੋ ਕਰ ਤੇਰੇ ਕੂਚੇ ਸੇ ਹਮ ਨਿਕਲੇ।

ਮੇਰੀਆਂ ਟਿੱਪਣੀਆਂ ਮੇਰੇ ਅਸਲ ਵਿਚਾਰ, ਮਾਫ਼ੀ ਨਹੀਂ ਮੰਗਾਂਗਾ- ਪ੍ਰਸ਼ਾਂਤ ਭੂਸ਼ਨ
ਬਾਜ਼ੀ ਮਾਰ ਗਿਆ ਬਠਿੰਡੇ ਵਾਲ਼ਾ ਗੱਭਰੂ, ਬਾਕੀ ਰਹਿ ਗਏ ਹਾਲ ਪੁੱਛਦੇ।
 

17 Aug. 2020

ਬੇਅਦਬੀਆਂ ਕਰਵਾਉਣ ਵਾਲੇ ਪਟਿਆਲੇ ‘ਚ ਧਰਨਾ ਦੇ ਕੇ ਡਰਾਮੇਬਾਜ਼ੀ ਕਰ ਰਹੇ ਹਨ- ਪ੍ਰਮਿੰਦਰ ਢੀਂਡਸਾ
ਨਾਲੇ ਚੋਰ ਨਾਲੇ ਚਤਰ।

ਕਾਂਗਰਸ ਹਾਈ ਕਮਾਂਡ ਨੇ ਬਾਜਵਾ-ਕੈਪਟਨ ਦੀ ਲੜਾਈ ਠੰਢੇ  ਬਸਤੇ ‘ਚ ਪਾਈ- ਇਕ ਖ਼ਬਰ
ਵਾਰਸ ਸ਼ਾਹ ਅਸਾਂ ਮਾਲੂਮ ਕੀਤਾ, ਜੱਟੀ ਜੋਗੀ ਇਕੋ ਹਾਣ ਦੇ ਨੇ।

ਸਮਾਰਟ ਫੋਨ ਖ਼ਰੀਦਣ ਲਈ ਸਰਕਾਰ ਦੀ ਅੱਖ ਆਫ਼ਤ ਰਾਹਤ ਫੰਡ ‘ਤੇ- ਇਕ ਖ਼ਬਰ
ਛੰਨਾ ਵੇਚ ‘ਤਾ, ਕੌਲੀ ਵੇਚ ‘ਤੀ, ਵੇਚਣ ਨੂੰ ਫਿਰਦੈ ਗੜਵੀ ਨੀਂ ਮਰ ਜਾਣਾ ਅਮਲੀ।

ਹਰਿਆਣਾ ਕਮੇਟੀ ਦਾ ਪ੍ਰਧਾਨ ਬਣਨ ‘ਤੇ ਦਾਦੂਵਾਲ ਨੂੰ ਵਧਾਈਆਂ ਦਾ ਸਿਲਸਿਲਾ ਜਾਰੀ- ਇਕ ਖ਼ਬਰ
ਸਿੱਖ ਕੌਮ ਪ੍ਰਧਾਨਾਂ ਨੂੰ ਹਾਥੀ ‘ਤੇ ਬਿਠਾ ਕੇ ਲਿਆਉਂਦੀ ਹੁੰਦੀ ਆ ਤੇ ਖੋਤੇ ‘ਤੇ ਬਿਠਾ ਕੇ ਘਰ ਭੇਜਦੀ ਹੁੰਦੀ ਆ।

ਵਿਆਹ ਕਿਸੇ ਦਾ ਤੇ ਰਗੜੇ ਗਏ ਗਵਾਹ ਤੇ ਗ੍ਰੰਥੀ- ਇਕ ਖ਼ਬਰ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲੀ ਕੰਧ ਟੱਪ ਕੇ।

ਕੈਪਟਨ ਅਕਾਲੀ ਦਲ ਨੂੰ ਵਿਰੋਧੀ ਧਿਰ ਵਜੋਂ ਪੇਸ਼ ਕਰਨ ਦੇ ਯਤਨਾਂ ‘ਚ- ਭਗਵੰਤ ਮਾਨ
ਮਿੱਤਰਾਂ ਦੇ ਫੁਲਕੇ ਨੂੰ, ਨੀਂ ਮੈਂ ਖੰਡ ਦਾ ਪਲੇਥਣ ਲਾਵਾਂ।   

ਸਰਕਾਰ ਸੌਖੇ ਦਿਨਾਂ ਦਾ ਵਸੀਲਾ ਬਣੇ, ਬੇਸ਼ੱਕ ਸਮਾਰਟ ਫੋਨ ਲੈ ਲਵੇ- ਇਕ ਦੁਖੀ ਮਾਂ
ਮਾਤਾ ਜੀ, ਤੁਹਾਡੇ ਦੁੱਖਾਂ ਨਾਲ ਇਹਨਾਂ ਨੂੰ ਕੋਈ ਸਰੋਕਾਰ ਨਹੀਂ, ਵੋਟਾਂ ਤਾਈਂ ਮਤਲਬ ਹੈ।

ਲਾਇਬ੍ਰੇਰੀ ਦਿਵਸ ਮੌਕੇ ਵੀ ਸਰਕਾਰ ਨੇ ਲਾਇਬ੍ਰੇਰੀਆਂ ਦੀ ਸਾਰ ਨਹੀਂ ਲਈ- ਇਕ ਖ਼ਬਰ
ਪੰਜਾਬ ਸਾਰਾ ਹੀ ਨਸ਼ੇੜੀ ਕਰ ਦੇਣਾ, ਪੜ੍ਹਾਕੂਆਂ ਦੀ ਲੋੜ ਕੋਈ ਨਾ।

ਗੁਰੂ ਗ੍ਰੰਥ ਸਾਹਿਬ ਦੇ 267 ਸਰੂਪਾਂ ਦੇ ਖੁਰਦ ਬੁਰਦ ਹੋਣ ਬਾਰੇ ਦਿੱਲੀ ਕਮੇਟੀ ਚੁੱਪ ਕਿਉਂ?- ਜਸਮੀਤ ਸਿੰਘ ਪੀਤਮਪੁਰਾ
ਹਿਜ਼ ਮਾਸਟਰਜ਼ ਵਾਇਸ।

ਪੰਦਰਾਂ ਲੱਖ ਰੁਪਏ ਦੇ ਸਮਾਰਟ ਫੋਨ ਵੰਡਣ ’ਤੇ ਸਰਕਾਰ ਦਾ 25 ਲੱਖ ਰੁਪਇਆ ਖਰਚ ਆਵੇਗਾ- ਇਕ ਖ਼ਬਰ
ਧੇਲੇ ਦੀ ਬੁੱਢੀ, ਟਕਾ ਸਿਰ ਮੁਨਾਈ।

ਜਾਖੜ ਦਾ ਡੇਰਾ ਨਵੀਂ ਦਿੱਲੀ ‘ਚ, ਬਾਜਵਾ ਵੀ ਜਲਦੀ ਹੀ ਪਹੁੰਚ ਰਿਹੈ- ਇਕ ਖ਼ਬਰ
ਤੇਰੇ ਦੁਆਰ ਖੜ੍ਹੇ ਹਮ ਜੋਗੀ, ਮਈਆ ਮਿਹਰ ਕੀ ਨਜ਼ਰ ਕਬ ਹੋਗੀ।

ਦਿੱਲੀ ‘ਚ ਕਰਵਾਏ ਵਿਕਾਸ ਕਾਰਜਾਂ ਦੇ ਸਿਰ ‘ਤੇ ‘ਆਪ’ ਪਾਰਟੀ ਪੰਜਾਬ ‘ਚ ਚੋਣਾਂ ਲੜੇਗੀ- ਬੌਬੀ ਅਟਵਾਲ
ਨੱਚਾਂ ਮੈਂ ਪਟਿਆਲੇ, ਮੇਰੀ ਧਮਕ ਜਲੰਧਰ ਪੈਂਦੀ।

ਬਿਜਲੀ ਚੋਰੀ ‘ਚ ਬਾਦਲ ਦਾ ਹਲਕਾ ਲੰਬੀ ਮੋਹਰੀ ਪਿੰਡ ਬਾਦਲ ਇਲਾਕੇ ‘ਚੋਂ ਮੋਹਰੀ- ਇਕ ਖ਼ਬਰ
ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸੱਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਪੰਜਾਬ ‘ਚ ਵਧ ਰਹੇ ਕਰੋਨਾ ਕੇਸਾਂ ਕਰ ਕੇ ਕੈਪਟਨ ਨੇ ਮੋਦੀ ਤੋਂ ਫ਼ਰਾਖ਼ਦਿਲੀ ਵਾਲਾ ਵਿਤੀ ਪੈਕੇਜ ਮੰਗਿਆ- ਇਕ ਖ਼ਬਰ
ਮੈਨੂੰ ਸੋਨੇ ਦਾ ਤਵੀਤ ਕਰਾ ਦੇ, ਚਾਂਦੀ ਦਾ ਕੀ ਭਾਰ ਚੁੱਕਣਾ।

ਮੇਰੀ ਕੋਈ ਮੰਗ ਨਹੀਂ, ਮੈਂ ਬਿਨਾਂ ਸ਼ਰਤ ਵਾਪਸ ਆਇਆ ਹਾਂ- ਸਚਿਨ ਪਾਇਲਟ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਜਿਹਲ ‘ਚ ਬੰਦ ਆਸਾ ਰਾਮ ਨੂੰ ਬਾਹਰੋਂ ਖਾਣਾ ਮੰਗਵਾਉਣ ਦੀ ਇਜਾਜ਼ਤ- ਇਕ ਖ਼ਬਰ
ਜੇ ਅੱਤਵਾਦੀ ਕਸਾਬ ਨੂੰ ਜਿਹਲ ‘ਚ ਬਰਿਆਨੀ ਦਿਤੀ ਜਾ ਸਕਦੀ ਐ, ਆਸਾ ਰਾਮ ਤਾਂ ਫੇਰ ਵੀ ਏਹਨਾਂ ਦਾ ‘ਬਾਪੂ’ ਐ।

09 Aug. 2020

ਆਰ.ਐਸ.ਐਸ. ਦੀ ਸਿਫ਼ਤ ਕਰਨ ਵਾਲੇ ਢੀਂਡਸਾ ਦੀ ਮਨਸ਼ਾ ਹੋਈ ਸਪਸ਼ਟ- ਲੌਂਗੋਵਾਲ
ਲੌਂਗੋਵਾਲ ਸਾਬ ਤੁਹਾਡੀ ਤੇ ਤੁਹਾਡੇ ਆਕਾਵਾਂ ਦੀ ਮਨਸ਼ਾ ਕਿਹੜਾ ਕਿਸੇ ਤੋਂ ਗੁੱਝੀ ਐ।

ਜ਼ਹਿਰੀਲੀ ਸ਼ਰਾਬ ਦੇ ਮੁੱਖ ਮੁਲਜ਼ਮ ਦੀ ਬਟਾਲਾ ਭਾਜਪਾ ਦੇ ਪ੍ਰਧਾਨ ਨਾਲ਼ ਸਾਂਝ-ਇਕ ਖ਼ਬਰ
ਇਕ ਨੂੰ ਕੀ ਰੋਨੀ ਏਂ, ਊਤ ਗਿਆ ਈ ਆਵਾ।    

ਪੰਜਾਬ ਕਾਂਗਰਸ ਦੇ ਵੱਡੇ ਆਗੂਆਂ ‘ਚ ਕਾਟੋ ਕਲੇਸ਼ ਵਧਿਆ-ਇਕ ਖ਼ਬਰ
ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਮਲੰਗ ਲੜ ਪਏ।

ਪੰਜਾਬ ਦੇ ਥਾਣੇ ਕਾਂਗਰਸੀ ਵਿਧਾਇਕਾਂ ਦੇ ਇਸ਼ਾਰੇ ‘ਤੇ ਚਲ ਰਹੇ ਹਨ- ਭਗਵੰਤ ਮਾਨ
ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

ਜ਼ਹਿਰੀਲੀ ਸ਼ਰਾਬ ਦੇ ਧੰਦੇ ਦੀ ਸਰਪ੍ਰਸਤੀ ਕਰਨ ਵਾਲੇ ਕਾਂਗਰਸੀ ਵਿਧਾਇਕਾਂ ਵਿਰੁਧ ਕਾਰਵਾਈ ਹੋਵੇ-ਮਜੀਠੀਆ
ਜਿਸ ਤਰ੍ਹਾਂ ਦੀ ਕਾਰਵਾਈ ਤੁਸੀਂ ਕਰਦੇ ਰਹੇ ਹੋ, ਉਸੇ ਤਰ੍ਹਾਂ ਦੀ ਹੁਣ ਹੋਊ।

ਲੌਂਗੋਵਾਲ ਨੇ ਹਰ ਤਰ੍ਹਾਂ ਦੇ ਨਸ਼ਿਆਂ ‘ਤੇ ਮੁਕੰਮਲ ਪਾਬੰਦੀ ਦੀ ਕੀਤੀ ਮੰਗ- ਇਕ ਖ਼ਬਰ   
ਲੌਂਗੋਵਾਲ ਸਾਬ ਫੇਰ ਸ਼੍ਰੋਮਣੀ ਕਮੇਟੀ ਦੇ ਮੈਂਬਰਾਂ ਦੀ ਭਰਤੀ ਕਿਵੇਂ ਹੋਵੇਗੀ?

ਕਿਸੇ ਵੀ ਕਿਸਮ ਦਾ ਭ੍ਰਿਸ਼ਟਾਚਾਰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ- ਮੰਤਰੀ ਆਸ਼ੂ
ਪੌਣੀ ਸਦੀ ਬੀਤ ਗਈ ਇਹ ਜੁਮਲੇ ਸੁਣਦਿਆਂ, ਰਹਿਮ ਕਰੋ ਕੁਝ ਹੁਣ ਲੋਕਾਂ ‘ਤੇ।

ਪੁਲਿਸ ਤੇ ਆਬਕਾਰੀ ਵਿਭਾਗ ਦੀ ਸ਼ਹਿ ਤੋਂ ਬਿਨਾਂ ਸ਼ਰਾਬ ਦੀ ਤਸਕਰੀ ਨਹੀਂ ਹੋ ਸਕਦੀ- ਦੂਲੋਂ
ਦੂਲੋਂ ਸਾਬ ਸਿਆਸਤਦਾਨਾਂ ਨੁੰ ਕਿਉਂ ਬਰੀ ਕਰੀ ਜਾਂਦੇ ਹੋ।

ਹਰ ਮਾਮਲੇ ‘ਤੇ ਸਿੱਟ ਪ੍ਰੰਤੂ ਨਤੀਜਾ ਜ਼ੀਰੋ ਦਾ ਜ਼ੀਰੋ- ਹਰਪਾਲ ਚੀਮਾ
ਬੇਰੀਆਂ ਨੂੰ ਬੇਰ ਲੱਗ ਗਏ, ਤੈਨੂੰ ਕੁਝ ਨਾ ਲੱਗਾ ਮੁਟਿਆਰੇ।

ਜ਼ਹਿਰੀਲੀ ਸ਼ਰਾਬ ਮਾਮਲੇ ‘ਚ ਕੈਪਟਨ ਸਰਕਾਰ ਨੇ ਤੁਰੰਤ ਕਾਰਵਾਈ ਕੀਤੀ- ਧਰਮਸੋਤ
ਵਾਹ ਬਈ ਵਾਹ! ਸਵਾ ਸੌ ਬੰਦਾ ਮਰਨ ਤੋਂ ਬਾਅਦ ਕੀਤੀ ਕਾਰਵਾਈ ਤੁਰੰਤ ਕਿਵੇਂ ਹੋ ਗਈ ਬਈ।

ਪੰਜਾਬ ਕਾਂਗਰਸ ‘ਚ ਬਗਾਵਤੀ ਸੁਰਾਂ ਤੋਂ ਨਵਾਂ ਵਿਵਾਦ- ਇਕ ਖ਼ਬਰ
ਬਾਲਣ ਹੱਡੀਆਂ ਦਾ, ਰੋਟੀ ਇਸ਼ਕੇ ਦੀ ਲਾਈ ਹੋਈ ਏ। 

ਬਾਜਵਾ-ਕੈਪਟਨ ਵਿਵਾਦ: ਮਨਪ੍ਰੀਤ ਬਾਦਲ ਖੁੱਲ੍ਹ ਕੇ ਕੈਪਟਨ ਦੇ ਹੱਕ ‘ਚ ਡਟੇ- ਇਕ ਖ਼ਬਰ
ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੇ ਭਾਵੇਂ ਜਿੰਦ ਕੱਢ ਲੈ।

ਭਾਜਪਾ ਦੀਆਂ ਪ੍ਰਤਾਪ ਸਿੰਘ ਬਾਜਵਾ ‘ਤੇ ਡੋਰੇ ਪਾਉਣ ਦੀਆਂ ਕੋਸ਼ਿਸ਼ਾਂ ਜ਼ੋਰਾਂ ‘ਤੇ-ਇਕ ਖ਼ਬਰ
ਪਿੰਡ ਪਏ ਨਹੀਂ ਉਚੱਕੇ ਪਹਿਲਾਂ ਹੀ ਸੂਹਾਂ ਲੈਂਦੇ ਫਿਰਦੇ।

ਪਟਿਆਲੇ ‘ਚ ਚੋਰੀ ਹੋਏ ਸਰੂਪ ਲਈ ਸੁਖਬੀਰ ਬਾਦਲ ਨੇ ਸਰਕਾਰ ਵਿਰੁੱਧ ਧਰਨਾ ਦਿੱਤਾ-ਇਕ ਖ਼ਬਰ
ਮੇਰਾ ਕੰਮ ਨਾ ਪਟਿਆਲੇ ਵਿਚ ਕੋਈ, ਆਵਾਂ ਜਾਵਾਂ ਵੋਟਾਂ ਬਦਲੇ। 

ਲੋਕ ਗ਼ੈਰਕਾਨੂੰਨੀ ਨਸ਼ਿਆਂ ਅਤੇ ਸ਼ਰਾਬ ਦੇ ਤਸਕਰਾਂ ਸਬੰਧੀ ਪੁਲਿਸ ਨੂੰ ਸੂਚਨਾ ਦੇਣ- ਪੁਲਿਸ ਅਫ਼ਸਰ
ਤਾਂ ਕਿ ਪੁਲਿਸ ਦੇ ‘ਮਹੀਨੇ’ ‘ਚ ਹੋਰ ਵਾਧਾ ਹੋ ਸਕੇ।

02 Aug. 2020

ਰਾਜਸਥਾਨ ਮਾਮਲਾ: ਰਾਜਪਾਲ ਨੇ ਤੀਜੀ ਵਾਰੀ ਮੋੜੀ ਫ਼ਾਈਲ- ਇਕ ਖ਼ਬਰ
ਉੱਜੜੀਆਂ ਭਰਜਾਈਆਂ, ਵਲੀ ਜਿਹਨਾਂ ਦੇ ਜੇਠ।

ਪੰਜਾਬ ‘ਚ ਭਾਜਪਾ ਅਕਾਲੀ ਦਲ ਬਾਦਲ ਤੋਂ ਪੱਲਾ ਛੁਡਾਉਣ ਲਈ ਪਰ ਤੋਲਣ ਲੱਗੀ- ਇਕ ਖ਼ਬਰ
ਟੁੱਟ ਜਾਊਗਾ ਬਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।

ਰਾਜਸਥਾਨ ‘ਚ ਹੋ ਰਹੇ ਤਮਾਸ਼ੇ ਨੂੰ ਬੰਦ ਕਰਵਾਉਣ ਪ੍ਰਧਾਨ ਮੰਤਰੀ ਮੋਦੀ- ਗਹਿਲੋਤ
ਹਮ ਕੋ ਉਨ ਸੇ ਹੈ ਵਫ਼ਾ ਕੀ ਉਮੀਦ, ਜੋ ਨਹੀਂ ਜਾਨਤੇ ਵਫ਼ਾ ਕਿਆ ਹੈ।

ਨਕਲੀ ਸ਼ਰਾਬ ਕਾਰਨ ਹੋਈਆਂ ਮੌਤਾਂ ਲਈ ਜ਼ਿੰਮੇਵਾਰਾਂ ਵਿਰੁੱਧ ਹੋਵੇ ਸਖ਼ਤ ਕਾਰਵਾਈ- ਜਾਖੜ
ਜਾਖੜ ਸਾਹਿਬ ਛੋਟੀਆਂ ਮੱਛੀਆਂ ਹੀ ਫੜ ਹੋਣੀਆਂ, ਮਗਰਮੱਛ ਨਹੀਂ ਫੜਨੇ ਕਿਸੇ ਨੇ।

ਡੇਢ ਕਿੱਲੋ ਅਫ਼ੀਮ ਸਮੇਤ ਸਾਬਕਾ ਪੁਲਿਸ ਮੁਲਾਜ਼ਮ ਗ੍ਰਿਫ਼ਤਾਰ- ਇਕ ਖ਼ਬਰ
ਪਹਿਲਾਂ ਸਟਾਰਾਂ ਤੇ ਫੀਤੀਆਂ ਸਦਕਾ ਬਚਦਾ ਰਿਹੈਂ ਪੁੱਤਰਾ।

ਸ਼੍ਰੋਮਣੀ ਅਕਾਲੀ ਦਲ ਦੇ ਨਿਘਾਰ ਲਈ ਸੁਖਬੀਰ ਬਾਦਲ ਜ਼ਿੰਮੇਵਾਰ-ਦੇਸਰਾਜ ਸਿੰਘ ਧੁੱਗਾ
ਡੁੱਬਦੀ ਬੇੜੀ ‘ਚੋਂ ਮਾਰ ਕੇ ਛਾਲ ਮਿੱਤਰੋ, ਘਰ ਨਵਾਂ ਹੋਰ ਕੋਈ ਲੱਭੀਏ ਜੀ।

ਜ਼ਹਿਰੀਲੀ ਸ਼ਰਾਬ ਪੀਣ ਕਾਰਨ ਮਰਨ ਵਾਲਿਆਂ ਦੇ ਵਾਰਸਾਂ ਨੇ ਸੁਣਾਏ ਆਪਣੇ ਦੁਖੜੇ- ਇਕ ਖ਼ਬਰ
ਸਭ ਲੱਭਦੇ ਵੋਟਾਂ ਜੀ, ਇੱਥੇ ਕੋਈ ਨਹੀਂ ਕਿਸੇ ਦਾ ਦਰਦੀ।

ਪੰਜਾਬ ਸਰਕਾਰ ਨੇ ਕੁੱਤਿਆਂ ਦੀ ਨਸਬੰਦੀ ਕੀਤੀ ਸ਼ੁਰੂ-ਇਕ ਖ਼ਬਰ
ਚਲੋ ਕੁਝ ਤਾਂ ਕਾਰਗੁਜ਼ਾਰੀ ਪਈ ਕੈਪਟਨ ਸਰਕਾਰ ਦੀ।

ਸਹੀ ਸਮੇਂ ‘ਤੇ ਸਹੀ ਫ਼ੈਸਲੇ ਲੈਣ ਨਾਲ਼ ਦੇਸ਼ ਦੇ ਹਾਲਾਤ ਬਿਹਤਰ- ਮੋਦੀ
ਬਿਲਕੁਲ ਜੀ ਤਾਹੀਂਉਂ ਹੁਣ ਦੂਜੇ ਨੰਬਰ ‘ਤੇ ਆਉਣ ਵਾਲੇ ਹਾਂ।

ਯੂ.ਪੀ. ‘ਚ ਮਾਸਕ ਨਾ ਪਾਉਣ ਕਰ ਕੇ ਬੱਕਰੀ ਗ੍ਰਿਫ਼ਤਾਰ- ਇਕ ਖ਼ਬਰ
ਬੰਦੇ ਭਾਵੇਂ ਕੋਈ ਸਾਡੇ ਅੱਠ ਮਾਰ ਜਾਵੇ ਪਰ ਬੱਕਰੀ ਸੁੱਕੀ ਨਹੀਂ ਜਾਣ ਦੇਣੀ।

ਅਮਰੀਕੀ ਜੰਗੀ ਜਹਾਜ਼ ਦੇ ਸ਼ੰਘਾਈ ਨੇੜੇ ਗੇੜੇ ਨੇ ਵਧਾਇਆ ਤਣਾਅ- ਇਕ ਖ਼ਬਰ
ਨਿੱਤ ਮਾਰਦੇ ਗਲੀ ਦੇ ਵਿਚ ਗੇੜੇ, ਛੜਿਆਂ ਦੀ ਨੀਤ ਬੁਰੀ।

ਸ਼੍ਰੋਮਣੀ ਅਕਾਲੀ ਦਲ ਟਕਸਾਲੀ ਦੇ ਮੁੱਖ ਦਫ਼ਤਰ ਦਾ ਉਦਘਾਟਨ ਹੋਇਆ- ਇਕ ਖ਼ਬਰ
ਅੱਧ ਪਾ ਖਿਚੜੀ, ਚੁਬਾਰੇ ਰਸੋਈ।

ਸੁਖਬੀਰ ਬਾਦਲ ਆਪਣੀ ਦੋਗਲੀ ਨੀਤੀ ਛੱਡੇ- ਚੰਦੂਰਾਈਆਂ
ਵਾਦੜੀਆਂ ਸਜਾਦੜੀਆਂ, ਨਿਭਣ ਸਿਰਾਂ ਦੇ ਨਾਲ਼।

ਸਰਕਾਰਾਂ ਸਿੱਖਾਂ ਦੇ ਸਬਰ ਦਾ ਇਮਤਿਹਾਨ ਲੈ ਰਹੀਆਂ ਹਨ- ਭਾਈ ਮੰਡ
ਤੁਹਾਡੇ ਸਬਰ ਨੂੰ ਵੀ ਨਮਸਕਾਰ ਐ ‘ਜਥੇਦਾਰ’ ਜੀ।

ਕਾਂਗਰਸ ਅਤੇ ਗਹਿਲੋਤ ਨੂੰ ਸਬਕ ਸਿਖਾਉਣ ਦੀ ਲੋੜ- ਮਾਇਆਵਤੀ
ਨੀਂ ਮੈਂ ਚੋਰੀ ਚੋਰੀ ਲਾ ਲਈਆਂ ਅੱਖੀਆਂ, ਨੀਂ ਮੈਂ ਚੋਰੀ ਚੋਰੀ।

27 July 2020

ਗਰਭਵਤੀ ਔਰਤ ਨੂੰ ਹੋਇਆ ਕਰੋਨਾ, ਪਤੀ ਨੇ ਪਛਾਨਣ ਤੋਂ ਕੀਤਾ ਇਨਕਾਰ- ਇਕ ਖ਼ਬਰ
ਸੁਖ ਮੇਂ ਬਹੁ ਸੰਗੀ ਭਏ, ਦੁਖ ਮੇਂ ਸੰਗ ਨਾ ਕੋਇ ।

ਮੂਸੇਵਾਲਾ ਦੇ ਨਿੱਤ ਪੁਆੜੇ: ਮੁਹਾਲੀ ਪੁਲਿਸ ਵਲੋਂ ਨਵਾਂ ਕੇਸ ਦਰਜ- ਇਕ ਖ਼ਬਰ
ਨਿੱਤ ਨਵੇਂ ਪੁਆੜੇ ਪਾਉਂਦਾ ਨੀ ਮਰ ਜਾਣਾ ਅਮਲੀ।

ਕਰੋਨਾ ‘ਤੇ ਕੀਤੇ ਖ਼ਰਚਿਆਂ ਬਾਰੇ ਵਾਈਟ ਪੇਪਰ ਜਾਰੀ ਕਰੇ ਸਰਕਾਰ- ਆਪ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਪ੍ਰਕਾਸ਼ ਸਿੰਘ ਬਾਦਲ ਦੀ ਸਿਹਤ ਢਿੱਲੀ, ਬਠਿੰਡਾ ਹਸਪਤਾਲ ‘ਚ ਚੈੱਕ-ਅੱਪ ਹੋਇਆ- ਇਕ ਖ਼ਬਰ
ਹਾਇ ਓਏ ਕਿਤੇ ਆਪਣੀ ਸਰਕਾਰ ਹੁੰਦੀ, ਫੁਰਨ ਕਰ ਕੇ ਮੈਂ ਅਮਰੀਕਾ ਨੂੰ ਉਡ ਜਾਣਾ ਸੀ।

 ਆਮ ਆਦਮੀ ਪਾਰਟੀ: ਮੁੱਖ ਮੰਤਰੀ ਦੇ ਚਿਹਰੇ ਲਈ ਹੁਣ ਤੋਂ ਹੀ ਲੱਗੀ ਦੌੜ- ਇਕ ਖ਼ਬਰ
ਇਕ ਅਨਾਰ, ਸੌ ਬਿਮਾਰ।

ਸਾਰੀਆਂ ਸਿਆਸੀ ਧਿਰਾਂ ਵਲੋਂ ਸੁਖਬੀਰ ਬਾਦਲ ਦੀ ਘੇਰਾਬੰਦੀ, ਵੱਡਾ ਬਾਦਲ ਬੇਵੱਸ- ਇਕ ਖ਼ਬਰ
ਬਾਝ ਭਰਾਵਾਂ ਮਾਰਿਆ, ਕੋਈ ਨਾ ਮਿਰਜ਼ੇ ਸੰਗ।

ਹਰਿਆਣਾ ‘ਚ ਗੁਰਦੁਆਰਾ ਕਮੇਟੀਆਂ ਪੰਜਾਬੀ ਭਾਸ਼ਾ ਵਲ ਕੋਈ ਧਿਆਨ ਨਹੀਂ ਦੇ ਰਹੀਆਂ- ਸਿਕੰਦਰ ਸਿੰਘ ਸਿੱਧੂ
ਰੱਖਦੇ ਧਿਆਨ ਸਦਾ ਬਾਬੇ ਦੀਆਂ ਗੋਲਕਾਂ ‘ਤੇ, ਸਮਾਧੀ ਉੱਤੇ ਬੈਠਾ ਹੋਵੇ ਜਿਵੇਂ ਕੋਈ ਸੰਤ ਜੀ।

ਮੇਰੀ ਸਰਕਾਰ ਨੂੰ ਡੇਗਣ ਦੀ ਕੋਸ਼ਿਸ ਹੋ ਰਹੀ ਹੈ, ਗਹਿਲੋਤ ਨੇ ਮੋਦੀ ਨੂੰ ਪੱਤਰ ਲਿਖਿਆ- ਇਕ ਖ਼ਬਰ
ਚਿੱਠੀ ਰੋ ਕੇ ਨਹੀਂ ਲਿਖੀਦੀ ਸ਼ੁਦੈਣੇ, ਥੋੜ੍ਹਾ ਜਿਹਾ ਰੱਖ ਹੌਸਲਾ।

ਹਾਂਗਕਾਂਗ ਮਾਮਲੇ ‘ਚ ਬਰਤਾਨੀਆ ਦਾ ਦਖ਼ਲ ਬਰਦਾਸ਼ਤ ਨਹੀਂ- ਚੀਨ
ਨਾਰ ਬਿਗਾਨੀ ਦੀ, ਬਾਂਹ ਨਾ ਮੂਰਖਾ ਫੜੀਏ।

 ਅਮਰੀਕਾ ’ਚ ਚੀਨ ਦੇ ਰਾਜਦੂਤ ਨੇ ਮਾਰੀ ਘੁਰਕੀ- ਇਕ ਖ਼ਬਰ
ਗੱਲ ਸੋਚ ਕੇ ਕਰੀਂ ਜ਼ੈਲਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ।

ਜਥੇਦਾਰ ਕਹਿੰਦੈ ਕਿ ਸੌਦਾ ਸਾਧ ਨੂੰ ਪੁਸ਼ਾਕ ਕਿਸ ਨੇ ਦਿੱਤੀ ਆਦਿਕ ਗੱਲਾਂ ‘ਫਾਲਤੂ’ ਹਨ- ਇਕ ਖ਼ਬਰ
ਲੈ ਲਈਓ ਜਥੇਦਾਰ ਕੋਲੋਂ ਛੁਣਛੁਣਾ।

ਸੁਖਬੀਰ ਬਾਦਲ ਦਾ ਘਰ ਘੇਰਨ ਗਏ ਕਿਸਾਨਾਂ ‘ਤੇ ਪੁਲਿਸ ਨੇ ਵਰ੍ਹਾਇਆ ਡੰਡਾ- ਇਕ ਖਬਰ
ਓਏ ਕਿਸਾਨੋਂ ਮੇਰੇ ਭਤੀਜੇ ਦੇ ਘਰ ਨੂੰ ਘੇਰਨ ਦੀ ਜੁਰਅਤ ਕਿਵੇਂ ਕੀਤੀ ਤੁਸੀਂ!

ਬਾਦਲ ਦੇ ਕਹਿਣ ‘ਤੇ ਮੈਂ ਆਪਣੀ ਲੋਕ ਭਲਾਈ ਪਾਰਟੀ ਭੰਗ ਕਰ ਕੇ ਗ਼ਲਤੀ ਕੀਤੀ- ਰਾਮੂਵਾਲੀਆ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

21 July 2020

ਘਪਲੇ ਨੰਗੇ ਕਰਨ ਵਾਲੇ ਅਧਿਕਾਰੀਆਂ ਦੇ ਸ਼੍ਰੋਮਣੀ ਕਮੇਟੀ ਨੇ ਕੀਤੇ ਤਬਾਦਲੇ- ਇਕ ਖ਼ਬਰ
ਬੱਕਰੇ ਦੀ ਮਾਂ ਕਦ ਤੱਕ ਖੈਰ ਮਨਾਏਗੀ।

29 ਦਿਨਾਂ ਬਾਅਦ ਹੀ ਢਹਿ ਢੇਰੀ ਹੋ ਗਿਆ 264 ਕਰੋੜ ਦਾ ਨਵਾਂ ਪੁਲ਼- ਇਕ ਖ਼ਬਰ
ਸ਼ੁਕਰ ਕਰੋ ਬਣਾਇਆ ਹੋਇਐ ਰੁੜ੍ਹਿਐ, ਏਥੇ ਤਾਂ ਬਿਨਾਂ ਬਣਾਇਆਂ ਵੀ ਰੁੜ੍ਹ ਜਾਂਦੇ ਐ।

ਪੁਸ਼ਾਕ ਮਾਮਲੇ ‘ਚ ਅਵਤਾਰ ਸਿੰਘ ਹਿਤ ਵਲੋਂ ਸੁਖਬੀਰ ਬਾਦਲ ਦੀ ਹਮਾਇਤ- ਇਕ ਖ਼ਬਰ
ਭੈੜੇ ਭੈੜੇ ਯਾਰ ਮੇਰੀ ਫੱਤੋ ਦੇ।

ਗੁਰਦੁਆਰਾ ਬੰਗਲਾ ਸਾਹਿਬ ਦੇ ਲੰਗਰ ਦਾ ਆਟਾ ਦੁਕਾਨ ‘ਤੇ ਵਿਕਦਾ ਫੜਿਆ- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਸੁਖਬੀਰ ਬਾਦਲ ਨੂੰ ਵਿਰੋਧੀ ਬਦਨਾਮ ਕਰ ਰਹੇ ਹਨ- ਬੰਟੀ ਰੋਮਾਣਾ
ਤੇਰੀ ਹਰ ਮੱਸਿਆ ਬਦਨਾਮੀ, ਨੀ ਸੋਨੇ ਦੇ ਤਵੀਤ ਵਾਲੀਏ।

ਬੀਰ ਦਵਿੰਦਰ ਸਿੰਘ ਨੂੰ ਪਾਰਟੀ ‘ਚ ਸ਼ਾਮਲ ਕਰ ਕੇ ਬਹੁਤ ਵੱਡੀ ਗ਼ਲਤੀ ਕੀਤੀ- ਟਕਸਾਲੀ ਅਕਾਲੀ ਦਲ
ਵਕਤੋਂ ਮੈਂ ਖੁੰਝ ਗਈ, ਘੜਾ ਦੇਖ ਨਾ ਲਿਆ ਟੁਣਕਾ ਕੇ।

ਚੀਨ ਦੀਆਂ ਚੁਨੌਤੀਆਂ ਦਾ ਜਵਾਬ ਦੇਣ ਦਾ ਸਮਾਂ ਆ ਗਿਐ- ਪੌਂਪੀਓ
ਦਾਰੂ ਪੀ ਕੇ ਮਿੱਤਰਾਂ ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਅਕਾਲੀ ਦਲ ਟਕਸਾਲੀ ਨੇ ਸੇਖਵਾਂ ਤੇ ਬੀਰ ਦਵਿੰਦਰ ਸਿੰਘ ਨੂੰ ਪਾਰਟੀ ‘ਚੋਂ ਕੱਢਿਆ- ਇਕ ਖ਼ਬਰ
ਨੰਗੀ ਕੀ ਨਹਾਊ ਤੇ ਕੀ ਨਿਚੋੜੂ।

ਸਚਿਨ ਪਾਇਲਟ ਨੂੰ ਮਨਾਉਣ ਦੀਆਂ ਕੋਸ਼ਿਸ਼ਾਂ ਤੇਜ਼, ਰਾਹੁਲ ਤੇ ਪ੍ਰਿਅੰਕਾ ਨੇ ਵੀ ਗੱਲਬਾਤ ਕੀਤੀ-ਇਕ ਖ਼ਬਰ
ਅੜੀ ਵੇ ਅੜੀ  ਨਾ ਕਰ ਬਹੁਤੀ ਤੂੰ ਅੜੀ, ਵੇ ਮੈਂ ਕਦੋਂ ਦੀ ਖੜ੍ਹੀ।

ਬੇਅਦਬੀ ਮਾਮਲਾ: ਡੇਰੇ ਨੇ ਲਾਇਆ ਸਿੱਟ ‘ਤੇ ਡੇਰੇ ਨੂੰ ਬਦਨਾਮ ਕਰਨ ਦਾ ਦੋਸ਼-ਇਕ ਖਬਰ
ਸੁਣ ਲੈ ਨਿਹਾਲੀਏ ਚੋਰਾਂ ਦੀਆ ਗੱਲਾਂ।

ਅਕਾਲੀ ਦਲ ਬਾਦਲ ਦਾ ਪੰਥ ਵਿਰੋਧੀ ਚਿਹਰਾ ਡੇਰੇ ਨੇ ਬੇਨਕਾਬ ਕੀਤਾ- ਜਾਖੜ
ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲਾ ਤਿਲਕ ਪਿਆ।

ਕਾਂਗਰਸ ਨੇ ਕੇਂਦਰੀ ਮੰਤਰੀ ‘ਤੇ ਲਗਾਏ ਵਿਧਾਇਕਾਂ ਨੂੰ ਖ਼ਰੀਦਣ ਦੇ ਦੋਸ਼- ਇਕ ਖ਼ਬਰ
ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਭਾਰਤ ਅਤੇ ਚੀਨ ‘ਚ ਸ਼ਾਂਤੀ ਲਈ ਹਰ ਸੰਭਵ ਕਦਮ ਚੁੱਕਣਾ ਚਾਹੁੰਦਾ ਹਾਂ- ਟਰੰਪ
ਟੁੱਟ ਜਾਊਗਾ ਬਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।

ਕਾਂਗਰਸ ਸਰਕਾਰ ਨੂੰ ਡੇਗਣ ਦੀ ਸਾਜ਼ਿਸ਼ ‘ਚ ਸਚਿਨ ਪਾਇਲਟ ਸ਼ਾਮਲ ਸੀ- ਸੁਰਜੇਵਾਲਾ
ਘਰ ਕਾ ਭੇਤੀ ਲੰਕਾ ਢਾਏ।

ਮੋਦੀ ਸਰਕਾਰ ਪੰਜਾਬ ‘ਚ ਵੀ ਚੌਧਰ ਲਈ ਯਤਨਸ਼ੀਲ-ਇਕ ਖ਼ਬਰ
ਰਾਂਝਾ ਰਾਂਝਾ ਕਰਦੀ, ਲੱਗ ਕੇ ਨਾਲ਼ ਦੀਵਾਰਾਂ ਦੇ।

ਪੁਸ਼ਾਕ ਮਾਮਲਾ: ਸੁਖਬੀਰ ਬਾਦਲ ਦੇ ਬਚਾਉ ਲਈ ਸ਼੍ਰੋਮਣੀ ਕਮੇਟੀ ਦਾ ਪ੍ਰਧਾਨ ਉੱਤਰਿਆ ਮੈਦਾਨ ’ਚ- ਇਕ ਖ਼ਬਰ
ਨੌਕਰ ਕੀ ਤੇ ਨਖ਼ਰਾ ਕੀ! 

ਪੰਥਕ ਧਿਰਾਂ ਵਲੋਂ ਬਰਗਾੜੀ ‘ਚ ਮੁੜ ਰੋਸ ਪ੍ਰਦਰਸ਼ਨ ਕਰਨ ਦਾ ਐਲਾਨ- ਭਾਈ ਗੁਰਦੀਪ ਸਿੰਘ
ਆਰੀ ਆਰੀ ਆਰੀ, ਰਸਤਾ ਛੋੜ ਦਿਓ, ਲੰਘਣੀ ਮੇਮ ਕੁਆਰੀ।

12 July 2020

ਅਮਰਿੰਦਰ ਤੇ ਸੁਖਬੀਰ ਦੇ ਗੱਠਜੋੜ ਕਰ ਕੇ ਚਲਦੇ ਨੇ ਬਾਦਲਾਂ ਦੇ ਧੰਦੇ- ਢੀਂਡਸਾ
ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਡ ਦ ਸੇਮ ਥਿੰਗ।

ਵਿਕਾਸ ਦੂਬੇ ਦੇ ਸਬੰਧ ‘ਚ ਐੱਸ. ਆਈ. ਟੀ. ਦਾ ਗਠਨ- ਇਕ ਖ਼ਬਰ
ਸੱਪ ਮਰੇ ‘ਤੇ ਕੁੱਟਦੇ ਲਕੀਰ ਨੂੰ, ਬੱਲੇ ਓਏ ਨਿਆਂਕਾਰੀਓ।

ਟਰੰਪ ਵਲੋਂ ਚੀਨ ਨਾਲ ਦੂਜੇ ਪੜਾਅ ਦੇ ਵਪਾਰ ਸਮਝੌਤੇ ਤੋਂ ਇਨਕਾਰ- ਇਕ ਖ਼ਬਰ
ਮੁੰਡਾ ਭੰਨਦਾ ਕਿਰਕ ਨਹੀਂ ਕਰਦਾ, ਮੇਰੀਆਂ ਬਰੀਕ ਚੂੜੀਆਂ।

ਅਰਥਚਾਰਾ ਆਮ ਵਰਗੀ ਹਾਲਤ ਵਲ ਵਾਪਸੀ ਦੇ ਸੰਕੇਤ ਦੇਣ ਲੱਗਾ-ਆਰ.ਬੀ.ਆਈ. ਗਵਰਨਰ
ਨੀ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਪੰਜਾਬ ਦੇ ਆੜ੍ਹਤੀਏ ਵੀ ਕੇਂਦਰ ਦੇ ਖੇਤੀ ਆਰਡੀਨੈਂਸਾਂ ਖ਼ਿਲਾਫ਼ ਅੰਦੋਲਨ ਕਰਨਗੇ -ਇਕ ਖ਼ਬਰ
ਜਦੋਂ ਕੱਢ ਕੇ ਵਹੀ ਲੇਖਾ ਮੰਗਿਆ, ਫੇਰ ਕੀ ਜਵਾਬ ਦੇਵੇਂਗਾ।

ਸਾਜ਼ਿਸ਼ਕਰਤਾ ਦਾ ਨਾਮ ਸਾਹਮਣੇ ਆਉਣ ਦੇ ਬਾਵਜੂਦ ਬਾਦਲਾਂ ਦੀ ਚੁੱਪ ਤੋਂ ਪੰਥਕ ਹਲਕੇ ਹੈਰਾਨ-ਇਕ ਖ਼ਬਰ
ਚੋਰ ਦੀ ਮਾਂ, ਕੋਠੀ ‘ਚ ਮੂੰਹ।

ਪੰਜਾਬ ਭਾਜਪਾ ਦੀ ਮੀਟਿੰਗ ‘ਚ ਇਸ ਵਾਰ ਇਕੱਲਿਆਂ ਚੋਣ ਲੜਨ ਦੀ ਮੰਗ ਉੱਠੀ-ਇਕ ਖ਼ਬਰ
ਘੜਾ ਚੁੱਕ ਲਊਂ ਪੱਟਾਂ ‘ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਮੇਰੀ ਸਰਕਾਰ ਡੇਗਣ ਦੀਆਂ ਕੋਸ਼ਿਸ਼ਾਂ ਕਰ ਰਹੀ ਹੈ ਭਾਜਪਾ- ਗਹਿਲੋਤ
ਜਦੋਂ ਜਾਲ਼ ਫਾਂਧੀਆਂ ਨੇ ਪਾਇਆ, ਨੈਣ ਭਰ ਰੋਈ ਮਛਲੀ।

ਕੋਈ ਗਾਰੰਟੀ ਨਹੀਂ ਕਿ ਚੀਨ-ਭਾਰਤ ਤਣਾਅ ਵਧਣ ‘ਤੇ ਟਰੰਪ ਭਾਰਤ ਦਾ ਸਾਥ ਦੇਵੇਗਾ- ਅਮਰੀਕੀ ਸੁਰੱਖਿਆ ਮਾਹਰ
ਡਰਿਉ ਲੋਕੋ ਡਰਿਉ ਵੇ, ਲੰਬੜਾਂ ਦੀ ਸੇਪ ਨਾ ਕਰਿਉ ਵੇ।

ਬਾਦਲ ਪਰਵਾਰ ਕੇਂਦਰ ਦੀ ਮਦਦ ਨਾਲ ਖੁਦ ਨੂੰ ਤੇ ਸੌਦਾ ਸਾਧ ਨੂੰ ਬਚਾਉਣਾ ਚਾਹੁੰਦਾ- ਹਰਜਿੰਦਰ ਸਿੰਘ ਮਾਝੀ
ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਨਵਾਂ ਅਕਾਲੀ ਦਲ ਬਣਦਿਆਂ ਹੀ ਢੀਂਡਸਾ ਤੇ ਬ੍ਰਹਮਪੁਰਾ ‘ਚ ਦੂਸ਼ਣਬਾਜ਼ੀ ਛਿੜੀ- ਇਕ ਖ਼ਬਰ
ਕੂੰਡੇ ਭੱਜ ਗਏ ਘੋਟਣੇ ਟੁੱਟ ਗਏ, ਤਕੀਏ ਨਿਹੰਗ ਲੜ ਪਏ।

ਵਿਸ਼ਵ ਸਿਹਤ ਸੰਗਠਨ ਤੋਂ ਅਲੱਗ ਹੋਇਆ ਅਮਰੀਕਾ- ਇਕ ਖ਼ਬਰ
ਆਹ ਚੁੱਕ ਲੈ ਯੱਕੇ ਦਾ ਭਾੜਾ, ਤੁਰ ਜਾਹ ਪੇਕਿਆਂ ਨੂੰ।

ਸੇਖਵਾਂ ਤੇ ਬੀਰ ਦਵਿੰਦਰ ਸਿੰਘ ਵਲੋਂ ਟਕਸਾਲੀ ਅਕਾਲੀ ਦਲ ਤੋਂ ਦਿੱਤੇ ਅਸਤੀਫ਼ੇ- ਇਕ ਖ਼ਬਰ
ਜਿੰਨਾ ਨ੍ਹਾਤੀ, ਓਨਾ ਈ ਪੁੰਨ।

ਢੀਂਡਸਾ ਨੇ ਕਾਂਗਰਸ ਦੇ ਕਹਿਣ ‘ਤੇ ਨਵਾਂ ਅਕਾਲੀ ਦਲ ਬਣਾਇਆ- ਦਲਜੀਤ ਸਿੰਘ ਚੀਮਾ
ਪਰ੍ਹੇ ਵਿਚ ਆ ਕੇ ਕੈਦੋ ਨੇ ਮੱਗ ਮਾਰੀ, ਚਲੋ ਵੇਖ ਲਉ ਗੱਲਾਂ ਅੱਲ ਵਲੱਲੀਆਂ ਨੇ।

ਭਾਰਤ ਨਾਲ ਪਿਆਰ ਕਰਦੈ ਅਮਰੀਕਾ- ਟਰੰਪ
ਤੇਰਾ ਕਿਸੇ ਦੇ ਨਾਲ ਪਿਆਰ ਨਾਹੀਂ, ਨਿਰਾ ਮਤਲਬ ਆਪਣੇ ਦਾ ਯਾਰ ਐ ਤੂੰ।

ਥਾਣਿਆਂ ‘ਚ ਨਫ਼ਰੀ ਘੱਟ ਹੋਣ ਕਰ ਕੇ ਜ਼ੁਰਮਾਂ ਨੂੰ ਨੱਥ ਪਾਉਣੀ ਔਖੀ-ਇਕ ਖਬਰ
ਪੁਲਿਸ ਦੀਆਂ ਧਾੜਾਂ ਤਾਂ ਗੁੰਡਿਆਂ ਦੀ ਰਾਖੀ ‘ਤੇ ਲਾਈਆਂ ਹੋਈਆਂ।