30 ਜੁਲਾਈ 2023

ਪੰਜਾਬ ਕਾਂਗਰਸ ਨੇ ਕੇਂਦਰ ਦੀ ਭਾਜਪਾ ਸਰਕਾਰ ਵਿਰੁੱਧ ਕੀਤਾ ਮੌਨ ਸਤਿਆਗ੍ਰਹਿ- ਇਕ ਖ਼ਬਰ

ਤੇਰੇ ਸਾਹਮਣੇ ਬੈਠ ਕੇ ਰੋਣਾ, ਦੁੱਖ ਤੈਨੂੰ ਨਹੀਂਉਂ ਦੱਸਣਾ।

ਯੂਕਰੇਨ ਨੂੰ ਮਿਲੇ ਅਮਰੀਕੀ ਹਥਿਆਰ ਬਲੈਕ ਮਾਰਕੀਟ ‘ਚ ਵੇਚੇ ਗਏ-ਇਕ ਖ਼ਬਰ

ਚੋਰਾਂ ਦੇ ਕੱਪੜੇ, ਡਾਂਗਾਂ ਦੇ ਗਜ਼।

ਲੌਢੂਵਾਲ ਦੇ ਟੌਲ ਪਲਾਜ਼ੇ ਦੇ ਕਰਮਚਾਰੀਆਂ ਤੋਂ ਦਿਨ-ਦਿਹਾੜੇ 23 ਲੱਖ ਰੁਪਏ ਦੀ ਲੁੱਟ- ਇਕ ਖ਼ਬਰ

ਚੋਰਾਂ ਨੂੰ ਮੋਰ।

ਸ਼੍ਰੋਮਣੀ ਕਮੇਟੀ ਦੇ ਮੁਲਾਜ਼ਮਾਂ ਨੇ ਵੀ ਆਪਣੀ ਯੂਨੀਅਨ ਬਣਾ ਕੇ ਰਜਿਸਟਰ ਕਰਵਾਈ- ਇਕ ਖ਼ਬਰ

ਤੰਗ ਆਮਦ, ਬਜੰਗ ਆਮਦ।

ਦਿੱਲੀ ਕਮੇਟੀ ਨੇ ਸ਼੍ਰੋਮਣੀ ਕਮੇਟੀ ਨੂੰ ਦਿੱਲੀ ਵਾਲ਼ਾ ਦਫ਼ਤਰ ਖ਼ਾਲੀ ਕਰਨ ਦੀ ਦਿਤੀ ਚਿਤਾਵਨੀ-ਇਕ ਖ਼ਬਰ

ਚੁੱਕ ਚਰਖ਼ਾ ਪਰ੍ਹਾਂ ਕਰ ਪੀੜ੍ਹੀ, ਛੜਿਆਂ ਨੇ ਬੋਕ ਬੰਨ੍ਹਣਾ।

ਸਿੱਖਾਂ ਦੇ ਧਾਰਮਕ ਮਾਮਲਿਆਂ ‘ਚ ਦਖ਼ਲਅੰਦਾਜ਼ੀ ਬੰਦ ਕਰੇ ਭਗਵੰਤ ਮਾਨ- ਸੁਖਬੀਰ ਬਾਦਲ

ਇਹ ਹੱਕ ਸਿਰਫ਼ ਤੇ ਸਿਰਫ਼ ਇਕੋ ਪਰਵਾਰ ਨੂੰ ਹੈ ।

ਯੂਥ ਅਕਾਲੀ ਦਲ ਨੇ ਮੁੱਖ ਮੰਤਰੀ ਰਿਹਾਇਸ਼ ਅਤੇ ਕਾਂਗਰਸ ਭਵਨ ਵਲ ਕੀਤਾ ਰੋਸ ਮਾਰਚ- ਇਕ ਖ਼ਬਰ

ਹੁਣ ਅੱਕਾਂ ਤੋਂ ਭਾਲ਼ਦੀ ਡੇਲੇ, ਜੱਟਾਂ ਨੇ ਕਰੀਰ ਪੁੱਟ ਲਏ।

ਮਨੀਪੁਰ ਦੇ ਮੁੱਦੇ ‘ਤੇ ਲੋਕ ਸਭਾ ‘ਚ ਰੇੜਕਾ ਬਰਕਰਾਰ- ਇਕ ਖ਼ਬਰ

ਸੱਸ ਲੜਦੀ ਜਠਾਣੀ ਗੁੱਤ ਫੜਦੀ, ਦਿਉਰ ਮਾਰੇ ਮਿਹਣੇ ਵੀਰਨਾ।

ਸੁਨੀਲ ਜਾਖੜ ਨੇ ਅਸ਼ਵਨੀ ਸੇਖੜੀ ਨੂੰ ਕਰਵਾਇਆ ਭਾਜਪਾ ‘ਚ ਦਾਖ਼ਲ- ਇਕ ਖ਼ਬਰ

ਤੂੰ ਪੱਟੀ ਲੱਡੂਆਂ ਨੇ, ਤੇਰੀ ਤੋਰ ਪੱਟਿਆ ਪਟਵਾਰੀ।

ਬਾਜਵੇ ਨੇ ਪੰਜਾਬ ‘ਚ ਕੀਤੇ ਗੱਠਜੋੜ ਬਾਰੇ ਸੋਨੀਆ ਗਾਂਧੀ ਅਤੇ ਖੜਗੇ ਕੋਲ਼ ਰੱਖਿਆ ਆਪਣਾ ਪੱਖ-ਇਕ ਖ਼ਬਰ

ਅਰਜ਼ ਗ਼ਰੀਬਾਂ ਦੀ, ਸੁਣ ਲੈ ਪਟੋਲਿਆ ਖੜ੍ਹ ਕੇ।

ਭਾਜਪਾ ਅਤੇ ਆਰ.ਐਸ.ਐਸ. ਸੱਤਾ ਪ੍ਰਾਪਤੀ ਲਈ ਕੁਝ ਵੀ ਕਰ ਸਕਦੇ ਹਨ- ਰਾਹੁਲ

ਰੋਕੜ ਲੱਕ ਬੰਨ੍ਹ ਕੇ, ਛੜੇ ਤੀਵੀਆਂ ਖਰੀਦਣ ਜਾਂਦੇ।

ਪ੍ਰਧਾਨ ਮੰਤਰੀ ਲੋਕਤੰਤਰ ‘ਚ ਵਿਸ਼ਵਾਸ ਨਹੀਂ ਰੱਖਦੇ, ਸੰਸਦ ਦਾ ਅਪਮਾਨ ਕਰ ਰਹੇ ਹਨ- ਖੜਗੇ

ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਭਗਵੰਤ ਮਾਨ ਨੇ ਮਨਪ੍ਰੀਤ ਬਾਦਲ ਵਲੋਂ ਪਾਕ ਸਾਫ਼ ਹੋਣ ਦੇ ਦਾਅਵੇ ‘ਤੇ ਕੀਤੇ ਤਿੱਖੇ ਸ਼ਬਦੀ ਵਾਰ- ਇਕ ਖ਼ਬਰ

ਜੱਟ ਆਉਂਦੈ ਪਰੈਣੀ ਕੱਸੀ, ਨੀ ਮੈਂ ਹੁਣ ਕੀ ਕਰਾਂ।

ਰਾਜਪਾਲ ਵੀ ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਦੇ ਦੌਰੇ ਲਈ ਨਿਕਲੇ- ਇਕ ਖ਼ਬਰ

ਤੋਰ ਦੇ ਮਾਏਂ ਨੀ, ਰਾਂਝਾ ਨਿੱਤ ਪਾਵੇ ਫੇਰੀਆਂ।

23 ਜੁਲਾਈ 2023

ਧਾਮੀ ਨੇ ਇਕ ਜਥੇਦਾਰ ਦਾ ਆਦੇਸ਼ ਕੀਤਾ ਅਣਸੁਣਿਆ ਤੇ ਦੂਸਰੇ ਦਾ ਝੱਟ ਮੰਨ ਲਿਆ- ਇਕ ਖ਼ਬਰ

ਆਦੇਸ਼ ਤਾਂ ‘ਮਾਲਕਾਂ ’ ਦਾ ਹੀ ਹੈ ਪਰ ਆਇਆ ਹੈ ‘ਹੱਥਠੋਕੇ’ ਦੇ ਰਾਹੀਂ।

ਭਗਵਾਨ ਦੀ ਮਾਰ ਨਹੀਂ ਭਗਵੰਤ ਮਾਨ ਦੀ ਮਾਰ ਨੇ ਹੜ੍ਹ- ਹਰਸਿਮਰਤ ਬਾਦਲ

ਅਸੀ ਤਾਂ ਸਮਝਿਆ ਸੀ ਕਿ ਸੁੱਖਾ ਅਮਲੀ ਹੀ ਹਿੱਲਿਆ ਹੋਇਐ ਪਰ ਇਥੇ ਤਾਂ.........

ਵਿਜੀਲੈਂਸ ਵਲੋਂ ਦਸ ਹਜ਼ਾਰ ਦੀ ਰਿਸ਼ਵਤ ਲੈਂਦਿਆਂ ਦਰਜਾ ਚਾਰ ਮੁਲਾਜ਼ਮ ਕਾਬੂ- ਇਕ ਖ਼ਬਰ

‘ਵੱਡਾ ਬੱਕਰਾ’ ਵੀ ਫੜੋ ਜਿਸ ਦੇ ਵਾਸਤੇ ਰਿਸ਼ਵਤ ਲਈ ਇਸ ਮੁਲਾਜ਼ਮ ਨੇ।

ਬੇਰੁਜ਼ਗਾਰੀ ਵਿਚ ਹਰਿਆਣਾ ਨੰਬਰ ਇਕ ਬਣਿਆ- ਇੰਦਰਜੀਤ ਗੁਰਾਇਆ

ਬਦਨਾਮ ਭੀ ਹੋਂਗੇ ਤੋ ਕਿਆ ਨਾਮ ਨਾ ਹੋਗਾ।

ਪ੍ਰਧਾਨ ਮੰਤਰੀ ਵਲੋਂ ਢੀਂਡਸਾ ਨੂੰ ਬਾਦਲ ਦਾ ਅਸਲੀ ਵਾਰਸ ਕਹਿਣ ਨਾਲ਼ ਅਕਾਲੀਆਂ ‘ਚ ਛਿੜੀ ਨਵੀਂ ਚਰਚਾ- ਇਕ ਖ਼ਬਰ

ਹੁਣ ਬਾਦਲ ਸਾਹਿਬ ਵਾਲ਼ੀ ਨਿੱਕਰ ਵੀ ਢੀਂਡਸੇ ਦੇ ਹਵਾਲੇ ਕਰਨੀ ਪਊ।

26 ਵਿਰੋਧੀ ਪਾਰਟੀਆਂ ਦੀ ਮੀਟਿੰਗ ਬਾਅਦ ਪੰਜਾਬ ਦੀ ਸਿਆਸਤ ਵੀ ਗਰਮਾਈ- ਇਕ ਖ਼ਬਰ

ਨਿੰਮ ਹੇਠ ਕੱਤਦੀ ਦੀ, ਮੇਰੀ ਗੂੰਜ ਪਵੇ ਦਰਵਾਜੇ।

ਮਨੀਪੁਰ ਦੀ ਸ਼ਰਮਨਾਕ ਘਟਨਾ ਦੇ ਦੋਸ਼ੀਆਂ ਨੂੰ ਬਖ਼ਸ਼ਾਂਗੇ ਨਹੀਂ- ਮੋਦੀ

ਮੋਦੀ ਸਾਹਿਬ ਅੱਜ ਤਾਈਂ ਤਾਂ ਸਭ ਬਖ਼ਸ਼ ਹੁੰਦੇ ਰਹੇ ਐ।

ਬ੍ਰਿਜ ਭੂਸ਼ਨ ਨੂੰ ਮਿਲੀ ਅੰਤਰਿਮ ਜ਼ਮਾਨਤ- ਇਕ ਖ਼ਬਰ

ਟੁੱਟ ਪੈਣੇ ਜੇਠ ਦਾ ਮੁੰਡਾ, ਚੀਰਾ ਬੰਨ੍ਹ ਕੇ ਸਾਹਮਣੇ ਬਹਿੰਦਾ।

ਮਨੀਪੁਰ ਮਾਮਲੇ ‘ਚ ਸਖ਼ਤ ਹੋਇਆ ਸੁਪਰੀਮ ਕੋਰਟ- ਇਕ ਖ਼ਬਰ

ਦੋ ਪਈਆਂ ਕਿਧਰ ਗਈਆਂ, ਸਦਕਾ ਢੂਈ ਦਾ।

ਟਰੰਪ ਦਾ ਦਾਅਵਾ: ਇਕ ਦਿਨ ਵਿਚ ਖਤਮ ਹੋ ਜਾਵੇਗੀ ਰੂਸ-ਯੂਕਰੇਨ ਜੰਗ- ਇਕ ਖ਼ਬਰ

ਕੌਣ ਜੰਮਿਆਂ ਨਿਬੇੜਨ ਵਾਲ਼ਾ, ਝਗੜੇ ਮਿੱਤਰਾਂ ਦੇ।

ਕਾਂਗਰਸ ਤੇ ‘ਆਪ’ ਦੇ ਗੱਠਜੋੜ ਨਾਲ ਪੰਜਾਬ ‘ਚ ਮਚਿਆ ਸਿਆਸੀ ਘਮਸਾਣ- ਇਕ ਖ਼ਬਰ

ਪਿਆ ਦੇਸ਼ ਦੇ ਵਿਚ ਸੀ ਬੜਾ ਰੌਲਾ, ਭੂਤ ਮੰਡਲੀ ਇਕ ਥੀਂ ਚਾਰ ਹੋਈ।

ਹੜ੍ਹਾਂ ਦੀ ਤ੍ਰਾਸਦੀ ਲਈ ਭਗਵੰਤ ਮਾਨ ਸਿੱਧੇ ਤੌਰ ‘ਤੇ ਜ਼ਿੰਮੇਂਵਾਰ- ਸੁਖਬੀਰ ਬਾਦਲ

ਸਾਊਥ ਕੋਰੀਆ, ਅਮਰੀਕਾ, ਉੱਤਰਾਖੰਡ, ਮੁੰਬਈ ‘ਚ ਹੜ੍ਹਾਂ ਲਈ ਵੀ ਭਗਵੰਤ ਮਾਨ ਜ਼ਿੰਮੇਵਾਰ।

ਅਜੋਕੇ ਮਸੰਦਾਂ ਨੂੰ ਸਜ਼ਾ ਤਾਂ ਭੁਗਤਣੀ ਹੀ ਪਵੇਗੀ- ਭਗਵੰਤ ਮਾਨ

ਗਲ਼ੀਆਂ ਸੁਣੀਂਦੀਆਂ ਭੀੜੀਆਂ, ਜਿੱਥੋਂ ਦੀ ਜਮ ਲੈ ਜਾਣਗੇ।

ਰਾਜਪਾਲ ਪੁਰੋਹਿਤ ਜੀ ਅਸੀਂ ਵੀ ਕੱਚੀਆਂ ਗੋਲ਼ੀਆਂ ਨਹੀਂ ਖੇਡਦੇ- ਭਗਵੰਤ ਮਾਨ

ਜੱਟ ਸ਼ਾਹਾਂ ਨੂੰ ਖੰਘੂਰੇ ਮਾਰੇ, ਕਣਕਾਂ ਨਿੱਸਰ ਪਈਆਂ।

ਸੌਦਾ ਸਾਧ ਫਿਰ ਆਵੇਗਾ ਜੇਹਲ ਤੋਂ ਬਾਹਰ, ਫਿਰ ਮਿਲੀ ਪੈਰੋਲ ਉਸ ਨੂੰ- ਇਕ ਖ਼ਬਰ

ਮੈਨੂੰ ਐਵੇਂ ਨਹੀਂ ਮਿਲਦੀਆਂ ਪੈਰੋਲਾਂ, ਵੋਟਾਂ ਵਾਲ਼ੀ ਗੱਠੜੀ ਨੂੰ ਸਭ ਨੇ ਸਲਾਮਾਂ।

18 ਜੁਲਾਈ 2023

ਮੁੱਖ ਮੰਤਰੀ ਭਗਵੰਤ ਮਾਨ ਕੇਂਦਰ ਤੋਂ ਆਏ ਫੰਡ ਨੂੰ ਬਿਨਾਂ ਗਿਰਦਾਵਰੀ ਲੋੜਵੰਦਾਂ ਨੂੰ ਵੰਡੇ- ਜਾਖੜ

ਜਾਖੜ ਸਾਹਿਬ, ਭਗਵੰਤ ਮਾਨ ਏਨਾ ਨਿਆਣਾ ਨਹੀਂ ਜੋ ਤੁਹਾਡੇ ਵਿਛਾਏ ਜਾਲ਼ ‘ਚ ਫਸ ਜਾਊ।

ਤਜਰਬੇ ਦੀ ਘਾਟ ਕਾਰਣ ਸਰਕਾਰ ਕੁਦਰਤੀ ਆਫ਼ਤ ਨਾਲ ਨਜਿੱਠਣ ‘ਚ ਅਸਫ਼ਲ- ਰਾਜਾ ਵੜਿੰਗ

ਪਿਛਲੇ ਸਾਲਾਂ ‘ਚ ਆਏ ਹੜ੍ਹਾਂ ਵੇਲੇ ਤੁਹਾਡੇ ਤੇ ਤੁਹਾਡੇ ਸਾਥੀਆਂ ਦੇ ਤਜਰਬਿਆਂ ਨੇ ਕੰਮ ਕਿਉਂ ਨਾ ਕੀਤਾ?

ਹੁਣ ਵਾਜਪਾਈ ਦਾ ਜ਼ਮਾਨਾ ਨਹੀਂ, ਅਸੀਂ ਛੋਟੇ ਭਰਾ ਨਹੀਂ ਰਹੇ, ਤੇਰ੍ਹਾਂ ਦੀਆਂ ਤੇਰ੍ਹਾਂ ਸੀਟਾਂ ਜਿੱਤਣ ਦੇ ਸਮਰੱਥ ਹਾਂ- ਜਾਖੜ

ਨਵਾਂ ਨਵਾਂ ਬਣਿਆ ਮੌਲਵੀ ਉੱਚੀ ਉੱਚੀ ਬਾਂਗਾਂ ਦਿੰਦਾ ਹੀ ਹੁੰਦੈ।

ਕੇਂਦਰ ਤੇ ‘ਆਪ’ ਹਰਿਆਣੇ ਨੂੰ ਚੰਡੀਗੜ੍ਹ ‘ਚ ਵਿਧਾਨ ਸਭਾ ਲਈ ਥਾਂ ਦੇਣ ਦੀ ਸਾਜਿਸ਼ ਘੜ ਰਹੇ ਹਨ- ਬਾਦਲ

ਬਾਦਲੋ ਤੁਹਾਡੀਆਂ ਮਿਹਰਬਾਨੀਆਂ, ਤੁਸੀਂ ਮੁਹਾਲੀ ‘ਚ ਦਫ਼ਤਰ ਤਬਦੀਲ ਕਰ ਕੇ ਪੰਜਾਬ ਦਾ ਹੱਕ ਕਮਜ਼ੋਰ ਕੀਤੈ।

ਪੰਜਾਬ ਦੇ ਰਾਜਪਾਲ ਤੇ ਮੁੱਖ ਮੰਤਰੀ ਵਿਚਕਾਰ ਟਕਰਾਅ ਬਰਕਰਾਰ- ਇਕ ਖ਼ਬਰ

ਦੋ ਛੜਿਆਂ ਦੀ ਇਕ ਢੋਲਕੀ, ਰੋਜ਼ ਰਾਤ ਨੂੰ ਖੜਕੇ।

ਧਿਆਨ ਸਿੰਘ ਮੰਡ ਨੇ ਭਗਵੰਤ ਮਾਨ ਨੂੰ ਮੁੜ ਅਕਾਲ ਤਖ਼ਤ ‘ਤੇ ਤਲਬ ਕੀਤਾ- ਇਕ ਖ਼ਬਰ

ਪੜ੍ਹ ਗੁਰਨਾਮ ਕੁਰੇ, ਕਾਟ ਯਾਰ ਦਾ ਆਇਆ।

ਪਤੀ ਨੂੰ ਬੰਧਕ ਬਣਾ ਕੇ ਰੱਖਣ ਦੇ ਦੋਸ਼ ਵਿਚ ਪਤਨੀ ਨੂੰ ਸਜ਼ਾ- ਇਕ ਖ਼ਬਰ

ਕਦੀ ਦਾਦੇ ਦੀਆਂ, ਕਦੇ ਪੋਤੇ ਦੀਆਂ।

ਓ.ਪੀ.ਸੋਨੀ ਨੇ ਚਾਰ ਸਾਲਾਂ ‘ਚ ਨਿਵੇਸ਼ ਕੀਤੇ 10.63 ਕਰੋੜ ਰੁਪਏ- ਵਿਜੀਲੈਂਸ

ਬਹੁਤੀਆਂ ਜਗੀਰਾਂ ਵਾਲਿਆ, ਸਾਢੇ ਤਿੰਨ ਹੱਥ ਧਰਤੀ ਤੇਰੀ।

ਐਸ.ਡੀ.ਐਮ. ਨੇ ਤਾਰੀ ਲਾ ਕੇ ਹੜ੍ਹ ‘ਚ ਘਿਰੇ ਵਿਅਕਤੀ ਨੂੰ ਬਚਾਇਆ- ਇਕ ਖ਼ਬਰ

ਪਾਰ ਲੰਘਾ ਦੇ ਵੇ, ਤੂੰ ਨਦੀਆਂ ਦਾ ਭੇਤੀ।

ਕੈਬਨਿਟ ਮੰਤਰੀ ਜੌੜਾਮਾਜਰਾ ਤੇ ਜੈਇੰਦਰ ਕੌਰ ਵਿਚਾਲੇ ਹੋਈ ਤਿੱਖੀ ਬਹਿਸ- ਇਕ ਖ਼ਬਰ

ਜੰਗ ਹਿੰਦ ਪੰਜਾਬ ਦਾ ਹੋਣ ਲੱਗਾ, ਦੋਵੇਂ ਪਾਤਸ਼ਾਹੀ ਫੌਜਾਂ ਭਾਰੀਆਂ ਨੇ।

ਖੱਟਰ ਦੇ ਐਸ.ਵਾਈ.ਐਲ. ‘ਤੇ ਦਿਤੇ ਬਿਆਨ ਨਾਲ ਪੰਜਾਬ ਦੀ ਸਿਆਸਤ ਗਰਮਾਈ- ਇਕ ਖ਼ਬਰ

ਜਦ ਮੈਂ ਰਿੰਨ੍ਹੀਆਂ ਸੇਂਵੀਆਂ, ਕਮਲ਼ੇ ਨੂੰ ਚੜ੍ਹ ਗਿਆ ਚਾਅ।

ਪੰਜਾਬ ਕਾਂਗਰਸ ਨੂੰ ਵੱਡਾ ਝਟਕਾ: ਸਾਬਕਾ ਮੰਤਰੀ ਅਸ਼ਵਨੀ ਸੇਖੜੀ ਪਰਵਾਰ ਸਮੇਤ ਭਾਜਪਾ ‘ਚ ਸ਼ਾਮਲ-ਇਕ ਖ਼ਬਰ

ਤਾਏ ਦੀ ਧੀ ਚੱਲੀ, ਤਾਂ ਮੈਂ ਕਿਉਂ ਰਹਾਂ ‘ਕੱਲੀ।

ਕੀ ਪੰਜਾਬ ਦੇ ਹੱਥੋਂ ਨਿਕਲਣ ਜਾ ਰਹੀ ਹੈ ਰਾਜਧਾਨੀ ਚੰਡੀਗੜ੍ਹ?-ਇਕ ਸਵਾਲ

ਵਾਰਸਸ਼ਾਹ ਜਿਉਂ ਦਲਾ ਪੰਜਾਬ ਲੁੱਟੀ, ਤਿਵੇਂ ਜੋਗੀ ਨੂੰ ਲੁੱਟਿਆ ਡਾਰੀਆਂ ਨੇ।

ਸਾਬਕਾ ਉਪ ਮੁੱਖ ਮੰਤਰੀ ਓ.ਪੀ.ਸੋਨੀ ਦੀ ਅਦਾਲਤ ਪੇਸ਼ੀ ਦੌਰਾਨ ਸਿਹਤ ਵਿਗੜੀ- ਇਕ ਖ਼ਬਰ

ਤੋੜ ਤੋੜ ਖਾਣ ਹੱਡੀਆਂ, ਰੱਤਾ ਪਲੰਘ ਚੰਨਣ ਦੇ ਪਾਵੇ।

11 ਜੁਲਾਈ 2023

ਚੰਡੀਗੜ੍ਹ ਦੀ ਇਕ ਇੰਚ ਵੀ ਜ਼ਮੀਨ ਹਿਮਾਚਲ ਨੂੰ ਨਹੀਂ ਦਿਤੀ ਜਾ ਸਕਦੀ- ਬਾਜਵਾ

ਦਾਲ਼ ਮੰਗੇਂ ਛੜਿਆਂ ਤੋਂ, ਨਾ ਸ਼ਰਮ ਗੁਆਂਢਣੇ ਆਵੇ।

ਮੇਰੇ ਲਈ ਇਹ ਸਭ ਕੁਝ ਨਵਾਂ ਨਹੀਂ- ਸ਼ਰਦ ਪਵਾਰ

ਛੜੇ ਬੈਠ ਕੇ ਸਲਾਹਾਂ ਕਰਦੇ, ਕੌਣ ਕੌਣ ਹੋਈਆਂ ਰੰਡੀਆਂ।

ਦੇਸ਼ ਦੇ ਵਿਕਾਸ ਲਈ ਸ਼ਿੰਦੇ ਸਰਕਾਰ ‘ਚ ਸ਼ਾਮਲ ਹੋਇਆ ਹਾਂ- ਅਜੀਤ ਪਵਾਰ

ਤਿਕੜਮਬਾਜ਼ੀ ‘ਚ ਬੜੇ ਹਾਂ ਮਾਹਰ ਲੋਕੋ, ਵਿਕਾਸ ਵਿਕਾਸ ਦਾ ਰਾਗ ਅਲਾਪਦੇ ਹਾਂ।

ਭਾਜਪਾ ਨੇ ਸੁਨੀਲ ਜਾਖੜ ਨੂੰ ਪੰਜਾਬ ਭਾਜਪਾ ਦਾ ਪ੍ਰਧਾਨ ਬਣਾਇਆ- ਇਕ ਖ਼ਬਰ

ਬਾਜ਼ੀ ਮਾਰ ਗਿਆ ਅਬੋਹਰ ਵਾਲਾ ਗੱਭਰੂ, ਬਾਕੀ ਰਹਿ ਗਏ ਹਾਲ ਪੁੱਛਦੇ।

ਭਗਵੰਤ ਮਾਨ ਦਾ ਰਾਜਪਾਲ ਦੇ ਨਹਿਲੇ ‘ਤੇ ਦਹਿਲਾ- ਇਕ ਖ਼ਬਰ

ਤੂੰ ਡਾਲ ਡਾਲ, ਮੈਂ ਪਾਤ ਪਾਤ।

ਪੁਰਾਣੇ ਵਰਕਰਾਂ ਨੂੰ ਦਰਕਿਨਾਰ ਕਰਕੇ ਸੁਨੀਲ ਜਾਖੜ ਨੂੰ ਪ੍ਰਧਾਨ ਬਣਾਇਆ ਗਿਆ- ਅਰੁਣ ਨਾਰੰਗ

ਕੁੰਜੀਆਂ ਹਿਜਰ ਦੀਆਂ, ਕਿਸ ਜਿੰਦਰੇ ਨੂੰ ਲਾਵਾਂ।

ਪੰਜਾਬ ਦੇ ਹਿਤਾਂ ਦੀ ਪਹਿਰੇਦਾਰੀ ਪੂਰੀ ਤਨਦੇਹੀ ਨਾਲ ਕਰਾਂਗਾ- ਜਾਖੜ

ਵਿਹੜੇ ਖੇੜਿਆਂ ਦੇ ਤਿਲਕਣਬਾਜ਼ੀਆਂ ਨੇ, ਜ਼ਰਾ ਸੰਭਲ ਕੇ ਪੈਰ ਟਿਕਾਈਂ ਜੋਗੀ।

ਸ਼੍ਰੋਮਣੀ ਕਮੇਟੀ ਨੇ ਯੂਨੀਫ਼ਾਰਮ ਸਿਵਲ ਕੋਡ ਦੇ ਵਿਰੁੱਧ ਕਰੜਾ ਰੁਖ਼ ਅਪਣਾਇਆ- ਇਕ ਖ਼ਬਰ

ਤੇਰੀ ਰੰਨ ਦਾ ਨਾ ਭਰਨਾ ਪਾਣੀ, ਤੇਰੀ ਨਾ ਮੁਥਾਜ ਝੱਲਣੀ।

ਪਰੈੱਸ ਵਾਲੇ ਜੂਠ ਦੇ ਮਾਮਲੇ ਨੂੰ ਘਪਲ਼ਾ ਨਾ ਕਹਿਣ, ਸਗੋਂ ਬੇਨਿਯਮੀਆਂ ਕਹਿਣ- ਧਾਮੀ

ਸਾਡਾ ਕੁੱਤਾ, ਕੁੱਤਾ, ਤੁਹਾਡਾ ਕੁੱਤਾ ਟੌਮੀ।

ਕਿਸਾਨ ਅੰਦੋਲਨ ਦੇ ਦਬਾਅ ਹੇਠ ਹੀ ਅਕਾਲੀਆਂ ਨੇ ਭਾਜਪਾ ਛੱਡਣ ਦਾ ਡਰਾਮਾ ਕੀਤਾ ਸੀ- ਇਕ ਖ਼ਬਰ

ਚੰਨ ਭਾਵੇਂ ਨਿੱਤ ਚੜ੍ਹਦਾ, ਸਾਨੂੰ ਸੱਜਣਾ ਬਾਝ ਹਨ੍ਹੇਰਾ।

ਮੱਧ ਪ੍ਰਦੇਸ਼ ‘ਚ ਭਾਜਪਾ ਨੇਤਾ ਨੇ ਕਬਾਇਲੀ ਨੌਜੁਆਨ ਦੇ ਸਿਰ ‘ਚ ਪਿਸ਼ਾਬ ਕੀਤਾ- ਇਕ ਖ਼ਬਰ

ਘੱਟ ਗਿਣਤੀਆਂ ਨੂੰ ਹਿੰਦੂ ਰਾਸ਼ਟਰ ਦਾ ਟਰੇਲਰ ਦਿਖਾਇਆ ਜਾ ਰਿਹੈ।

2024 ‘ਚ ਭਾਜਪਾ ਪੰਜਾਬ ਵਿਚ ਇਕੱਲੀ ਹੀ ਚੋਣਾਂ ਲੜੇਗੀ –ਵਿਜੇ ਰੂਪਾਨੀ

ਘੜਾ ਚੁੱਕ ਲਊਂ ਪੱਟਾਂ ‘ਤੇ ਹੱਥ ਧਰ ਕੇ, ਖਸਮਾਂ ਨੂੰ ਖਾਣ ਕੁੜੀਆਂ।

ਅਕਾਲੀ ਦਲ ਦਾ ਗੱਠਜੋੜ ਸਿਰਫ਼ ਬਸਪਾ ਨਾਲ਼, ਕਿਸੇ ਹੋਰ ਨਾਲ਼ ਨਹੀਂ-ਸੁਖਬੀਰ ਬਾਦਲ

ਡੋਰ ਵੱਟ ਕੇ ਗਲ਼ੇ ਦੇ ਵਿਚ ਪਾਵਾਂ, ਮਿੱਤਰਾ ਤਵੀਤ ਬਣ ਜਾ।

ਕੈਲੇਫ਼ੋਰਨੀਆਂ ਦੇ ਸਿੱਖਾਂ ਨੇ ਜਾਤ ਵਿਰੋਧੀ ਬਿੱਲ ਦੀ ਹਮਾਇਤ ਕੀਤੀ- ਇਕ ਖ਼ਬਰ

ਜਾਤਿ ਕਾ ਗਰਬੁ ਨ ਕਰਿ ਮੂਰਖ ਗਵਾਰਾ।। ਇਸੁ ਗਰਬ ਤੇ ਚਲਹਿ ਬਹੁਤੁ ਵਿਕਾਰਾ।। (ਗੁਰੂ ਗ੍ਰੰਥ ਸਾਹਿਬ, 1227/8)

ਪਿਸ਼ਾਬ ਘਟਨਾ ਦੇ ਪੀੜਤ ਵਿਅਕਤੀ ਦੇ ਮੁੱਖ ਮੰਤਰੀ ਚੌਹਾਨ ਨੇ ਪੈਰ ਧੋਤੇ ਤੇ ਮੰਗੀ ਮੁਆਫ਼ੀ-ਇਕ ਖ਼ਬਰ

ਵੋਟਾਂ ਦੀ ਖ਼ਾਤਰ ਲੋਕਾ ਵੇ, ਸਾਨੂੰ ਕੀ ਕੀ ਕਰਨਾ ਪੈਂਦਾ ਹੈ।

03 ਜੁਲਾਈ 2023

ਮਣੀ ਪੁਰ ਸੜ ਰਿਹੈ, ਪ੍ਰਧਾਨ ਮੰਤਰੀ ਚੁੱਪ ਹਨ- ਜੈਰਾਮ ਰਮੇਸ਼

ਕਾਹਨੂੰ ਕੀਤੀ ਅਸਾਂ ਨਾਲ਼ ਬਸ ਵੇ, ਕੋਈ ਦੋਸ਼ ਅਸਾਡਾ ਦੱਸ ਵੇ।

ਭਾਰਤ, ਅਮਰੀਕਾ ਦੀ ਦੋਸਤੀ ਦੁਨੀਆਂ ‘ਚ ‘ਸਭ ਤੋਂ ਮਹੱਤਵਪੂਰਨ’ – ਰਾਸ਼ਟਰਪਤੀ ਬਾਈਡਨ

ਸਭ ਦੁਨੀਆਂ ਮਤਲਬ ਦੀ, ਇਥੇ ਕੋਈ ਨਾ ਕਿਸੇ ਦਾ ਬੇਲੀ।

ਜਥੇਦਾਰ ਹਰਪ੍ਰੀਤ ਸਿੰਘ ਨੂੰ ਇਜਲਾਸ ‘ਚ ਨਾ ਬੁਲਾਏ ਜਾਣ ‘ਤੇ ਬਲਤੇਜ ਪੰਨੂੰ ਨੇ ਸਵਾਲ ਚੁੱਕਿਆ- ਇਕ ਖ਼ਬਰ

ਯਾਰ ਮਸੀਂ ਤਾਂ ਅਗਲਿਆਂ ਨੇ ਖਹਿੜਾ ਛੁਡਾਇਆ, ਚੈਨਲ ਦਾ ਹੀ ਪੰਗਾ ਹੀ ਪਾਉਣਾ ਸੀ ਆ ਕੇ।

ਲੋਕ ਸਭਾ ਚੋਣਾਂ ਨੇੜੇ ਜਾ ਕੇ ਬਾਦਲ ਅਕਾਲੀ ਦਲ- ਭਾਜਪਾ ਗੱਠਜੋੜ ਹੋ ਸਕਦਾ ਹੈ- ਇਕ ਖ਼ਬਰ

ਹੱਡੀਆਂ ਨੂੰ ਤੋੜ ਤੋੜ ਖਾਵੇ, ਵਿਛੋੜਾ ਬੁਰਾ ਸੱਜਣਾਂ ਦਾ।

ਸ਼੍ਰੋਮਣੀ ਕਮੇਟੀ ਦੇ ਬਹੁਤੇ ਮੈਂਬਰ ਸਿੱਖ ਸੰਗਤਾਂ ਦੀ ਆਸ ‘ਤੇ ਨਹੀਂ ਉੱਤਰੇ ਖਰੇ- ਬਲਦੇਵ ਸਿੰਘ ਸਿਰਸਾ

ਸਿਰਸਾ ਜੀ, ਜਿਸ ਦੀ ਖਾਈਏ ਬਾਜਰੀ, ਉਸ ਦੀ ਭਰੀਏ ਹਾਜ਼ਰੀ।

ਕੇਂਦਰ ਸਰਕਾਰ ਪੰਜਾਬ ਦੇ ਵਿਕਾਸ ਦੀ ਰਫ਼ਤਾਰ ‘ਚ ਅੜਿੱਕੇ ਡਾਹ ਰਹੀ ਹੈ- ਹਰਜੋਤ ਬੈਂਸ

ਮੁਗ਼ਲਾਂ ਨੇ ਤੇਰਾ ਸਭ ਕੁਝ ਲੁੱਟਿਆ, ੳਏ ਵੱਡਿਆ ਬਹਾਦਰਾ।

ਕੇਂਦਰ ਸਰਕਾਰ ਦੀ ਬਦੌਲਤ ਦੇਸ਼ ਦਾ ਹਰ ਨਾਗਰਿਕ ਇਕ ਲੱਖ ਰੁਪਏ ਦਾ ਕਰਜ਼ਾਈ- ਲਖਵੀਰ ਰਾਏ

ਨੀਂਦਰ ਭੁੱਖ ਆਰਾਮ ਨਾ ਮੂਲੇ, ਲੱਗੇ ਦੁਖ ਹਜ਼ਾਰਾਂ, ਆਹੀਂ ਮਾਰਾਂ।

ਪੰਜਾਬ ਦੀਆਂ ਨਹਿਰਾਂ ਸੁੱਕੀਆਂ, ਰਾਜਸਥਾਨ ਨੂੰ ਜਾ ਰਿਹੈ ਪਾਣੀ- ਇਕ ਖ਼ਬਰ

ਲੋਕ ਆਖਦੇ ਮੋਇਆ ਹੈ ਖ਼ਸਮ ਜਿਹਦਾ, ਤਖ਼ਤ ਉੱਜੜੇ ਤਦੋਂ ਵੀਰਾਨ ਹੋ ਕੇ।

ਪ੍ਰਧਾਨ ਧਾਮੀ ਇਕ ਪਰਵਾਰ ਨੂੰ ਬਚਾਉਣ ਲਈ ਆਪਣੇ ਅਹੁਦੇ ਦੀ ਗਰਿਮਾ ਨੂੰ ਸੱਟ ਨਾ ਮਾਰਨ- ਬਲਵਿੰਦਰ ਸਿੰਘ ਮੁੰਡੀ

ਹੱਥਾਂ ਵਿਚੋਂ ਲਾਲ ਗਵਾਇਆ, ਧਿਰ ਨੂੰ ਪਿਆਰੀ ਕਰ ਕੇ।

ਬੀਬੀ ਜਗੀਰ ਕੌਰ ਅਤੇ ਹਰਜਿੰਦਰ ਸਿੰਘ ਧਾਮੀ ਵਿਚਕਾਰ ਤਿੱਖੀ ਬਹਿਸ- ਇਕ ਖ਼ਬਰ

ਕੂੰਡੇ ਟੁੱਟ ਗਏ, ਘੋਟਣੇ ਭੱਜ ਗਏ, ਤਕੀਏ ਮਲੰਗ ਲੜ ਪਏ।

ਚੀਨ ਅਤੇ ਸਾਊਦੀ ਅਰਬ ਦੋਸਤੀ ਨੇ ਅਮਰੀਕਾ ਦੀ ਨੀਂਦ ਉਡਾਈ- ਇਕ ਖ਼ਬਰ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਕੇਂਦਰ ਸਰਕਾਰ ਵਲ ਪੰਜਾਬ ਦੀ ਬਕਾਇਆ ਰਾਸ਼ੀ ਦੀ ਪੰਡ ਹੋਰ ਭਾਰੀ ਹੋਈ- ਇਕ ਖ਼ਬਰ

ਮੇਰਾ ਮੋਰਨੀ ਜਿਹੀ ਦਾ ਗਲ਼ ਖਾਲੀ, ਆਪ ਤੇ ਜੰਜ਼ੀਰੀ ਰੱਖਦਾ।

ਸ਼੍ਰੋਮਣੀ ਕਮੇਟੀ ਦਾ ਇਕੋ ਏਜੰਡਾ ਕਿ ਬਾਦਲਾਂ ਦੇ ਵਪਾਰਕ ਹਿਤ ਕਿਵੇਂ ਸੁਰੱਖਿਅਤ ਰੱਖੇ ਜਾਣ- ਮਨਜੀਤ ਸਿੰਘ ਭੋਮਾ

ਤੇਰਾ ਵਾਲ਼ ਵੀ ਵਿੰਗਾ ਨਾ ਹੋਵੇ, ਮੇਰੀ ਭਾਵੇਂ ਜਿੰਦ ਮੁੱਕ ਜਾਏ।

ਵਿਰੋਧੀ ਪਾਰਟੀਆਂ ਤੋਂ ਖ਼ਤਰਾ ਮਹਿਸੂਸ ਕਰ ਰਹੀ ਹੈ ਭਾਜਪਾ- ਇਕ ਖ਼ਬਰ

ਜੇਠ ਤੋਂ ਡਰ ਕੋਈ ਨਾ, ਮੈਨੂੰ ਤੇਰੇ ਤੋਂ ਖ਼ਤਰਾ ਭਾਰੀ।

27 ਜੂਨ 2023

ਗੱਠਜੋੜ ਛੱਡਣ ਵਾਲਿਆਂ ਤੋਂ ਅਸੀਂ ਕਦੇ ਵੀ ਦਿਲੋਂ ਦੂਰ ਨਹੀਂ ਹੁੰਦੇ- ਰਾਜਨਾਥ ਸਿੰਘ

ਚਲੇ ਗਈ ਏਂ ਤੂੰ ਛੱਡ ਕੇ, ਤੈਨੂੰ ਮਨੋਂ ਨਾ ਅਸੀਂ ਵਿਸਾਰਿਆ।

ਅਮਰੀਕੀ ਕਾਰੋਬਾਰੀ ਧਾਲੀਵਾਲ ਦੀ ਮੋਦੀ ਨਾਲ ਬੰਦ ਕਮਰਾ ਮੀਟਿੰਗ- ਇਕ ਖ਼ਬਰ

ਰੁੱਤ ਯਾਰੀਆਂ ਲਾਉਣ ਦੀ ਆਈ ਕਿ ਲੱਕ ਲੱਕ ਹੋ ਗਏ ਬਾਜਰੇ।

ਮੋਦੀ ਦੇ ਅਮਰੀਕਾ ਦੌਰੇ ਨੂੰ ਲੈ ਕੇ ਪਾਕਿ ਚਿੰਤਤ- ਇਕ ਖ਼ਬਰ

ਭਾਬੀ ਮੈਨੂੰ ਡਰ ਲਗਦਾ, ਬੁਰਛਾ ਜੇਠ ਕੁਆਰਾ।

ਭਗਵੰਤ ਮਾਨ ਤੇ ਕੇਜਰੀਵਾਲ ਦਾ ਸਿੱਖ ਵਿਰੋਧੀ ਚਿਹਰਾ ਨੰਗਾ ਹੋਇਆ- ਅਮਰਜੀਤ ਸਿੰਘ ਚਾਵਲਾ

ਸਿੱਖ ਰਹਿਤ ਮਰਯਾਦਾ ਦਾ ਵਿਰੋਧ ਕਰਕੇ ਜਨਾਬ ਦਾ ਵੀ ਚਿਹਰਾ ਨੰਗਾ ਹੋਇਆ।

ਰਾਜਪਾਲ ਨੇ ਭਵਿੱਖ ‘ਚ ਪੰਜਾਬ ਸਰਕਾਰ ਦਾ ਹੈਲੀਕਾਪਟਰ ਨਾ ਵਰਤਣ ਦਾ ਕੀਤਾ ਐਲਾਨ- ਇਕ ਖ਼ਬਰ

ਫੇਰ ਕਿਹੜਾ ਮੱਸਿਆ ਲੱਗਣੋਂ ਬੰਦ ਹੋ ਜਾਊ ਰਾਜਪਾਲ ਸਾਹਿਬ।

‘ਜਥੇਦਾਰ’ ਨੂੰ ਰੁਖ਼ਸਤ ਹੋਣ ਵੇਲੇ ਸਨਮਾਨ ਵਜੋਂ ਸਿਰਪਾਉ ਵੀ ਨਹੀਂ ਮਿਲਦਾ- ਇਕ ਖ਼ਬਰ

‘ਮਾਲਕ’ ਤਾਂ ਜੁੱਤੀ ਵੀ ਨਹੀਂ ਪਾਉਣ ਦਿੰਦੇ ਜਥੇਦਾਰ ਨੂੰ, ਤੁਸੀਂ ਸਿਰਪਾਉ ਦੀ ਗੱਲ ਕਰਦੇ ਹੋ।

ਸਿੱਖ ਕੌਮ ਦੇ ਧਾਰਮਕ ਕੰਮਾਂ ‘ਚ ਬਾਹਰੀ ਦਖ਼ਲ ਬਰਦਾਸ਼ਤ ਨਹੀਂ- ਚੰਦੂਮਾਜਰਾ

ਅਸਾਂ ਜੇਠ ਨੂੰ ਲੱਸੀ ਨਹੀਂਉਂ ਦੇਣੀ, ਦਿਉਰ (ਬਾਦਲ) ਭਾਵੇਂ ਦੁੱਧ ਪੀ ਲਵੇ।

ਸ਼੍ਰੋਮਣੀ ਕਮੇਟੀ ਅਤੇ ਪੰਜਾਬ ਸਰਕਾਰ ਵਿਚ ਖੜਕੀ-ਇਕ ਖ਼ਬਰ

ਵਿਚ ਕਚਹਿਰੀ ਦੇ, ਭੂਆ ਭਤੀਜੀ ਲੜੀਆਂ।

ਕਾਂਗਰਸ ਨੇ ਵਿਧਾਨ ਸਭਾ ਦੇ ਦੂਜੇ ਦਿਨ ਦੇ ਸੈਸ਼ਨ ਦਾ ਕੀਤਾ ਬਾਈਕਾਟ-ਇਕ ਖ਼ਬਰ

ਉਹਦੇ ਨਾਲ ਕੀ ਬੋਲਣਾ, ਜਿਹਨੂੰ ਪੱਗ ਬੰਨ੍ਹਣੀਂ ਨਾ ਆਵੇ।

ਵਿਰੋਧੀ ਧਿਰ ਹੋਣ ਦੇ ਨਾਤੇ ਸਾਨੂੰ ਵਿਧਾਨ ਸਭਾ ਦੇ ਸੈਸ਼ਨ ਦਾ ਏਜੰਡਾ ਹੀ ਨਹੀਂ ਦਿਤਾ ਗਿਆ- ਪਰਤਾਪ ਸਿੰਘ ਬਾਜਵਾ

ਕਿਉਂ ਨਿਰਮੋਹਾ ਹੋ ਗਿਉਂ ਵੇ, ਨਾ ਕਾਟ ਸ਼ਗਨਾਂ ਦਾ ਪਾਇਆ।

ਅਕਾਲ ਤਖ਼ਤ ਨੂੰ ਬਾਦਲ ਪਰਵਾਰ ਤੋਂ ਆਜ਼ਾਦ ਕਰਵਾਉਣਾ ਸਮੇਂ ਦੀ ਮੰਗ- ਦਿੱਲੀ ਕਮੇਟੀ

ਦਿੱਲੀ ਕਮੇਟੀ ਨੂੰ ਵੀ ਭਾਜਪਾ ਤੋਂ ਆਜ਼ਾਦ ਕਰਵਾਉਣਾ ਸਮੇਂ ਦੀ ਮੰਗ।

ਕਾਂਗਰਸ ਵਿਚ ਸ਼ਾਮਲ ਹੋਣ ਨਾਲੋਂ ਖੂਹ ਵਿਚ ਛਾਲ ਮਾਰਨੀ ਪਸੰਦ ਕਰਾਂਗਾ- ਗਡਕਰੀ

ਜਾਣਾ ਨਹੀਂ ਬੁੱਢੜੇ ਨਾਲ, ਨਹੀਂ ਮਰ ਜੂੰ ਮਹੁਰਾ ਖਾ ਕੇ।

ਅਮਰੀਕਨ ਸਾਂਸਦਾਂ ਦੀ ਤਾਰੀਫ਼ ਕਰਦਿਆਂ ਮੋਦੀ ਨੇ ਰਾਹੁਲ ਗਾਂਧੀ ‘ਤੇ ਅਸਿੱਧਾ ਨਿਸ਼ਾਨਾ ਲਾਇਆ- ਇਕ ਖ਼ਬਰ

ਅੱਖ ਨਾਲ ਗੱਲ ਕਰ ਗਈ, ਪੱਲਾ ਮਾਰ ਕੇ ਬੁਝਾ ਗਈ ਦੀਵਾ।

ਰਾਜਨਾਥ ਸਿੰਘ ਨੂੰ ਪੰਜਾਬ ਦੀ ਚਿੰਤਾ ਪਰ ਮਨੀਪੁਰ ਦੀ ਅੱਗ ਨਹੀਂ ਦਿਸਦੀ- ਮਾਲਵਿੰਦਰ ਸਿੰਘ ਕੰਗ

ਕੰਧਾਂ ਕਾਲ਼ੀਆਂ ਸ਼ਹਿਰ ਹੜਤਾਲ ਹੋਈ, ਧੁੰਦੂਕਾਰ ਜ਼ਿਮੀਂ ਆਸਮਾਨ ਹੋਇਆ।

ਪੰਜਾਬ ਮੋਦੀ ਸਰਕਾਰ ਦੀਆਂ ਤਰਜੀਹਾਂ ਵਾਲ਼ੇ ਰਾਜਾਂ ਵਿਚ ਸ਼ਾਮਲ- ਰਾਜਨਾਥ ਸਿੰਘ

ਪੰਜਾਬੀਉ ਸੰਵਾ ਲਉ ਵੱਡੀਆਂ ਜੇਬਾਂ ਵਾਲੇ ਝੱਗੇ, ਪੰਦਰਾਂ ਪੰਦਰਾਂ ਲੱਖ ਆਉਣ ਵਾਲ਼ਾ।

19 ਜੂਨ 2023

ਹਰਿਆਣਾ ਗੁਰਦੁਆਰਾ ਕਮੇਟੀ ਦੇ ਅਹੁਦੇਦਾਰਾਂ ਨੂੰ ਖੱਟਰ ਨੇ ਪੜ੍ਹਾਇਆ ਏਕਤਾ ਦਾ ਸਬਕ- ਇਕ ਖ਼ਬਰ

ਜਦੋਂ ਲੂੰਬੜੀ ਉਪਦੇਸ਼ ਦੇਵੇ ਉਦੋਂ ਆਪਣੀਆਂ ਬੱਤਖ਼ਾਂ ਨੂੰ ਬਚਾਅ ਕੇ ਰੱਖੋ।

ਕਿਸ ਨੂੰ ਪੁੱਛ ਕੇ ਬੁਲਾਇਆ ਸੈਸ਼ਨ? ਰਾਜਪਾਲ ਨੇ ਸਪੀਕਰ ਸੰਧਵਾਂ ਨੂੰ ਖ਼ਤ ਲਿਖ ਕੇ ਪੁੱਛਿਆ- ਇਕ ਖ਼ਬਰ

ਹੱਥ ਸੋਚ ਕੇ ਗੰਦਲ ਨੂੰ ਪਾਈਂ, ਨੀਂ ਕਿਹੜੀ ਏਂ ਤੂੰ ਸਾਗ ਤੋੜਦੀ।

ਕੀ ਪੰਥਕ ਸਿਆਸਤ ਵਿਚ ਧਿਆਨ ਸਿੰਘ ਮੰਡ ਕਰਨਗੇ ਕੋਈ ਧਮਾਕਾ?- ਇਕ ਖ਼ਬਰ

ਨਾ ਖੰਜਰ ਉਠੇਗਾ ਨਾ ਤਲਵਾਰ ਹੀ ਉਠੇਗੀ, ਯੇਹ ਬਾਜ਼ੂ ਮਿਰੇ ਆਜ਼ਮਾਏ ਹੂਏ ਹੈਂ।

ਗਿਆਨੀ ਹਰਪ੍ਰੀਤ ਸਿੰਘ ਨੇ ਆਪਣੀ ਮਰਜ਼ੀ ਨਾਲ ਜਥੇਦਾਰੀ ਦਾ ਅਹੁਦਾ ਛੱਡਿਆ- ਹਰਜਿੰਦਰ ਸਿੰਘ ਧਾਮੀ

ਧਾਮੀ ਸਾਹਿਬ ‘ਯੇਹ ਜੋ ਪਬਲਿਕ ਹੇ ਯੇਹ ਸਭ ਜਾਨਤੀ ਹੈ’।

ਨਵੇਂ ਬਣੇ ਜਥੇਦਾਰ ਗਿਆਨੀ ਰਘਬੀਰ ਸਿੰਘ ਨੇ ਕਿਹਾ,’ ਪੰਥ ਦੇ ਵਿਸ਼ਵਾਸ ਨੂੰ ਬਣਾਈ ਰੱਖਾਂਗਾ’- ਇਕ ਖ਼ਬਰ

ਫਿਕਰ ਕਰੀਂ ਨਾ ਪੰਥ ਖਾਲਸੇ ਦਾ, ਵਿਸ਼ਵਾਸ ਤੋੜੀਂ ਨਾ ਆਪਣੇ ‘ਮਾਲਕਾਂ’ ਦਾ।

ਜਥੇਦਾਰ ਨੂੰ ਅਹੁਦੇ ਤੋਂ ਲਾਂਭੇ ਕਰਨ ਲਈ ਪਾਇਆ ਗਿਆ ਸਿਆਸੀ ਦਬਾਅ-ਬੀਬੀ ਜਗੀਰ ਕੌਰ

ਧਾਮੀ:- ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।

ਬਾਦਲਾਂ ਵਿਰੁੱਧ ਬੋਲਣਾ ਮਹਿੰਗਾ ਪੈ ਗਿਆ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੂੰ- ਇਕ ਖ਼ਬਰ

ਢਿੱਡ ਛਿੱਲ ਲਿਆ ਬੋਸਕੀ ਵਰਗਾ, ਰੋੜਾਂ ਵਾਲ਼ੀ ਕੰਧ ਟੱਪ ਕੇ।

ਪ੍ਰਿਅੰਕਾ ਗਾਂਧੀ ਨੇ ਮੱਧ ਪ੍ਰਦੇਸ਼ ਵਿਚ ਚੋਣਾਂ ਦਾ ਬਿਗਲ ਵਜਾਇਆ-ਇਕ ਖ਼ਬਰ

ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ, ਵਿਹੜੇ ਲਾ ਤ੍ਰਿਵੈਣੀ।

ਰਾਜਪਾਲ ਜੀ ਆਪਣੇ ਅਹੁਦੇ ਦੀ ਗਰਿਮਾ ਦਾ ਖ਼ਿਆਲ ਰੱਖ ਕੇ ਹੀ ਬੋਲੋ- ਹਰਪਾਲ ਚੀਮਾ

ਨ੍ਹਾਉਂਦੀ ਫਿਰੇਂ ਤੀਰਥਾਂ ‘ਤੇ, ਤੇਰੇ ਅੰਦਰੋਂ ਮੈਲ਼ ਨਾ ਜਾਵੇ।

ਰਾਜਪਾਲ ਨਾਲ ਸਬੰਧਾਂ ਦੇ ਸਾਰੇ ਤੱਥ ਅਸੀਂ ਜਨਤਾ ਦੇ ਸਾਹਮਣੇ ਰੱਖ ਦਿਤੇ ਹਨ- ਮਾਲਵਿੰਦਰ ਸਿੰਘ ਕੰਗ

ਪੂਣੀਆਂ ਮੈਂ ਤਿੰਨ ਕੱਤੀਆਂ, ਟੁੱਟ ਪੈਣੇ ਦਾ ਤੇਰ੍ਹਵਾਂ ਗੇੜਾ।

ਪੰਜਾਬ ਵਿਧਾਨ ਸਭਾ ਦਾ ਸੈਸ਼ਨ ਰਹੇਗਾ ਹੰਗਾਮਿਆਂ ਭਰਿਆ- ਇਕ ਖ਼ਬਰ

ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ। 

ਭਗਵੰਤ ਮਾਨ ਅਤੇ ਸੁਖਬੀਰ ਬਾਦਲ ਹੋਏ ਟਵੀਟੋ- ਟਵੀਟੀ- ਇਕ ਖ਼ਬਰ

ਡੱਡੂਆਂ ਨੇ ਪਾਇਆ ਭੰਗੜਾ, ਕਾਟੋ ਸਾਜ਼ ਵਜਾਵੇ।

ਭਗਵੰਤ ਮਾਨ ਸੁਪਰੀਮ ਕੋਰਟ ਦਾ ਹੁਕਮ ਵੀ ਨਹੀਂ ਮੰਨ ਰਹੇ- ਰਾਜਪਾਲ ਪੁਰੋਹਿਤ

ਉੱਜੜੀਆਂ ਭਰਜਾਈਆਂ, ਵਲੀ ਜਿਨ੍ਹਾਂ ਦੇ ਜੇਠ।

ਗਿਆਨੀ ਰਘਬੀਰ ਸਿੰਘ ਦੀ ਨਿਯੁਕਤੀ ਸੰਗਤ ਤੋਂ ਚੋਰੀਂ ਕੀਤੀ ਗਈ- ਪੰਜੋਲੀ

ਕਾਦਰਯਾਰ ਅਣਹੋਣੀਆਂ ਕਰਨ ਜਿਹੜੇ, ਆਖਰ ਵਾਰ ਉਨ੍ਹਾਂ ਪੱਛੋਤਾਵਣਾ ਈ।

11 ਜੂਨ 2023

ਸੱਤਾ ਵਿਹੂਣੇ ਸਿਆਸਤਦਾਨਾਂ ਦੀਆਂ ਜੱਫੀਆਂ ਸਿਆਸੀ ਤਾਕਤ ਵਾਸਤੇ ਨਾ ਕਿ ਪੰਜਾਬ ਦੇ ਮਸਲਿਆਂ ਬਾਰੇ- ਇਕ ਖ਼ਬਰ

ਰੋਂਦੀ ਯਾਰਾਂ ਨੂੰ, ਨਾਂ ਲੈ ਲੈ ਕੇ ਭਰਾਵਾਂ ਦਾ।

ਪਿਉ ਨੇ ਦੇਸ਼ ਲਈ ਦਿਤੀ ਜਾਨ ਪਰ ਪੁੱਤਰ ਨੂੰ ਕੁਝ ਨਹੀਂ ਮਿਲਿਆ- ਇਕ ਖ਼ਬਰ

ਖਾਣ ਪੀਣ ਨੂੰ ਬਾਂਦਰੀ, ਡੰਡੇ ਖਾਣ ਨੂੰ ਰਿੱਛ।

ਮੁੱਖ ਮੰਤਰੀ ਮਾਨ ਸੂਬੇ ਦੇ ਹਿਤਾਂ ਦੀ ਰਖਵਾਲੀ ਕਰਨ ਦੇ ਯੋਗ ਨਹੀਂ- ਚੰਦੂਮਾਜਰਾ

ਜਿਹੜੇ ਬਿਨਾਂ ਸ਼ਰਤੋਂ ਸਮਝੌਤੇ ਕਰ ਕੇ ਪੰਜਾਬ ਨੂੰ ਦਾਅ ‘ਤੇ ਲਾਉਂਦੇ ਰਹੇ, ਉਨ੍ਹਾਂ ਬਾਰੇ ਕੀ ਖ਼ਿਆਲ ਐ?

ਕੈਨੇਡਾ ਤੋਂ ਜਬਰੀ ਵਤਨ ਵਾਪਸੀ ਦਾ ਸਾਹਮਣਾ ਕਰ ਰਹੇ ਵਿਦਿਆਰਥੀਆਂ ਨੂੰ ਕਾਨੂੰਨੀ ਸਹਾਇਤਾ ਦੇਵਾਂਗੇ- ਕੁਲਦੀਪ ਸਿੰਘ ਧਾਲੀਵਾਲ

ਧਾਲੀਵਾਲ ਸਾਹਿਬ, ਠੱਗ ਏਜੰਟ ਮਿਸ਼ਰੇ ਬਾਰੇ ਕੀ ਕਰ ਰਹੇ ਹੋ?

ਕੇਂਦਰ ਦੀਆਂ ਕਟੌਤੀਆਂ ਕਾਰਨ ਪੰਜਾਬ ਦੀ ਵਿਤੀ ਦਸ਼ਾ ਡਗਮਗਾਈ- ਇਕ ਖ਼ਬਰ

ਸੁਣਿਐ ਬਈ ਮੋਦੀ ਸਾਹਿਬ ਕਹਿੰਦੇ ਐ ਕਿ ਪੰਜਾਬ ਨੂੰ ਨੰਬਰ ਇਕ ਸੂਬਾ ਬਣਾਉਣੈ।

ਮੁੱਖ ਮੰਤਰੀ ਪੰਜਾਬ ਯੂਨੀਵਰਸਿਟੀ ਦੇ ਮਾਮਲੇ ‘ਚ ਸਰਦਾਰ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਬਦਨਾਮ ਨਾ ਕਰਨ- ਦਲਜੀਤ ਸਿੰਘ ਚੀਮਾ

ਜਦੋਂ ਸੱਚੀਆਂ ਸੁਣਾਈਆਂ ਨੀਂ, ਬੜਾ ਦੁਖ ਲੱਗਿਆ, ਬੜਾ ਦੁਖ ਲੱਗਿਆ।

ਅਮਰੀਕਾ ‘ਤੇ ਨਜ਼ਰ ਰੱਖਣ ਲਈ ਚੀਨ ਕਿਊਬਾ ‘ਚ ਬਣਾਵੇਗਾ ਖੁਫ਼ੀਆ ਅੱਡਾ- ਅਮਰੀਕੀ ਮੀਡੀਆ

ਛੜੇ ਜੇਠ ਦੀ ਮੈਂ ਅੱਖ ਵਿਚ ਰੜਕਾਂ, ਕੰਧ ਉੱਤੋਂ ਰਹੇ ਝਾਕਦਾ।

ਪੰਜਾਬ ਯੂਨੀਵਰਸਟੀ ਦੇ ਮੁੱਦੇ ‘ਤੇ ਭਗਵੰਤ ਮਾਨ ਵਲੋਂ ਮੁੱਖ ਮੰਤਰੀ ਖੱਟਰ ਨੂੰ ਕੋਰੀ ਨਾਂਹ- ਇਕ ਖ਼ਬਰ

ਅਸਾਂ ਨਹੀਂ ਜਾਣਾ ਸਹੁਰੇ, ਤੂੰ ਲੈ ਜਾ ਗੱਡੀ ਮੋੜ ਕੇ।

ਹਰਿਆਣਾ ‘ਚ ਜੇ.ਜੇ.ਪੀ. ਨਾਲ ਗੱਠਜੋੜ ਨੂੰ ਕੋਈ ਖ਼ਤਰਾ ਨਹੀਂ- ਖੱਟਰ

ਅੰਦਰੋਂ ਡਰ ਲਗਦਾ, ਬੁਰਛਾ ਦਿਉਰ ਕੁਆਰਾ।

‘ਸਰਕਾਰ ਤੁਹਾਡੇ ਦੁਆਰ’ ਦਾ ਮੰਤਵ ਆਮ ਆਦਮੀ ਨੂੰ ਅਸਲ ਮਾਅਨਿਆਂ ‘ਚ ਅਖ਼ਤਿਆਰ ਦੇਣਾ- ਭਗਵੰਤ ਮਾਨ

ਏਹੀ ਗੱਲ ਤਾਂ ਭਗਵੰਤ ਮਾਨਾ ‘ਉਹਨਾਂ’ ਦੇ ਸੰਘੋਂ ਹੇਠਾਂ ਨਹੀਂ ਉੱਤਰਦੀ। ਇਸੇ ਲਈ ਤਾਂ ਸ਼ਬਦ ‘ਮਟੀਰੀਅਲ’ ਵਰਤਿਆ ਬਾਜਵੇ ਨੇ।

ਵਿਰੋਧੀ ਧਿਰਾਂ ਦੇ ਆਗੂ ਪੰਜਾਬੀਆਂ ਦੇ ਮਨੋਂ ਉੱਤਰ ਚੁੱਕੇ ਲੋਕਾਂ ਦੀ ਜੁੰਡਲੀ- ਭਗਵੰਤ ਮਾਨ

ਗਿੱਦੜਾਂ ਦੀ ਜੰਨ ਚੜ੍ਹਦੀ, ਜਿੱਥੇ ਸੈਹਾ ਬੋਲੀਆਂ ਪਾਵੇ।

ਕੇਂਦਰ ਦੇ ਆਰਡੀਨੈਂਸ ਸਬੰਧੀ ਕੇਜਰੀਵਾਲ ਨੂੰ ਮਿਲਿਆ ਅਖਿਲੇਸ਼ ਦਾ ਸਾਥ- ਇਕ ਖ਼ਬਰ

ਪਾਰ ਲੰਘਾ ਦੇ ਵੇ, ਤੂੰ ਨਦੀਆਂ ਦਾ ਭੇਤੀ।

ਕਿਸਾਨਾਂ ‘ਤੇ ਕੀਤੇ ਲਾਠੀਚਾਰਜ ਦੀ ਕੀਮਤ ਖੱਟਰ ਸਰਕਾਰ ਨੂੰ ਚੁਕਾਉਣੀ ਪਵੇਗੀ- ਬੀਬੀ ਰਾਜੂ

ਮੂੰਹ ਉਂਗਲਾਂ ਘੱਤ ਕੇ ਕਹਿਣ ਸਭੇ, ਕਾਰੇ ਕਰਨ ਥੀਂ ਇਹ ਨਾ ਸੰਗਦਾ ਏ।

ਅਕਾਲੀ ਦਲ ਪੰਥ ਦੀ ਪਾਰਟੀ, ਜੰਨਤਾ ਦੀ ਸੋਚ ਪੰਥ ਦੀ ਫੌਜ- ਸੁਖਬੀਰ ਬਾਦਲ

ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ, ਜੇ ਮਨ ਰੰਗਿਆ ਨਾ ਜਾਵੇ।

ਮੂਲ ਨਾਨਕਸ਼ਾਹੀ ਕੈਲੰਡਰ ਦੇ ਮੁੱਦੇ ‘ਤੇ ਮੇਰਾ ਅੱਜ ਵੀ ਪਹਿਲਾਂ ਵਾਲ਼ਾ ਸਪਸ਼ਟ ਸਟੈਂਡ- ਬੀਬੀ ਜਾਗੀਰ ਕੌਰ

ਤੀਆਂ ਨੂੰ ਹਟਾਉਣ ਵਾਲ਼ਿਆ, ਤੇਰਾ ਹੋਵੇ ਨਰਕਾਂ ਵਿਚ ਵਾਸਾ।

5 ਜੂਨ 2023

ਸ਼੍ਰੋਮਣੀ ਕਮੇਟੀ ਦੀਆਂ ਚੋਣਾਂ ਹੋਣ ਦੀ ਸੰਭਾਵਨਾ ਬਣੀ- ਇਕ ਖ਼ਬਰ

ਚੰਦ ਚੰਦਾਂ ਦੇ ਮਾਮਲੇ, ਚੜ੍ਹਨ ਕਿ ਨਾ ਹੀ ਚੜ੍ਹਨ।

 
ਗਹਿਲੋਤ ਅਤੇ ਪਾਇਲਟ ਰਾਜਸਥਾਨ ‘ਚ ਇਕੱਠਿਆਂ ਚੋਣਾਂ ਲੜਨ ਲਈ ਸਹਿਮਤ- ਇਕ ਖ਼ਬਰ

ਅਲ਼ਕ ਵਹਿੜਾ ਤੇ ਬੁੱਢਾ ਬਲਦ ਕਿੰਨਾ ਕੁ ਚਿਰ ਨਰੜ ਕੱਢਣਗੇ।

ਬਰਤਾਨੀਆ ਨੇ ਮੰਨ ਲਿਆ ਕਿ ਉਹ ਕੋਹਿਨੂਰ ਜ਼ਬਰਦਸਤੀ ਲੈ ਗਏ ਸਨ- ਇਕ ਖ਼ਬਰ

ਕੂੜ ਨਿਖੁਟੈ ਨਾਨਕਾ, ਓੜਕ ਸਚੁ ਰਹੀ।

 

ਸਰਕਾਰ ਦੇ 9 ਸਾਲ ਪੂਰੇ ਹੋਣ ਤੇ ਮੋਦੀ ਨੇ ਕਿਹਾ,” ਧੰਨਵਾਦੀ ਹਾਂ, ਹੋਰ ਮਿਹਨਤ ਕਰਦੇ ਰਹਾਂਗੇ- ਇਕ ਖ਼ਬਰ

ਸਭ ਨੂੰ ਟਿੱਚ ਕਰ ਕੇ ਜਾਣਦੇ ਹਾਂ, ਕਰਦੇ ਰਹਾਂਗੇ ਜੋ ਹੁਣ ਕਰਦੇ ਹਾਂ।

 

ਰਾਸ਼ਟਰਪਤੀ ਟਰੰਪ ਜਾਣ ਬੁੱਝ ਕੇ ਗੁਪਤ ਫ਼ਾਈਲਾਂ ਆਪਣੇ ਨਾਲ ਹੀ ਲੈ ਗਏ- ਇਕ ਖ਼ਬਰ

ਨਾ ਰਹੇ ਬਾਂਸ, ਨਾ ਵੱਜੇ ਬੰਸਰੀ।

ਵਿਰੋਧੀ ਧਿਰ ਦੇ ਬਾਈਕਾਟ ਕਾਰਨ ਭਾਰਤ ਦੀ ਨਵੀਂ ਸੰਸਦ ਦੀ ਇਮਾਰਤ ਚਰਚਾ ਵਿਚ- ਇਕ ਖ਼ਬਰ

ਟੁੱਟ ਪੈਣੇ ਬਚਨੇ ਨੇ, ਕੰਧ ਢਾ ਕੇ ਚੁਬਾਰਾ ਪਾਇਆ।
                                                                          

ਅਕਾਲੀ ਦਲ ਆਪਣੇ ਮਕਸਦ ਤੋਂ ਭਟਕਿਆ- ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ

ਸੱਸੀ ਥਲਾਂ ‘ਚ ਆਵਾਜ਼ਾਂ ਮਾਰੇ, ਮੁੜ ਆ ਬਲੋਚ ਪੁੰਨਣਾਂ।

ਦਰਬਾਰਾ ਸਿੰਘ ਗੁਰੂ ਮੁੜ ਅਕਾਲੀ ਦਲ ਬਾਦਲ ‘ਚ ਸ਼ਾਮਲ- ਇਕ ਖ਼ਬਰ

ਮੁੜ ਆਇਆਂ ਦਰਬਾਰ ਤੇਰੇ, ਭੁੱਲ-ਚੁੱਕ ਮਾਫ਼ ਕਰੀਂ।
                                                                          

ਪਹਿਲਵਾਨਾਂ ਨੂੰ ਹੁਣ ਜੰਤਰ-ਮੰਤਰ ‘ਤੇ ਧਰਨੇ ਦੀ ਮੰਨਜ਼ੂਰੀ ਨਹੀਂ ਦਿਤੀ ਜਾਵੇਗੀ- ਦਿੱਲੀ ਪੁਲਿਸ

ਰਾਹੀਆਂ ਨੇ ਰਾਤ ਕੱਟਣੀ, ਤੇਰੀ ਚੁੱਕ ਨਾ ਮਸੀਤ ਲਿਜਾਣੀ।

ਮੋਦੀ ਸਰਕਾਰ ਦੇ ਨੌਂ ਸਾਲਾਂ ‘ਚ ਜਾਨ-ਲੇਵਾ ਮਹਿੰਗਾਈ, ਲੁੱਟੀ ਗਈ ਜਨਤਾ ਦੀ ਕਮਾਈ- ਕਾਂਗਰਸ

ਗੋਰੀਏ ਛਾਂ ਕਰ ਦੇ, ਰਾਂਝਾ ਸੁੱਕ ਗਿਆ ਧੁੱਪੇ।

ਸਿੱਖ ਇਕਜੁੱਟ ਹੋ ਕੇ ਸਰਕਾਰ ਦੇ ਨਾਦਰਸ਼ਾਹੀ ਰਵੱਈਏ ਦੀ ਵਿਰੋਧਤਾ ਕਰਨ- ਬਾਬਾ ਅਵਤਾਰ ਸਿੰਘ

ਬਾਬਾ ਜੀ, ਡੁੱਬੀ ਤਾਂ ਜਦ ਸਾਹ ਨਾ ਆਇਆ।

ਸ਼੍ਰੋਮਣੀ ਕਮੇਟੀ ‘ਚ ਅਕਾਲੀ ਦਲ ਦੀ ਵਧੇਰੇ ਦਖ਼ਲਅੰਦਾਜ਼ੀ ਕਾਰਨ ਧਰਮ ਪ੍ਰਚਾਰ ‘ਚ ਗਿਰਾਵਟ ਆਈ- ਬੀਬੀ ਜਾਗੀਰ ਕੌਰ

ਕੱਚੀਆਂ ਕਲੀਆਂ ਦਾ, ਕੌਣ ਭਰੂ ਹਰਜਾਨਾ।

ਦਿੱਲੀ ਆਰਡੀਨੈਂਸ: ਸੀ.ਪੀ.ਆਈ (ਐੱਮ.) ਨੇ ‘ਆਪ’ ਨੂੰ ਸਮਰਥਨ ਦੇਣ ਦਾ ਕੀਤਾ ਐਲਾਨ- ਇਕ ਖ਼ਬਰ

ਹਾਕਾਂ ਮਾਰਦੇ ਬੱਕਰੀਆਂ ਵਾਲੇ, ਦੁੱਧ ਪੀ ਕੇ ਜਾਈਂ ਬੱਲੀਏ।

ਸ਼੍ਰੋਮਣੀ ਕਮੇਟੀ ‘ਤੋਂ ਇਕ ਪਰਵਾਰ ਦਾ ਕਬਜ਼ਾ ਹਟਾਉਣ ਵਾਲਿਆਂ ਦਾ ਸਮਰਥਨ ਕਰਾਂਗਾ- ਬਲਜੀਤ ਸਿੰਘ ਦਾਦੂਵਾਲ

ਸੱਸ ਮਰੀ ‘ਤੇ ਚੁਬਾਰਾ ਪਾਉਣਾ, ਔਖੀ ਸੌਖੀ ਦਿਨ ਕੱਟਦੀ।

ਕੇਂਦਰ ਸਰਕਾਰ ਵਲੋਂ ਦਿਤੀ ਜ਼ੈੱਡ ਸੁਰੱਖਿਆ ਮੁੱਖ ਮੰਤਰੀ ਭਗਵੰਤ ਮਾਨ ਨਹੀਂ ਲੈਣਗੇ- ਇਕ ਖ਼ਬਰ

ਭੱਠ ਪਿਆ ਸੋਨਾ ਜਿਹੜਾ ਕੰਨਾਂ ਨੂੰ ਖਾਵੇ।

28 ਮਈ 2023

ਨਿਤੀਸ਼ ਨੇ ਖੜਗੇ ਅਤੇ ਰਾਹੁਲ ਗਾਂਧੀ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ

ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ।

ਸੰਸਦ ਭਵਨ ਦਾ ਉਦਘਾਟਨ ਪ੍ਰਧਾਨ ਮੰਤਰੀ ਕਰੇ ਜਾਂ ਰਾਸ਼ਟਰਪਤੀ, ਲੋਕਾਂ ਨੂੰ ਕੀ ਫ਼ਰਕ ਪਵੇਗਾ- ਗੁਲਾਮ ਨਬੀ ਆਜ਼ਾਦ

ਨੀਂ ਉਹ ਲੰਬੜਾਂ ਦਾ ਮੁੰਡਾ ਬੋਲੀ ਹੋਰ ਬੋਲਦਾ।

ਪੰਜਾਬ ਦੇ ਕਾਂਗਰਸੀਆਂ ਨੇ ਰੈਲੀ ਕੀਤੀ ਰਾਹੁਲ ਗਾਂਧੀ ਲਈ ਤੇ ਬਿੱਲ ਆ ਗਿਆ ਮਾਨ ਸਰਕਾਰ ਨੂੰ- ਇਕ ਖ਼ਬਰ

ਨਾਨੀ ਖਸਮ ਕਰੇ, ਦੋਹਤਾ ਚੱਟੀ ਭਰੇ।

ਸ਼ਰਾਬ ਨਾਲ ਡੱਕੇ ਬਿਹਾਰੀ ਨੇ ਸਿੱਖ ਵਿਅਕਤੀ ਦੇ ਰੋਮਾਂ ਦੀ ਕੀਤੀ ਬੇਅਦਬੀ- ਇਕ ਖ਼ਬਰ

ਦੇਖਤੇ ਜਾਉ, ਅਬੀ ਤੋ ਪਾਰਟੀ ਸ਼ੁਰੂ ਹੋਈ ਹੈ।

ਵਿਰੋਧੀ ਪਾਰਟੀਆਂ ਤੋਂ ਕਿਨਾਰਾ ਕਰ ਕੇ ਅਕਾਲੀ ਦਲ ਬਾਦਲ ਸੰਸਦ ਬਿਲਡਿੰਗ ਦੇ ਉਦਘਾਟਨ ‘ਚ ਸ਼ਾਮਲ  ਹੋਵੇਗਾ- ਇਕ ਖ਼ਬਰ

ਭੇਡਾਂ ਵਾਲਿਆਂ ਦੀ ਬੁੱਢੀ ਵਾਂਗ ਭਾਜਪਾ ‘ਚ ਮੁੜ ਵੜਨ ਦੀ ਕੋਸ਼ਿਸ਼ ਹੈ।

ਗੁਰਬਾਣੀ ਦੇ ਪ੍ਰਸਾਰਣ ਲਈ ਸ਼੍ਰੋਮਣੀ ਕਮੇਟੀ ਵਲੋਂ ਜਲਦੀ ਹੀ ਟੈਂਡਰ ਮੰਗੇ ਜਾਣਗੇ- ਧਾਮੀ

ਪਰ ਠੇਕਾ ਬਾਦਲਾਂ ਨੂੰ ਹੀ ਮਿਲੇਗਾ ਕਿਉਂਕਿ ਟੈਂਡਰ ਦੀਆਂ ਸ਼ਰਤਾਂ ਵੀ ਉਹੀ ਲਿਖਣਗੇ ।

ਸ਼੍ਰੋਮਣੀ ਕਮੇਟੀ ਦੇ ਮਸਲਿਆਂ ‘ਚ ਮੁੱਖ ਮੰਤਰੀ ਦੀ ਦਖ਼ਲਅੰਦਾਜ਼ੀ ਬਿਲਕੁਲ ਨਾਜਾਇਜ਼- ਮਹੇਸ਼ਇੰਦਰ ਗਰੇਵਾਲ

ਬਿਲਕੁਲ ਠੀਕ ਜੀ, ਦਖ਼ਲਅੰਦਾਜ਼ੀ ਦਾ ਅਧਿਕਾਰ ਸਿਰਫ਼ ਇਕੋ ਪਰਵਾਰ ਨੂੰ ਹੈ ਜੀ।

ਨਿਗਮ ਚੋਣਾਂ ਕਰ ਕੇ ਸਾਬਕਾ ਕੌਂਸਲਰ ਲੋਕਾਂ ਦੀਆਂ ਸਮੱਸਿਆਵਾਂ ਵਲ ਧਿਆਨ ਦੇ ਰਹੇ ਹਨ- ਇਕ ਖ਼ਬਰ

ਲੱਕ ਲੱਕ ਹੋ ਗਏ ਬਾਜਰੇ, ਰੁੱਤ ਯਾਰੀਆਂ ਲਾਉਣ ਦੀ ਆਈ।

ਰਾਜਸਥਾਨ  ਨੂੰ ਹੋਰ ਵਾਧੂ ਪਾਣੀ ਨਹੀਂ ਦਿਤਾ ਜਾ ਸਕਦਾ- ਮੁੱਖ ਮੰਤਰੀ ਭਗਵੰਤ ਮਾਨ

ਸਰ ਸੁੱਕ ਨਖਰੋ ਨੀਂ, ਮੈਂ ਕਿੱਥੋਂ ਲਿਆਵਾਂ ਆੜੂ।

ਮਮਤਾ ਵਲੋਂ ਕੇਂਦਰ ਦੇ ਆਰਡੀਨੈਂਸ ਵਿਰੁੱਧ ਕੇਜਰੀਵਾਲ ਨੁੰ ਸਮਰਥਨ ਦਾ ਭਰੋਸਾ- ਇਕ ਖ਼ਬਰ

ਮੈਨੂੰ ਬਗਲੀ ਸਿਖਾ ਦੇ ਗਲ਼ ਪਾਉਣੀ, ਚੱਲੂੰਗੀ ਤੇਰੇ ਨਾਲ ਜੋਗੀਆ।

ਸੁਪਰੀਮ ਕੋਰਟ ਪੁੱਜਿਆ ਨਵੀਂ ਸੰਸਦ ਦੇ ਉਦਘਾਟਨ ਦਾ ਮਸਲਾ- ਇਕ ਖ਼ਬਰ

ਤੁਸੀਂ ਕਰੋ ਅਸਾਡੀ ਕਾਰੀ ਜੀ, ਹੁਣ ਹੋ ਗਈ ਮੁਸ਼ਕਿਲ ਭਾਰੀ ਜੀ।

ਮੋਦੀ ਸਰਕਾਰ ਦੇ ‘ਹੰਕਾਰ’ ਨੇ ਸੰਸਦੀ ਪ੍ਰਣਾਲੀ ਨੂੰ ਕੀਤਾ ‘ਤਬਾਹ’- ਕਾਂਗਰਸ

ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।

ਕਾਂਗਰਸ ਹਾਈ ਕਮਾਨ ਦੀ ‘ਆਪ’ ਨਾਲ ਇਕਜੁਟਤਾ ਤੋਂ ਪੰਜਾਬ ਕਾਂਗਰਸ ਔਖੀ- ਇਕ ਖ਼ਬਰ

ਵੇ ਘਰ ਤੇਲਣ ਦੇ, ਤੇਰਾ ਚਾਦਰਾ ਖੜਕੇ।

ਵਿਆਜ ਦਰਾਂ ਦੇ ਵਾਧੇ ਨੂੰ ਰੋਕਣਾ ਮੇਰੇ ਵੱਸ ‘ਚ ਨਹੀਂ- ਰੀਜ਼ਰਵ ਬੈਂਕ ਗਵਰਨਰ

ਬਿਗਾਨੇ ਹੱਥਾਂ ਵਿਚ ਚਾਬੀ ਮੇਰੀ, ਕਿੰਜ ਮੈਂ ਜਿੰਦਰੇ ਖੋਲ੍ਹਾਂ।

ਲੋਕਤੰਤਰ ਸਿਰਫ਼ ਇਮਾਰਤਾਂ ਨਾਲ਼ ਨਹੀਂ, ਲੋਕਾਂ ਦੀ ਆਵਾਜ਼ ਨਾਲ਼ ਚਲਦਾ ਹੈ- ਖੜਗੇ

ਬੀਜ ਰਹੀ ਤੂੰ ਬੀਜ ਅੱਕਾਂ ਦੇ, ਵੱਢ ਚੰਦਨ ਦਾ ਟਹਿਣਾ।