02 September 2019

ਸੁਆਮੀ ਦੇ ਕਰਤਾਰ ਪੁਰ ਲਾਂਘੇ ਬਾਰੇ ਦਿਤੇ ਬਿਆਨ ਦੀ ਤਿੱਖੀ ਆਲੋਚਨਾ- ਇਕ ਖ਼ਬਰ
ਬਈ ਆਪਾਂ ਫਲੂਹਾ ਸੁੱਟਣਾ ਸੀ, ਸੁੱਟ ਦਿਤਾ। ਕਰੀ ਜਾਉ ਜੋ ਕਰਨਾ।

ਰਿਜ਼ਰਵ ਬੈਂਕ ਦਾ ਪੈਸਾ ਚੋਰੀ ਨਹੀਂ ਕੀਤਾ-ਸੀਤਾਰਮਨ
ਹੰਗਾਮਾ ਹੈ ਕਿਉਂ ਬਰਪਾ ਰਕਮ ਥੋੜ੍ਹੀ ਲੇ ਲੀ ਹੈ, ਡਾਕਾ ਹੀ ਤੋ ਡਾਲਾ, ਚੋਰੀ ਤੋ ਨਹੀਂ ਕੀ ਹੈ।

ਭਾਸ਼ਾ ਵਿਭਾਗ ਪੰਜਾਬ ਨੇ ਚੇਤੇ 'ਚੋਂ ਵਿਸਾਰਿਆ ਪੰਜਾਬੀ ਭਾਸ਼ਾ ਨੂੰ- ਇਕ ਖ਼ਬਰ
ਰੋਂਦੀ ਮਾਂ ਸੁੰਦਰ ਦੀ ਖੜ੍ਹ ਕੇ, ਕਿਹੜਾ ਦੇਵੇ ਧੀਰਾਂ।

ਹਵਾਈ ਅੱਡੇ 'ਤੇ ਲੋਡਰਾਂ ਨੂੰ ਦਸਤਾਰ ਉਤਾਰਨ ਲਈ ਮਜਬੂਰ ਕਰਨ 'ਤੇ ਲੌਂਗੋਵਾਲ ਵਲੋਂ ਨਿੰਦਾ-ਇਕ ਖ਼ਬਰ
ਕਦੀ ਨਿੰਦਾ ਤੋਂ ਅੱਗੇ ਵੀ ਵਧਿਆ ਕਰੋ ਕੌਮ ਦੇ ਪਹਿਰੇਦਾਰੋ।

ਸਰਕਾਰੀ ਕਾਲਜਾਂ ਵਿਚ ਪ੍ਰੋਫੈਸਰਾਂ ਦੀਆਂ 78% ਫ਼ੀਸਦੀ ਆਸਾਮੀਆਂ ਖ਼ਾਲੀ- ਇਕ ਖ਼ਬਰ
ਰਾਂਝਣਾਂ ਹੀਰ ਵੇ ਤੇਰੀ, ਵਿਚ ਖੇੜਿਆਂ ਦੇ ਰੁਲ਼ ਗਈ।

ਮਨੂੰਵਾਦੀਆਂ ਅਤੇ ਉਹਨਾਂ ਦੇ ਏਜੰਟਾਂ ਨੇ ਬਚਾਏ ਬੇਅਦਬੀਆਂ ਦੇ ਦੋਸ਼ੀ-ਖਾਲੜਾ ਮਿਸ਼ਨ
ਚੁੜੇਲਾਂ ਬਣ ਚੁੰਬੜ ਗਈਆਂ, ਮੈਨੂੰ ਸੱਸ ਤੇ ਨਨਾਣ ਚੰਨਾਂ ਦੋਵੇਂ।

ਤਿੰਨ ਦਹਾਕਿਆਂ ਬਾਅਦ ਵੀ ਪਰਨਾਲ਼ਾ ਉੱਤੇ ਦਾ ਉੱਥੇ- ਹੜ੍ਹਾਂ 'ਤੇ ਟਿੱਪਣੀ
ਹੁਣ ਤਾਂ ਪਰਨਾਲ਼ਾ ਚੋ ਕੇ ਸਿਰਾਂ 'ਚ ਪੈਂਦਾ ਬਈ।

ਪੰਜਾਬ ਅਤੇ ਹਰਿਆਣਾ ਕੋਲ ਉਹਨਾਂ ਦੀ ਰਾਜਧਾਨੀ ਹੋਣ ਦੇ ਨਹੀਂ ਹਨ ਕੋਈ ਸਬੂਤ-ਇਕ ਖ਼ਬਰ
ਯਾਨੀ ਕਿ ਦੋਵਾਂ ਬਿੱਲੀਆਂ ਦੀ ਰੋਟੀ ਹੁਣ ਬਾਂਦਰ ਖਾਵੇਗਾ।

ਮੋਦੀ ਦੀ ਸ਼ਲਾਘਾ ਕਰਨ ਲਈ ਕਾਂਗਰਸ ਨੇ ਸ਼ਸ਼ੀ ਥਰੂਰ ਤੋਂ ਸਪਸ਼ਟੀਕਰਨ ਮੰਗਿਆ- ਇਕ ਖ਼ਬਰ
ਨੀਂ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਸੌਦਾ ਸਾਧ ਦੀ ਚੇਲੀ ਵਿਪਾਸਨਾ ਅਤਿ-ਲੋੜੀਂਦੇ ਅਪਰਾਧੀਆਂ ਦੀ ਸੂਚੀ 'ਚੋਂ ਬਾਹਰ- ਇਕ ਖ਼ਬਰ
ਕੌਣ ਕੱਤੇ ਮੇਰਾ ਚਰਖ਼ਾ ਨੀਂ ਮਾਏ, ਤ੍ਰਿੰਞਣਾਂ ਦਾ ਸਰਦਾਰ ਨੀਂ ਮਾਏਂ।

ਹਰੇਕ ਕੌਮਾਂਤਰੀ ਮੰਚ 'ਤੇ ਕਸ਼ਮੀਰ ਮਸਲਾ ਉਠਾਵਾਂਗੇ- ਇਮਰਾਨ ਖ਼ਾਨ
ਰਾਂਝਾ ਰਾਂਝਾ ਕਰਦੀ, ਲੱਗ ਕੇ ਨਾਲ਼ ਦੀਵਾਰਾਂ ਦੇ।

ਕਸ਼ਮੀਰ 'ਤੇ ਤੀਜੀ ਧਿਰ ਦੀ ਵਿਚੋਲਗੀ ਪਰਵਾਨ ਨਹੀਂ- ਮੋਦੀ
ਝਗੜਾ ਪੰਜ ਕਨਾਲ਼ਾਂ ਦਾ, ਮੈਨੂੰ ਛੜਾ ਜੇਠ ਤੰਗ ਕਰਦਾ।

ਬਰਗਾੜੀ ਕਾਂਡ ਦੀ ਸਮੁੱਚੀ ਪੜਤਾਲ ਸ਼ੱਕ ਦੇ ਘੇਰੇ 'ਚ ਆਈ- ਇਕ ਖ਼ਬਰ
ਦਾਲ਼ 'ਚ ਕਾਲ਼ਾ ਕਾਲ਼ਾ ਨਹੀਂ, ਸਾਰੀ ਦਾਲ਼ ਹੀ ਕਾਲ਼ੀ ਐ ਬਈ।

ਇਕ ਅਪੀਲ 'ਤੇ ਕਰੋੜਾਂ ਇਕੱਠੇ ਕਰਨ ਵਾਲੇ ਅਕਾਲੀ ਦਲ ਦੀ ਮਾਲੀ ਹਾਲਤ ਮਾੜੀ- ਇਕ ਖ਼ਬਰ
ਮੇਰੇ ਗਲ਼ ਵਿਚ ਖੁੱਲ੍ਹੀਆਂ ਮੀਢੀਆਂ, ਮੇਰਾ ਸਾਲੂ ਹੋਇਆ ਲੰਗਾਰ ਵੇ।

ਮੈਂ ਕਿਸੇ ਰਾਜਸੀ ਪਾਰਟੀ 'ਚ ਸ਼ਾਮਲ ਨਹੀਂ ਹੋ ਰਿਹਾ- ਅਦਾਕਾਰ ਸੰਜੇ ਦੱਤ
ਹੱਥ ਤਾਂ ਤੇਰਾ ਵੀ ਢਾਈ ਕਿੱਲੋ ਤੋਂ ਘੱਟ ਨਹੀਂ ਸੰਜੂ, ਚੁੱਕ ਲੈ ਕੋਈ ਨਲ਼ਕਾ ਨੁਲ਼ਕਾ ਤੂੰ ਵੀ।

ਮੰਤਰਾਲਿਆਂ 'ਚ ਆਪਣੇ ਰਿਸ਼ਤੇਦਾਰਾਂ ਦੀ ਨਿਯੁਕਤੀ ਨਾ ਕਰਨ ਮੰਤਰੀ- ਮੋਦੀ
ਕਰ ਕੇ ਤੇਲੀ ਰੁੱਖਾ ਖਾਈਏ, ਨਹੀਂ ਪੁੱਗਦਾ ਇਹ ਸਾਨੂੰ।

25 August 2019

ਸੁਖਬੀਰ ਬਾਦਲ ਨੇ ਸਿੱਖਾਂ ਵਿਚ ਵੰਡੀਆਂ ਪਾਈਆਂ- ਕੈਪਟਨ
ਨਿੱਤ ਨਵੇਂ ਪੁਆੜੇ ਪਾਉਂਦਾ ਨੀਂ ਮਰ ਜਾਣਾ ਅਮਲੀ।

ਗਊਸ਼ਾਲਾਵਾਂ ਦੇ ਅੰਦਰ ਜਾਣ ਲਈ ਤਰਸਣ ਬਾਹਰ ਖੜ੍ਹੇ ਸਾਨ੍ਹ- ਇਕ ਖ਼ਬਰ
ਲੱਸੀ ਲੈਣ ਦੇ ਬਹਾਨੇ ਆਉਂਦੇ, ਛੜਿਆਂ ਦੀ ਨੀਤ ਬੁਰੀ।

ਨਰੇਗਾ ਕਰਮਚਾਰੀਆਂ ਦੇ ਮੁਜ਼ਾਹਰੇ 'ਚ ਆਵਾਰਾ ਸਾਨ੍ਹ ਆ ਵੜੇ- ਇਕ ਖ਼ਬਰ
ਗਊਸ਼ਾਲਾਵਾਂ 'ਚ ਵੜਨ ਨਹੀਂ ਦਿੰਦੇ, ਮੁਜ਼ਾਹਰਿਆਂ 'ਚ ਦੁੱਖ ਰੋਈਦਾ।

ਪੰਜਾਬ ਨੂੰ ਹੜ੍ਹ ਪੀੜਤ ਸੂਬਿਆਂ ਦੀ ਸੂਚੀ ਵਿਚ ਸ਼ਾਮਲ ਕਰੇ ਕੇਂਦਰ- ਕੈਪਟਨ
ਮੈਨੂੰ ਪਾਰ ਲੰਘਾ ਵੇ ਘੜਿਆ, ਮਿੰਨਤਾਂ ਤੇਰੀਆਂ ਕਰਦੀ।

ਸਾਨੂੰ ਚੀਨ ਦੀ ਲੋੜ ਨਹੀਂ, ਅਸੀਂ ਉਹਨਾਂ ਤੋਂ ਬਿਨਾਂ ਹੀ ਬੇਹਤਰ ਹਾਂ- ਟਰੰਪ
ਚੁੱਕ ਚਰਖ਼ਾ ਪਰ੍ਹਾਂ ਕਰ ਪੀੜ੍ਹੀ, ਛੜਿਆਂ ਨੇ ਬੋਕ ਬੰਨ੍ਹਣਾਂ।

ਭਾਰਤ ਨਾਲ਼ ਗੱਲਬਾਤ ਦੀ ਆਸ ਨਹੀਂ-ਇਮਰਾਨ ਖ਼ਾਨ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਜੀ-7 ਸੰਮੇਲਨ ਤੋਂ ਪਹਿਲਾਂ ਹੀ ਡੋਨਲਡ ਟਰੰਪ ਦਾ ਮੂਡ ਵਿਗੜਿਆ- ਇਕ ਖ਼ਬਰ
ਦੋ ਘੁੱਟ ਪੀ ਕੇ ਦਾਰੂ, ਨੀਂ ਪੈਰ 'ਤੇ ਮੁੱਕਰ ਗਿਆ।

ਭਾਜਪਾ ਤੇ ਅਕਾਲੀਆਂ ਦੇ ਰਲ਼ ਕੇ ਵਿਧਾਨ ਸਭਾ ਦੀਆਂ ਚੋਣਾਂ ਲੜਨ ਦੇ ਆਸਾਰ ਮੁੱਕੇ- ਇਕ ਖ਼ਬਰ
ਅੱਖਾਂ ਗਹਿਰੀਆਂ ਤੇ ਮੁੱਖ ਕੁਮਲਾਏ, ਜਿਹਨਾਂ ਦੇ ਰਾਤੀਂ ਯਾਰ ਵਿਛੜੇ।

ਚੀਨ ਨੇ ਟਰੂਡੋ 'ਤੇ ਦੁਵੱਲੇ ਸਬੰਧ ਖ਼ਰਾਬ ਕਰਨ ਦੇ ਦੋਸ਼ ਲਗਾਏ- ਇਕ ਖ਼ਬਰ
ਮੁੰਡਾ ਜੱਟਾਂ ਦਾ ਬੜਾ ਟੁੱਟ ਪੈਣਾ, ਦੋਹੀਂ ਪਾਸੀਂ ਅੱਖ ਮਾਰਦਾ।

ਰਾਖਵੇਂਕਰਨ 'ਤੇ ਬਹਿਸ ਪਿੱਛੇ ਸੰਘ ਦੇ 'ਮਾੜੇ ਇਰਾਦੇ'-ਪ੍ਰਿਅੰਕਾ ਗਾਂਧੀ   
ਤੇਰੇ ਛੱਲੇ ਨੇ ਪੁਆੜੇ ਪਾਏ, ਲਿਆ ਭਾਬੀ ਨੇ ਪਛਾਣ ਮਿੱਤਰਾ।

ਫ਼ਿਲਹਾਲ ਕਰਤਾਰ ਪੁਰ ਲਾਂਘਾ ਨਹੀਂ ਖੋਲ੍ਹਣਾ ਚਾਹੀਦਾ- ਸੁਬਰਾਮਨੀਅਮ ਸੁਆਮੀ
ਤੂੰ ਨਹੀਂ ਬੋਲਦੀ ਰਕਾਨੇ, ਤੂੰ ਨਹੀਂ ਬੋਲਦੀ ਤੇਰੇ 'ਚ ਤੇਰਾ ਯਾਰ ਬੋਲਦਾ।

ਪਰਤਾਪ ਸਿੰਘ ਬਾਜਵਾ ਨੇ ਪ੍ਰਧਾਨ ਮੰਤਰੀ ਨੂੰ ਪੰਜਾਬ ਨੂੰ ਫੰਡ ਦੇਣ ਦੀ ਅਪੀਲ ਕੀਤੀ-ਇਕ ਖ਼ਬਰ
ਕਦੇ ਸ਼ਾਹਾਂ ਦੀ ਸਰਦਾਰ, ਅੱਜ ਗਲ਼ੀਆਂ 'ਚ ਫਿਰੇ ਮੰਗਦੀ।

ਵਿਰੋਧੀ ਪਾਰਟੀਆਂ ਦਾ ਵਫ਼ਦ ਜੰਮੂ ਕਸ਼ਮੀਰ ਤੋਂ ਬੇਰੰਗ ਵਾਪਸ ਭੇਜਿਆ- ਇਕ ਖ਼ਬਰ
ਪਾਰ ਪੱਤਣੋਂ ਯਾਰ ਨੂੰ ਮਿਲਣਾ, ਪਾਰ ਲੰਘਾ ਦੇ ਘੜਿਆ।

ਬਰਗਾੜੀ ਬੇਅਦਬੀ ਮਾਮਲੇ 'ਚ ਅੜਿੱਕੇ ਡਾਹ ਰਿਹਾ ਹੈ ਅਕਾਲੀ ਦਲ- ਕੈਪਟਨ
ਉਡ ਕੇ ਚਿੰਬੜ ਗਿਆ, ਕਿਸੇ ਚੰਦਰੀ ਵਾੜ ਦਾ ਛਾਪਾ।

ਪੰਜ ਦਰਜਨ ਕਾਂਗਰਸੀ ਆਗੂਆਂ ਨੂੰ ਸਰਕਾਰੀ ਅਹੁੱਦੇ ਦੇਣ ਨੂੰ ਪ੍ਰਵਾਨਗੀ- ਇਕ ਖ਼ਬਰ
ਭਰ ਲਉ ਝੋਲ਼ੀਆਂ ਮਿੱਤਰੋ, ਮੀਂਹ ਲੱਡੂਆਂ ਦਾ ਪੈਂਦਾ।

ਪੰਜਾਬ 'ਚ ਹੜ੍ਹ ਬੀ.ਬੀ.ਐਮ.ਬੀ. ਦੀ ਨਾਲਾਇਕੀ ਨਾਲ਼ ਆਇਆ- ਸੁਖਪਾਲ ਖਹਿਰਾ
ਤੂੰ ਮੰਨ ਜਾਂ ਨਾ ਮੰਨ ਮਿੱਤਰਾ, ਗੜਬੜ ਹੋ ਗਈ ਲਗਦੀ ਆ।    

13 August 2019

ਸਿਰਸਾ ਸਾਧ ਦੀ ਪੈਰੋਲ ਲਈ ਹਾਈ ਕੋਰਟ 'ਚ ਰਿੱਟ- ਇਕ ਖ਼ਬਰ
ਤੇਰੇ ਵਿਚ ਸਾਰਾ ਬੰਦਿਆ ਕਸੂਰ ਸੀ, ਬੀਜ ਕੇ ਤੇ ਅੱਕ ਭਾਲ਼ਦਾ ਖ਼ਜੂਰ ਜੀ।

ਬਾਗ਼ੀ ਵਿਧਾਇਕਾਂ ਤੇ ਮੰਤਰੀਆਂ ਵਲੋਂ ਨਵਜੋਤ ਸਿੰਘ ਸਿੱਧੂ ਨਾਲ਼ ਗੁਪਤ ਮੀਟਿੰਗਾਂ- ਇਕ ਖ਼ਬਰ
ਟਿੱਲੇ ਜਾਇ ਕੇ ਜੋਗੀ ਦੇ ਹੱਥ ਜੋੜੇ, ਸਾਨੂੰ ਆਪਣਾ ਕਰੋ ਫ਼ਕੀਰ ਮੀਆਂ।

ਬੇਅਦਬੀ ਮਾਮਲਿਆਂ ਦੀ ਜਾਂਚ ਸੁਖਬੀਰ ਦੇ ਦਬਾਅ ਪਿੱਛੋਂ ਭਾਜਪਾ ਨੇ ਬੰਦ ਕਰਵਾਈ- ਕੈਪਟਨ
ਦਿੱਲੀ ਆਖੇ ਦਿਉਰ ਕੁਆਰੇ ਦਾ, ਮੈਂ ਆਖਾ ਨਾ ਮੋੜਾਂ।

ਜੰਮੂ ਕਸ਼ਮੀਰ ਜਾਵਾਂਗੇ, ਰਾਜਪਾਲ ਦੇ ਜਹਾਜ਼ ਦੀ ਜ਼ਰੂਰਤ ਨਹੀਂ-ਰਾਹੁਲ ਗਾਂਧੀ
ਹੀਰ ਖੇੜਿਆਂ ਨਾਲ਼ ਨਾ ਟੁਰੇ ਮੂਲ਼ੇ, ਪਿਆ ਪਿੰਡ ਦੇ ਵਿਚ ਇਹ ਸ਼ੋਰ ਮੀਆਂ।

ਸੱਤਾਧਾਰੀ ਵੱਡੇ ਲੋਕਾਂ ਦੀ ਥਾਂ ਗ਼ਰੀਬ ਲੋਕਾਂ ਲਈ ਨੀਤੀਆਂ ਘੜਨ- ਇਕ ਪੱਤਰਕਾਰ
ਕਮਾਲ ਕਰਦੇ ਹੋ ਇਹ ਕੀ ਮੰਗਿਆ ਹੈ, ਮਾਸ ਇੱਲਾਂ ਦੇ ਆਲ੍ਹਣੇ 'ਚੋਂ ਭਾਲ਼ਦੇ ਹੋ।

ਪੰਜਾਬ ਵਿਚ ਆਈਲੈਟਸ ਦੀ ਹਨ੍ਹੇਰੀ ਨੇ ਕਾਲਜਾਂ ਵਿਚ ਸੁੰਨ ਵਰਤਾਈ- ਇਕ ਖ਼ਬਰ
ਗੈਬੀ ਤੋਤੇ ਨੇ, ਮੇਰੀ ਗੁੱਤ 'ਤੇ ਆਲ੍ਹਣਾ ਪਾਇਆ।

ਸਰੀ, ਕੈਨੇਡਾ ਵਿਖੇ ਕਾਮਾਗਾਟਾ ਮਾਰੂ ਸੜਕ ਦਾ ਰਸਮੀਂ ਉਦਘਾਟਨ- ਇਕ ਖ਼ਬਰ
ਖਾਤਰ ਦੇਸ਼ ਦੀ ਸੀਸ ਕੁਰਬਾਨ ਕੀਤੇ, ਲੱਥੀ ਆਸ਼ਕਾਂ ਦੀ ਪੁੱਠੀ ਖੱਲ ਵੀਰਾ।

ਜਾਅਲੀ ਪਾਸਪੋਰਟ ਨਾਲ਼ 22 ਸਾਲ ਯੂ.ਕੇ.ਰਿਹਾ ਬੰਦਾ ਚੋਰੀ ਕਰਦਾ ਫੜਿਆ ਗਿਆ-ਇਕ ਖ਼ਬਰ
ਪਹਿਨ ਪਚਰ ਕੇ ਚੜ੍ਹ ਗਈ ਪੀਂਘ 'ਤੇ, ਡਿਗ ਪੀ ਹੁਲਾਰਾ ਖਾ ਕੇ।

ਜਹਾਜ਼ ਵਿਚ ਅੱਖਾਂ ਤੱਤੀਆਂ ਕਰਨ ਵਾਲੇ ਪਤੀ ਦਾ ਪਤਨੀ ਵਲੋਂ ਕੁਟਾਪਾ- ਇਕ ਖ਼ਬਰ
ਕਾਹਦੇ ਪਿੱਛੇ ਹੋ ਗਿਉਂ ਸ਼ੁਦਾਈ ਪਾਗਲਾ, ਸ਼ੈਅ ਹੁੰਦੀ ਹੁਸਨ ਪਰਾਈ ਪਾਗਲਾ।

ਚੰਡੀਗੜ੍ਹ ਦੇ ਇਕ ਹੋਟਲ 'ਚ ਦੋ ਕੇਲਿਆਂ ਦਾ ਬਿੱਲ 442 ਰੁਪਏ- ਇਕ ਖ਼ਬਰ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਕੇਲਿਆਂ ਦਾ ਬਿੱਲ ਵੇਖ ਕੇ।

18 ਸਾਲਾਂ ਤੋਂ ਅਫ਼ਗਾਨਿਸਤਾਨ 'ਚ ਚਲ ਰਹੀ ਲੜਾਈ ਦਾ ਹੱਲ ਚਾਹੁੰਦੈ ਅਮਰੀਕਾ-ਇਕ ਖ਼ਬਰ
ਮੈਂ ਤਾਂ ਮਾਰਿਆ ਵੇਖਦਾ ਮੁਲਕ ਸਾਰਾ, ਵਾਂਗ ਮੋਏ ਕੁੱਤੇ ਧੂਹ ਸੁੱਟਿਆ ਹਾਂ।

ਸਕਾਟਲੈਂਡ 'ਚ ਫਿਰ ਉਠੀ ਯੂ.ਕੇ. ਤੋਂ ਵੱਖ ਹੋਣ ਦੀ ਮੰਗ- ਇਕ ਖ਼ਬਰ
ਬਾਪੂ ਵੇ ਅੱਡ ਹੁੰਨੀ ਆਂ।

06 August 2019

ਕਾਰਗਿਲ ਬਾਰੇ ਫ਼ਿਲਮ 'ਚੋਂ ਸਿੱਖ ਰੈਜਮੈਂਟ ਦੇ ਰੋਲ ਨੂੰ ਕਿਉਂ ਅਣਗੌਲਿਆਂ ਕੀਤਾ ਗਿਆ?- ਮਨਜੀਤ ਸਿੰਘ ਜੀ.ਕੇ.
ਖਾਣ ਪੀਣ ਨੂੰ ਬਾਂਦਰੀ, ਧੌਣ ਭਨਾਉਣ ਨੂੰ ਜੁੰਮਾਂ।

ਇਕ ਹਫ਼ਤੇ 'ਚ ਜਿੱਤ ਸਕਦੇ ਹਾਂ ਅਫ਼ਗਾਨ ਜੰਗ- ਟਰੰਪ
ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸੱਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਵਿਰੋਧੀ ਧਿਰ ਦੀ ਫੁੱਟ ਕਾਰਨ ਸਰਕਾਰ ਅਹਿਮ ਮੁੱਦਿਆਂ 'ਤੇ ਬਚ ਨਿਕਲੀ-ਇਕ ਖ਼ਬਰ   
ਕੋਇਲਾਂ ਕੂਕਦੀਆਂ, ਖਾਹ ਬਾਗ਼ਾਂ ਦੇ ਮੇਵੇ।

ਨਗਰ ਕੀਰਤਨ ਨੂੰ ਮਿਲ ਰਹੇ ਭਰਵੇਂ ਹੁੰਗਾਰੇ ਕਾਰਨ ਪ੍ਰਬੰਧਕ ਬਾਗੋਬਾਗ਼- ਇਕ ਖ਼ਬਰ
ਸਾਡੀ ਮਿਹਨਤ ਰੰਗ ਲਿਆਈ, ਨੱਕੋ ਨੱਕ ਹੋਈਆਂ ਗੋਲਕਾਂ।

ਕੈਪਟਨ ਆਪਣੇ ਢਾਈ ਸਾਲਾਂ ਦੀ ਇਕ ਵੀ ਪ੍ਰਾਪਤੀ ਗਿਣਾਉਣ- ਬੈਂਸ
ਅੰਨ੍ਹੀ ਕੁੱਤੀ, ਜਲੇਬੀਆਂ ਦੀ ਰਾਖੀ।

ਪੰਜਾਬ ਦੇ ਸਰਕਾਰੀ ਸਕੂਲ ਲੈਕਚਰਾਰਾਂ ਤੋਂ ਵਾਂਝੇ- ਇਕ ਖ਼ਬਰ
ਚਰਖ਼ੇ ਦੀ ਘੂਕ ਨਾ ਸੁਣੇ, ਸੁੰਞੇ ਪਏ ਨੇ ਤ੍ਰਿੰਞਣਾਂ ਦੇ ਵਿਹੜੇ।

'ਆਪ' ਵਿਧਾਇਕਾ ਅਲਕਾ ਲਾਂਬਾ ਵਲੋਂ ਜਲਦੀ ਹੀ ਪਾਰਟੀ ਛੱਡਣ ਦੇ ਸੰਕੇਤ- ਇਕ ਖ਼ਬਰ
ਜਿੰਨਾਂ ਨਹਾਤੀ, ਓਨਾ ਹੀ ਪੁੰਨ।

ਬਾਦਲ ਕੈਪਟਨ ਦੇ 'ਫ਼ਰੈਂਡਲੀ ਮੈਚ' 'ਤੇ ਕਾਂਗਰਸੀ ਮੰਤਰੀਆਂ ਤੇ ਵਿਧਾਇਕਾਂ ਨੇ ਵੀ ਲਗਾਈ ਮੋਹਰ- ਭਗਵੰਤ ਮਾਨ
ਜੇਕਰ ਸੂਲੀ ਤੋਂ ਬਚ ਰਹੀ ਜਿੰਦ ਤੇਰੀ, ਬਨਵਾਸ ਜ਼ਰੂਰ ਤੂੰ ਪਾਵਸੇਂ ਵੇ।

ਦਾਦਿਆਂ ਵਲੋਂ ਦਾਇਰ ਕੇਸਾਂ ਦੇ ਫ਼ੈਸਲੇ ਉਡੀਕ ਰਹੇ ਹਨ ਪੋਤੇ- ਇਕ ਖ਼ਬਰ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉਤੋਂ ਬੂਰ ਹਟਾਵਾਂ।

ਚੰਡੀਗੜ੍ਹ 'ਚ ਡੈਪੂਟੇਸ਼ਨ ਦਾ ਮੁੱਦਾ: ਭਾਜਪਾ ਤੇ ਅਕਾਲੀ ਦਲ 'ਚ ਖੜਕੀ-ਇਕ ਖ਼ਬਰ
ਕਾਲਾ ਘੱਗਰਾ ਸੰਦੂਕ ਵਿਚ ਮੇਰਾ, ਦੇਖ ਦੇਖ ਰੋਵੇਂਗਾ ਜੱਟਾ।

ਭਾਰਤ ਨੇ ਸੰਯੁਕਤ ਰਾਸ਼ਟਰ ਦੀ ਰਿਪੋਰਟ 'ਤੇ ਨਾਖ਼ੁਸ਼ੀ ਪ੍ਰਗਟਾਈ- ਇਕ ਖ਼ਬਰ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਏਸ਼ੀਆ ਵਿਚ ਨਵੀਆਂ ਮਿਜ਼ਾਈਲਾਂ ਤਾਇਨਾਤ ਕਰਨ ਦਾ ਇੱਛੁਕ ਹੈ ਅਮਰੀਕਾ- ਅਮਰੀਕਨ ਰੱਖਿਆ ਮੰਤਰੀ
ਵਾਰਸ ਸ਼ਾਹ ਹੈ ਚੁਗਲ ਦੀ ਸ਼ਕਲ ਕੈਦੋ, ਇਹ ਮੂਲ਼ ਹੈ ਸਭ ਬਖੇੜਿਆਂ ਦਾ।

ਆਪਣੇ ਹੀ ਵਿਧਾਇਕਾਂ ਤੇ ਮੰਤਰੀਆਂ ਦੀ ਨਾਰਾਜ਼ਗੀ ਤੋਂ ਕੈਪਟਨ 'ਚਿੰਤਤ'- ਇਕ ਖ਼ਬਰ
ਸੱਪ ਤੋਂ ਨਾ ਡਰਦੀ ਸ਼ੀਂਹ ਤੋਂ ਨਾ ਡਰਦੀ, ਡਰਦੀ ਸੱਪ ਦੀ ਵਰਮੀ ਤੋਂ।

ਮਹਿਬੂਬਾ ਮੁਫ਼ਤੀ 'ਤੇ ਸ਼ਿਕੰਜਾ: ਬੈਂਕ ਵਿਚ ਨਿਯੁਕਤੀਆਂ ਦੇ ਮਾਮਲੇ 'ਤੇ ਭੇਜਿਆ ਨੋਟਿਸ- ਇਕ ਖ਼ਬਰ
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿੱਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।

ਪੰਜਾਬ ਵਿਚ ਉਭਰਨ ਲੱਗਾ ਹੈ 'ਆਪ' ਵਰਗਾ ਤੀਜਾ ਸਿਆਸੀ ਮੰਚ- ਇਕ ਖ਼ਬਰ
ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ, ਵਿਹੜੇ ਲਾ ਤ੍ਰਿਵੈਣੀ।

ਜੱਲ੍ਹਿਆਂਵਾਲਾ ਬਾਗ਼ ਟਰਸਟ ਬੋਰਡ 'ਚੋਂ ਕਾਂਗਰਸ ਪਾਰਟੀ ਨੂੰ ਬਾਹਰ ਕਰਨਾ ਮੰਦਭਾਗਾ- ਮੁਨੀਸ਼ ਤਿਵਾੜੀ
ਨੀਂ ਤੂੰ ਮੰਦਾ ਕੀਤਾ ਈ ਸਾਹਿਬਾਂ, ਮੇਰਾ ਤਰਕਸ਼ ਟੰਗਿਆ ਜੰਡ।

30 July 2019

ਮਿਲਾਵਟੀ ਅਤੇ ਗਲਤ ਬਰਾਂਡ ਦੇ ਭੋਜਨ ਨਮੂਨਿਆਂ 'ਚ ਪੰਜਾਬ ਸਭ ਤੋਂ ਅੱਗੇ- ਇਕ ਖ਼ਬਰ
ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਸੰਨ 2022 ਤੱਕ ਕਿਸਾਨਾਂ ਦੀ ਆਮਦਨ ਦੁੱਗਣੀ ਹੋਣ 'ਤੇ ਸਰਕਾਰ ਨੂੰ ਵੀ ਸ਼ੱਕ- ਇਕ ਖ਼ਬਰ 
ਕਸਮੇਂ, ਵਾਅਦੇ, ਜੁਮਲੇ, ਸ਼ੁਮਲੇ, ਬਾਤੇਂ ਹੈਂ ਬਾਤੋਂ ਕਾ ਕਿਆ।

ਅਫ਼ਸਰੋ ! ਬਾਜ਼ ਆ ਜਾਉ, ਨਹੀਂ ਤਾਂ ਸਖ਼ਤ ਐਕਸ਼ਨ ਲਵਾਂਗੀ- ਮਨੀਸ਼ਾ ਗੁਲਾਟੀ
ਮੈਨੂੰ ਨਰਮ ਕੁੜੀ ਨਾ ਜਾਣੀ, ਲੜ ਜੂੰ ਭਰਿੰਡ ਬਣ ਕੇ।

ਕੋਠੀ ਦੇ ਬੰਦ ਕਮਰਿਆਂ 'ਚ ਨਵਜੋਤ ਸਿੱਧੂ ਅਗਲੀ ਰਣਨੀਤੀ ਘੜਨ 'ਚ ਰੁਝੇ-ਇਕ ਖ਼ਬਰ
ਕੁੱਲੀ ਨੀਂ ਫ਼ਕੀਰ ਦੀ ਵਿਚੋਂ ਅੱਲਾ ਹੂ ਦਾ ਆਵਾਜ਼ਾ ਆਵੇ।

ਸ਼੍ਰੋਮਣੀ ਕਮੇਟੀ ਵਾਲ਼ੇ ਟਿੱਚ ਜਾਣਦੇ ਹਨ 'ਜਥੇਦਾਰ' ਦੇ 'ਇਲਾਹੀ' ਆਦੇਸ਼ਾਂ ਨੂੰ- ਇਕ ਖ਼ਬਰ
ਸਾਡੀ ਬਿੱਲੀ, ਸਾਨੂੰ ਹੀ ਮਿਆਊਂ?

ਇਮਰਾਨ ਖ਼ਾਨ ਅਮਰੀਕਾ ਨਾਲ਼ ਸਬੰਧਾਂ ਦੇ ਸੁਧਾਰ ਦੇ ਮਕਸਦ ਨਾਲ਼ ਟਰੰਪ ਨਾਲ਼ ਕਰਨਗੇ ਮੁਲਾਕਾਤ- ਇਕ ਖ਼ਬਰ
ਹੋ ਬੂਹੇ ਮੱਲ ਬੈਠੇ, ਭਗਤ ਮਈਆ ਜੀ ਦਰ ਤੇਰੇ 'ਤੇ।

ਟਰੰਪ ਵਲੋਂ ਕਸ਼ਮੀਰ ਮਸਲੇ ਲਈ ਵਿਚੋਲਗੀ ਦੀ ਪੇਸ਼ਕਸ਼-ਇਕ ਖ਼ਬਰ
ਸੱਦੀ ਨਾ ਬੁਲਾਈ, ਮੈਂ ਲਾੜੇ ਦੀ ਤਾਈ।

ਸਿੱਖ ਜਥੇਬੰਦੀਆਂ ਵਲੋਂ ਸਾਂਝਾ ਮੁਹਾਜ਼ ਉਸਾਰਨ ਲਈ ਇਕ ਹੋਰ ਹੰਭਲਾ- ਇਕ ਖ਼ਬਰ
ਝੰਡੇ ਨਿੱਕਲੇ ਕੂਚ ਦਾ ਹੁਕਮ ਹੋਇਆ, ਚੜ੍ਹੇ ਸੂਰਮੇ ਸਿੰਘ ਦਲੇਰ ਮੀਆਂ।

ਪ੍ਰਧਾਨ ਮੰਤਰੀ ਮੋਦੀ ਦੇਸ਼ ਨੂੰ ਦੱਸਣ ਕਿ ਟਰੰਪ ਨਾਲ਼ ਕੀ ਗੱਲ ਹੋਈ ਸੀ?- ਰਾਹੁਲ ਗਾਂਧੀ
ਕਿਹੜੇ ਯਾਰ ਦਾ ਗੁਤਾਵਾ ਕੀਤਾ, ਅੱਖ ਵਿਚ ਕੱਖ ਪੈ ਗਿਆ।

ਦਰਬਾਰਾ ਗੁਰੂ ਅਤੇ ਇਜ਼ਹਾਰ ਆਲਮ ਬਾਰੇ ਅਕਾਲੀ ਦਲ ਆਪਣਾ ਸਟੈਂਡ ਸਪਸ਼ਟ ਕਰੇ-ਆਪ ਪਾਰਟੀ
ਕੱਚੀਆਂ ਕਲੀਆਂ ਦਾ, ਕੌਣ ਭਰੂ ਹਰਜਾਨਾ।

ਬਾਦਲਾਂ ਵਾਂਗ ਹੀ ਨਾਕਾਮ ਰਹੀ ਕੈਪਟਨ ਸਰਕਾਰ- ਹਰਪਾਲ ਚੀਮਾ
ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।

ਮੁਲਕ ਵਿਚਲੇ ਕਾਲ਼ੇ ਧਨ ਬਾਰੇ ਕੋਈ ਅੰਦਾਜ਼ਾ ਨਹੀਂ- ਵਿੱਤ ਰਾਜ ਮੰਤਰੀ ਅਨੁਰਾਗ ਠਾਕੁਰ
ਰੋਟੀ ਮੇਰਾ ਯਾਰ ਖਾ  ਗਿਆ, ਦਾਣੇ ਚੱਬ ਲਾ ਪਤੀਲੇ ਦਿਆ ਢੱਕਣਾ।

ਕਾਂਗਰਸ ਕਿਸੇ ਵੀ ਕੀਮਤ 'ਤੇ ਛੱਡਾਂਗਾ ਨਹੀਂ- ਸਿੱਧੂ
ਭਗਤੀ ਤੇਰੀ ਪੂਰਨਾ, ਕੱਚੇ ਧਾਗੇ ਦਾ ਸੰਗਲ ਬਣ ਜਾਵੇ।

ਸੁਪਰੀਮ ਕੋਰਟ ਵਲੋਂ 34 ਦੋਸ਼ੀਆਂ ਨੂੰ ਬਰੀ ਕਰਨ 'ਤੇ ਸਮੁੱਚਾ ਅਕਾਲੀ ਦਲ ਬਾਦਲ ਚੁੱਪ ਕਿਉਂ?-ਸਰਨਾ
ਕਬਰਾਂ ਨਾ ਪੁੱਟ ਵੇ, ਨਹੀਂ ਲੱਭਣੀ ਪਰਤਾਪੀ।

ਵਿਜੀਲੈਂਸ ਬਿਊਰੋ ਭ੍ਰਿਸ਼ਟਾਚਾਰ ਦੇ ਖ਼ਾਤਮੇ ਲਈ ਦ੍ਰਿੜ੍ਹ-ਡੀ.ਐੱਸ.ਪੀ.
ਟੁੰਡੀਲਾਟ ਨੇ ਚੁੱਕਿਆ ਆਣ ਬੀੜਾ, ਹਮ ਸਿੰਘ ਸੇ ਜਾਇ ਕੇ ਲੜੇਗਾ ਜੀ।

22 July 2019

ਸਿੱਧੂ ਦੇ ਅਸਤੀਫ਼ੇ ਬਾਅਦ ਪੰਜਾਬ 'ਚ ਫਿਰ ਤੀਜੇ ਬਦਲ ਦੀ ਗੱਲਬਾਤ ਹੋਣ ਲੱਗੀ- ਇਕ ਖ਼ਬਰ
ਚੁੱਕ ਚਾਦਰਾ ਚਰੀ੍ਹ ਵਿਚ ਚਲੀਏ, ਮੱਕੀ ਵਿਚ ਪੱਛ ਲੜਦੇ।

ਬਰਗਾੜੀ ਮੁੱਦੇ 'ਤੇ ਸੁਖਬੀਰ ਮਗਰਮੱਛ ਦੇ ਅੱਥਰੂ ਵਹਾਉਣੇ ਬੰਦ ਕਰੇ- ਕੈਪਟਨ
ਤੇਰੇ ਵਰਗੇ ਨੂੰ, ਗੱਲੀਂ ਰਾਤ ਲੰਘਾਵਾਂ।

ਲੁਧਿਆਣਾ ਸਿਟੀ ਸੈਂਟਰ ਘੁਟਾਲ਼ੇ ਦੀ ਫਾਈਲ ਗੁੰਮ- ਇਕ ਖ਼ਬਰ
ਮਿੱਟੀ ਨਾ ਫ਼ਰੋਲ ਜੋਗੀਆ, ਨਹੀਂ ਲੱਭਣੇ ਲਾਲ ਗੁਆਚੇ।

ਪਾਲ ਸਿੰਘ ਪੁਰੇਵਾਲ ਅੱਜ ਵੀ ਅਕਾਲ ਤਖ਼ਤ ਦੇ ਜਥੇਦਾਰ ਦੇ ਜਵਾਬ ਦੀ ਉਡੀਕ ਵਿਚ- ਇਕ ਖ਼ਬਰ
ਅਜੇ ਤੀਕ ਨਾ ਜਵਾਬ ਤੇਰਾ ਆਇਆ, ਮੈਂ ਡਾਕੀਏ ਨੂੰ ਰੋਜ਼ ਪੁੱਛਦਾ।

ਨਵਜੋਤ ਸਿੱਧੂ ਪੁੱਜਿਆ ਦਿੱਲੀ, ਪ੍ਰਿਅੰਕਾ ਨਾਲ ਮੁਲਾਕਾਤ ਦੇ ਚਰਚੇ- ਇਕ ਖ਼ਬਰ
ਮੇਰੀ ਸੁਣੀਂ ਪੁਕਾਰ ਨਿਮਾਣੇ ਦੀ, ਮੈਂ ਢੱਠਾ ਤੇਰੇ ਦੁਆਰੇ 'ਤੇ।

ਬਾਦਲ ਪਰਵਾਰ ਸਿੱਖਾਂ ਵਿਚ ਆਪਣਾ ਵਜੂਦ ਗੁਆ ਚੁੱਕਿਐ- ਐਡਵੋਕੇਟ ਪੰਨੂੰ
ਤੇਰੀ ਹਰ ਮੱਸਿਆ ਬਦਨਾਮੀ, ਨੀ ਸੋਨੇ ਦੇ ਤਵੀਤ ਵਾਲ਼ੀਏ।

ਅਮਰੀਕਾ ਪੁੱਜਣ 'ਤੇ ਨਹੀਂ ਹੋਇਆ ਇਮਰਾਨ ਖਾਨ ਦਾ ਸਵਾਗਤ- ਇਕ ਖ਼ਬਰ
ਡਰਿਓ ਲੋਕੋ ਡਰਿਓ ਵੇ, ਲੰਬੜਾਂ ਦੀ ਸੇਪ ਨਾ ਕਰਿਓ ਵੇ।

ਅਡਾਨੀ ਗਰੁੱਪ ਦੇ ਸੋਲਰ ਪ੍ਰਾਜੈਕਟ ਨੂੰ ਛੋਟਾਂ ਦੇ ਗੱਫੇ- ਇਕ ਖ਼ਬਰ
ਮਿੱਤਰਾਂ ਦੇ ਫੁਲਕੇ ਨੂੰ, ਨੀਂ ਮੈਂ ਖੰਡ ਦਾ ਪਲੇਥਣ ਲਾਵਾਂ।

ਮੱਧ ਪ੍ਰਦੇਸ਼ ਆਰ.ਪੀ.ਐਫ. ਦਾ ਇਕ ਡੀ.ਆਈ.ਜੀ. ਜਿਨਸੀ ਛੇੜਛਾੜ ਮਾਮਲੇ 'ਚ ਨਾਮਜ਼ਦ- ਇਕ ਖ਼ਬਰ
ਅੱਖਾਂ ਖੋਲ੍ਹ ਕੇ ਦੇਖ ਲੈ ਫ਼ਕਰਦੀਨਾਂ, ਵਾੜ ਆਪ ਹੀ ਖੇਤ ਨੂੰ ਖਾਂਵਦੀ ਏ।

ਸਰਕਾਰ ਵਲੋਂ ਸੀ.ਬੀ. ਆਈ. ਕਲੋਜ਼ਰ ਰਿਪੋਰਟ ਵਿਰੁੱਧ ਤਿਆਰੀ-ਇਕ ਖ਼ਬਰ
ਦੇਖ ਮੇਰੀ ਚਤੁਰਾਈ, ਮੈਂ ਵੀ ਸੁੱਕੇ ਸੰਘ ਅੜਾਈ, ਰੋਈ ਮੈਂ ਵੀ ਨਹੀਂ।

ਬੈਂਕ 'ਚੋਂ ਏ.ਟੀ.ਐੱਮ. ਹੀ ਪੁੱਟ ਕੇ ਲੈ ਗਏ ਚੋਰ-ਇਕ ਖ਼ਬਰ
ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਜੇ ਅਕਾਲੀ ਦਲ ਸ੍ਰੀ ਗੁਰੂੁ ਗ੍ਰੰਥ ਸਾਹਿਬ ਦੀਆਂ ਬੇਅਦਬੀਆਂ ਲਈ ਗੰਭੀਰ ਹੈ ਤਾਂ ਭਾਜਪਾ ਨਾਲ਼ੋਂ ਨਾਤਾ ਤੋੜੇ-ਤ੍ਰਿਪਤ ਬਾਜਵਾ
ਛੱਡ ਦੇ ਲੜ ਪ੍ਰਦੇਸੀ ਦਾ, ਤੈਨੂੰ ਨਿੱਤ ਦਾ ਰੋਣਾ ਪੈ ਜਾਊਗਾ।

ਅਕਾਲੀ ਦਲ ਵਲੋਂ ਸੀ.ਬੀ.ਆਈ. ਦੀ ਕਲੋਜ਼ਰ ਰਿਪੋਰਟ ਰੱਦ- ਇਕ ਖ਼ਬਰ
ਜੇਠ ਤੋਂ ਡਰ ਕੋਈ ਨਾ, ਮੈਨੂੰ ਤੇਰੇ ਤੋਂ ਖ਼ਤਰਾ ਭਾਰੀ।

ਹੁਣ ਭਾਰਤੀ ਹਵਾਈ ਜਹਾਜ਼ ਪਾਕਿਸਤਾਨ ਉੱਪਰੋਂ ਉਡਾਨ ਭਰ ਸਕਣਗੇ-ਇਕ ਖ਼ਬਰ
ਆ ਵੇ ਨਾਜਰਾ, ਜਾਹ ਵੇ ਨਾਜਰਾ, ਬੋਤਾ ਬੰਨ੍ਹ ਦਰਵਾਜ਼ੇ।

14 July 2019

ਸੱਤਾਹੀਣ ਹੋ ਕੇ ਹੀ ਬਾਦਲਾਂ ਦਾ ਹੇਜ ਪੰਜਾਬ ਨਾਲ ਕਿਉਂ ਜਾਗਦਾ ਹੈ?- ਹਰਪਾਲ ਚੀਮਾ
ਕੰਢੇ ਕੰਢੇ ਹੀਰ ਭਾਲ਼ਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।

ਹਰ ਸਿੱਖ ਪਰਵਾਰ ਦਾ ਇਕ ਮੈਂਬਰ ਅਕਾਲੀ ਦਲ ਦਾ ਕਾਰਕੁੰਨ ਹੋਵੇ-ਬਾਦਲ
ਆਸ਼ਕ ਸੜਦੇ ਧੁੱਪੇ, ਕੁਆਰੀਏ ਛਾਂ ਕਰ ਦੇ।

ਨਵਜੋਤ ਸਿੱਧੂ ਨੇ ਕੈਬਨਿਟ ਮੰਤਰੀ ਵਜੋਂ ਅਸਤੀਫ਼ਾ ਦਿਤਾ- ਇਕ ਖ਼ਬਰ
ਆਹ ਲੈ ਫੜ ਮਿੱਤਰਾ, ਮੇਰੇ ਬਾਂਕਾਂ ਮੇਚ ਨਾ ਆਈਆਂ।

ਆਮ ਆਦਮੀ ਪਾਰਟੀ  ਦਾ ਝਾੜੂ ਫਿਰ ਖਿੰਡਣ ਲੱਗਾ- ਇਕ ਖ਼ਬਰ
ਮੋੜੀਂ ਮੋੜੀਂ ਵੇ ਗੁਲਜ਼ਾਰੀ,  ਭੇਡਾਂ ਦੂਰ ਗਈਆਂ।

ਪੰਜਾਬ ਵਿਚ ਸੱਤਾ ਬਦਲੀ ਪਰ ਪੁਲੀਸ ਦਾ ਕੰਮ-ਕਾਰ ਕਰਨ ਦਾ ਤਰੀਕਾ ਉਹੀ-ਇਕ ਖ਼ਬਰ
ਮਾਉਂ ਹੀਰ ਥੀਂ ਲੋਕ ਕਰਨ ਚੁਗਲੀ, ਤੇਰੀ ਮਲਕੀਏ ਧੀ ਖ਼ਰਾਬ ਹੈ ਨੀਂ।

ਖੇਡਾਂ ਵਿਚ ਪਛੜਿਆ ਪੰਜਾਬ- ਇਕ ਖ਼ਬਰ
ਬਈ ਹੁਣ ਉਹ ਗੱਲ ਕਰੋ ਜੀਹਦੇ 'ਚ ਪੰਜਾਬ ਪਛੜਿਆ ਨਹੀਂ।

ਠੇਕੇਦਾਰ ਨੇ ਬਾਰਿਸ਼ ਦੌਰਾਨ ਹੀ ਸੜਕ 'ਤੇ ਲੁੱਕ ਪੁਆਈ-ਇਕ ਖ਼ਬਰ
ਲਾਗੀਆਂ ਨੇ ਲਾਗ ਲੈਣਾ ਭਾਵੇਂ ਜਾਂਦਿਆਂ ਹੀ..........।

ਕੈਪਟਨ ਖ਼ਾਲਿਸਤਾਨ ਦੇ ਮੁੱਦੇ 'ਤੇ ਦੋਹਰੀ ਬਾਜ਼ੀ ਖੇਡ ਰਿਹਾ ਹੈ- ਬਾਦਲ ਅਕਾਲੀ ਦਲ
ਨੀਂ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਕੌਮ ਦੀ ਚੜ੍ਹਦੀਕਲਾ ਕਰਨ ਲਈ ਯਤਨ ਕਰਨ ਦੀ ਲੋੜ- ਜਥੇਦਾਰ ਅਕਾਲ ਤਖ਼ਤ
ਤੁਸੀਂ ਖੱਟਾ ਪੀਣ ਲਈ ਤਖ਼ਤਾਂ 'ਤੇ ਬੈਠੇ ਹੋ?

ਕਿਸਾਨਾਂ ਨੂੰ 'ਤੁੱਛ' ਸਮਝਦੀ ਹੈ ਸਰਕਾਰ- ਰਾਹੁਲ
ਓਹੋ ਤੇਰੀ ਤੁਣਤੁਣੀ, ਉਹੀਓ ਤੇਰਾ ਰਾਗ।

ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ ਦੇ ਅੰਕੜਿਆਂ ਨੂੰ ਛੁਪਾ ਰਹੀ ਹੈ ਸਰਕਾਰ- ਕਾਂਗਰਸ
ਸੱਪ ਤੋਂ ਨਾ ਡਰਦੀ ਸ਼ੀਂਹ ਤੋਂ ਨਾ ਡਰਦੀ, ਡਰਦੀ ਸੱਪ ਦੀ ਵਰਮੀ ਤੋਂ।

ਮੁਕਤਸਰ ਦੇ ਪਟਵਾਰੀ ਨੇ ਰੱਖੇ ਹੋਏ ਹਨ 16 ਕਰਿੰਦੇ- ਇਕ ਖ਼ਬਰ
ਸਿਰ ਫੌਜ ਦੇ ਰਿਹਾ ਨਾ ਕੋਈ ਕੁੰਡਾ, ਹੋਏ ਸ਼ੁਤਰ ਜਿਉਂ ਬਾਝ ਮੁਹਾਰ ਮੀਆਂ।

ਭਾਜਪਾ ਸੰਸਦ ਮੈਂਬਰ ਹੰਸ ਰਾਜ ਹੰਸ ਦਾ ਆਈ ਫੋਨ ਚੋਰੀ-ਇਕ ਖ਼ਬਰ
ਸਾਡਾ ਫੋਨ ਜੀ ਚੋਰੀ ਹੋ ਗਿਆ ਕੀ ਕਰੀਏ, ਕੀ ਕਰੀਏ।

ਨਸ਼ਿਆਂ ਨੇ 'ਲੁੱਟਿਆ' ਜਿਉਣੇ ਮੌੜ ਦਾ ਪਿੰਡ-ਇਕ ਖ਼ਬਰ
ਰਾਤੀਂ ਧਾੜ ਪਈ, ਲੁੱਟਿਆ ਤਖ਼ਤ ਹਜ਼ਾਰਾ।

ਬਿਜਲੀ ਚੋਰੀ ਰੋਕਣ 'ਚ ਪੁਲਿਸ ਤੇ ਪ੍ਰਸ਼ਾਸਨ ਸਹਿਯੋਗ ਕਰੇ- ਅਮਰਿੰਦਰ
ਰਾਖੀ ਦੁੱਧ ਦੀ ਬਿੱਲੀਆਂ ਤੋਂ, ਭਾਲ਼ਦੀ ਏਂ ਸਰਕਾਰੇ।                                                   

09 July 2019

ਚੰਗੇ ਰੁਜ਼ਗ਼ਾਰ ਪੱਖੋਂ ਭਾਰਤ ਦੇ ਹਾਲਾਤ ਪਾਕਿਸਤਾਨ ਨਾਲੋਂ ਵੀ ਮਾੜੇ-ਇਕ ਖ਼ਬਰ
ਸੱਸ ਮੇਰੀ ਦਾ ਐਡਾ ਜੂੜਾ ਵਿਚੋਂ ਕਿਰਦੀ ਰੇਤ, ਸੱਸੇ ਕੰਜਰੀਏ ਸ਼ੀਸ਼ਾ ਲੈ ਕੇ ਦੇਖ।

ਭਾਰਤ ਦੇ 70 ਫ਼ੀਸਦੀ ਲੋਕ ਮੋਟਾਪੇ ਦੇ ਸ਼ਿਕਾਰ- ਇਕ ਖ਼ਬਰ
ਤੇਰੀ ਮੇਰੀ ਨਹੀਂ ਨਿਭਣੀ, ਮੈਂ ਪਤਲੀ ਤੂੰ ਭਾਰਾ।

ਮਹਾਂਰਾਸ਼ਟਰ ਵਿਧਾਨ ਸਭਾ ਚੋਣਾਂ ਬੈਲਟ ਪੇਪਰ ਨਾਲ਼ ਕਰਵਾਈਆਂ ਜਾਣ- ਰਾਜ ਠਾਕਰੇ
ਤੇਰੀਆਂ ਮੈਂ ਲੱਖ ਮੰਨੀਆਂ, ਮੇਰੀ ਇਕ ਤੂੰ ਮੰਨੇ ਤਾਂ ਜਾਣਾ।

ਸਰਕਾਰੀ ਹਸਪਤਾਲਾਂ 'ਚ ਸਿਹਤ ਸਹੂਲਤਾਂ ਦੀ ਘਾਟ ਨਹੀਂ ਆਉਣ ਦਿਤੀ ਜਾਵੇਗੀ- ਬਲਬੀਰ ਸਿੰਘ ਸਿੱਧੂ
ਬਸ਼ਰਤਿ ਕਿ ਮਰੀਜ਼ਾਂ ਦੀਆਂ ਜੇਬਾਂ ਨੋਟਾਂ ਨਾਲ਼ ਭਰੀਆਂ ਹੋਈਆਂ ਹੋਣ।

ਕਰਨਾਟਕ ਦੇ ਬਾਗ਼ੀ ਵਿਧਾਇਕ ਮੁੰਬਈ 'ਚ, ਖ਼ਰੀਦੋ-ਫ਼ਰੋਖ਼ਤ ਦਾ ਦੋਸ਼- ਇਕ ਖ਼ਬਰ
ਨਦੀਓਂ ਪਾਰ ਰਾਂਝਣ ਦਾ ਠਾਣਾ, ਕੀਤੇ ਕੌਲ ਜ਼ਰੂਰੀ ਜਾਣਾ।

ਮਹਿੰਗੀ ਬਿਜਲੀ ਦੇ ਮੁੱਦੇ 'ਤੇ ਬਾਦਲਾਂ ਦੀ ਡਰਾਮੇਬਾਜ਼ੀ ਦੇ ਪਾਜ ਉਧੇੜਾਂਗੇ- ਹਰਪਾਲ ਚੀਮਾ
ਬਈ ਦਾਰੂ ਪੀ ਕੇ ਮਿੱਤਰਾਂ  ਨੇ, ਤੇਰੇ ਬੂਹੇ ਅੱਗੇ ਡਾਂਗ ਖੜਕਾਉਣੀ।

ਬੱਚਿਆਂ ਦੇ ਸ਼ੋਸ਼ਣ ਮਾਮਲੇ 'ਚ ਪਾਦਰੀ ਗ੍ਰਿਫ਼ਤਾਰ- ਇਕ ਖ਼ਬਰ
ਵਾਹ ਪਾਦਰੀ ਜੀ ਵਾਹ, ਪੜ੍ਹਨੀਆਂ ਪੋਥੀਆਂ ਤੇ ਕੰਮ ਕਰਨੇ ਆਹ।

ਕੇਜਰੀਵਾਲ ਨੇ ਕਿਹਾ, ਕੇਂਦਰ ਨਾਲ ਸਹਿਯੋਗ ਕਰਾਂਗੇ-ਇਕ ਖ਼ਬਰ
ਵਿਹੜੇ ਖੇੜਿਆਂ ਦੇ ਤਿਲਕਣਬਾਜ਼ੀਆਂ ਨੇ, ਜ਼ਰਾ ਸੋਚ ਕੇ ਪੈਰ ਟਿਕਾਈਂ ਜੋਗੀ।

ਭਾਰਤ ਵਿਚ 30% ਜਾਅਲੀ ਡਰਾਈਵਿੰਗ ਲਾਇਸੰਸ ਲੋਕ ਲਈ ਫਿਰਦੇ ਹਨ- ਟਰਾਂਸਪੋਰਟ ਮੰਤਰੀ
ਜੱਗ ਭਾਵੇਂ ਨਿੰਦਿਆ ਕਰੇ, ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ।

ਖੇਤੀ ਬਾਰੇ ਬਣਾਈ ਕੌਮੀ ਕਮੇਟੀ 'ਚੋਂ ਪੰਜਾਬ ਨੂੰ ਬਾਹਰ ਰੱਖਣਾ ਸਰਾਸਰ ਧੱਕਾ- ਭਗਵੰਤ ਮਾਨ
ਰਾਤੀਂ ਧਾੜ ਪਈ, ਲੁੱਟਿਆ ਤਖ਼ਤ ਹਜ਼ਾਰਾ।

ਭਾਰਤ 'ਚ ਅਮੀਰ ਲੋਕਾਂ 'ਤੇ ਲਗਾਇਆ ਗਿਆ ਟੈਕਸ ਦੂਸਰੇ ਦੇਸ਼ਾਂ ਦੇ ਨਾਲ਼ੋਂ ਕਿਤੇ ਘੱਟ- ਸਰਕਾਰ
ਮਿੱਤਰਾਂ ਦੇ ਫੁਲਕੇ ਨੂੰ, ਨੀਂ ਮੈਂ ਖੰਡ ਦਾ ਪਲੇਥਣ ਲਾਵਾਂ।

ਦੋ ਵਿਧਾਨ ਰੱਖਣ ਬਦਲੇ ਅਕਾਲੀ ਦਲ ਦੀ ਮਾਨਤਾ ਰੱਦ ਕਰਵਾ ਕੇ ਹੀ ਰਹਾਂਗੇ- ਬਲਵੰਤ ਸਿੰਘ ਖੇੜਾ
ਸੋਨੇ ਦੇ ਤਵੀਤ ਵਾਲ਼ੀਏ, ਤੇਰੀ ਤੋੜ ਕੇ ਛੱਡਾਂਗੇ ਗਾਨੀ।               

02 July 2019

*ਕੋਈ ਗ਼ੈਰ-ਗਾਂਧੀ ਵੀ ਹੋ ਸਕਦੈ ਕਾਂਗਰਸ ਦਾ ਪ੍ਧਾਨ- ਰਾਹੁਲ ਗਾਂਧੀ
# ਛੜਿਆਂ ਦੀ ਮਾਂ ਮਰ ਗਈ,
 ਕੋਈ ਡਰਦੀ ਪਿੱਟਣ ਨਾ ਜਾਵੇ।

* ਭਾਖੜਾ ਡੈਮ ਭਾਈਵਾਲ ਰਾਜਾਂ ਦੀਆਂ ਸਿੰਜਾਈ ਜ਼ਰੂਰਤਾਂ ਪੂਰੀਆਂ ਕਰ ਰਿਹੈ- ਚੇਅਰਮੈਨ ਭਾਖੜਾ ਬੋਰਡ
# ਤੇ ਪੰਜਾਬ ਪੰਦਰਾਂ ਲੱਖ ਟਿਊਬਵੈੱਲਾਂ ਨਾਲ ਆਪਣਾ ਡੈੱਥ ਵਾਰੰਟ ਲਿਖ ਰਿਹੈ।

* ਸਿਆਸੀ ਸਰਪ੍ਸਤੀ ਤੋਂ ਬਿਨਾਂ ਨਹੀਂ ਚਲ ਸਕਦਾ ਡਰੱਗ ਮਾਫੀਆ- ਹਰਪਾਲ ਚੀਮਾ
# ਵਾਰਸ ਸ਼ਾਹ ਪਰ ਅਸਾਂ ਮਾਲੂਮ ਕੀਤਾ, ਜੱਟੀ ਜੋਗੀ ਇੱਕੋ ਹਾਣ ਦੇ ਨੇ।

* ਮੋਦੀ ਵੱਲੋਂ ਰਾਜ ਸਭਾ ' ਚ ਵੀ ਕਾਂਗਰਸ ਨੂੰ ਰਗੜੇ- ਇਕ ਖ਼ਬਰ
# ਜਿੱਥੇ ਮਰਜ਼ੀ ਨਿਸ਼ਾਨੇ ਲਾ,
    ਹੁਣ ਤੇਰੇ ਦਿਨ ਬੱਲੀਏ।

* ਸਮਾਜਵਾਦੀਆਂ ਤੋਂ ਮਾਇਆਵਤੀ ਨੇ ਪਾਸਾ ਕਿਉਂ ਵੱਟਿਆ?- ਇਕ ਸਵਾਲ
# ਗੁੱਸਾ ਨਾ ਕਰਿਆ ਕਰ ਨੀਂ,
    ਹੁੰਦਾ ਗੁੱਸਾ ਸਿਹਤ ਲਈ ਮਾੜਾ।

* ਮੁੱਖ ਮੰਤਰੀ ਵੱਲੋਂ ਨਸ਼ਾ ਤਸਕਰਾਂ ਤੇ ਪੁਲਸ ਦਾ ਗੱਠਜੋੜ ਤੋੜਨ ਦੀ ਹਦਾਇਤ- ਇਕ ਖ਼ਬਰ
# ਨਹਿਰੋਂ ਪਾਰ ਬੰਗਲਾ,
   ਪੁਆ ਦੇ ਹਾਣੀਆਂ।

* ਕਾਂਗਰਸ ਦੀ ਦਾਲ਼ ਵਿਚ ਕਾਲ਼ਾ ਕਾਲ਼ਾ ਨਹੀਂ ਸਗੋਂ ਸਾਰੀ ਦਾਲ਼ ਹੀ ਕਾਲ਼ੀ ਹੈ- ਭਗਵੰਤ ਮਾਨ
# ਬੇਰੀਆਂ ਨੂੰ ਬੇਰ ਲੱਗ ਗਏ,
    ਤੈਨੂੰ ਕੁਝ ਨਾ ਲੱਗਾ ਮੁਟਿਆਰੇ।

* ਪੰਜਾਬ ਨੂੰ ਨਸ਼ਾ ਮੁਕਤ ਕਰਨ ਲਈ ਮੁੱਖ ਮੰਤਰੀ ਨੇ ਅਹਿਦ ਲਿਆ- ਇਕ ਖ਼ਬਰ
# ਰਾਜਾ ਜੀ ਵੀਹ ਸੌ ਸਤਾਰਾਂ 'ਚ ਗੁਟਕਾ ਸਾਹਿਬ ਹੱਥ ਫੜ ਕੇ ਲਿਆ ਹੋਇਆ ਅਹਿਦ ਬੇਹਾ ਹੋ ਗਿਐ?

* ਕਮੇਟੀ ਦੀ ਰਿਪੋਰਟ ਆਉਣ ਤੋਂ ਪਹਿਲਾਂ ਸਿੱਖ ਰੈਫਰੈਂਸ ਲਾਇਬੇ੍ਰੀ ਬਾਰੇ ਗੱਲ ਕਰਨਾ ਠੀਕ ਨਹੀਂ- ਸੁਖਬੀਰ ਬਾਦਲ
# ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜੀਣ।

* ਕਰਤਾਰ ਪੁਰ ਲਾਂਘਾਃ ਭਾਰਤ ਸਰਕਾਰ ਬੇਤੁਕੇੇ ਅੜਿੱਕੇ ਡਾਹ ਰਹੀ ਹੈ- ਅਮਰੀਕ ਸਿੰਘ ਸ਼ਾਹਪੁਰ
# ਬਦੀਆਂ ਨਾ ਕਰ ਵੇ,
    ਕੈਅ ਦਿਨ ਦੀ ਜ਼ਿੰਦਗਾਨੀ।

* ਯੂ.ਪੀ. 'ਚ ਐਂਬੂਲੈਂਸ ਨਾ ਮਿਲਣ 'ਤੇ ਮਰੀਜ਼ ਨੂੰ ਰੇਹੜੀ 'ਤੇ ਲਿਜਾਣਾ ਪਿਆ- ਇਕ ਖ਼ਬਰ
# ਮਰ ਗਈ ਰਾਮ ਤੁਰੇ,
ਡਾਕਦਾਰ ਨਾ ਆਇਆ।

* ਜੋਤਸ਼ੀ ਦੇ ਘਰ ਚੋਰੀ ਕਰ ਕੇ ਘਰ ਨੂੰ ਚੋਰ ਆਪਣਾ ਜਿੰਦਰਾ ਲਗਾ ਗਏ- ਇਕ ਖ਼ਬਰ
#  ਖ਼ਬਰ ਕਾਈ ਨਾ ਘਰ ਆਪਣੇ ਦੀ,
    ਹੱਥ ਲੋਕਾਂ ਦੇ ਦੇਖਦਾ ਰੱਬ ਬਣ ਕੇ।

* ਅਗਲੀਆਂ ਚੋਣਾਂ ਬਸਪਾ ਆਪਣੇ ਬਲਬੂਤੇ 'ਤੇ ਹੀ ਲੜੇਗੀ- ਮਾਇਆਵਤੀ
# ਘੜਾ ਚੁੱਕ ਲਉਂ ਪੱਟਾਂ 'ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

* ਸੌਦਾ ਸਾਧ ਨੇ ਆਪਣੀ ਪੈਰੋਲ ਅਰਜ਼ੀ ਵਾਪਸ ਲਈ-ਇਕ ਖ਼ਬਰ
# ਤੇਰੀ ਤੋੜ ਕੇ ਛੱਡਣਗੇ ਗਾਨੀ,
ਵੱਸ ਪੈ ਗਈ ਅੜ੍ਬਾਂ ਦੇ।

23 June 2019

ਕਾਂਗਰਸ ਲੋਕ ਸਭਾ ਲਈ ਅਜੇ ਵੀ ਆਪਣਾ ਨੇਤਾ ਨਹੀਂ ਚੁਣ ਸਕੀ- ਇਕ ਖ਼ਬਰ
ਗੰਜੀ ਕੀ ਨਹਾਊ ਤੇ ਕੀ ਨਿਚੋੜੂ।

ਪੰਜਾਬ ਦੀ ਧਰਤੀ ਹੇਠਾਂ ਵੀ ਛੁਪੇ ਹਨ ਪੈਟਰੋਲੀਅਮ ਪਦਾਰਥ- ਇਕ ਖ਼ਬਰ
ਪੰਜਾਬੀਓ ਤੁਹਾਨੂੰ ਕੀ ਮਿਲਣੈ? ਜਿਵੇਂ ਤੁਹਾਡਾ ਬਿਜਲੀ,ਪਾਣੀ ਲੁੱਟਿਐ ਉਵੇਂ ਪੈਟਰੋਲ ਲੁੱਟ ਲੈਣੈ।

ਵਿਰੋਧੀ ਧਿਰ ਗਿਣਤੀ ਦੀ ਚਿੰਤਾ ਨਾ ਕਰੇ, ਉਸਦਾ ਹਰ ਸ਼ਬਦ ਸਾਡੇ ਲਈ ਕੀਮਤੀ- ਮੋਦੀ
ਖ਼ਬਰਦਾਰ ਰਹਿਣਾ ਬਈ, ਚੌਂਕੀ ਜ਼ਾਲਮਾਂ ਦੀ ਆਈ।

ਅਮਰੀਕਾ ਵਪਾਰਕ ਪੱਖ ਤੋਂ ਭਾਰਤ ਖ਼ਿਲਾਫ਼ ਹੋਰ ਕਾਰਵਾਈ ਦੀ ਤਿਆਰੀ 'ਚ- ਇਕ ਖ਼ਬਰ
ਮੇਰੇ ਨਰਮ ਕਾਲ਼ਜੇ ਲੜ ਗਏ, ਲੱਡੂ ਖਾ ਲਏ ਤੇਰੇ ਤੇਲ ਦੇ।

ਸਿੱਖਾਂ ਦੇ ਕਾਤਲ ਪੁਲਸ ਮੁਲਾਜ਼ਮਾਂ ਨੂੰ ਮੁਆਫ਼ੀ ਦੇਣ ਦੀ ਸੁਖਬੀਰ ਬਾਦਲ ਵਲੋਂ ਨਿਖੇਧੀ- ਇਕ ਖ਼ਬਰ
ਬਈ ਖ਼ਬਰ ਐ ਕਿ ਇਹ ਮੁਆਫ਼ੀ ਦੀ ਫਾਈਲ ਤਾਂ ਅਕਾਲੀਆਂ ਵੇਲੇ ਹੀ ਤੁਰ ਪਈ ਸੀ।

ਸਿੱਖ ਬੁੱਧੀਜੀਵੀਆਂ ਵਲੋਂ ਸਿੱਖ ਰੈਫ਼ਰੈਂਸ ਲਾਇਬ੍ਰੇਰੀ ਦੀ ਪੜਤਾਲ ਲਈ ਬਣਾਈ ਕਮੇਟੀ ਰੱਦ- ਇਕ ਖ਼ਬਰ
ਕੰਧਾਂ ਕਾਲ਼ੀਆਂ ਸ਼ਹਿਰ ਹੜਤਾਲ ਹੋਈ, ਧੁੰਦੂਕਾਰ ਜ਼ਿਮੀਂ ਆਸਮਾਨ ਹੋਇਆ।  

ਆਸਟ੍ਰੇਲੀਆ 'ਚ ਭਾਰਤੀ ਦੂਤਾਵਾਸ ਵੀ ਕਰ ਰਿਹੈ ਪਰਵਾਸੀਆਂ ਦਾ ਸ਼ੋਸ਼ਣ- ਇਕ ਖ਼ਬਰ
ਹੁਣ ਰੱਬ ਡਾਢਾ ਵੀ ਡਰਿਆ, ਠਾਣੇਦਾਰਾਂ ਤੋਂ।

ਪਾਕਿਸਤਾਨੀਆਂ ਨੂੰ ਅੱਜ ਕਲ ਸਿਰਫ਼ ਨਿਰਾਸ਼ਾਜਨਕ ਖ਼ਬਰਾਂ ਹੀ ਸੁਣਾਈ ਦੇ ਰਹੀਆਂ ਹਨ- ਪਾਕਿ ਚੀਫ਼ ਜਸਟਿਸ
ਸੀਟੀ ਵਿਚ ਆਂਦਰਾਂ ਦੇ ਵੱਜਦੀ, ਕੰਨ ਲਾ ਕੇ ਸੁਣ ਅੜੀਏ।

ਟਰੰਪ ਵਲੋਂ 2020 'ਚ ਦੁਬਾਰਾ ਰਾਸ਼ਟਰਪਤੀ ਬਣਨ ਲਈ ਚੋਣ ਮੁਹਿੰਮ ਸ਼ੁਰੂ-ਇਕ ਖ਼ਬਰ
ਰੋਟੀ ਲੈ ਕੇ ਦਿਓਰ ਦੀ ਚੱਲੀ, ਅੱਗੇ ਜੇਠ ਬੱਕਰਾ ਹਲ਼ ਵਾਹਵੇ।

ਭਾਰਤ ਵਲੋਂ ਗੱਲਬਾਤ ਲਈ ਤਿਆਰ ਹੋਣ ਸਬੰਧੀ ਪਾਕਿ ਦਾਅਵੇ ਦਾ ਖੰਡਨ- ਇਕ ਖ਼ਬਰ
ਐਵੇਂ ਈ ਰੌਲ਼ਾ ਪੈ ਗਿਆ, ਐਵੇਂ ਈ ਰੌਲ਼ਾ ਪੈ ਗਿਆ।

ਸਰਬ ਪਾਰਟੀ ਬੈਠਕ ਦਾ ਕਾਂਗਰਸ ਤੇ ਹੋਰਾਂ ਵਲੋਂ ਬਾਈਕਾਟ- ਇਕ ਖ਼ਬਰ
ਆਹ ਲੈ ਫੜ ਮਾਲ਼ਾ ਆਪਣੀ, ਸਾਥੋਂ ਭੁੱਖਿਆਂ ਤੋਂ ਭਗਤੀ ਨਾ ਹੋਵੇ।

ਪਿਛਲੀ ਭਾਜਪਾ ਸਰਕਾਰ ਵਲੋਂ ਜਾਰੀ ਦਸ ਆਰਡੀਨੈਂਸ ਨਵੇਂ ਸਿਰੇ ਤੋਂ ਸੰਸਦ ਵਿਚ ਪੇਸ਼- ਇਕ ਖ਼ਬਰ
ਜਿਥੇ ਮਰਜ਼ੀ ਨਿਸ਼ਾਨੇ ਲਾ, ਹੁਣ ਤੇਰੇ ਦਿਨ ਬੱਲੀਏ।

ਫਤਿਹਵੀਰ ਦੇ ਸ਼ਰਧਾਂਜਲੀ ਸਮਾਗਮ ਸਮੇਂ ਬੁਲਾਰਿਆਂ ਨੂੰ ਬੋਲਣ ਦਾ ਮੌਕਾ ਨਾ ਮਿਲਿਆ- ਇਕ ਖ਼ਬਰ
ਢਿੱਡ ਫੁੱਲ ਗਏ ਸਾਡੇ ਜੀ, ਹੁਣ ਕਿਵੇਂ ਅਫ਼ਾਰਾ ਉੱਤਰੂ।

ਪਿਛਲੇ ਦਿਨਾਂ ਤੋਂ ਵਾਪਰੀਆਂ ਮੰਦਭਾਗੀਆਂ ਘਟਨਾਵਾਂ ਦੇਖ ਕੇ ਹਰ ਸਿੱਖ ਚਿੰਤਿਤ- ਭਾਈ ਰਾਮ ਸਿੰਘ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਲੌਂਗੋਵਾਲ ਨੇ ਲਾਇਬ੍ਰੇਰੀ ਮਾਮਲੇ ਲਈ ਆਪਣਿਆਂ ਦੀ ਹੀ ਇਕ ਸਬ ਕਮੇਟੀ ਗਠਿਤ ਕੀਤੀ- ਇਕ ਖ਼ਬਰ
ਆਪੇ ਮੈਂ ਰੱਜੀ ਪੁੱਜੀ, ਆਪੇ ਮੇਰੇ ਬੱਚੇ ਜੀਣ।

ਮੋਦੀ ਕਿਵੇਂ ਦੁਗਣੀ ਕਰਨਗੇ ਕਿਸਾਨਾਂ ਦੀ ਆਮਦਨ?- ਵਿਸ਼ਵ ਵਾਪਾਰ ਸੰਗਠਨ
ਯਾਰ ਇਹ ਜੁਮਲਾ ਸੀ, ਤੁਸੀਂ ਅਜੇ ਵੀ ਜੁਮਲੇ ਨੂੰ ਚੁੱਕੀ ਫਿਰਦੇ ਓ।

ਤੁਰਲੇ ਵਾਲ਼ੀ ਪੱਗ ਬੰਨ੍ਹ ਕੇ ਮੁਹੰਮਦ ਸਦੀਕ ਪਹੁੰਚਿਆ ਪਾਰਲੀਮੈਂਟ 'ਚ- ਇਕ ਖ਼ਬਰ
ਤੂੰ ਤੇ ਆ ਗਇਓਂ ਬਸੰਤੀ ਚੀਰਾ ਬੰਨ੍ਹ ਕੇ, ਮਾਪੇ ਮੈਨੂੰ ਨਹੀਓਂ ਤੋਰਦੇ।