19 Jan. 2020

ਕੈਪਟਨ ਅਮਰਿੰਦਰ ਸਿੰਘ ਨਸ਼ਿਆਂ ਦੇ ਖ਼ਾਤਮੇ ਲਈ ਪੂਰੀ ਤਰ੍ਹਾਂ ਸੰਜੀਦਾ- ਬਲਬੀਰ ਸਿੰਘ ਸਿੱਧੂ
ਗੱਡੀ ਵਿਚ ਇੱਟ ਰੱਖ ਲੈ, ਲਈ ਜਾਨਾਂ ਓ ਪ੍ਰਾਹੁਣਿਆਂ ਖ਼ਾਲੀ।

ਕੈਪਟਨ ਵਿਰੁੱਧ ਬਗਾਵਤ ਕਰਨ ਲਈ ਸਮੂਹ ਮੰਤਰੀਆਂ ਨੇ ਬਾਜਵਾ 'ਤੇ ਅਨੁਸ਼ਾਸਨੀ ਕਾਰਵਾਈ ਮੰਗੀ-ਇਕ ਖ਼ਬਰ
ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਕਸ਼ਮੀਰ 'ਚ ਇੰਟਰਨੈੱਟ ਬੰਦ ਕਰਨਾ ਠੀਕ, ਕਸ਼ਮੀਰੀ ਗੰਦੀਆਂ ਫ਼ਿਲਮਾਂ ਦੇਖਦੇ ਹਨ-ਵੀ.ਕੇ. ਸਰਸਵਤ
ਤੇ ਜਿਹੜੇ ਪਾਰਲੀਮੈਂਟ ਤੇ ਵਿਧਾਨ ਸਭਾਵਾਂ ਦੇ ਸੈਸ਼ਨਾਂ 'ਚ ਦੇਖਦੇ ਆ, ਉਹਨਾਂ ਬਾਰੇ ਕੀ ਖਿਆਲ ਐ।

ਹੈਰੀ ਅਤੇ ਮੇਗਨ ਨੇ ਸ਼ਾਹੀ ਠਾਠ ਬਾਠ ਛੱਡੇ- ਇਕ ਖ਼ਬਰ
ਚਾਰੇ ਕੰਨੀਆਂ ਮੇਰੀਆਂ ਵੇਖ ਖ਼ਾਲੀ, ਅਸੀਂ ਨਾਲ਼ ਨਹੀਂ ਕੁਝ ਲੈ ਚੱਲੇ।

ਮਾਲਵਾ 'ਚ ਬਾਦਲਾਂ ਖ਼ਿਲਾਫ਼ ਮੁਹਿੰਮ ਵਿੱਢਣ ਲਈ ਢੀਂਡਸਾ ਤਿਆਰ- ਇਕ ਖ਼ਬਰ
ਸਿੰਘ ਸੂਰਮੇ ਸ਼ੇਰ ਦਲੇਰ ਬਾਂਕੇ, ਕੱਸਣ ਘੋੜੀਆਂ ਜ਼ੀਨਾਂ ਸਵਾਰੀਆਂ ਨੀਂ।

ਦਿੱਲੀ ਦੇ ਸੰਘਰਸ਼ੀ ਯੱਗ 'ਚ ਹੁਣ ਪੰਜਾਬ ਵੀ ਪਾਏਗਾ ਆਪਣਾ ਹਿੱਸਾ-ਇਕ ਖ਼ਬਰ
ਛਾਲ਼ ਗੱਡੀ 'ਚੋਂ ਮਾਰੀ, ਮਿੱਤਰਾਂ ਦਾ ਨਾਂ ਸੁਣ ਕੇ।

ਭੂੰਦੜ ਨੇ ਬਾਦਲਾਂ ਦੇ ਪੁਰਖਿਆਂ ਤੋਂ ਬੰਦਾ ਬਹਾਦਰ ਦਾ ਸਿਰ ਵਢਵਾ ਦਿਤਾ-ਇਕ ਖ਼ਬਰ
ਆਨਰੇਰੀ ਪੀ.ਐਚ.ਡੀ. ਵਿਗੈਰਾ ਦੁਆਉ ਯਾਰ ਅਜਿਹੇ ਇਤਿਹਾਸਕ ਖੋਜੀ ਨੂੰ ।

ਅਕਾਲੀ ਸਰਕਾਰ ਸਮੇਂ ਹੋਏ ਬਿਜਲੀ ਸਮਝੌਤਿਆਂ 'ਤੇ ਵਾਈਟ ਪੇਪਰ ਲਿਆਵਾਂਗੇ-ਕੈਪਟਨ
ਕੌਨ ਜੀਤਾ ਹੈ ਤੇਰੀ ਜ਼ੁਲਫ਼ ਕੇ ਸਰ ਹੋਨੇ ਤੱਕ, ਖ਼ਾਕ ਹੋ ਜਾਏਂਗੇ ਹਮ ਤੁਮ ਕੋ ਖ਼ਬਰ ਹੋਨੇ ਤੱਕ।

ਸੁਖਬੀਰ ਬਾਦਲ ਦੇ ਤਾਨਾਸ਼ਾਹੀ ਵਤੀਰੇ ਕਰ ਕੇ ਵੱਡੇ ਆਗੂਆਂ ਨੇ ਅਕਾਲੀ ਦਲ ਤੋਂ ਦੂਰੀ ਬਣਾਈ- ਸੇਖਵਾਂ
ਗੱਲ ਸੋਚ ਕੇ ਕਰੀਂ ਜ਼ੈਲਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ।

ਜਨਵਰੀ ਮਹੀਨੇ ਪਰਚੂਨ ਮਹਿੰਗਾਈ ਅੱਠ ਪ੍ਰਤੀਸ਼ਤ ਰਹਿਣ ਦੀ ਪੇਸ਼ੀਨਗੋਈ-ਇਕ ਖ਼ਬਰ
ਸਾਡੇ ਨਾਲ਼ ਰਵ੍ਹੋਗੇ ਤੇ ਐਸ਼ ਕਰੋਗੇ।

ਅਕਾਲੀ ਦਲ ਦੇ ਕੁਝ ਵੱਡੇ ਚਿਹਰੇ ਸੁਧਾਰ ਮੁਹਿੰਮ 'ਚ ਹੋਣਗੇ ਸ਼ਾਮਲ- ਪਰਮਿੰਦਰ ਢੀਂਡਸਾ
ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।

ਕੀ ਦਿੱਲੀ ਵਿਚ ਕੇਜਰੀਵਾਲ ਦਾ ਸਿੱਖਾਂ ਤੋਂ ਮੋਹ ਭੰਗ ਹੋ ਗਿਐ?-ਇਕ ਸਵਾਲ
ਭੁੱਲ ਗਈ ਯਾਰ ਪੁਰਾਣੇ, ਨਵਿਆਂ ਦੇ ਸੰਗ ਲੱਗ ਕੇ।

ਮਾਨਸਾ 'ਚ ਬਾਦਲ ਦਲੀਏ ਪਰਮਿੰਦਰ ਸਿੰਘ ਢੀਂਡਸਾ ਦੀ ਪੈੜ ਨੱਪਦੇ ਰਹੇ-ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਸੁਖਬੀਰ ਬਾਦਲ ਮੁੰਗੇਰੀ ਲਾਲ ਵਾਲ਼ੇ ਰਾਜ ਕਰਨ ਦੇ ਸੁਪਨੇ ਲੈਣੇ ਛੱਡ ਦੇਵੇ- ਭੱਠਲ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।

15 Jan. 2020

ਜੇ.ਐਨ.ਯੂ. ਹਿੰਸਾ ਵਿਰੁੱਧ ਰੋਹ ਦਿੱਲੀ ਤੋਂ ਆਕਸਫੋਰਡ ਤੱਕ ਫ਼ੈਲਿਆ-ਇਕ ਖ਼ਬਰ
ਜਿਊਣਾ ਮੌੜ ਵੱਢਿਆ ਨਾ ਜਾਵੇ, ਛਵ੍ਹੀਆਂ ਦੇ ਘੁੰਡ ਮੁੜ ਗਏ।

ਸਾਰਿਆਂ ਨੂੰ ਤਰੱਕੀ ਦੇ ਮੌਕੇ ਤੇ ਰੋਜ਼ਗਾਰ ਦਿੱਤੇ ਬਿਨਾਂ ਸਿਆਸਤ ਨਹੀਂ ਛੱਡਾਂਗਾ- ਕੈਪਟਨ
ਇਕ ਤਾਂ ਮੁੰਡਾ ਚੜ੍ਹ ਗਿਆ ਪਿੱਪਲ 'ਤੇ, ਡਾਹਣੇ ਨੂੰ ਹੱਥ ਪਾ ਕੇ।

ਐਨ.ਆਰ.ਸੀ. ਦੇ ਮਸਲੇ 'ਤੇ ਮੈਂ ਸੋਨੀਆ ਵਲੋਂ ਬੁਲਾਈ ਮੀਟਿੰਗ 'ਚ ਨਹੀਂ ਜਾਵਾਂਗੀ- ਮਮਤਾ
ਘੜਾ ਚੁੱਕ ਲਉਂ ਪੱਟਾਂ 'ਤੇ ਹੱਥ ਧਰ ਕੇ, ਖ਼ਸਮਾਂ ਨੂੰ ਖਾਣ ਕੁੜੀਆਂ।

ਈਰਾਨ ਨੇ ਅਮਰੀਕਾ ਤੋਂ ਬਦਲਾ ਲੈਣ ਦਾ ਅਹਿਦ ਦੁਹਰਾਇਆ- ਇਕ ਖ਼ਬਰ
ਤੇਰੇ ਲਹੂ ਦੇ ਪੂਰਨਾ ਘੁੱਟ ਭਰਸਾਂ, ਕਿੱਥੇ ਜਾਏਂਗਾ ਬਚ ਕੇ ਛੋਹਰੂਆ ਓਏ।

ਢੀਂਡਸਾ ਬਾਰੇ ਫ਼ੈਸਲਾ ਕੋਰ ਕਮੇਟੀ ਕਰੇਗੀ- ਸੁਖਬੀਰ ਸਿੰਘ ਬਾਦਲ
ਹਾਹਾਹਾ, ਕੋਰ ਕਮੇਟੀ!..............

ਐਸ.ਐਚ.ਓ. ਨੇ ਲੁਟੇਰਿਆਂ ਨੂੰ ਛੱਡਣ ਬਦਲੇ ਸਾਢੇ ਤਿੰਨ ਲੱਖ ਰੁਪਏ ਲਏ- ਇਕ ਖ਼ਬਰ
ਕੋਠੀ ਦਾ ਲੈਂਟਰ ਵਿਚਾਰੇ ਦਾ ਅੱਧ 'ਚ ਪਿਆ ਸੀ, ਹੋਰ ਕੀ ਕਰਦਾ।

ਸਹਿਕਾਰੀ ਸੁਸਾਇਟੀ 'ਚੋਂ ਕਰਜ਼ਿਆਂ ਦਾ ਰਜਿਸਟਰ ਗ਼ਾਇਬ, ਮੈਨੇਜਰ ਸ਼ੱਕ ਦੇ ਘੇਰੇ 'ਚ-ਇਕ ਖ਼ਬਰ
ਨਾ ਰਹੇ ਬਾਂਸ , ਨਾ ਵੱਜੇ ਬੰਸਰੀ।

ਸੜਕ ਵਿਚਕਾਰ ਆਪਸ 'ਚ ਭਿੜੇ ਆਵਾਰਾ ਸਾਨ੍ਹ, ਜਾਨੀ ਮਾਲੀ ਨੁਕਸਾਨ ਤੋਂ ਬਚਾਅ-ਇਕ ਖ਼ਬਰ
ਸਰਕਾਰ ਨੂੰ ਚਾਹੀਦੈ ਕਿ ਸੈੱਸ ਦੀ ਰਾਸ਼ੀ 'ਚੋਂ ਇਹਨਾਂ ਲਈ ਸਟੇਡੀਅਮ ਬਣਵਾਵੇ।

ਢੀਂਡਸਾ ਪਿਉ-ਪੁੱਤਰ ਨੂੰ ਅਕਾਲੀ ਦਲ 'ਚੋਂ ਕੱਢਣ ਦੀ ਕਵਾਇਦ ਸ਼ੁਰੂ-ਇਕ ਖ਼ਬਰ
ਵੱਢਿਆ ਗੰਡਾਸਿਆਂ ਦੇ ਨਾਲ਼, ਚੰਦੜਾਂ ਨੇ ਮਿਰਜ਼ੇ ਨੂੰ।

ਰਾਮਗੜ੍ਹੀਆ ਫੈਡਰੇਸ਼ਨ ਵਲੋਂ ਅਵਤਾਰ ਸਿੰਘ ਹਿੱਤ ਦਾ ਸਵਾਗਤ- ਇਕ ਖ਼ਬਰ
ਸਵਾਗਤ ਹੋਣਾ ਵੀ ਚਾਹੀਦੈ, ਮੂੰਹ 'ਚੋਂ ਫੁੱਲ ਜੁ ਕਿਰਦੇ ਐ।

ਸ਼ਮਸ਼ਾਨਘਾਟ 'ਚ ਲੱਗਾ ਲੋਹੇ ਦਾ ਗੇਟ ਅਤੇ ਪਾਣੀ ਦੀ ਟੈਂਕੀ ਚੋਰੀ- ਇਕ ਖ਼ਬਰ
ਨੰਗ ਭੁੱਖ ਦੀ ਏਥੇ ਪ੍ਰਵਾਹ ਕੋਈ ਨਹੀਂ, ਹੁਕਮ ਹੋਵੇ ਤਾਂ ਦੇਗਾਂ ਨੂੰ ਚੱਟੀਏ ਜੀ।

 ਕੌਮੀ ਨਾਗਰਿਕਤਾ ਰਜਿਸਟਰ ਦੀ ਕੋਈ ਲੋੜ ਨਹੀਂ- ਨਿਤੀਸ਼ ਕੁਮਾਰ
ਪਰੇ ਹਟ ਜਾ ਬਲ਼ਦ ਸਿੰਗ ਮਾਰੂ, ਨੀਂ ਸੋਨੇ ਦੇ ਤਵੀਤ ਵਾਲ਼ੀਏ।

ਸੂਬਾ ਪ੍ਰਧਾਨ ਲਈ ਭਾਜਪਾ ਨੂੰ ਨਹੀਂ ਲੱਭਿਆ ਕੋਈ ਦਮਦਾਰ ਚਿਹਰਾ- ਇਕ ਖ਼ਬਰ
ਦੀਵਾ ਬਾਲ਼ ਕੇ ਮਿਟਾ ਲੈ ਨੀਂ ਹਨ੍ਹੇਰਾ, ਕੁੱਲੀ ਵਿਚੋਂ ਯਾਰ ਲੱਭ ਲੈ।

ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੀ ਕਾਨਫ਼੍ਰੰਸ ਨੂੰ ਮਾਘੀ 'ਤੇ ਪਈ ਮੀਂਹ ਦੀ ਮਾਰ- ਇਕ ਖ਼ਬਰ
ਭਿੱਜ ਗਈਆਂ ਨਣਾਨੇ ਪੂਣੀਆਂ, ਰੰਗਲੇ ਭਿੱਜ ਗਏ ਚਰਖ਼ੇ।

5 Jan. 2020

ਢੀਂਡਸਾ ਦੀ ਚੁੱਪ ਤੋਂ ਮਿਲ ਰਹੀ ਹੈ ਵੱਡੀ ਸਿਆਸੀ ਹਲਚਲ ਦੀ ਆਹਟ-ਇਕ ਖ਼ਬਰ
ਇਹਦੀ ਚੁੱਪ ਵਿਚ ਛੁਪਿਆ ਤੂਫਾਨ ਜੀ, ਕਰੂ ਬਾਦਲਾਂ ਦਾ ਡਾਢਾ ਨੁਕਸਾਨ ਜੀ।

ਨਾਗਰਿਕਤਾ ਕਾਨੂੰਨ ਦੇ ਫ਼ੈਸਲੇ ਤੋਂ ਇਕ ਇੰਚ ਵੀ ਪਿੱਛੇ ਨਹੀਂ ਹਟਾਂਗੇ-ਸ਼ਾਹ
ਵਾਰਸ ਸ਼ਾਹ ਨਾ ਮੁੜਾਂ ਰੰਝੇਟੜੇ ਤੋਂ ਭਾਵੇਂ ਬਾਪ ਦੇ ਬਾਪ ਦਾ ਬਾਪ ਆਵੇ।

ਭਾਜਪਾ, ਅਮਰਿੰਦਰ ਤੇ ਬਾਦਲਾਂ ਦੀ ਯਾਰੀ ਸਿੱਖਾਂ ਨੂੰ ਲੈ ਡੁੱਬੀ-ਭੋਮਾ, ਜੰਮੂ
ਤਿੰਨ ਰਲ਼ੇ, ਘਰ ਗਲ਼ੇ।

ਵਿਧਾਇਕਾਂ ਦੀ ਸਲਾਹ ਨਾਲ਼ ਹੀ ਢਿੱਲੋਂ ਨੂੰ ਆਗੂ ਥਾਪਿਆ- ਚੀਮਾ
ਖਵਾਜੇ ਦਾ ਗਵਾਹ.......।

ਹੱਥਾਂ ਨਾਲ਼ ਦਿਤੀਆਂ ਗੰਢਾਂ ਬਾਦਲਾਂ ਨੂੰ ਮੂੰਹ ਨਾਲ਼ ਖੋਲ੍ਹਣੀਆਂ ਪੈ ਰਹੀਆਂ ਹਨ- ਰਾਮੂਵਾਲੀਆ
ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

ਨਵੇਂ ਸਾਲ ਮੌਕੇ ਭਾਰਤ 'ਚ ਜੰਮੇ ਸਭ ਤੋਂ ਵੱਧ ਬੱਚੇ- ਇਕ ਖ਼ਬਰ
ਚਲੋ ਕਿਸੇ ਪਾਸੇ ਤਾਂ ਜੀ.ਡੀ.ਪੀ. ਵਧੀ, ਵਧਾਈਆਂ।

ਮੱਧ ਪ੍ਰਦੇਸ਼ ਚੋਂ ਸਿੱਖਾਂ ਨੂੰ ਕੱਢਣ ਖਿਲਾਫ਼ ਦਿੱਲੀ ਕਮੇਟੀ ਦਾ ਵਫ਼ਦ ਮਿਲੇਗਾ ਸ਼ਾਹ ਨੂੰ- ਇਕ  ਖ਼ਬਰ
ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਮੈਂ ਸੁਖਬੀਰ ਦੀ ਤਾਨਾਸ਼ਾਹੀ ਕਾਰਨ ਅਸਤੀਫ਼ਾ ਦਿਤਾ- ਪਰਮਿੰਦਰ ਢੀਂਡਸਾ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਉੱਤਰ ਪ੍ਰਦੇਸ਼ 'ਚ ਨਗਰ ਕੀਰਤਨ ਸਜਾਉਣ ਤੋਂ ਰੋਕਣਾ ਸਿੱਖਾਂ ਦੀ ਧਾਰਮਕ ਆਜ਼ਾਦੀ 'ਤੇ ਹਮਲਾ-ਲੌਂਗੋਵਾਲ
ਬਾਣੀਆਂ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।

ਮਮਤਾ ਵਲੋਂ ਸਾਰੀਆਂ ਧਿਰਾਂ ਨੂੰ ਇਕਜੁੱਟ ਹੋ ਕੇ ਭਾਜਪਾ ਦੇ ਬਾਈਕਾਟ ਦਾ ਸੱਦਾ-ਇਕ ਖ਼ਬਰ
ਕੁਰਸੀ 'ਤੇ ਬੈਠਦੀ ਲਗਾ ਕੇ ਮੇਜ਼ ਜੀ, ਬੀਬੀ ਦਾ ਸਰੂਪ ਬਿਜਲੀ ਤੋਂ ਤੇਜ਼ ਜੀ।

ਲੋਕਾਂ ਨੂੰ ਗੁੰਮਰਾਹ ਕਰ ਰਹੀ ਹੈ ਕੈਪਟਨ ਸਰਕਾਰ-ਰਾਜੂ ਖੰਨਾ
ਦੋ ਘੁੱਟ ਪੀ ਕੇ ਦਾਰੂ, ਪੈਰ 'ਤੇ ਮੁਕਰ ਗਿਆ।

ਭਾਰਤ ਦੇ ਉਪ ਰਾਸ਼ਟਰਪਤੀ ਵਲੋਂ ਜ਼ਾਤ-ਪਾਤ ਖ਼ਤਮ ਕਰਨ ਦੀ ਅਪੀਲ-ਇਕ ਖ਼ਬਰ
ਬਿਆਨ ਦੇਣ ਤੋਂ ਪਹਿਲਾਂ 'ਘਰੇ' ਸਲਾਹ ਨਹੀਂ ਕੀਤੀ ਲਗਦੀ।

ਨਵੇਂ ਸਾਲ 'ਚ ਪਰਮਿੰਦਰ ਸਿੰਘ ਢੀਂਡਸਾ ਵੀ ਬਾਦਲਾਂ ਖਿਲਾਫ਼ ਫਰੰਟ ਖੋਲ੍ਹਣਗੇ- ਬੱਬੀ ਬਾਦਲ
ਘੁੱਗੂਆਂ ਨੂੰ ਤੂੰ ਟੱਕਰੀ, ਤੈਨੂੰ ਟੱਕਰੂ ਬੰਸਰੀ ਵਾਲ਼ਾ।

ਨਵੇਂ ਸਾਲ 'ਚ ਵੀ ਲੋਕਾਂ ਦੇ ਰੋਹ ਦਾ ਸ਼ਿਕਾਰ ਹੋਵੇਗੀ ਪੰਜਾਬ ਸਰਕਾਰ- ਇਕ ਖ਼ਬਰ
ਲੱਤ ਮਾਰੂੰਗੀ ਪੰਜੇਬਾਂ ਵਾਲ਼ੀ, ਪਰ੍ਹਾਂ ਹੋ ਜਾ ਚੱਟੂ ਵੱਟਿਆ।

ਮਹਾਂਰਾਸ਼ਟਰ 'ਚ ਮੰਤਰੀਆਂ ਦੀ ਚੋਣ ਤੋਂ ਕਾਂਗਰਸ ਧੜਾ ਨਾਰਾਜ਼- ਇਕ ਖ਼ਬਰ
ਕੋਹ ਤੁਰੀ ਨਾ ਅਖੇ ਬਾਬਾ ਤ੍ਰਿਹਾਈ।

ਕੇਰਲਾ ਅਸੈਂਬਲੀ ਨੇ ਨਾਗਰਿਕਤਾ ਕਾਨੂੰਨ ਨੂੰ ਰੱਦ ਕਰਨ ਦਾ ਮਤਾ ਪਾਸ ਕੀਤਾ- ਇਕ ਖ਼ਬਰ
ਹਾਜੀ ਲੋਕ ਮੱਕੇ ਵਲ ਜਾਂਦੇ, ਅਸਾਂ ਜਾਣਾ ਤਖ਼ਤ ਹਜ਼ਾਰੇ।

30 Dec. 2019

ਬੋਰਿਸ ਜਾਹਨਸਨ ਦੀ ਜਿੱਤ ਨੇ ਬ੍ਰੈਗਜ਼ਿਟ ਦਾ ਰਾਹ ਕੀਤਾ ਪੱਧਰਾ- ਇਕ ਖ਼ਬਰ
ਚੰਨ ਬਣ ਗਿਆ ਠਾਣੇਦਾਰ, ਹੁਣ ਮੈਂ ਨਹੀਂ ਡਰਦੀ।

ਨਾਗਰਿਕਤਾ ਸੋਧ ਐਕਟ ਵਿਰੁੱਧ ਸਾਰਾ ਦੇਸ਼ ਇਕਜੁੱਟ- ਜਾਖੜ
ਮੈਨੂੰ ਬਗਲੀ ਸਿਖਾ ਦੇ ਗਲ਼ ਪਾਉਣੀ, ਚੱਲੂੰਗੀ ਤੇਰੇ ਨਾਲ ਜੋਗੀਆ।

ਲੋਕਾਂ ਦਾ ਭਰੋਸਾ ਆਈ.ਜੀ. ਕੁੰਵਰ ਵਿਜੇ ਪ੍ਰਤਾਪ ਸਿੰਘ 'ਤੇ ਕਿਉਂ?-ਇਕ ਸਵਾਲ
ਕੰਨੀਂ ਨੱਤੀਆਂ ਸੰਧੂਰੀ ਸਿਰ ਸਾਫ਼ਾ, ਉਹ ਮੇਰਾ ਵੀਰ ਕੁੜੀਓ।

ਹੁਣ ਮੈਂ ਅਕਾਲੀ ਸਿਆਸਤ ਬਾਰੇ ਪਹਿਲੀ ਜਨਵਰੀ ਨੂੰ ਦੱਸਾਂਗਾ- ਸੁਖਦੇਵ ਸਿੰਘ ਢੀਂਡਸਾ
ਕਿਤੇ 'ਕੱਲੀ ਬਹਿ ਕੇ ਸੋਚੀਂ ਨੀਂ, ਅਸੀਂ ਕੀ ਨਹੀਂ ਕੀਤਾ ਤੇਰੇ ਲਈ।

ਹਿੰਦੂਤਵੀ ਤਾਕਤਾਂ ਨੇ ਸਿੱਖਾਂ ਨਾਲ਼ ਹਮੇਸ਼ਾ ਹੀ ਧੋਖਾ ਕੀਤਾ-ਸਿਮਰਨਜੀਤ ਸਿੰਘ ਮਾਨ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਨਵੇਂ ਸਾਲ 'ਚ ਤਿਆਰੀ ਨਾਲ਼ ਨਿੱਤਰਾਂਗੇ ਮੈਦਾਨ 'ਚ- ਰਾਮੂਵਾਲੀਆ
ਜੱਟ ਆਉਂਦੈ ਪਰੈਣੀ ਕੱਸੀ, ਨੀਂ ਹੁਣ ਮੈਂ ਕੀ ਕਰਾਂ।

ਅਕਾਲੀਆਂ ਦੇ ਰਾਜ ਸਮੇਂ ਲੱਗੇ ਤਾਪ ਬਿਜਲੀ ਘਰਾਂ ਦੀ ਜਾਂਚ ਹੋਵੇ- ਜਾਖੜ
ਤੁਸੀਂ ਜਾਂਚ ਕਰਵਾਉ ਜਾਖੜ ਸਾਹਿਬ, ਰੋਕਿਆ ਕਿਸ ਨੇ ਹੈ।

ਜਦ ਤਕ ਮੈਂ ਜਿਊਂਦੀ ਹਾਂ, ਬੰਗਾਲ 'ਚ ਨਾਗਰਿਕਤਾ ਕਾਨੂੰਨ ਲਾਗੂ ਨਹੀਂ ਹੋਵੇਗਾ- ਮਮਤਾ ਬੈਨਰਜੀ
ਹਾਜੀ ਲੋਕ ਮੱਕੇ ਵਲ ਜਾਂਦੇ, ਅਸਾਂ ਜਾਣਾ ਤਖ਼ਤ ਹਜ਼ਾਰੇ।

ਵਿਰੋਧ ਨੂੰ ਵੇਖਦਿਆਂ ਐਨ. ਆਰ. ਸੀ. ਤੋਂ ਚਾਲਾਕੀ ਨਾਲ਼ ਪਿੱਛੇ ਹਟ ਗਈ ਭਾਜਪਾ- ਪ੍ਰਸ਼ਾਂਤ ਕਿਸ਼ੋਰ
ਸਾਨ੍ਹ ਬਣ ਕੇ ਮਾਰੀਆਂ ਬੜ੍ਹਕਾਂ, ਹੁਣ ਬਣ ਗਏ ਗਊ ਦੇ ਜਾਏ।

ਦਸ ਸਾਲਾਂ ਦੇ ਰਾਜ ਵਿਚ ਗੈਂਗਸਟਰ ਪੈਦਾ ਕਰਨ ਵਾਲੇ ਹੁਣ ਦੂਜਿਆਂ 'ਤੇ ਦੋਸ਼ ਲਾ ਰਹੇ ਹਨ- ਨਵਜੋਤ ਸਿੱਧੂ
ਸੱਸੇ ਕਾਹਨੂੰ ਮਿਹਣੇ ਮਾਰਦੀ, ਆਪਣੇ ਤੂੰ ਦਿਨ ਭੁੱਲ ਗਈ।

ਬਠਿੰਡਾ 'ਚ ਏਅਰਕਰਾਫਟ ਮਿੱਗ ਦਾ ਸਿਹਰਾ ਲੈਣ ਲਈ ਦਿਉਰ-ਭਰਜਾਈ 'ਚ ਦੌੜ-ਇਕ ਖ਼ਬਰ
ਦਿਉਰ ਬਣਦਾ ਮੈਂ ਦੁੱਧ ਪਿਆਉਂਦੀ, ਤੂੰ ਬਣਿਆ ਮੇਰਾ ਸ਼ਰੀਕ ਵੇ ਮੁੰਡਿਆ ਤੂੰ ਬਣਿਆ ਮੇਰਾ ਸ਼ਰੀਕ।
ਵਿਚ ਸਿਆਸਤ ਸਕਾ ਨਾ ਕੋਈ, ਕਹਿੰਦੇ ਲੋਕ ਸਿਆਣੇ, ਅੱਲ੍ਹੜੇ ਤੂੰ ਕੀ ਜਾਣੇ।

ਭਾਜਪਾ ਦੀਆਂ ਫੁੱਟਪਾਊ ਨੀਤੀਆਂ ਤੋਂ ਲੋਕ ਹੋਏ ਜਾਗਰੂਕ- ਮਨੀਸ਼ ਤਿਵਾੜੀ
ਘੁੰਡ ਕੱਢ ਕੇ ਸਦਾ ਖੈਰ ਪਾਈਏ, ਸਾਧਾਂ ਦਾ ਭਰੋਸਾ ਕੋਈ ਨਾ।

ਭਾਰਤ ਦੀ ਅਰਥ ਵਿਵਸਥਾ ਗੰਭੀਰ ਮੰਦੀ ਦੇ ਦੌਰ 'ਚ, ਫੌਰੀ ਨੀਤੀਗਤ ਕਦਮ ਚੁੱਕਣ ਦੀ ਲੋੜ- ਆਈ.ਐਮ.ਐਫ.
ਬਹੁਤਿਆਂ ਭਰਾਵਾਂ ਵਾਲ਼ੀਏ, ਗੱਡਾ ਜਾਂਦਾ ਏ ਸੰਦੂਕੋਂ ਖ਼ਾਲੀ।

ਬਿਜਲੀ ਦਰਾਂ 'ਚ ਕੀਤੇ ਵਾਧੇ ਦੀ ਅਕਾਲੀ ਦਲ ਵਲੋਂ ਨਿਖੇਧੀ- ਇਕ ਖ਼ਬਰ
ਬੀਬੀ ਐਹ ਬਲਦ ਮਾਰਦਾ ਤਾਂ ਨਹੀਂ? ਵੇ ਵੀਰਾ ਰੰਡੀ ਕਿਹਦੀ ਕੀਤੀ ਹੋਈ ਆਂ!

27 Dec. 2019

ਝਾਰਖੰਡ ਵਿਚ ਭਾਜਪਾ ਦਾ ਬਿਸਤਰਾ ਗੋਲ਼, ਗੱਠਜੋੜ ਨੂੰ ਮਿਲੀ ਸੱਤਾ-ਇਕ ਖ਼ਬਰ
ਬੇਰੀਆਂ ਦੇ ਬੇਰ ਮੁੱਕ ਗਏ, ਹੁਣ ਕਾਸ ਦੇ ਬਹਾਨੇ ਆਵਾਂ।

ਪੰਜਾਬ ਦੀ ਮਾੜੀ ਵਿਤੀ ਹਾਲਤ ਲਈ ਪਿਛਲੀ ਅਕਾਲੀ-ਭਾਜਪਾ ਸਰਕਾਰ ਜ਼ਿੰਮੇਵਾਰ- ਕੈਪਟਨ
ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲ਼ਾ ਤਿਲਕ ਪਿਆ।

ਵਿਤ ਮੰਤਰਾਲੇ ਵਲੋਂ ਭਾਰਤੀਆਂ ਦੇ ਸਵਿਸ ਖਾਤਿਆਂ ਬਾਰੇ ਜਾਣਕਾਰੀ ਦੇਣ ਤੋਂ ਇਨਕਾਰ- ਇਕ ਖ਼ਬਰ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।

ਕੇਂਦਰ ਸਰਕਾਰ ਵਿਚ ਹਿੰਮਤ ਹੈ ਤਾਂ ਮੇਰੀ ਸਰਕਾਰ ਡੇਗ ਕੇ ਦਿਖਾਏ-ਮਮਤਾ ਬੈਨਰਜੀ
ਮੈਂ ਡਿਪਟੀ ਦੀ ਸਾਲ਼ੀ, ਕੈਦ ਕਰਾ ਦਊਂਗੀ।

ਮੋਦੀ ਸਰਕਾਰ ਲੋਕਾਂ ਦੀ ਆਵਾਜ਼ ਨਹੀਂ ਸੁਣ ਰਹੀ- ਸੋਨੀਆ ਗਾਂਧੀ
ਕੰਤ ਨਿਆਣੇ ਨੂੰ, ਦੱਸ ਮੈਂ ਕਿਵੇਂ ਸਮਝਾਵਾਂ!

ਆਸਟ੍ਰੇਲੀਆ 'ਚ ਘੱਟ ਤੇਲ ਪਾਉਣ ਵਾਲੇ ਪਟਰੌਲ ਪੰਪਾਂ ਨੂੰ ਜ਼ੁਰਮਾਨੇ- ਇਕ ਖ਼ਬਰ
ਪਹੁੰਚ ਗਈਆਂ ਕਰਤੂਤਾਂ ਆਸਟ੍ਰੇਲੀਆ ਵੀ, ਸ਼ਾਬਾਸ਼ੇ!

ਟਰੰਪ ਵਿਰੁੱਧ ਸੰਸਦ ਦੇ ਹੇਠਲੇ ਸਦਨ 'ਚ ਮਹਾਂਦੋਸ਼ ਮਤਾ ਪਾਸ- ਇਕ ਖ਼ਬਰ
ਵੈਲੀਆਂ ਨੇ ਵੈਲ ਕਮਾਉਣੇ, ਲੋਕ ਭਾਵੇਂ ਦੇਣ ਗਾਲ਼ੀਆਂ।

ਢੀਂਡਸਾ ਨੇ ਹਮਾਇਤੀਆਂ ਦਾ ਵੱਡਾ ਇਕੱਠ ਕਰ ਕੇ ਬਾਦਲਾਂ ਨੂੰ ਆਪਣਾ ਜ਼ੋਰ ਵਿਖਾਇਆ-ਇਕ ਖ਼ਬਰ
ਕੱਢ ਹਰਨਾੜੀਆਂ ਜੱਟ ਤਿਆਰ ਹੋਏ, ਸੀਆਂ ਭੋਇੰ ਨੂੰ ਜਿਨ੍ਹਾਂ ਲਾਉਣੀਆਂ ਨੇ।

ਸੰਸਦ ਦੇ ਇਜਲਾਸ 'ਚੋਂ ਗ਼ੈਰਹਾਜ਼ਰ ਰਹਿਣ ਦੀ ਸੁਖਬੀਰ ਅਤੇ ਸੰਨੀ ਦਿਉਲ ਦੀ ਝੰਡੀ-ਇਕ ਖ਼ਬਰ
ਹੱਥ ਪੁਰਾਣੇ ਖੌਂਸੜੇ, ਬਸੰਤੇ ਹੋਰੀਂ ਆਏ।

ਸੁਖਬੀਰ 21 ਨੂੰ ਪਟਿਆਲੇ ਤੇ 24 ਨੂੰ ਮੋਗੇ ਵਿਖੇ ਧਰਨਿਆਂ ਦੀ ਅਗਵਾਈ ਕਰਨਗੇ- ਇਕ ਖ਼ਬਰ
ਹੋਰ ਵਿਹਲਾ ਬੰਦਾ ਕਰੇ ਵੀ ਕੀ, ਯਾਰ!

38 ਵਰ੍ਹਿਆਂ ਦੀ ਔਰਤ ਨੇ 17ਵੇਂ ਬੱਚੇ ਨੂੰ ਜਨਮ ਦਿਤਾ- ਇਕ ਖ਼ਬਰ
ਕੋਈ ਮੈਡਲ ਸ਼ੈਡਲ ਦਿਉ ਯਾਰ, ਫੋਕੀਆਂ ਖ਼ਬਰਾਂ ਹੀ ਨਾ ਲਾਉ।

ਅਸਲੀ ਥਾਣੇਦਾਰ ਨਾਲ ਨਕਲੀ ਥਾਣੇਦਾਰ ਨੇ ਮਾਰੀ ਲੱਖਾਂ ਦੀ ਠੱਗੀ-ਇਕ ਖ਼ਬਰ
ਚੋਰਾਂ ਨੂੰ ਮੋਰ!

ਚੁਣੌਤੀਆਂ ਭਰਪੂਰ ਰਹੇਗਾ ਸ਼੍ਰੋਮਣੀ ਅਕਾਲੀ ਦਲ ਨੂੰ ਆਉਣ ਵਾਲ਼ਾ ਸਾਲ-ਇਕ ਖ਼ਬਰ
ਘੁੱਗੂਆਂ ਨੂੰ ਤੂੰ ਟੱਕਰੀ, ਤੈਨੂੰ ਟੱਕਰੂ ਬੰਸਰੀ ਵਾਲ਼ਾ।

24 Dec. 2019

ਕੈਪਟਨ ਸਾਡੇ ਪਰਵਾਰ ਨੂੰ ਬਦਨਾਮ ਕਰ ਕੇ ਸਿਆਸੀ ਲਾਹਾ ਲੈਣ ਦੀ ਕੋਸ਼ਿਸ਼ 'ਚ- ਪ੍ਰਕਾਸ਼ ਸਿੰਘ ਬਾਦਲ
ਜੇਠ ਦੇ ਬੁਰੇ ਦਿਨ ਆਏ, ਕਿੱਕਰਾਂ ਨੂੰ ਪਾਵੇ ਜੱਫੀਆਂ।

ਪੱਛਮੀ ਪੰਜਾਬ ਦੇ ਸਕੂਲਾਂ 'ਚ ਪੰਜਵੀਂ ਜਮਾਤ ਤੱਕ ਪੰਜਾਬੀ ਭਾਸ਼ਾ ਲਾਗੂ ਕਰਨ ਦਾ ਅਦਾਲਤੀ ਫ਼ੈਸਲਾ-ਇਕ ਖ਼ਬਰ
ਕੰਨਾਂ ਦੇ ਵਿਚ ਮਿੱਠਾ ਮਿੱਠਾ, ਦਿੰਦੀ ਏ ਰਸ ਘੋਲ਼ ਪੰਜਾਬੀ।

'ਖ਼ਾਲਸਾ ਏਡ' ਕਸ਼ਮੀਰੀ ਵਿਦਿਆਰਥੀਆਂ ਲਈ ਬਣੀ ਸਹਾਰਾ- ਇਕ ਖ਼ਬਰ
ਗੁਰੂ ਜੀ ਤੇਰੀ ਫੌਜ ਰੰਗਲੀ, ਆਈ ਆ ਮੋਰਚਾ ਜਿੱਤ ਕੇ।

ਮਾਇਆਵਤੀ ਅਤੇ ਅਖ਼ਿਲੇਸ਼ ਵਿਚਕਾਰ ਸੀਟਾਂ ਦੀ ਵੰਡ ਮੁਕੰਮਲ- ਇਕ ਖ਼ਬਰ
ਭੋਂ ਦੇ ਵਿਚੋਂ ਅੱਧ ਸਾਂਭ ਲੈ, ਬਲ਼ਦ ਸਾਂਭ ਲੈ ਨਾਰਾ।

ਕਸ਼ਮੀਰੀ ਵਿਦਿਆਰਥੀਆਂ ਨਾਲ ਹੋ ਰਹੀ ਬਦਸਲੂਕੀ ਬਾਰੇ ਮੋਦੀ ਚੁੱਪ ਕਿਉਂ?- ਉਮਰ ਅਬਦੁੱਲਾ
ਹੁਣ ਤੂੰ ਕਿਧਰ ਗਿਆ, ਜੇਠ ਬੋਲੀਆਂ ਮਾਰੇ।

ਡਾ. ਮਨਮੋਹਨ ਸਿੰਘ ਨੂੰ ਅੰਮ੍ਰਿਤਸਰ ਤੋਂ ਲੋਕ ਸਭਾ ਸੀਟ ਲੜਾਉਣ ਲਈ ਤਿਆਰੀ 'ਚ ਕਾਂਗਰਸ- ਇਕ ਖ਼ਬਰ
ਬੱਗੇ ਬਲਦ ਖਰਾਸੇ ਜਾਣਾ, ਕੋਠੀ 'ਚੋਂ ਲਿਆ ਦੇ ਘੁੰਗਰੂ।

ਸ਼ਰਾਬ ਦੀ ਖਪਤ ਵਾਲ਼ੇ ਮੋਹਰੀ ਰਾਜਾਂ 'ਚ ਪੰਜਾਬ ਵੀ ਸ਼ਾਮਲ- ਇਕ ਖ਼ਬਰ
ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।

ਅਕਾਲੀ-ਭਾਜਪਾਈਆਂ ਨੂੰ 'ਸ਼ੋਅਲੇ' ਦੇ ਗੱਬਰ ਸਿੰਘ ਵਾਂਗ ਨਵਜੋਤ ਸਿੱਧੂ ਸੁਪਨੇ 'ਚ ਵੀ ਦਿਸਦੈ- ਜਾਖੜ
ਅਰੇ ਸੁਸਰੋ ਸੋ ਜਾਉ, ਨਹੀਂ ਤੋ ਸਿੱਧੂ ਆ ਜਾਏਗਾ।

ਲੰਬੀ ਤੋਂ ਚੰਡੀਗੜ੍ਹ ਪਹੁੰਚੇ ਵੱਡੇ ਬਾਦਲ ਵਲੋਂ ਗ੍ਰਿਫ਼ਤਾਰੀ ਦੀ ਪੇਸ਼ਕਸ਼- ਇਕ ਖ਼ਬਰ
ਅੰਮ੍ਰਿਤਸਰ 'ਚ ਖੇਡੇ ਡਰਾਮੇ ਤੋਂ ਬਾਅਦ ਇਸ ਦਾ ਦੂਜਾ ਸੀਨ।

ਸ਼੍ਰੋਮਣੀ ਕਮੇਟੀ ਚੋਣਾਂ ਲਈ ਵਿਧਾਨ ਸਭਾ 'ਚ ਮਤਾ ਪਾਸ ਕਰਾਉਣਾ ਫੂਲਕਾ ਦੀ ਹਿੰਮਤ- ਬ੍ਰਹਮਪੁਰਾ
ਬਾਜ਼ੀ ਲੈ ਗਿਆ ਜੀ ਦਾਖੇ ਵਾਲ਼ਾ ਗੱਭਰੂ, ਬਾਕੀ ਰਹਿ ਗਏ ਹਾਲ ਪੁੱਛਦੇ।

 ਜਸਟਿਸ ਰਣਜੀਤ ਸਿੰਘ ਕੇਸ 'ਚ ਹਾਈ ਕੋਰਟ ਵਲੋਂ ਸੁਖਬੀਰ ਅਤੇ ਮਜੀਠੀਆ ਨੂੰ ਪੇਸ਼ ਹੋਣ ਲਈ ਨੋਟਿਸ ਜਾਰੀ- ਇਕ ਖ਼ਬਰ
ਟੈਮ ਹੋ ਗਿਆ ਬਦਲ ਗਏ ਕਾਂਟੇ, ਗੱਡੀ ਆਉਣੀ ਸ਼ੂੰ ਕਰ ਕੇ।

ਤਖ਼ਤ ਪਟਨਾ ਸਾਹਿਬ ਦਾ 'ਜਥੇਦਾਰ' ਹੀ ਮਹੰਤਸ਼ਾਹੀ ਚਲਾ ਰਿਹਾ ਹੈ- ਹਿਤ
ਟੁੱਟ ਪੈਣੇ ਦਾ ਕੁਲੱਛਣਾ ਬੋਤਾ, ਚੜ੍ਹਦੀ ਨੂੰ ਵੱਢੇ ਦੰਦੀਆਂ।

ਸਮਝੌਤੇ ਤੋਂ ਦੂਜੇ ਦਿਨ ਹੀ ਭਾਜਪਾ-ਸ਼ਿਵ ਸੈਨਾ ਗੱਠਜੋੜ 'ਚ ਦਿਸੀਆਂ ਤਰੇੜਾਂ- ਇਕ ਖ਼ਬਰ
ਕੋਹ ਤੁਰੀ ਨਾ, ਬਾਬਾ ਤ੍ਰਿਹਾਈ।

ਪ੍ਰਕਾਸ਼ ਪੁਰਬ ਸਮਾਗਮਾਂ ਲਈ ਅਕਾਲੀ ਸਾਥ ਦੇਣ- ਕੈਪਟਨ
ਉਹਨਾਂ ਨੂੰ ਪ੍ਰਕਾਸ਼ ਪੁਰਬ ਸੁੱਝਦੈ, ਉਹਨਾਂ ਦੇ ਤਾਂ ਭਾਅ ਦੀ ਬਣੀ ਹੋਈ ਐ।

ਕੇਜਰੀਵਾਲ ਨੇ ਮੋਦੀ ਨੂੰ ਪੂਰਨ ਰਾਜ ਦੇ ਦਰਜੇ ਦਾ ਵਾਅਦਾ ਯਾਦ ਕਰਵਾਇਆ-ਇਕ ਖ਼ਬਰ
ਜਿਧਰ ਗਈਆਂ ਬੇੜੀਆਂ, ਉਧਰ ਗਏ ਮਲਾਹ।

16 Dec. 2019

ਬੇਅਦਬੀ, ਸੌਦਾ-ਸਾਧ, ਪੁੱਤਰ ਮੋਹ ਬਾਦਲ ਪਰਵਾਰ ਲਈ ਪਤਨ ਦਾ ਕਾਰਨ ਬਣਿਆਂ-ਇਕ ਖ਼ਬਰ
ਹਵਾ ਉਤਲੀ 'ਚ ਜਾ ਕੇ ਫਟ ਜਾਂਦੇ, ਜਿਹਨਾਂ ਗੁੱਡਿਆਂ ਨੂੰ ਖੁੱਲ੍ਹੀ ਡੋਰ ਲੱਭੇ।

ਡੈਮੋਕਰੈਟਾਂ ਨੇ ਟਰੰਪ ਨੂੰ ਕੌਮੀ ਸੁਰੱਖਿਆ ਲਈ ਖ਼ਤਰਾ ਦੱਸਿਆ-ਇਕ ਖ਼ਬਰ
ਕਿੱਕਰ 'ਤੇ ਅੰਗੂਰ ਚੜ੍ਹਾਇਆ, ਹਰ ਗੁੱਛਾ ਜ਼ਖ਼ਮਾਇਆ।

ਪੀ.ਐਮ.ਸੀ. ਬੈਂਕ ਦੇ ਦੇ ਗਾਹਕ ਪ੍ਰਦਰਸ਼ਨ ਤੋਂ ਬਾਅਦ ਹਿਰਾਸਤ ਵਿਚ- ਇਕ ਖ਼ਬਰ
ਯਾਨੀ ਕਿ ਜਿਹੜੇ ਲੁੱਟੇ ਗਏ ਉਹੋ ਹੀ ਜੇਹਲ ਵਿਚ, ਵਾਹ ਰੇ ਭਾਰਤ ਦੇ ਨਿਆਂ ਸਿਸਟਮ।

ਨਵਜੋਤ ਸਿੰਘ ਸਿੱਧੂ ਨੂੰ ਉਪ ਮੁੱਖ ਮੰਤਰੀ ਬਣਾਉਣ ਦਾ ਕੋਈ ਪ੍ਰਸਤਾਵ ਨਹੀਂ - ਆਸ਼ਾ ਕੁਮਾਰੀ
ਐਵੇਂ ਹੀ ਰੌਲ਼ਾ ਪੈ ਗਿਆ, ਐਵੇਂ ਹੀ ਰੌਲ਼ਾ ਪੈ ਗਿਆ।

ਰਾਜ ਸਭਾ ਦੇ ਮੈਂਬਰਾਂ ਨੇ ਆਪਣੀ ਤਨਖਾਹ ਤੋਂ ਕਈ ਗੁਣਾ ਵਧੇਰੇ ਟੀ.ਏ.ਡੀ.ਏ. ਵਸੂਲਿਆ-ਇਕ ਖ਼ਬਰ
ਭਰ ਲਉ ਝੋਲ਼ੀਆਂ ਮਿੱਤਰੋ ਕਿ ਲੱਡੂਆਂ ਦਾ ਮੀਂਹ ਵਰ੍ਹਦਾ।

ਅਕਾਲੀ ਦਲ ਬਾਦਲ ਦੇ ਜਨਰਲ ਸਕੱਤਰ ਚੀਮਾ ਵਲੋਂ ਜ਼ਮਾਨਤ ਲਈ ਅਰਜ਼ੀ- ਇਕ ਖ਼ਬਰ
ਕੀ ਖੱਟਿਆ ਮੈਂ ਤੇਰੀ ਹੀਰ ਬਣ ਕੇ!

ਸ਼੍ਰੋਮਣੀ ਅਕਾਲੀ ਦਲ ਦਾ 99 ਸਾਲਾ ਸਥਾਪਨਾ ਦਿਵਸ ਮਨਾਉਣ ਲਈ ਅਕਾਲੀ ਤੇ ਟਕਸਾਲੀ ਆਹਮੋ-ਸਾਹਮਣੇ-ਇਕ ਖ਼ਬਰ
ਕੁੰਢੀਆਂ ਦੇ ਸਿੰਗ ਫ਼ਸ ਗਏ, ਕੋਈ ਨਿੱਤਰੂ ਵੜੇਂਵੇਂ ਖਾਣੀ।

ਸੁਖਦੇਵ ਸਿੰਘ ਢੀਂਡਸਾ ਦੇ ਹੱਕ ਵਿਚ ਨਿੱਤਰਿਆ ਬਲਵੰਤ ਸਿੰਘ ਰਾਮੂਵਾਲੀਆ-ਇਕ ਖ਼ਬਰ
ਓਧਰੋਂ ਰੁਮਾਲ ਹਿੱਲਿਆ, ਮੇਰੀ ਇਧਰੋਂ ਹਿੱਲੀ ਫੁੱਲਕਾਰੀ।

ਸੱਤਾਧਾਰੀ ਧਿਰ ਦੇ ਮੰਤਰੀ ਆਪਣੀਆਂ ਜੇਬਾਂ ਭਰਨ 'ਚ ਵਿਅਸਤ- ਸੁਖਬੀਰ ਬਾਦਲ
ਅੱਧੋ ਅੱਧ ਨਾ ਸਹੀ ਪਰ ਬਾਕੀਆਂ ਦਾ ਵੀ ਕੁਝ ਤਾਂ ਖ਼ਿਆਲ ਰੱਖਣ।

ਮਹਿਲਾਵਾਂ ਖ਼ਿਲਾਫ਼ ਅਪਰਾਧਾਂ 'ਚ ਨਾਮਜ਼ਦ ਸਭ ਤੋਂ ਵੱਧ ਕਾਨੂੰਨਸਾਜ਼ (ਐਮ.ਪੀ.) ਭਾਜਪਾ ਦੇ- ਇਕ ਖ਼ਬਰ
ਸੁਣ ਲੈ ਨਿਹਾਲੀਏ ਚੋਰਾਂ ਦੀਆਂ ਗੱਲਾਂ।

ਅਕਾਲੀ ਦਲ ਨੂੰ ਬਾਦਲਾਂ ਦੇ ਕਬਜ਼ੇ ਤੋਂ ਮੁਕਤ ਕਰਾਵਾਂਗੇ- ਢੀਂਡਸਾ
ਨਾਲ਼ੇ ਤੇਰੇ ਬੰਦ ਜਾਣਗੇ, ਨਾਲ਼ ਜਾਊਗੀ ਸਾਧ ਦੀ ਲੋਈ।

ਅਰਥਚਾਰੇ ਨੂੰ ਪੈਰਾਂ-ਸਿਰ ਕਰਨ ਲਈ ਹੋਰ ਕਦਮ ਪੁੱਟੇ ਜਾਣਗੇ-ਸੀਤਾਰਮਨ
ਜ਼ਰਾ ਸੰਭਲ ਕੇ ਤੁਰੀਂ ਮੁਟਿਆਰੇ, ਗਿੱਟੇ ਦੀ ਮਚਕੋੜ ਬੁਰੀ।

600 ਰੁਪਏ ਦੀ ਪੈਨਸ਼ਨ ਲਈ 100 ਸਾਲਾ ਬਜ਼ੁਰਗ ਔਰਤ ਨੇ ਕੀਤਾ 40 ਕਿਲੋਮੀਟਰ ਸਫ਼ਰ-ਇਕ ਖ਼ਬਰ
ਮੇਰਾ ਭਾਰਤ ਮਹਾਨ!

ਨਾਗਰਿਕਤਾ ਬਿੱਲ 'ਤੇ ਪਾਕਿਸਤਾਨ ਦੀ ਬੋਲੀ ਬੋਲ ਰਹੀ ਹੈ ਵਿਰੋਧੀ ਧਿਰ- ਮੋਦੀ
ਨੀਂ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਲੜਕਿਆਂ ਨੂੰ 'ਸੁਧਾਰਨ' ਲਈ ਸਹੁੰ ਚੁਕਾਈ ਜਾਵੇਗੀ- ਕੇਜਰੀਵਾਲ
ਕੇਜਰੀਵਾਲ ਸਾਬ੍ਹ ਪਾਰਲੀਮੈਂਟ 'ਚ 'ਸਵੱਛ ਅਭਿਆਨ' ਚਲਾਉਣ ਦੀ ਗੱਲ ਕਰੋ।

10 Dec. 2019

ਕਾਂਗਰਸ ਨੇ ਦੇਸ਼ ਨੂੰ ਲੁੱਟਿਆ ਜਦ ਕਿ ਅਸੀਂ ਦੇਸ਼ ਨੂੰ ਬਚਾਇਆ- ਮੋਦੀ
ਕਾਦਰਯਾਰ ਜੇ ਕੋਲ਼ ਗਵਾਹ ਹੁੰਦੇ, ਕਹਿੰਦੇ ਖੋਲ੍ਹ ਹਕੀਕਤ ਸਾਰੀ।

ਸੁਖਦੇਵ ਸਿੰਘ ਢੀਂਡਸਾ ਦੀ ਬਾਦਲ ਦਲ ਨੂੰ ਅਲਵਿਦਾ ਕਹਿਣ ਦੀ ਤਿਆਰੀ- ਇਕ ਖ਼ਬਰ
ਸਾਡਾ ਚਿੜੀਆਂ ਦਾ ਚੰਬਾ ਵੇ, ਬਾਬਲ ਅਸਾਂ ਉਡ ਜਾਣਾ।

ਰਾਜਨੀਤੀ ਨੂੰ 'ਸੇਵਾ' ਸਮਝ ਕੇ ਨਿਭਾਉਣਾ ਚਾਹੀਦੈ-ਪ੍ਰਕਾਸ਼ ਸਿੰਘ ਬਾਦਲ
ਨੌਂ ਸੌ ਚੂਹਾ ਖਾ ਕੇ ਬਿੱਲੀ ਹੱਜ ਨੂੰ ਚੱਲੀ।

ਆਪਣੇ ਅਮੀਰ ਦੋਸਤਾਂ ਦੇ ਕਰਜ਼ੇ ਮੁਆਫ਼ ਕਰ ਰਹੀ ਹੈ ਮੋਦੀ ਸਰਕਾਰ-ਰਾਹੁਲ ਗਾਂਧੀ
ਲੱਗੀਆਂ ਦੋਸਤੀਆਂ, ਹੁਣ ਨਹੀਂ ਪੁੱਛਦੀਆਂ ਜ਼ਾਤਾਂ।

ਕਾਂਗਰਸੀਆਂ ਨੇ ਸੁਨੀਲ ਜਾਖੜ ਕੋਲ ਆਪਣਾ ਦੁੱਖੜਾ ਰੋਇਆ-ਇਕ ਖ਼ਬਰ
ਰਾਤੀਂ ਰੋਂਦੀ ਦਾ, ਮੂੰਹ ਪਾਵੇ ਵਿਚ ਵੱਜਾ।

ਆਖਰ 28 ਮਹੀਨਿਆਂ ਬਾਅਦ ਹਨੀਪ੍ਰੀਤ ਦੀ ਸੌਦਾ ਸਾਧ ਨਾਲ ਮੁਲਾਕਾਤ ਹੋਈ-ਇਕ ਖ਼ਬਰ
ਮਿੱਤਰਾਂ ਦੇ ਦਰਦ ਬੁਰੇ, ਬਹਿ ਗਈ ਕਾਲ਼ਜਾ ਫੜ ਕੇ।

ਸਮੁੱਚੀ ਅਕਾਲੀ ਲੀਡਰਸ਼ਿੱਪ ਤਿੰਨ ਦਿਨ ਦਰਬਾਰ ਸਾਹਿਬ ਵਿਖੇ ਜੋੜੇ ਝਾੜਨ ਤੇ ਲੰਗਰ ਸੇਵਾ ਕਰੇਗੀ- ਇਕ ਖ਼ਬਰ
ਅਮਲਾਂ ਬਾਝ ਦਰਗਾਹ ਵਿਚ ਪੈਣ ਪੌਲੇ, ਲੋਕਾਂ ਵਿਚ ਮੀਆਂ ਵਾਰਸ ਸ਼ਾਹ ਹੋਇਆ।

ਸ਼੍ਰੀ ਲੰਕਾ 'ਚ ਭਾਰੀ ਮੀਂਹ ਨੇ ਮਚਾਈ ਤਬਾਹੀ- ਇਕ ਖ਼ਬਰ
ਜਲ ਥਲ ਹੋ ਗਿਐ ਲੰਕਾ ਦੇ ਵਿਚ ਯਾਰੋ, ਢੱਕਣ ਘੜੇ ਤੋਂ ਨੀਲੇ ਨੇ ਚੁੱਕਿਆ ਈ।

ਪੰਜਾਬ ਯੂਨੀਵਰਸਿਟੀ ਪੰਜਾਬੀ ਮਾਂ ਬੋਲੀ ਤੋਂ ਹੋਰ ਵੀ ਬੇਮੁੱਖ ਹੋਈ-ਇਕ ਖ਼ਬਰ
ਏਥੇ ਰਾਤ ਹਨ੍ਹੇਰੀ ਨੀਂ, ਏਥੇ ਕੋਈ ਨਹੀਂ ਤੇਰਾ ਦਰਦੀ।

ਬਾਦਲਾਂ ਦੀ ਅਕਾਲੀ ਦਲ ਦੀ 99 ਸਾਲਾਂ ਦੀ ਲੀਜ਼ ਖ਼ਤਮ ਹੋਣ ਵਾਲ਼ੀ ਹੈ- ਇਕ ਖ਼ਬਰ
ਪੱਤ ਝੜੇ ਪੁਰਾਣੇ ਮਾਹੀ ਵੇ, ਰੁੱਤ ਨਵਿਆਂ ਦੀ ਆਈ ਆ, ਢੋਲਾ।

ਕੇਂਦਰ ਸਰਕਾਰ ਪੰਜਾਬ ਦੇ ਹੱਕ ਵਿਚ ਕੁਝ ਵੀ ਨਹੀਂ ਕਰਦੀ-ਗਿਆਨੀ ਹਰਪ੍ਰੀਤ ਸਿੰਘ
ਰੋਲ਼ ਦਿਤੀ ਅਮਲੀ ਨੇ, ਨਾਰ ਪਟੋਲੇ ਵਰਗੀ।

ਮੋਦੀ ਸਰਕਾਰ ਭਾਈ ਰਾਜੋਆਣੇ ਦੇ ਫ਼ੈਸਲੇ 'ਤੇ ਮੁੜ ਵਿਚਾਰ ਕਰੇ-ਹਰਨਾਮ ਸਿੰਘ ਖ਼ਾਲਸਾ
ਖ਼ਾਲਸਾ ਜੀ, ਅਕਾਲੀਆਂ ਨੂੰ ਪੁੱਛੋ ਕਿ ਉਹਨੀਂ ਬਿਨਾਂ ਪਾਣੀਉਂ ਮੌਜੇ ਕਿਉਂ ਲਾਹੇ।

ਭਾਰਤ ਨਾਲ ਵਪਾਰ ਬੰਦ ਹੋਣ ਕਾਰਨ ਪਾਕਿ 'ਚ ਵਧੀ ਮਹਿੰਗਾਈ ૶ਪਾਕਿ ਮੰਤਰੀ
ਡਿਗੀ ਖੋਤੇ ਤੋਂ, ਗੁੱਸਾ ਘੁਮਿਆਰ 'ਤੇ।

ਚੀਨ ਵਿਰੁੱਧ ਵੀ ਹਮਲਾਵਰ ਨੀਤੀ ਅਪਣਾਏ ਮੋਦੀ ਸਰਕਾਰ- ਕਾਂਗਰਸ
ਆਪੇ ਤੇਰਾ ਰਾਮ ਰੱਖ ਲਊ, ਪਾ ਲੈ ਤੱਤਿਆਂ ਥੰਮ੍ਹਾਂ ਨੂੰ ਜੱਫੀਆਂ।

ਅਕਾਲੀ ਦਲ ਦੇ ਪ੍ਰਧਾਨ ਦੀ ਚੋਣ 14 ਦਸੰਬਰ ਨੂੰ ਹੋਵੇਗੀ- ਇਕ ਖ਼ਬਰ
ਸ਼੍ਰੋਮਣੀ ਕਮੇਟੀ ਦੇ ਡਰਾਮੇ ਤੋਂ ਬਾਅਦ ਅਕਾਲੀ ਦਲ ਦਾ ਗਰੈਂਡ ਫਿਨਾਲੇ।

25 Nov. 2019

ਟਕਸਾਲੀ ਅਕਾਲੀ ਦਲ ਦੇ ਦੋ ਵੱਡੇ ਥੰਮ੍ਹ ਜਲਦੀ ਹੀ ਅਕਾਲੀ ਦਲ ਬਾਦਲ 'ਚ ਹੋਣਗੇ ਸ਼ਾਮਲ-ਇਕ ਖ਼ਬਰ
ਰਾਤੀਂ ਬਹਿ ਬਹਿ ਪਈ ਉਡੀਕਾਂ, ਕਦੋਂ ਹੋਣਗੇ ਸੱਜਣ ਨਾਲ਼ ਮੇਲੇ।

ਸੁਲਤਾਨਪੁਰ ਲੋਧੀ 'ਚ 550 ਸਾਲਾ ਪ੍ਰਕਾਸ਼ ਮੌਕੇ 8000 ਹਜ਼ਾਰ ਗਊਆਂ ਯੂਨੀਵਰਸਿਟੀ ਕੈਂਪਸ 'ਚ ਡੱਕੀਆਂ- ਇਕ ਖ਼ਬਰ
ਲਗਦੇ ਹੱਥ ਕਾਨਵੋਕੇਸ਼ਨ ਕਰ ਕੇ ਇਹਨਾਂ ਨੂੰ ਡਿਗਰੀਆਂ ਵੀ ਦੇ ਦਿੰਦੇ।

ਕੈਪਟਨ ਦੇਸ਼ ਦਾ ਸਭ ਤੋਂ ਵੱਧ ਲਾਪ੍ਰਵਾਹ ਮੁੱਖ ਮੰਤਰੀ- ਭਗਵੰਤ ਮਾਨ
ਉਡ ਕੇ ਚਿੰਬੜ ਗਿਆ ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਚੌਟਾਲਿਆਂ ਵਾਂਗ ਬਾਦਲ ਜੁੰਡਲੀ ਵੀ ਖਾਵੇਗੀ ਜੇਲ੍ਹ ਦੀ ਹਵਾ- ਬਲਵੰਤ ਸਿੰਘ ਖੇੜਾ
ਨਰਮ ਸਰੀਰਾਂ ਨੂੰ, ਪੈ ਗਏ ਮਾਮਲੇ ਭਾਰੀ।

ਨਾਜਾਇਜ਼ ਚਲ ਰਹੀਆਂ ਬਸਾਂ 'ਤੇ ਰੋਕ ਲਾਉਣ ਲਈ ਵਿਸ਼ੇਸ਼ ਮੁਹਿੰਮ ਸ਼ੁਰੂ ਹੋਵੇਗੀ- ਰਜ਼ੀਆ ਸੁਲਤਾਨਾ
ਬੀਬੀ ਜੀ, ਪਹਿਲਾਂ ਪਤਾ ਕਰ ਲਉ ਬੱਸਾਂ ਕਿਹੜੇ ਲੋਕਾਂ ਦੀਆਂ ਹਨ, ਲੈਣੇ ਕੇ ਦੇਣੇ ਨਾ ਪੈ ਜਾਣ।

ਪ੍ਰਦੂਸ਼ਣ ਘਟਾਉਣਾ ਹੈ ਤਾਂ ਯੱਗ ਕਰੋ- ਭਾਜਪਾ ਸੰਸਦ ਮੈਂਬਰ
ਅੰਨ੍ਹੀ ਕੁੱਤੀ ਜਲੇਬੀਆਂ ਦੀ ਰਾਖੀ।

ਅਕਾਲੀ ਰਾਜ ਵਾਲ਼ਾ ਗੁੰਡਾ ਟੈਕਸ ਅਜੇ ਵੀ ਲਿਆ ਜਾ ਰਿਹਾ ਹੈ- ਹਰਪਾਲ ਚੀਮਾ
ਤੇਰੇ ਨੀਂ ਕਰਾਰਾਂ ਮੈਨੂੰੰ ਪੱਟਿਆ, ਦਸ ਮੈਂ ਕੀ ਪਿਆਰ ਵਿਚੋਂ ਖੱਟਿਆ।

ਲੇਬਰ ਪਾਰਟੀ ਸਤਾਧਾਰੀ ਹੋਈ ਤਾਂ ਜੱਲ੍ਹਿਆਂਵਾਲ਼ਾ ਬਾਗ ਦੇ ਕਾਂਡ ਦੀ ਮੁਆਫ਼ੀ ਮੰਗੇਗੀ- ਲੇਬਰ ਪਾਰਟੀ ਲੀਡਰ
ਗੰਗਾ ਗਈਆਂ ਨਾ ਹੱਡੀਆਂ ਮੁੜਦੀਆਂ ਨੇ, ਗਏ ਵਕਤ ਨੂੰ ਕਿਸੇ ਨਾ ਮੋੜਿਆ ਏ।

ਨਵਜੋਤ ਸਿੰਘ ਸਿੱਧੂ ਨੂੰ ਬਣਾਵਾਂਗੇ ਮੁੱਖ ਮੰਤਰੀ- ਰਣਜੀਤ ਸਿੰਘ ਬ੍ਰਹਮਪੁਰਾ
ਪਿੰਡ ਪਏ ਨਹੀਂ ਉਚੱਕੇ ਪਹਿਲਾਂ ਹੀ...............

ਸ਼ਿਵ ਸੈਨਾ ਆਗੂ ਦੇ ਗੁਦਾਮ 'ਚੋਂ ਨਕਲੀ ਦੇਸੀ ਘਿਉ ਬਰਾਮਦ-ਇਕ ਖ਼ਬਰ
ਤੇਲੀ ਕਰ ਕੇ ਰੁੱਖਾ ਖਾਈਏ, ਇਹ ਨਹੀਂ ਸਾਨੂੰ ਪੁੱਗਦਾ।

ਅਗਲੇ ਸਾਲ ਵੀ ਚੱਲਣਗੇ ਬਾਬੇ ਨਾਨਕ ਨੂੰ ਸਮਰਪਿਤ ਪ੍ਰੋਗਰਾਮ-ਇਕ ਖ਼ਬਰ
ਸਟੇਜਾਂ ਵੀ ਦੱਸ ਦਿੰਦੇ ਕਿੰਨੇ ਕਿੰਨੇ ਕਰੋੜ ਦੀਆਂ ਲੱਗਣਗੀਆਂ।

ਸਰਕਾਰੀ ਵਿਭਾਗਾਂ 'ਚ ਧੋਖਾਧੜੀ ਫੜਨ ਲਈ ਆਧੁਨਿਕ ਸੰਦ ਵਿਕਸਤ ਕਰੇ ਕੈਗ- ਮੋਦੀ
ਸੰਦ ਵਰਤਣ ਵਾਲ਼ੇ ਕਿੱਥੋਂ ਲਿਆਉਗੇ ਮੋਦੀ ਸਾਬ?

ਬਾਦਲ ਪਰਵਾਰ ਦਾ ਸ਼੍ਰੋਮਣੀ ਕਮੇਟੀ ਤੋਂ ਕਬਜ਼ਾ ਹਟਾਉਣਾ ਜ਼ਰੂਰੀ-ਰਾਮੂਵਾਲੀਆ
ਆ ਜਾ ਬਈ ਆ ਜਾ, ਲੋਕ ਭਲਾਈ ਵਾਲ਼ਿਆ ਤੇਰੀ ਕਸਰ ਬਾਕੀ ਸੀ।

ਪਾਣੀ ਦੇ ਮਾਮਲੇ 'ਤੇ ਭਾਜਪਾ ਨੇ ਕੇਜਰੀਵਾਲ 'ਤੇ ਹੱਲਾ ਬੋਲਿਆ- ਇਕ ਖ਼ਬਰ
ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਵਸ ਪੈ ਗਈ ਅੜ੍ਹਬਾਂ ਦੇ।

19 Nov. 2019

ਸੌਦਾ ਸਾਧ ਨਾਲ਼ ਜੇਹਲ ਵਿਚ ਮੁਲਾਕਾਤ ਕਰਨ ਲਈ ਹਨੀਪ੍ਰੀਤ ਕਾਹਲੀ-ਇਕ ਖ਼ਬਰ
ਮੈਨੂੰ ਪਾਰ ਲੰਘਾ ਦੇ ਵੇ, ਘੜਿਆ ਮਿੰਨਤਾਂ ਤੇਰੀਆਂ ਕਰਦੀ।

ਪਟਿਆਲਾ 'ਚ ਕਾਂਗਰਸੀ ਲੀਡਰ ਜਿਲ੍ਹਾ ਪ੍ਰਸ਼ਾਸਨ ਤੋਂ 'ਔਖੇ'- ਇਕ ਖ਼ਬਰ
ਗੋਰੇ ਰੰਗ 'ਤੇ ਝਰੀਟਾਂ ਵੱਜੀਆਂ, ਬੇਰੀਆਂ ਦੇ ਬੇਰ ਖਾਣੀਏਂ।

ਦਿੱਲੀ ਕਮੇਟੀ ਦੇ ਨਗਰ ਕੀਰਤਨ ਵਿਚ ਹੋਇਆ ਸਿੱਖ ਮਰਯਾਦਾ ਦਾ ਘਾਣ-ਇਕ ਖ਼ਬਰ
ਇਹ ਘਾਣ ਪਿਆਰਿਓ ਕੋਈ ਪਹਿਲੀ ਵਾਰੀ ਹੋਇਐ।

ਸ਼ਰੋਮਣੀ ਕਮੇਟੀ ਦੀ ਸਟੇਜ ਤੋਂ ਪ੍ਰਕਾਸ਼ ਸਿੰਘ ਬਾਦਲ ਨੇ ਵੀ ਸੰਬੋਧਨ ਕੀਤਾ-ਇਕ ਖ਼ਬਰ
ਏਸੇ ਸੰਬੋਧਨ ਦੀ ਖਾਤਰ ਤਾਂ ਕਮੇਟੀ ਨੇ 12 ਕਰੋੜ ਪੰਡਾਲ 'ਤੇ ਖਰਚਿਆ ਬਈ।

ਅਕਾਲੀ ਦਲ ਬਾਦਲ ਨੂੰ ਅੱਧੀ ਦਰਜਨ ਸਾਬਕਾ ਮੰਤਰੀ ਛੱਡਣ ਦੀ ਤਿਆਰੀ ਵਿਚ- ਇਕ ਖ਼ਬਰ
ਡੁੱਬਦੇ ਜਹਾਜ਼ 'ਚੋਂ ਸਭ ਤੋਂ ਪਹਿਲਾਂ ਚੂਹੇ ਛਾਲ਼ਾਂ ਮਾਰਦੇ ਹੁੰਦੇ ਆ ਬਈ।

ਅਕਤੂਬਰ 'ਚ ਮਹਿੰਗਾਈ ਨੇ ਪਿਛਲੇ ਡੇਢ ਸਾਲ ਦਾ ਰਿਕਾਰਡ ਤੋੜਿਆ- ਇਕ ਖ਼ਬਰ
ਹੋਰ ਕਿੰਨੇ ਕੁ ਅੱਛੇ ਦਿਨ ਦੇਖਣਾ ਚਾਹੁੰਦੇ ਹੋ ਭਾਈ ਜਾਨ।

ਬਾਦਲ ਨੂੰ 'ਖ਼ੁਸ਼' ਕਰਨ ਲਈ ਸ਼੍ਰੋਮਣੀ ਕਮੇਟੀ ਨੇ ਰੋਹੜੇ ਗਿਆਰਾਂ ਕਰੋੜ ਰੁਪਏ-ਇਕ ਖ਼ਬਰ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਅਯੁੱਧਿਆ ਮੰਦਰ ਟਰਸਟ ਬਾਰੇ ਮਹੰਤਾਂ ਤੇ ਸਾਧੂਆਂ ਵਿਚਕਾਰ ਮੱਤਭੇਦ-ਇਕ ਖ਼ਬਰ
ਕੂੰਡੇ ਟੁੱਟ ਗਏ ਘੋਟਣੇ ਭੱਜ ਗਏ, ਤਕੀਏ ਮਲੰਗ ਲੜ ਪਏ।

ਕੈਪਟਨ ਸਰਕਾਰ ਦੇ ਰੇਤ ਮਾਫੀਆ ਨੇ ਬਾਦਲ ਪਿੱਛੇ ਛੱਡੇ- ਇਕ ਖ਼ਬਰ
ਕੋਈ ਪੁੱਟ ਕੇ ਸਿਆਲੋਂ ਬੂਟਾ, ਖੇੜਿਆਂ ਨੂੰ ਲਈ ਜਾਂਦਾ ਏ।

ਨਾ ਹੋਈ ਕਰਜ਼ਾ ਮੁਕਤੀ, ਨਾ ਮਿਲੀ ਰਾਹਤ ਰਾਸ਼ੀ- ਇਕ ਖ਼ਬਰ
ਨਾ ਖੁਦਾ ਹੀ ਮਿਲਾ ਨਾ ਵਿਸਾਲੇ ਸਨਮ, ਨਾ ਇਧਰ ਕੇ ਰਹੇ ਨਾ ਉਧਰ ਕੇ ਰਹੇ।

ਅਕਾਲੀ ਦਲ ਤੇ ਸ਼੍ਰੋਮਣੀ ਕਮੇਟੀ ਨੂੰ ਬਚਾਉਣ ਲਈ ਸੁਧਾਰ ਲਹਿਰ ਚਲਾਉਣ ਦਾ ਸੱਦਾ- ਇਕ ਖ਼ਬਰ
 ਮੈਨੂੰ ਬਗਲੀ ਸਿਖਾ ਦੇ ਗਲ਼ ਪਾਉਣੀ, ਚੱਲੂੰਗੀ ਤੇਰੇ ਨਾਲ਼ ਜੋਗੀਆ।

ਸ੍ਰੀ ਸ੍ਰੀ ਰਵੀਸ਼ੰਕਰ ਦੀ ਫਰੀਦਕੋਟ ਫੇਰੀ ਵਿਵਾਦਾਂ 'ਚ ਘਿਰੀ-ਇਕ ਖ਼ਬਰ
ਤੇਰੀ ਹਰ ਮੱਸਿਆ ਬਦਨਾਮੀ, ਨੀਂ  ਸੋਨੇ ਦੇ ਤਵੀਤ ਵਾਲ਼ੀਏ।