ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
15 ਮਈ 2023
ਕਰਨਾਟਕ ਦਾ ਮੁੱਖ ਮੰਤਰੀ ਚੁਣਨ ਦੇ ਅਧਿਕਾਰ ਖੜਗੇ ਨੂੰ ਦਿਤੇ- ਇਕ ਖ਼ਬਰ
ਚਾਹੇ ਸੁੱਥਣ ਸੰਵਾ ਦੇ ਚਾਹੇ ਲਹਿੰਗਾ, ਤੇਰੇ ਅੱਗੇ ਥਾਨ ਸੁੱਟਿਆ।
ਜਥੇਦਾਰ ਦੀ ਰਾਘਵ ਚੱਢਾ ਤੇ ਪ੍ਰਨੀਤੀ ਚੋਪੜਾ ਦੀ ਮੰਗਣੀ ‘ਚ ਸ਼ਮੂਲੀਅਤ ਬਣੀ ਚਰਚਾ ਦਾ ਵਿਸ਼ਾ- ਇਕ ਖ਼ਬਰ
ਅੱਡੀ ਮਾਰ ਕੇ ਨੱਚੀ ਜਦੋਂ ਬੰਤੋ, ਪਿੰਡ ‘ਚ ਭੂਚਾਲ ਆ ਗਿਆ।
ਐੱਲ.ਆਈ. ਸੀ. ਦੇ ਡੀਵੈਲਪਮੈਂਟ ਅਫ਼ਸਰ ਵਲੋਂ 4 ਕਰੋੜ 30 ਲੱਖ ਤੋਂ ਵੱਧ ਦੀ ਧੋਖਾਧੜੀ- ਇਕ ਖ਼ਬਰ
ਤਾਏ ਦੀ ਧੀ ਚੱਲੀ ਤਾਂ ਮੈਂ ਕਿਉਂ ਰਹਾਂ ‘ਕੱਲੀ।
ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਪ੍ਰਧਾਨ ਮੰਤਰੀ ਮੋਦੀ ਨੂੰ ਜੱਫੀ ਪਾ ਕੇ ਮਿਲੇ- ਇਕ ਖ਼ਬਰ
ਤੇਰੀ ਸੱਜਰੀ ਪੈੜ ਦਾ ਰੇਤਾ, ਚੁੱਕ ਚੁੱਕ ਲਾਵਾਂ ਹਿੱਕ ਨੂੰ।
ਮੋਦੀ ਨੇ ਕਾਨੂੰਨ ਮੰਤਰੀ ਰੀਜੀਜੂ ਨੂੰ ਉਸ ਦੇ ਬਿਆਨਾਂ ਕਰ ਕੇ ਅਹੁਦੇ ਤੋਂ ਹਟਾਇਆ- ਇਕ ਖ਼ਬਰ
ਭੱਠ ਪਿਆ ਸੋਨਾ ਜਿਹੜਾ ਕੰਨਾਂ ਨੂੰ ਖਾਵੇ।
ਨਗਰ ਨਿਗਮ ਚੋਣਾਂ ਜਲਦੀ ਕਰਵਾਏ ਜਾਣ ਦੀ ਸੰਭਾਵਨਾ- ਇਕ ਖ਼਼ਬਰ
ਹਾਂ ਜੀ! ਤਵਾ ਗਰਮ ਐ, ਦੋ ਮੰਨੀਆਂ ਰਾੜ੍ਹ ਲਉ ਜਲਦੀ।
ਕੇਂਦਰ ਦੇ ‘ਏਜੰਸੀ ਰਾਜ’ ਨੇ ਸਾਡਾ ਕੰਮ ਚੁਣੌਤੀਪੂਰਨ ਬਣਾ ਦਿਤਾ- ਮਮਤਾ
ਸਉਣ ਦਿਆ ਬੱਦਲਾ ਵੇ, ਹੀਰ ਭਿਉਂ ‘ਤੀ ਮਿਜਾਜ਼ਾਂ ਵਾਲ਼ੀ।
ਸਾਫ਼- ਸੁਥਰੀ ਪੰਥਕ ਲੀਡਰਸ਼ਿੱਪ ਦੀ ਉਡੀਕ ‘ਚ ਹਨ ਸਿੱਖ ਸੰਸਥਾਵਾਂ- ਇਕ ਖ਼ਬਰ
ਸਉਣ ਵਿਚ ਆ ਜਾ ਮਿੱਤਰਾ, ਗੁੜ ਵੰਡਦੀ ਪੀਰ ਦੇ ਜਾਵਾਂ।
ਸਿਸੋਦੀਆਂ ਨੇ ਜੇਲ੍ਹ ‘ਚੋਂ ਲਿਖੀ ਚਿੱਠੀ, ਕਵਿਤਾ ਰਾਹੀਂ ਕੇਂਦਰ ਸਰਕਾਰ ‘ਤੇ ਸਾਧੇ ਨਿਸ਼ਾਨੇ- ਇਕ ਖ਼ਬਰ
ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ, ਜੱਗ ਭਾਵੇਂ ਕਰੇ ਨਿੰਦਿਆ।
ਨਾਜਾਇਜ਼ ਉਸਾਰੀਆਂ ਖਿਲਾਫ਼ ਕਾਰਵਾਈ ਕਰਨ ਵਾਲੇ ਅਫ਼ਸਰ ਦੀ ਕਮਿਸ਼ਨਰ ਨੇ ਕੀਤੀ ਬਦਲੀ- ਇਕ ਖਬਰ
ਓਏ ਸਹੁਰੀ ਦਿਆ ਸਾਡੇ ਢਿੱਡ ‘ਤੇ ਕਾਹਨੂੰ ਲੱਤ ਮਾਰਦੈਂ, ਦਫ਼ਾ ਹੋ ਏਥੋਂ।
ਕਿਸਮਤ ਦੇ ਧਨੀ ਨਿਕਲੇ ‘ਜਥੇਦਾਰ’, ਆਈ ਸੁਨਾਮੀ ਫ਼ਿਲਹਾਲ ਟਲ ਗਈ- ਇਕ ਖ਼ਬਰ
ਬੱਕਰੇ ਦੀ ਮਾਂ ਕਿੰਨਾ ਕੁ ਚਿਰ ਖ਼ੈਰ ਮਨਾਏਗੀ।
ਕੇਂਦਰ ਨੇ ਆਰਡੀਨੈਂਸ ਜਾਰੀ ਕਰ ਕੇ ਦੱਸ ਦਿਤਾ ਕਿ ਅੰਤਮ ਫ਼ੈਸਲਾ ਉਸ ਦਾ ਹੀ ਹੋਵੇਗਾ- ਕਪਿਲ ਸਿੱਬਲ
ਵੈਰੀਆਂ ਦਾ ਖੂਹ ਵਗਦਾ, ਮੈਨੂੰ ਤੇਰੀ ਵੇ ਜਾਨ ਦਾ ਧੋਖਾ।
ਅਮਰੀਕੀਆਂ ‘ਤੇ ਰੂਸ ‘ਚ ਦਾਖ਼ਲੇ ‘ਤੇ ਪਾਬੰਦੀ- ਇਕ ਖ਼ਬਰ
ਡੇਕ ਦਾ ਗੁਮਾਨ ਕਰਦੀ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।
ਨੱਢਾ ਜਿੱਥੇ ਵੀ ਜਾਂਦੇ ਹਨ, ਭਾਜਪਾ ਹਾਰ ਜਾਂਦੀ ਹੈ- ਸੰਜੇ ਰਾਊਤ
ਖਾਲੀ ਘੋੜੀ ਹਿਣਕਦੀ, ਉੱਤੇ ਨਹੀਂ ਦੀਂਹਦਾ ਵੀਰ।
ਸੁਪਰੀਮ ਕੋਰਟ ’ਚ ਖੁਲਾਸਾ: ਅਡਾਨੀ ਦੀਆਂ ਕੰਪਨੀਆ ਦੀ ਜਾਂਚ ਸੇਬੀ ਨੇ 2016 ਤੋਂ ਹੀ ਨਹੀਂ ਕੀਤੀ-ਇਕ ਖ਼ਬਰ
ਮਿੱਤਰਾਂ ਦੇ ਫੁਲਕੇ ਨੂੰ, ਨੀਂ ਮੈਂ ਖੰਡ ਦਾ ਪਲੇਥਣ ਲਾਵਾਂ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
14 ਮਈ 2023
ਮਜੀਠੀਆ ਨੇ ਇਨਸਾਫ਼ ਮੰਗ ਰਹੀਆਂ ਕੁੜੀਆਂ ਨੂੰ ਆਪਣੇ ਗੁੰਡਿਆਂ ਤੋਂ ਕੁਟਵਾਇਆ- ਹਰਪਾਲ ਚੀਮਾ
ਗੁੰਡਿਆਂ ਤੋਂ ਕੁਟਵਾਉਣ ਦੀ ਕੀ ਲੋੜ ਸੀ, ਆਪ ਹੀ ਕੁੱਟ ਲੈਂਦੇ।
ਆਮ ਆਦਮੀ ਪਾਰਟੀ ਵਲੋਂ ਚੋਣਾਂ ‘ਚ ਅਫਸਰਸ਼ਾਹੀ ਦੀ ਦੁਰਵਰਤੋਂ ਦਾ ਖ਼ਦਸ਼ਾ- ਚੰਦੂਮਾਜਰਾ
ਪਿੰਡ ਪਏ ਨਹੀਂ ਉਚੱਕੇ ਪਹਿਲਾਂ ਹੀ ਪਹੁੰਚੇ।
ਅਕਾਲੀ-ਬਸਪਾ ਸਰਕਾਰ ਬਣਨ ’ਤੇ ਸਿੱਧੂ ਮੂਸੇਵਾਲਾ ਦੇ ਕਤਲ ਲਈ ਜ਼ਿੰਮੇਵਾਰ ਲੋਕਾਂ ਖ਼ਿਲਾਫ਼ ਕਾਰਵਾਈ ਕਰਾਂਗੇ- ਸੁਖਬੀਰ ਬਾਦਲ
ਜਿਹੋ ਜਿਹੀ ਕਾਰਵਾਈ ਤੁਸੀਂ ਬੇਅਦਬੀ ਦੇ ਦੋਸ਼ੀਆਂ ਖ਼ਿਲਾਫ਼ ਕੀਤੀ ਸੀ!
ਵੱਡੇ ਕਰਜ਼ੇ ‘ਚ ਡੁੱਬਿਆ ਅਮਰੀਕਾ, ਡੀਫਾਲਟਰ ਹੋਣ ਦਾ ਖ਼ਤਰਾ- ਅਮਰੀਕਨ ਵਿਤ ਮੰਤਰੀ
ਉੱਚੀਆ ਇਮਾਰਤਾਂ ਦੇ ਸੁਫ਼ਨੇ ਨਾ ਵੇਖ, ਇਹ ਗਿਰ ਜਾਂਦੀਆਂ।
ਅੰਮ੍ਰਿਤਸਰ ਧਮਾਕਿਆਂ ਤੋਂ ਬਾਅਦ ਭਗਵੰਤ ਮਾਨ ਨੂੰ ਅਹੁਦੇ ‘ਤੇ ਬਣੇ ਰਹਿਣ ਦਾ ਹੱਕ ਨਹੀਂ- ਸੁਖਬੀਰ
ਆਪ ਤਾਂ ਤੁਸੀਂ ਨਿਰਦੋਸ਼ ਬੰਦੇ ਮਾਰ ਕੇ ਵੀ ਢੀਠ ਬਣ ਕੇ ਕੁਰਸੀਆਂ ਨੂੰ ਚੁੰਬੜੇ ਰਹੇ ਸੀ।
ਪਾਕਿਸਤਾਨੀ ਅਦਾਕਾਰਾ ਮੋਦੀ ‘ਤੇ ਕੇਸ ਕਰਨਾ ਚਾਹੁੰਦੀ ਹੈ- ਇਕ ਖ਼ਬਰ
ਬੀਬੀ ਸਿਧੀ ਸਿਧੀ ਗੱਲ ਕਰ, ਗੱਲ ਕੁਝ ਹੋਰ ਐ ਤੇ ਕੇਸ ਤਾਂ ਐਵੇਂ ਬਹਾਨਾ ਈ ਐ।
ਸਹਾਇਕ ਲਾਈਨਮੈਨਾਂ ਦੀ ਭਰਤੀ ਲਈ ਬਾਹਰੀ ਰਾਜਾਂ ਦੇ ਨੌਜਵਾਨਾਂ ਨੂੰ ਖੁੱਲ੍ਹ- ਇਕ ਖ਼ਬਰ
ਹੌਲੀ ਹੌਲੀ ਜਹਾਜ਼ੇ ਸਭ ਚਾੜ੍ਹ ਦੇਣੇ, ਮੁੰਡਾ ਕੋਈ ਨਹੀਂ ਪੰਜਾਬ ‘ਚ ਰਹਿਣ ਦੇਣਾ।
ਸਰਕਾਰ- ਕਿਸਾਨ ਮਿਲਣੀ ‘ਚ ਕਿਸਾਨਾਂ ਦੀ ਤਾਂ ਗੱਲ ਹੀ ਨਹੀਂ ਸੁਣੀ ਗਈ- ਇਕ ਖ਼ਬਰ
ਸਰਕਾਰਾਂ ਗੱਲਾਂ ਸੁਣਾਉਂਦੀਆਂ ਨੇ ਸੁਣਦੀਆਂ ਨਹੀ। ਮਨ ਕੀ ਬਾਤ ਸੁਣਿਆਂ ਕਰੋ।
ਭਾਜਪਾ ਨੇ ‘ਆਪ’ ਖ਼ਿਲਾਫ਼ ਚੋਣ ਕਮਿਸ਼ਨ ਕੋਲ ਸ਼ਿਕਾਇਤ ਕੀਤੀ- ਇਕ ਖ਼ਬਰ
ਕਾਹਨੂੰ ਅੱਗ ਉੱਤੇ ਲਿਟੀ ਜਾਂਦੇ ਹੋ, ਸੱਪ ਲੰਘ ਗਿਆ ਲਕੀਰ ਪਿੱਟੀ ਜਾਂਦੇ ਹੋ।
ਸ਼੍ਰੋਮਣੀ ਅਕਾਲੀ ਦਲ ਦੀ ਪੁਨਰ ਸੁਰਜੀਤੀ ਲਈ ਨਵੀਂ ਲੀਡਰਸ਼ਿੱਪ ਦੀ ਲੋੜ- ਇਕ ਖ਼ਬਰ
ਇਕ ਰਾਂਝਣ ਸਾਨੂੰ ਲੋੜੀਦਾ, ਨੀਂ ਇਕ ਰਾਂਝਣ ਸਾਨੂੰ ਲੋੜੀਦਾ।
ਕਰਨਾਟਕ ਵਿਚ ‘ਕਾਂਗਰਸ ਮੁਕਤ ਭਾਰਤ’ ਦਾ ਭਾਜਪਾ ਦਾ ਸੁਪਨਾ ਹੋਇਆ ਚੂਰ ਚੂਰ- ਇਕ ਖ਼ਬਰ
ਵੈਰੀ ਤੇਰੇ ਐਬ ਬੰਦਿਆ, ਹੁੰਦਾ ਰੱਬ ਨਹੀਂ ਕਿਸੇ ਦਾ ਵੈਰੀ।
ਜਾਖੜ ਨੇ ਸਾਰੀ ਉਮਰ ਕਾਂਗਰਸ ਦੇ ਨਾਂ ‘ਤੇ ਖਾਧਾ, ਹੁਣ ਕਾਂਗਰਸ ਨੂੰ ਭੰਡਣਾ ਠੀਕ ਨਹੀਂ- ਰਾਜਾ ਵੜਿੰਗ
ਮਿੱਤਰਾਂ ਨੂੰ ਦਗ਼ਾ ਦੇਣੀਏਂ, ਕੀੜੇ ਪੈਣਗੇ, ਮਰੇਂਗੀ ਸੱਪ ਲੜ ਕੇ।
ਸੁਪਰੀਮ ਕੋਰਟ ਵਲੋਂ ਆਪਣੇ ‘ਲਾਡਲੇ’ ਇਮਰਾਨ ਖ਼ਾਨ ਦਾ ਪੱਖ ਲੈਣਾ ਜਾਰੀ- ਸ਼ਾਹਬਾਜ਼ ਸ਼ਰੀਫ਼
ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।
ਜਿਣਸੀ ਸ਼ੋਸ਼ਣ ਅਤੇ ਮਾਣਹਾਨੀ ਕੇਸ ‘ਚ ਟਰੰਪ ਨੂੰ 50 ਲੱਖ ਡਾਲਰ ਜ਼ੁਰਮਾਨਾ-ਇਕ ਖ਼ਬਰ
ਔਖੀ ਹੋ ਜਾਊ ਕੈਦ ਕੱਟਣੀ, ਕਾਹਨੂੰ ਮਾਰਦੈਂ ਵੇ ਗੋਰਿਆ ਡਾਕੇ।
ਅਸਥਿਰ ਪਾਕਿਸਤਾਨ ਸਾਰੇ ਦੇਸ਼ਾਂ ਲਈ ਖ਼ਤਰਾ- ਫ਼ਾਰੁਕ ਅਬਦੁੱਲਾ
ਚੰਦ ਕੌਰ ਚੱਕਵਾਂ ਚੁੱਲ੍ਹਾ, ਕਿਤੇ ਯਾਰਾਂ ਨੂੰ ਭਿੜਾ ਕੇ ਮਾਰੂ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
- ਭਾਜਪਾ ਦਾ ਅਕਾਲੀ ਦਲ ਨਾਲ ਗੱਠਜੋੜ ਕਿਸੇ ਵੀ ਕੀਮਤ ‘ਤੇ ਨਹੀਂ ਹੋਵੇਗਾ- ਅਸ਼ਵਨੀ ਕੁਮਾਰ
+ ਤੇਰੀ ਮੇਰੀ, ਮੇਰੀ ਤੇਰੀ ਨਹੀਂ ਨਿਭਣੀ, ਤੂੰ ਤੇਲਣ ਮੈਂ ਸੁਨਿਆਰਾ।
- ਬੀਬੀ ਜਗੀਰ ਕੌਰ ਵਲੋਂ ਭਾਜਪਾ ਨੂੰ ਸਮਰਥਨ ਦੇਣ ਤੋਂ ਪਹਿਲਾਂ ਸ਼ਰਤਾਂ ਦਾ ਚਿੱਠਾ ਦੇਣ ਦੇ ਸੰਕੇਤ-ਇਕ ਖ਼ਬਰ
+ ਸਾਨੂੰ ਜੇ ਤੂੰ ਲੈ ਕੇ ਦੇਵੇਂ ਕੱਚ ਦੀਆਂ ਚੂੜੀਆਂ, ਤਾਂ ਹੀ ਗੱਲਾਂ ਹੋਣਗੀਆਂ ਤੇਰੇ ਨਾਲ਼ ਗੂੜ੍ਹੀਆਂ।
- ਅਕਾਲੀ ਧੜਿਆਂ ‘ਚ ਏਕਤਾ ਲਈ ਜਥੇਦਾਰ ਸਾਰੇ ਧੜਿਆਂ ਦੇ ਪ੍ਰਧਾਨਾਂ ਦੇ ਅਸਤੀਫ਼ੇ ਲੈ ਕੇ ਇਕ ਕਮੇਟੀ ਬਣਾਉਣ-ਢੀਂਡਸਾ
+ ਢੀਂਡਸਾ ਸਾਬ੍ਹ, ਪ੍ਰੋ. ਮਨਜੀਤ ਸਿੰਘ ਜਥੇਦਾਰ ਬਾਥਰੂਮ ‘ਚ ਲੁਕ ਕੇ ‘ਬਾਦਲ ਬਰੀਗੇਡ’ ਤੋਂ ਬਚਿਆ ਸੀ।
- ‘ਆਪ’ ਝੂਠ ਤੇ ਫਰੇਬ ਦੀ ਰਾਜਨੀਤੀ ਕਰ ਰਹੀ ਹੈ- ਸੇਖੋਂ, ਗਿੱਲ
+ ਉਸ ਪਾਰਟੀ ਦਾ ਨਾਮ ਦੱਸੋ ਜਿਹੜੀ ਅਜਿਹੀ ਰਾਜਨੀਤੀ ਨਹੀਂ ਕਰਦੀ।
- ਬਾਦਲ ਦੇ ਭੋਗ ਮੌਕੇ ਪੰਥਕ ਏਕਤਾ ਦੇ ਨਾਲ ਨਾਲ ਭਾਜਪਾ ਨਾਲ ਗੱਠਜੋੜ ਦੀ ਗੱਲ ਚੱਲੀ-ਇਕ ਖ਼ਬਰ
+ ਪੱਲਾ ਮਾਰ ਕੇ ਬੁਝਾ ਗਈ ਦੀਵਾ, ਅੱਖ ਨਾਲ ਗੱਲ ਕਰ ਗਈ।
- ‘ਆਪ’ ਤੇ ਭਾਜਪਾ ਇਕੋ ਸਿੱਕੇ ਦੇ ਦੋ ਪਹਿਲੂ ਹਨ- ਰਾਜਾ ਵੜਿੰਗ
+ ਨੱਥਾ ਸਿੰਘ ਪ੍ਰੇਮ ਸਿੰਘ, ਵੰਨ ਐਂਡ ਦੀ ਸੇਮ ਥਿੰਗ।
- ਭਾਰਤ ਦੇ ਸਰਬਪੱਖੀ ਵਿਕਾਸ ਲਈ ਭਾਜਪਾ ਦਾ ਸੱਤਾ ‘ਚ ਰਹਿਣਾ ਜ਼ਰੂਰੀ- ਕੈਪਟਨ ਅਮਰਿੰਦਰ ਸਿੰਘ
+ ਆਪਣੀ ਖੱਲ ਬਚਾਉਣ ਲਈ ਕੁਝ ਲੋਕਾਂ ਦਾ ਭਾਜਪਾ ‘ਚ ਜਾਣਾ ਵੀ ਜ਼ਰੂਰੀ।
- ਕਾਂਗਰਸ ਅਤੇ ‘ਆਪ’ ਪਾਰਟੀ ਦੀਆਂ ਗ਼ਲਤ ਨੀਤੀਆਂ ਕਰਕੇ ਪੰਜਾਬ ਨਸ਼ਿਆਂ ਦੀ ਗ੍ਰਿਫ਼ਤ ਵਿਚ-ਅਨੁਰਾਗ ਠਾਕੁਰ
+ ਲਗਦੈ ਅਕਾਲੀਆਂ ਨਾਲ ਗੰਢਤੁੱਪ ਦੀ ਝਾਕ ਹੈਗੀ ਅਜੇ, ਤਾਂ ਹੀ ਉਨ੍ਹਾਂ ਦਾ ਨਾਮ ਨਹੀਂ ਲਿਆ।
- ਕੌਮ ਦੀ ਚੜ੍ਹਦੀ ਕਲਾ ਲਈ ਆਪਸੀ ਮੱਤਭੇਦਾਂ ਅਤੇ ਮੁਫ਼ਾਦਾਂ ਨੂੰ ਤਿਆਗਣਾ ਪਵੇਗਾ- ਜਥੇਦਾਰ ਹਰਪ੍ਰੀਤ ਸਿੰਘ
+ ਨਾ ਨੌਂ ਮਣ ਤੇਲ ਹੋਵੇਗਾ, ਨਾ ਰਾਧਾ ਨੱਚੇਗੀ।
- ਅਖੀਰ ਤੱਕ ਭਾਜਪਾ ਨੇ ਵੱਡੇ ਬਾਦਲ ਨਾਲ ਨਿਭਾਈ ਯਾਰੀ-ਇਕ ਖ਼ਬਰ
+ ਮਿੱਤਰਾਂ ਦਾ ਨਾਂ ਸੁਣ ਕੇ, ਮੈਂ ਧਰਤੀ ਪੈਰ ਨਾ ਲਾਵਾਂ।
- ਦੁਨੀਆ ਦੀ ਮਹਾਂਸ਼ਕਤੀ ਅਮਰੀਕਾ ’ਤੇ ਮੰਡਰਾ ਰਿਹਾ ਹੈ ਆਰਥਕ ਮੰਦੀ ਦਾ ਖ਼ਤਰਾ- ਇਕ ਖ਼ਬਰ
+ ਰੰਗ ਪੈ ਗਿਆ ਕਿਉਂ ਤੇਰਾ ਪੀਲਾ, ਭਾਬੋ ਮੈਨੂੰ ਰੋਜ਼ ਪੁੱਛਦੀ।
- ਮੋਦੀ ਉਪਨਾਮ ਮਾਮਲਾ: ਗੁਜਰਾਤ ਹਾਈ ਕੋਰਟ ਨੇ ਰਾਹੁਲ ਗਾਂਧੀ ਨੂੰ ਨਹੀਂ ਦਿਤੀ ਰਾਹਤ- ਇਕ ਖ਼ਬਰ
08 ਮਈ 2023
+ ਡੇਕ ਦਾ ਗੁਮਾਨ ਕਰਦੀ, ਸਾਨੂੰ ਤੋਤਿਆਂ ਨੂੰ ਬਾਗ਼ ਬਥੇਰੇ।
- ਆਪਸੀ ਵਿਵਾਦ ਨਹੀਂ ਸੁਲਝਦੇ ਤਾਂ ਵਿਆਹ ਖਤਮ ਕੀਤਾ ਜਾ ਸਕਦਾ ਹੈ, ਛੇ ਮਹੀਨੇ ਉਡੀਕ ਕਰਨ ਦੀ ਲੋੜ ਨਹੀਂ- ਸੁਪਰੀਮ ਕੋਰਟ
+ ਭੱਠ ਪਿਆ ਸੋਨਾ, ਜਿਹੜਾ ਕੰਨਾਂ ਨੂੰ ਖਾਵੇ।
- ਪ੍ਰੈੱਸ ਦੀ ਆਜ਼ਾਦੀ ਨੂੰ ਬਚਾਉਣ ਲਈ ਪੱਤਰਕਾਰ ਭਾਈਚਾਰੇ ਨੂੰ ਇਕਜੁੱਟ ਹੋਣ ਦੀ ਲੋੜ-ਇਕ ਖ਼ਬਰ
+ ਲੋਕੋ ਜਾਗਦੇ ਰਹਿਣਾ, ਗੱਡੀ ਜ਼ਾਲਮਾਂ ਦੀ ਆਈ।
- ਅਜੈਪਾਲ ਸਿੰਘ ਬੰਗਾ ਬਣੇ ਵਿਸ਼ਵ ਬੈਂਕ ਦੇ ਨਵੇਂ ਚੇਅਰਮੈਨ- ਇਕ ਖ਼ਬਰ
+ ਜਿਹੜਾ ਮੂਹਰਲੀ ਗੱਡੀ ਦਾ ਬਾਬੂ, ਉਹੀਓ ਮੇਰਾ ਵੀਰ ਕੁੜੀਓ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
30 ਅਪ੍ਰੈਲ 2023
ਨਿਤੀਸ਼- ਮਮਤਾ ਮੁਲਾਕਾਤ- ਵਿਰੋਧੀ ਦਲਾਂ ਨੂੰ ਇਕ ਜੁੱਟ ਹੋ ਕੇ ਰਣਨੀਤੀ ਬਣਾਉਣ ਦੀ ਵਕਾਲਤ- ਇਕ ਖ਼ਬਰ
ਸਉਣ ਵਿਚ ਆ ਜਾ ਮਿੱਤਰਾ, ਗੁੜ ਵੰਡਦੀ ਪੀਰ ਦੇ ਜਾਵਾਂ।
ਅੰਮ੍ਰਿਤਪਾਲ ਨੂੰ ਪਹਿਲਾਂ ਹੀ ਗ੍ਰਿਫ਼ਤਾਰ ਕਰ ਲੈਣਾ ਚਾਹੀਦਾ ਸੀ- ਕੈਪਟਨ ਅਮਰਿੰਦਰ ਸਿੰਘ
ਕੈਪਟਨ ਸਾਬ ਤੁਹਾਨੂੰ ਵੀ ਪਹਿਲਾਂ ਹੀ ਭਾਜਪਾ ‘ਚ ਚਲੇ ਜਾਣਾ ਚਾਹੀਦਾ ਸੀ।
ਭਗਵੰਤ ਮਾਨ ਨੂੰ ਸਰਕਾਰ ਚਲਾਉਣ ਦੀ ਸਮਝ ਨਹੀਂ- ਕੈਪਟਨ
ਐਵੇਂ ਹੀ ਭੱਜਿਆ ਫਿਰਦੈ, ਮਹਿਲਾਂ ‘ਚ ਬੈਠ ਕੇ ਮੌਜ ਨਾਲ ਚੀਕੂ ਤੇ ਸੀਤਾਫ਼ਲ ਖਾਵੇ।
ਕੋਤਵਾਲੀ ਗੁਰਦੁਆਰੇ ਦੀ ਘਟਨਾ ਨਾਲ ਸਿੱਖ ਸੰਗਤਾਂ ਦੇ ਮਨ ਵਲੂੰਧਰੇ ਗਏ- ਸੁਖਬੀਰ ਬਾਦਲ
ਤੁਹਾਡੇ ਤਾਂ ਉਦੋਂ ਵੀ ਨਾ ਵਲੂੰਧਰੇ ਗਏ ਜਦੋਂ ਬਰਗਾੜੀ ‘ਚ ਗੁਰੂ ਸਾਹਿਬ ਦੇ ਅੰਗ ਖਿਲਾਰੇ ਗਏ ਸੀ।
2024 ਤੇ 2027 ਦੀਆਂ ਚੋਣਾਂ ਭਾਜਪਾ ਇਕੱਲਿਆਂ ਹੀ ਲੜੇਗੀ- ਆਰ.ਪੀ.ਸਿੰਘ
ਘੜਾ ਚੁੱਕ ਲਉਂ ਪੱਟਾਂ ‘ਤੇ ਹੱਥ ਧਰ ਕੇ, ਖ਼ਸਮਾਂ ਨੂੰ ਖਾਣ ਕੁੜੀਆਂ।
ਬੰਦੀ ਸਿੰਘਾਂ ਦੀ ਰਿਹਾਈ ਦੇ ਮੁੱਦੇ ‘ਤੇ ਅਕਾਲੀ ਦਲ ਨੇ ‘ਆਪ’ ਦੇ ਬਾਈਕਾਟ ਦਾ ਸੱਦਾ ਦਿਤਾ- ਇਕ ਖ਼ਬਰ
ਅਕਾਲੀਉ! ਤਾਕਤ ‘ਚ ਹੁੰਦਿਆਂ ਤੁਸੀਂ ਬੰਦੀ ਸਿੰਘ ਕਿਉਂ ਨਾ ਰਿਹਾ ਕੀਤੇ?
ਕਾਂਗਰਸ ਨੇ ਸੱਤਾ ‘ਚ ਆਉਣ ਲਈ ‘ਧਰਮ’ ਦਾ ਇਸਤੇਮਾਲ ਕੀਤਾ- ਰਾਜਨਾਥ ਸਿੰਘ
ਪੀੜ੍ਹੀ ਆਪਣੀ ਹੇਠ ਸੋਟਾ ਫੇਰ ਲਈਏ, ਉਂਗਲ ਫੇਰ ਕਿਸੇ ਵਲ ਚੁੱਕੀਏ ਜੀ।
ਕੇਜਰੀਵਾਲ ਨੇ ਬੰਗਲੇ ਦੀ ਸਜਾਵਟ ‘ਤੇ ਖਰਚੇ 45 ਕਰੋੜ- ਭਾਜਪਾ
ਪਤਾ ਲੱਗਿਐ ਜੀ ਕਿ ਪ੍ਰਧਾਨ ਮੰਤਰੀ ਲਈ 500 ਕਰੋੜ ਦਾ ਘਰ ਬਣ ਰਿਹੈ।
ਪੰਜਾਬ ‘ਚ ਭ੍ਰਿਸ਼ਟਾਚਾਰ ਦਾ ਪੂਰੀ ਤਰ੍ਹਾਂ ਖਾਤਮਾ ਕਰ ਦਿਤਾ- ਮੁੱਖ ਮੰਤਰੀ
ਮਾਨ ਸਾਬ੍ਹ ਗੱਪਾਂ ਮਾਰਨ ਲਈ ਹੋਰ ਬੰਦਾ ਹੈਗਾ, ਤੁਸੀਂ ਨਾ ਇਹ ਕੰਮ ਕਰੋ।
‘ਆਪ’ ਸਰਕਾਰ ਨੂੰ ਟਿੱਚ ਜਾਣਦੇ ਨੇ ਪ੍ਰਾਈਵੇਟ ਸਕੂਲ- ਇਕ ਖ਼ਬਰ
ਕਿੱਥੋਂ ਨੀ ਤੂੰ ਆਈ ਸ਼ੂਕਰੇ, ਸਾਨੂੰ ਟਿੱਚ ਕਰ ਕੇ ਤੂੰ ਜਾਣੇ।
ਖਾਸ ਲੋਕਾਂ ਦੀ ਬਣ ਕੇ ਰਹਿ ਗਈ ਹੈ ਆਮ ਆਦਮੀ ਪਾਰਟੀ- ਪ੍ਰਤਾਪ ਸਿੰਘ ਬਾਜਵਾ
ਹੋਕਾ ਵੰਙਾਂ ਦਾ, ਕੱਢ ਦਿਖਾਇਆ ਚੱਕੀਰਾਹਾ।
ਜਿੰਨੇ ਮਰਜ਼ੀ ਪਰਚੇ ਕਰ ਲਵੋ, ਡਟ ਕੇ ਵਿਰੋਧ ਕਰਦਾ ਰਹਾਂਗਾ- ਖਹਿਰਾ
ਗੱਲ ਸੋਚ ਕੇ ਕਰੀਂ ਠਾਣੇਦਾਰਾ, ਅਸਾਂ ਨਹੀਂ ਕਨੌੜ ਝੱਲਣੀ।
ਭਲਵਾਨਾਂ ਦੇ ਹੱਕ’ਚ ਆਏ ਹਾਕੀ ਟੀਮ ਦੇ ਸਾਬਕਾ ਕਪਤਾਨ ਪਰਗਟ ਸਿੰਘ- ਇਕ ਖ਼ਬਰ
ਚਰਖ਼ੇ ਦੀ ਘੂਕ ਸੁਣ ਕੇ, ਜੋਗੀ ਉੱਤਰ ਪਹਾੜੋਂ ਆਇਆ।
ਮਾਨ ਸਰਕਾਰ ਨੇ ਲੋਕਾਂ ਦਾ ਭਰੋਸਾ ਤੋੜਿਆ- ਪਵਨ ਟੀਨੂੰ
ਲਾਰਾ ਲਾ ਕੇ ਨੱਤੀਆਂ ਦਾ, ਨੀਂ ਮਾਹੀ ਮੇਰਾ ਮੁਕਰ ਗਿਆ।
ਹੁਣ ਪਿੰਡਾਂ ਤੇ ਕਸਬਿਆਂ ‘ਚ ਵੀ ਮੰਤਰੀ ਮੰਡਲ ਦੀਆਂ ਹੋਣਗੀਆਂ ਮੀਟਿੰਗਾਂ- ਭਗਵੰਤ ਮਾਨ
ਵਿਹੜੇ ਲਾ ਤ੍ਰਿਵੈਣੀ, ਛਾਂਵੇਂ ਬਹਿ ਕੇ ਕੱਤਿਆ ਕਰੂੰ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
23 ਅਪ੍ਰੈਲ 2023
ਪੰਜਾਬ ਦੇ ਚੰਗੇ ਭਵਿੱਖ ਅਤੇ ਵਿਕਾਸ ਲਈ ਲੋਕਾਂ ਨੂੰ ਭਾਜਪਾ ਤੋਂ ਆਸਾਂ- ਹੰਸ ਰਾਜ ਹੰਸ
ਬਿਲਕੁਲ ਸਹੀ ਜਨਾਬ ਤੁਹਾਡਾ ਵਿਕਾਸ ਵੀ ਇਥੇ ਜਾ ਕੇ ਹੀ ਹੋਇਆ ਸੀ।
ਸਾਡੇ ‘ਤੇ ‘ਆਪ’ ‘ਚ ਸ਼ਾਮਲ ਹੋਣ ਲਈ ਦਬਾਅ ਬਣਾਇਆ ਜਾ ਰਿਹੈ-ਕਾਂਗਰਸੀ ਸਰਪੰਚ
ਸਾਡੀ ਧਾਰ ਕੱਢ ਜਾ ਭਰਜਾਈਏ, ਛੜਾ ਜੇਠ ਮਾਰੇ ਬੋਲੀਆਂ।
‘ਆਪ’ ਤੇ ਕਾਂਗਰਸ ਤੋਂ ਪੰਜਾਬ ਦੇ ਲੋਕ ਪੂਰੀ ਤਰ੍ਹਾਂ ਅੱਕ ਚੁੱਕੇ ਹਨ- ਸਿਕੰਦਰ ਸਿੰਘ ਮਲੂਕਾ
ਤੁਹਾਡੇ ਕੋਲੋਂ ਵੀ ਅੱਕੇ ਹੋਏ ਲੋਕਾਂ ਨੇ ਹੀ ਤੁਹਾਨੂੰ ਤਿੰਨ ਸੀਟਾਂ ਤੱਕ ਲੈ ਆਂਦਾ ਸੀ।
ਅੰਸਾਰੀ ਦੀ ਪੰਜਾਬ ‘ਚ ਹੋਈ ਸ਼ਾਹੀ ਮਹਿਮਾਨ ਨਿਵਾਜ਼ੀ ਦੀ ਪੜਤਾਲ ਕਰੇ ਪੰਜਾਬ ਸਰਕਾਰ- ਬੀਰ ਦਵਿੰਦਰ ਸਿੰਘ
ਕੀ ਲਗਦੇ ਸੰਤੀਏ ਤੇਰੇ, ਜਿਨ੍ਹਾਂ ਨੂੰ ਰਾਤੀਂ ਖੰਡ ਪਾਈ ਸੀ।
ਜਲੰਧਰ ਜ਼ਿਮਨੀ ਚੋਣ ਵਿਚ ਸ਼੍ਰੋਮਣੀ ਅਕਾਲੀ ਦਲ(ਸੰਯੁਕਤ) ਵਲੋਂ ਭਾਜਪਾ ਦੇ ਸਮਰਥਨ ਦਾ ਐਲਾਨ- ਇਕ ਖ਼ਬਰ
ਮੁੰਡਾ (ਸੁਖਦੇਵ ਸਿੰਘ ਢੀਂਡਸਾ) ਮੋਹ ਲਿਆ ਤਵੀਤਾਂ ਵਾਲ਼ਾ, ਦਮੜੀ ਦਾ ਸੱਕ ਮਲ਼ ਕੇ।
ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਪ੍ਰਧਾਨ ਨਸ਼ਈ-ਦਾਦੂਵਾਲ
ਨਸ਼ਾ ਤਾਂ ਕੁਰਸੀ ਦਾ ਵੀ ਬਹੁਤ ਮਾੜਾ ਹੁੰਦੈ ਦਾਦੂਵਾਲ ਸਾਹਿਬ ਜੀ।
‘ਆਪ’ ਨੇ ਲੋਕਾਂ ਨਾਲ ਝੂਠੇ ਵਾਅਦੇ ਕਰ ਕੇ ਸੂਬੇ ‘ਚ ਸਰਕਾਰ ਬਣਾਈ- ਡਿੰਪਾ
ਹੱਥ ‘ਚ ਗੁਟਕਾ ਫੜ ਕੇ ਤੇ ਦਮਦਮਾ ਸਾਹਿਬ ਵਲ ਮੂੰਹ ਕਰ ਕੇ ਕਸਮਾਂ ਤਾਂ ਨਹੀਂ ਨਾ ਖਾਧੀਆਂ।
ਦਾਦੂਵਾਲ ਦੀ ਨਜ਼ਰ ਸਿਰਫ਼ ਪ੍ਰਧਾਨਗੀ ਦੀ ਕੁਰਸੀ ਉਪਰ ਹੈ- ਮਹੰਤ ਕਰਮਜੀਤ ਸਿੰਘ
ਕੰਢੇ ਕੰਢੇ ਹੀਰ ਭਾਲਦਾ, ਰਾਂਝਾ ਪੱਜ ਮੱਝੀਆਂ ਦਾ ਲਾਵੇ।
ਐਮ.ਐਸ.ਪੀ.ਨਾਲ ਜੁੜੀ ਕਮੇਟੀ ਕਮਜ਼ੋਰ, ਸਰਕਾਰ ਦੀ ਨੀਅਤ ‘ਤੇ ਸ਼ੱਕ- ਕਾਂਗਰਸ
ਮਾਂਏਂ ਕਿਵੇਂ ਮੈਂ ਯਕੀਨ ਕਰ ਲਾਂ, ਮੁੰਡਾ ਰੱਖਦਾ ਦਿਲੇ ‘ਚ ਬੇਈਮਾਨੀ।
ਜੂਨ 2023 ਤੱਕ ਚੀਨ ਨੂੰ ਪਛਾੜ ਕੇ ਭਾਰਤ ਬਣ ਜਾਵੇਗਾ ਸਭ ਤੋਂ ਵੱਧ ਆਬਾਦੀ ਵਾਲਾ ਦੇਸ਼-ਇਕ ਖ਼ਬਰ
ਸਾਨੂੰ ਦਿਉ ਵਧਾਈਆਂ ਜੀ, ਬਣ ਜਾਣਾ ਵਿਸ਼ਵ ਗੁਰੂ ਅਸੀਂ।
ਕੇਂਦਰ ਸਰਕਾਰ ਜਾਂਚ ਏਜੰਸੀਆਂ ਦੀ ਦੁਰਵਰਤੋਂ ਕਰ ਰਹੀ ਹੈ-ਹਰਪਾਲ ਚੀਮਾ
ਆ ਵੇ ਮਾਹੀ ਬਹਿ ਵੇ ਮਾਹੀ, ਦਿਲ ਦਾ ਹਾਲ ਸੁਣਾਵਾਂ।
ਸੀ.ਬੀ.ਆਈ. ਤੇ ਈ.ਡੀ. ਵਰਗੀਆਂ ਏਜੰਸੀਆਂ ਤੱਥਾਂ ਦੇ ਆਧਾਰ ‘ਤੇ ਕੰਮ ਕਰਦੀਆਂ ਹਨ-ਸੰਬਿਤ ਪਾਤਰਾ
ਅੱਗੇ ਬੀਬੀ ਟੱਪਣੀ, ਪਿੱਛੇ ਢੋਲਾਂ ਦੀ ਘੜਮੱਸ।
ਪੰਜਾਬ ‘ਤੇ ਰਾਜ ਕਰਨ ਵਾਲੀਆਂ ਸਿਆਸੀ ਪਾਰਟੀਆਂ ਨੇ ਹੀ ਪੰਜਾਬ ਦੇ ਹਿਤਾਂ ਦਾ ਘਾਣ ਕੀਤਾ-ਡਾ.ਗੁਰਮੇਜ ਸਿੰਘ ਮਠਾੜੂ
ਫਕਰਦੀਨਾ ਕੀ ਦੱਸਾਂ ਹਾਲ ਤੈਨੂੰ, ਚੰਦਰੀ ਵਾੜ ਹੀ ਖਾ ਗਈ ਏ ਖੇਤ ਸਾਰਾ।
ਆਸਟਰੇਲੀਆ ਦੀਆਂ 5 ਯੂਨੀਵਰਸਿਟੀਆਂ ਨੇ ਭਾਰਤੀ ਵਿਦਿਆਰਥੀਆਂ ਦਾ ਕੀਤਾ ਦਾਖ਼ਲਾ ਬੰਦ-ਇਕ ਖ਼ਬਰ
ਕੀਤੀਆਂ ਲੱਧੀ ਦੀਆਂ, ਪੇਸ਼ ਦੁੱਲੇ ਦੇ ਆਈਆਂ।
ਸਾਬਕਾ ਮੰਤਰੀ ਮਦਨ ਮੋਹਨ ਮਿੱਤਲ ਅਕਾਲੀ ਦਲ ਛੱਡ ਮੁੜ ਭਾਜਪਾ ‘ਚ ਜਾਣ ਲਈ ਤਿਆਰ- ਇਕ ਖ਼ਬਰ
ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।
ਸਾਬਕਾ ਮੁੱਖ ਮੰਤਰੀ ਵਿਜੇ ਰੁਪਾਨੀ ਤੇ ਲਾਲਪੁਰਾ ਵਲੋਂ ਬੀਬੀ ਜਗੀਰ ਕੌਰ ਨਾਲ ਮੁਲਾਕਾਤ- ਇਕ ਖ਼ਬਰ
ਟੁੱਟ ਜਾਊਗਾ ਬਲੌਰੀ ਚੂੜਾ, ਮਿੱਤਰਾ ਬਾਂਹ ਛੱਡ ਦੇ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
17 ਅਪ੍ਰੈਲ 2023
ਡਾ. ਹਮਦਰਦ ਵਲੋਂ ਜੰਗੇ-ਆਜ਼ਾਦੀ ਯਾਦਗਾਰ ਦੇ ਸਾਰੇ ਅਹੁਦਿਆਂ ਤੋਂ ਅਸਤੀਫ਼ਾ- ਇਕ ਖ਼ਬਰ
ਪਾਣੀ ਡੋਲ੍ਹ ਗਈ ਝਾਂਜਰਾਂ ਵਾਲ਼ੀ, ਕੈਂਠੇ ਵਾਲਾ ਤਿਲਕ ਪਿਆ।
ਕਿਸਾਨਾਂ ਦੀਆਂ ਮੰਗਾਂ ਨੂੰ ਲਾਗੂ ਕਰਨ ਤੋਂ ਮੁੱਕਰੀ ਪੰਜਾਬ ਸਰਕਾਰ-ਡੱਲੇਵਾਲ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦੇ ਹੱਕ ਮਾਰ ਕੇ।
ਸੁਰਿੰਦਰ ਚੌਧਰੀ ਪੰਜਾਂ ਦਿਨਾਂ ਬਾਅਦ ਹੀ ‘ਆਪ’ ਨੂੰ ਛੱਡ ਕੇ ਕਾਂਗਰਸ ‘ਚ ਮੁੜ ਗਿਆ- ਇਕ ਖ਼ਬਰ
ਘਰਾਂ ਵਾਲਿਓ ਅਪਣੇ ਘਰ ਅੰਦਰ, ਅਸੀਂ ਆਏ ਹਾਂ ਵਾਂਗ ਪ੍ਰਾਹੁਣਿਆਂ ਦੇ।
ਪੰਜਾਬ ‘ਚ ਆਮ ਆਦਮੀ ਲਈ ਮੁਗ਼ਲਾਂ ਦੀ ਸਰਕਾਰ- ਚਰਨਜੀਤ ਸਿੰਘ ਚੰਨੀ
ਟੁੱਟ ਪੈਣੇ ਛੜੇ ਜੇਠ ਨੇ, ਮੇਰੇ ਮੂੰਹ ‘ਤੇ ਬੈਟਰੀ ਮਾਰੀ।
ਪੰਜਾਬੀ ਸਮੇਤ 13 ਖੇਤਰੀ ਭਾਸ਼ਾਵਾਂ ‘ਚ ਸੀ.ਪੀ.ਏ.ਐਫ. ਦੀਆਂ ਪ੍ਰੀਖਿਆਵਾਂ ਹੋਣਗੀਆਂ- ਇਕ ਖ਼ਬਰ
ਰੋਏ ਬਿਨਾਂ ਤਾਂ ਮਾਂ ਵੀ ਦੁੱਧ ਨਹੀਂ ਦਿੰਦੀ।
ਸੰਤ ਮਾਨ ਸਿੰਘ ਦੇ ਲੋਕ ਭਲਾਈ ਦੇ ਕਾਰਜਾਂ ਨੂੰ ਭੁਲਾਇਆ ਨਹੀਂ ਜਾ ਸਕਦਾ- ਬਾਬਾ ਸ਼ਿਕਾਗੋ ਵਾਲਾ
ਭੈੜੇ ਭੈੜੇ ਯਾਰ ਮੇਰੀ ਫੱਤੋ ਦੇ।
ਸੁਖਬੀਰ ਬਾਦਲ ਨੇ ਪ੍ਰਧਾਨ ਮੰਤਰੀ ਨੂੰ ਅਪੀਲ ਕੀਤੀ ਕਿ ਕਾਲੇ ਕਾਨੂੰਨ ਤੁਰੰਤ ਰੱਦ ਕੀਤੇ ਜਾਣ-ਇਕ ਖ਼ਬਰ
ਗਿੱਦੜਾਂ ਦੀ ਜੰਨ ਚੜ੍ਹਦੀ, ਜਿੱਥੇ ਸੈਹਾ ਬੋਲੀਆਂ ਪਾਵੇ।
ਬਾਦਲਾਂ ਨੇ ਸੂਬੇ ਅਤੇ ਆਮ ਲੋਕਾਂ ਨਾਲੋਂ ਵੱਧ ਆਪਣੇ ਸਵਾਰਥਾਂ ਨੂੰ ਅਹਿਮੀਅਤ ਦਿਤੀ-ਭਗਵੰਤ ਮਾਨ
ਤੇਰੇ ਲਾ ਕੇ ਦੰਦਾਂ ਵਿਚ ਮੇਖਾਂ, ਮੌਜ ਸੁਨਿਆਰਾ ਲੈ ਗਿਆ।
ਸਾਬਕਾ ਮੁੱਖ ਮੰਤਰੀ ਚੰਨੀ ਨੂੰ ਵਿਜੀਲੈਂਸ ਨੇ ਭੇਜਿਆ ਸੰਮਨ-ਇਕ ਖ਼ਬਰ
ਸਹੁਰਿਆਂ ਦਾ ਪਿੰਡ ਆ ਗਿਆ, ਘੁੰਡ ਕੱਢ ਲੈ ਪਤਲੀਏ ਨਾਰੇ।
ਸਾਬਕਾ ਮੇਅਰ ਜਗਦੀਸ਼ ਰਾਜਾ ਨੂੰ ਮਨਾਉਣ ਲਈ ਪਹੁੰਚੇ ਪ੍ਰਤਾਪ ਸਿੰਘ ਬਾਜਵਾ-ਇਕ ਖ਼ਬਰ
ਅੜੀ ਵੇ ਅੜੀ ਨਾ ਕਰ ਬਹੁਤੀ ਤੂੰ ਅੜੀ, ਚੋਣ ਸਿਰ ‘ਤੇ ਖੜ੍ਹੀ।
ਬੀ.ਬੀ.ਸੀ. ਖ਼ਿਲਾਫ਼ ਹੁਣ ਈ.ਡੀ. ਕਰੇਗੀ ਫੇਮਾ ਦੀ ਉਲੰਘਣਾ ਦੀ ਜਾਂਚ-ਇਕ ਖ਼ਬਰ
ਕੁੜਤੀ ਦਾ ਰੰਗ ਵੇਖ ਕੇ, ਪੁੱਛਦੇ ਫਿਰ ਲਲਾਰੀ।
ਸ਼੍ਰੋਮਣੀ ਅਕਾਲੀ ਦਲ (ਸੰਯੁਕਤ) ਵਲੋਂ ਜਲੰਧਰ ਜਿਮਨੀ ਚੋਣ ਨਾ ਲੜਨ ਦਾ ਫ਼ੈਸਲਾ- ਇਕ ਖ਼ਬਰ
ਜਿਗਰੀ ਯਾਰ ਬਿਨਾਂ, ਕੋਈ ਨਾ ਦਿਲਾਂ ਦਾ ਜਾਨੀ।
ਰਾਹੁਲ,ਖੜਗੇ ਅਤੇ ਨਿਤੀਸ਼ ਨੇ ਵਿਰੋਧੀ ਪਾਰਟੀਆਂ ਨੂੰ ਇਕ ਜੁੱਟ ਕਰਨ ਦਾ ਸੰਕਲਪ ਲਿਆ- ਇਕ ਖ਼ਬਰ
ਤੇਰੀ ਤੋੜ ਕੇ ਛੱਡਣਗੇ ਗਾਨੀ, ਨੀਂ ਸੋਨੇ ਦੇ ਤਵੀਤ ਵਾਲ਼ੀਏ।
ਦੇਸ਼ ਦੇ 29 ਮੌਜੂਦਾ ਮੁੱਖ ਮੰਤਰੀ ਹਨ ਕਰੋੜਪਤੀ- ਇਕ ਰਿਪੋਰਟ
ਇਕ ਤੇਰਾ ਰੰਗ ਮੁਸ਼ਕੀ, ਦੂਜੇ ਡਾਹ ਲਿਆ ਗਲ਼ੀ ਦੇ ਵਿਚ ਚਰਖ਼ਾ।
ਭਾਰਤ ਹੁਣ ਪਾਕਿਸਤਾਨ ਅਤੇ ਚੀਨ ਨਾਲ਼ ਨਜਿੱਠ ਸਕਦਾ ਹੈ- ਜੈਸ਼ੰਕਰ
ਜਿਹੜੀਆਂ ਲੈਣ ਉਡਾਰੀਆਂ ਨਾਲ਼ ਬਾਜ਼ਾਂ, ਉਹ ਬੁਲਬੁਲਾਂ ਠੀਕ ਮਰੀਂਦੀਂਆਂ ਨੇ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
11 ਅਪ੍ਰੈਲ 2023
ਮਾਨ ਸਰਕਾਰ ਦੀ ਕਹਿਣੀ ਤੇ ਕਥਨੀ ‘ਚ ਕੋਹਾਂ ਦਾ ਫ਼ਰਕ- ਐਡਵੋਕੇਟ ਕੋਹਾੜ
ਸਾਈਆਂ ਕਿਧਰੇ, ਵਧਾਈਆਂ ਕਿਧਰੇ, ਬੱਲੇ ਓਏ ਚਾਲਾਕ ਸੱਜਣਾ।
ਪੰਜਾਬ ਦੀ ਗੱਡੀ ਮੁੜ ਵਿਕਾਸ ਦੀਆਂ ਲੀਹਾਂ ‘ਤੇ ਪੈ ਚੁੱਕੀ ਹੈ- ਭਗਵੰਤ ਮਾਨ
ਚੜ੍ਹੇ ਟਿਕਟੋਂ ਬਿਨਾਂ ਨਾ ਕੋਈ, ਝੰਡੇ ਅਮਲੀ ਦੀ ਰੇਲ ਕੂਕਾਂ ਮਾਰਦੀ।
ਧੋਖਾਧੜੀ ਕਰਨ ਦੇ ਜ਼ੁਰਮ ਹੇਠ ਭਾਰਤੀ ਮੂਲ ਦੇ ਵਿਅਕਤੀ ਨੂੰ 24 ਲੱਖ ਡਾਲਰ ਜ਼ੁਰਮਾਨਾ ਤੇ ਜੇਲ੍ਹ-ਇਕ ਖ਼ਬਰ
ਵਾਦੜੀਆਂ ਸਜਾਦੜੀਆਂ ਨਿਭਣ ਸਿਰਾਂ ਦੇ ਨਾਲ।
ਭਗਵੰਤ ਮਾਨ ਸਰਕਾਰ ਨੇ ਕੇਂਦਰ ਸਰਕਾਰ ਅੱਗੇ ਗੋਡੇ ਟੇਕ ਦਿਤੇ- ਸੁਖਵਿੰਦਰ ਸਿੰਘ ਕੋਟਲੀ
ਲਾਈਆਂ ਤੇ ਤੋੜ ਨਿਭਾਵੀਂ ਛੱਡ ਕੇ ਨਾ ਜਾਵੀਂ ਵੇ ਬੀਬਾ ਛੱਡ ਕੇ ਨਾ ਜਾਵੀਂ।
ਪੰਜਾਬ ਅੰਦਰ ਰੇਲਵੇ ਵਿਭਾਗ ਵਲੋਂ ਮਾਂ ਬੋਲੀ ਪੰਜਾਬੀ ਨੂੰ ਕੀਤਾ ਜਾ ਰਿਹੈ ਅੱਖੋਂ ਪਰੋਖੇ- ਇਕ ਖ਼ਬਰ
ਕੀ ਤੂੰ ਚੰਦਰੇ ਲੇਖ ਲਿਖਾਏ, ਵੈਰੀ ਤੇਰੇ ਪੈਰ ਪੈਰ ‘ਤੇ।
ਰਾਹੁਲ ਗਾਂਧੀ ਨੂੰ ਕਾਰਪੋਰੇਟ ਘਰਾਣਿਆਂ ਵਿਰੁੱਧ ਬੋਲਣ ਦੀ ਕੀਮਤ ਚੁਕਾਉਣੀ ਪਈ- ਕੁਲਜੀਤ ਸਿੰਘ ਨਾਗਰਾ
ਦਿਲ ਦੀ ਪੁਗਾਉਣੀ ਮਿੱਤਰਾ, ਭਾਵੇਂ ਰਹੇ ਨਾ ਭੜੋਲੀ ਵਿਚ ਦਾਣਾ।
ਕੈਪਟਨ ਨੇ ਜਲੰਧਰ ਜ਼ਿਮਨੀ ਚੋਣ ਦੀ ਰਣਨੀਤੀ ਲਈ ਜੇ.ਪੀ. ਨੱਢਾ ਨਾਲ ਕੀਤੀ ਮੀਟਿੰਗ- ਇਕ ਖ਼ਬਰ
ਤੇਰੀ ਸੱਜਰੀ ਪੈੜ ਦਾ ਰੇਤਾ, ਚੁੱਕ ਚੁੱਕ ਲਾਵਾਂ ਹਿੱਕ ਨੂੰ।
ਨਰਿੰਦਰ ਮੋਦੀ ਰਾਹੁਲ ਗਾਂਧੀ ਦੀ ਵਧਦੀ ਲੋਕਪ੍ਰਿਯਤਾ ਨੂੰ ਦੇਖ ਕੇ ਘਬਰਾਏ- ਹਰੀਸ਼ ਚੌਧਰੀ
ਤੇਰੇ ਚਿੱਟਿਆਂ ਦੰਦਾਂ ਦਾ ਹਾਸਾ, ਲੈ ਗਿਆ ਮੇਰੀ ਜਿੰਦ ਕੱਢ ਕੇ।
‘ਆਪਣਾ ਆਦਰਸ਼, ਖੁਦ ਬਣੋ’, ਭਗਵੰਤ ਮਾਨ ਵਲੋਂ ਨੌਜਵਾਨਾਂ ਨੂੰ ਅਪੀਲ- ਇਕ ਖ਼ਬਰ
ਆਪਣ ਹਥੀਂ ਆਪਣਾ ਆਪੇ ਹੀ ਕਾਜੁ ਸਵਾਰੀਐ।
ਜਲੰਧਰ ਚੋਣ ਤੋਂ ਪਹਿਲਾਂ ‘ਆਪ’ ਨੇ ਕਾਂਗਰਸ ਪਾਰਟੀ ‘ਚ ਸੰਨ੍ਹ ਲਾਈ-ਇਕ ਖ਼ਬਰ
ਟੁੱਟ ਪੈਣੇ ਬਚਨੇ ਨੇ ਕੰਧ ਢਾ ਕੇ ਚੁਬਾਰਾ ਪਾਇਆ।
ਧੋਖੇਬਾਜ਼ ਆਗੂਆਂ ਲਈ ਪਾਰਟੀ ਵਿਚ ਕੋਈ ਥਾਂ ਨਹੀਂ- ਰਾਜਾ ਵੜਿੰਗ
ਯਾਰੀ ਤੋੜ ਗਏ ਬੱਕਰੀਆਂ ਵਾਲੇ, ਇਕ ਘੁੱਟ ਦੁੱਧ ਬਦਲੇ।
ਨਵਜੋਤ ਸਿੱਧੂ ਨੇ ਦਿੱਲੀ ਜਾ ਕੇ ਰਾਹੁਲ ਅਤੇ ਪ੍ਰਿਯੰਕਾ ਨਾਲ ਕੀਤੀ ਮੁਲਾਕਾਤ- ਇਕ ਖ਼ਬਰ
ਤੋਰ ਦੇ ਮਾਏਂ ਨੀਂ, ਰਾਂਝਾ ਨਿੱਤ ਪਾਵੇ ਫੇਰੀਆਂ।
ਭਗਵੰਤ ਮਾਨ ਤੇ ਕੇਂਦਰ ਵਲੋਂ ਪੰਜਾਬ ਦੀ ਗ਼ਲਤ ਤਸਵੀਰ ਪੇਸ਼ ਕੀਤੀ ਜਾ ਰਹੀ ਹੈ- ਸੁਖਪਾਲ ਖਹਿਰਾ
ਖਾਣ ਵੱਢੀਆਂ ਨਿੱਤ ਈਮਾਨ ਵੇਚਣ, ਇਹੋ ਬਾਣ ਹੈ ਕਾਜ਼ੀ ਮੁਲਾਣਿਆਂ ਨੂੰ।
11 ਆਦਿਵਾਸੀ ਔਰਤਾਂ ਨਾਲ ਬਲਾਤਕਾਰ ਕਰਨ ਵਾਲੇ ਮੁਲਜ਼ਮ 21 ਪੁਲਿਸ ਮੁਲਾਜ਼ਮ ਬਰੀ- ਇਕ ਖ਼ਬਰ
ਕਿਧਰ ਗਏ ਬਈ ਬੇਟੀਆਂ ਬਚਾਉਣ ਤੇ ਬੇਟੀਆਂ ਪੜ੍ਹਾਉਣ ਵਾਲ਼ੇ?
ਧਾਰਮਕ ਕੰਮਾਂ ਤੋਂ ਪਹਿਲਾਂ ਗੁਆਂਢੀਆਂ ਅਤੇ ਰਿਸ਼ਤੇਦਾਰਾਂ ਦੀ ਕਰੋ ਮਾਲੀ ਮਦਦ- ਸ਼ਾਹੀ ਇਮਾਮ
ਕੀ ਕਰਨਾ ਕੱਪੜੇ ਰੰਗਿਆਂ ਨੂੰ, ਜੇ ਮਨ ਰੰਗਿਆ ਨਾ ਜਾਵੇ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
03 ਅਪ੍ਰੈਲ 2023
ਲਾਰੈਂਸ ਬਿਸ਼ਨੋਈ ਇੰਟਰਵੀਊ ਦੇ ਮਾਮਲੇ ਦੀ ਜਾਂਚ ‘ਲਟਕੀ’- ਇਕ ਖ਼ਬਰ
ਲਟਕੀ ਨਹੀਂ ਲਟਕਾਈ ਕਹੋ।
ਲੁਟੇਰਿਆਂ ਨੇ ਬਜ਼ੁਰਗ ਕਬਾੜੀਆ ਵੀ ਨਹੀਂ ਬਖਸ਼ਿਆ, ਨੌ ਸੌ ਰੁਪਏ ਲੁੱਟ ਲਏ ਉਸ ਪਾਸੋਂ- ਇਕ ਖ਼ਬਰ
ਭੁੱਖ ਨੰਗ ਦੀ ਕੋਈ ਪ੍ਰਵਾਹ ਨਾਹੀਂ, ਹੁਕਮ ਹੋਵੇ ਤਾਂ ਦੇਗਾਂ ਨੂੰ ਚੱਟੀਏ ਜੀ।
ਰਿਸ਼ਵਤ ਮਾਮਲੇ ‘ਚ ਸਾਬਕਾ ਮੰਤਰੀ ਸ਼ਾਮ ਸੁੰਦਰ ਅਰੋੜਾ ਨੂੰ ਮਿਲੀ ਜ਼ਮਾਨਤ-ਇਕ ਖ਼ਬਰ
ਨੋਟ ਗਿਣਨ ਵਾਲੀ ਮਸ਼ੀਨ ਨੂੰ ਚੈੱਕ ਕਰ ਲੈ ਭਾਈ ਕਿਤੇ ਜੰਗਾਲ ਨਾ ਲੱਗ ਗਿਆ ਹੋਵੇ।
ਬਰਾੜ ਦੇ ‘ਆਪ’ ‘ਚ ਜਾਣ ਨਾਲ ਸ਼੍ਰੋਮਣੀ ਅਕਾਲੀ ਦਲ ਨੂੰ ਕੋਈ ਨੁਕਸਾਨ ਨਹੀਂ- ਗੁਰਪ੍ਰਤਾਪ ਸਿੰਘ ਵਡਾਲਾ
ਤੁਸੀਂ ਤਾਂ ਤਿੰਨ ਸੀਟਾਂ ‘ਤੇ ਆ ਗਏ ਤਾਂ ਵੀ ਕੋਈ ਫ਼ਰਕ ਨਹੀਂ ਪਿਆ ਤੁਹਾਨੂੰ।
ਸਿੱਖਾਂ ਵਿਰੁੱਧ ਸਰਕਾਰੀ ਦਹਿਸ਼ਤ ਨੂੰ ਜਥੇਦਾਰ ਅਕਾਲ ਤਖ਼ਤ ਅੱਗੇ ਲੱਗ ਕੇ ਬੰਦ ਕਰਵਾਉਣ- ਪੰਜੋਲੀ
ਜੇ ਬਾਦਲਾਂ ਨੂੰ ਕੋਈ ਫ਼ਾਇਦਾ ਹੁੰਦਾ ਹੋਊ ਫੇਰ ਤਾਂ ਜਥੇਦਾਰ ਬਣਜੂ ਭੰਬੀਰੀ ਭਾਈ।
ਨੌਕਰੀ ਲਈ ਪੰਜਾਬੀ ਭਾਸ਼ਾ ਪ੍ਰੀਖਿਆ ਦੀ ਸ਼ਰਤ ‘ਤੇ ਕਿਉਂ ਨਾ ਲਗਾਈ ਜਾਵੇ ਰੋਕ?- ਹਾਈ ਕੋਰਟ
ਪੰਜਾਬੀਏ ਵਿਚਾਰੀਏ ਹਰ ਪਾਸੇ ਤੇਰੇ ਦੁਸ਼ਮਣ ਬੈਠੇ, ਕੋਈ ਨਾ ਤੇਰਾ ਦਰਦੀ।
ਸ਼੍ਰੋਮਣੀ ਕਮੇਟੀ ਦੇ ਬਜਟ ਤੋਂ ਨਾਖੁਸ਼ ਵਿਰੋਧੀ ਧਿਰ ਦੇ ਮੈਂਬਰ- ਇਕ ਖ਼ਬਰ
ਲੌਂਗ ਘੜਾ ਦਊਂਗਾ, ਗੁੱਸਾ ਛੱਡ ਮੁਟਿਆਰੇ।
ਜਲੰਧਰ ‘ਚ ਜ਼ਿਮਨੀ ਚੋਣ ਦਾ ਐਲਾਨ ਹੁੰਦਿਆਂ ਹੀ ਹਲਚਲ ਵਧੀ- ਇਕ ਖ਼ਬਰ
ਲਾਮ ਲੱਦ ਅਸਬਾਬ ਸਭ ਸਾਧ ਚੱਲੇ, ਚੜ੍ਹੇ ਪਰਬਤਾਂ ਦੇ ਉਪਰ ਜਾ ਭਾਈ।
ਅਕਾਲੀ ਦਲ ਤੇ ਬਸਪਾ ਮਿਲ ਕੇ ਲੜਨਗੇ ਜਲੰਧਰ ਦੀ ਜ਼ਿਮਨੀ ਚੋਣ- ਇਕ ਖ਼ਬਰ
ਰੁੱਤ ਯਾਰੀਆਂ ਲਾਉਣ ਦੀ ਆਈ, ਬੇਰੀਆਂ ਦੇ ਬੇਰ ਪੱਕ ਗਏ।
ਸੰਸਦ ਦੀ ਮੈਂਬਰੀ ਖੁੱਸਣ ਤੋਂ ਬਾਅਦ ਰਾਹੁਲ ਨੂੰ ਬੰਗਲਾ ਖਾਲੀ ਕਰਨ ਦਾ ਨੋਟਿਸ- ਇਕ ਖ਼ਬਰ
ਚੁੱਕ ਚਰਖਾ ਪਰ੍ਹਾਂ ਕਰ ਪੀੜ੍ਹੀ, ਛੜਿਆਂ ਨੇ ਬੋਕ ਬੰਨ੍ਹਣਾ।
ਮਹਿੰਗਾਈ ਘੱਟ ਕਰਨੀ ਹੈ ਤਾਂ ਰਿਲਾਇੰਸ, ਟਾਟਾ, ਬਿਰਲਾ, ਅਡਾਨੀ ਗਰੁੱਪ ਤੋੜ ਦਿਉ- ਵਿਰਲ ਅਚਾਰੀਆ
ਲੈ ਬਈ ਅਚਾਰੀਆ ਈ.ਡੀ. ਆਈ ਸਮਝ ਤੇਰੇ ਵਲ ਵੀ, ਕਰ ਲੈ ਤਿਆਰੀ।
ਕਾਂਗਰਸ ਨੇ ਸੰਸਦ ਤੋਂ ਸੜਕ ਤੱਕ ਮਨਾਇਆ ‘ਕਾਲਾ ਦਿਨ’- ਇਕ ਖ਼ਬਰ
ਢਾਬ ਤੇਰੀ ਦਾ ਗੰਧਲਾ ਪਾਣੀ, ਉੱਤੋਂ ਬੂਰ ਹਟਾਵਾਂ।
ਤਿੰਨ ਦਿਨ ਹਸਪਤਾਲ ‘ਚ ਰਹਿਣ ਪਿੱਛੋਂ ਪੋਪ ਫਰਾਂਸਿਸ ਨੂੰ ਮਿਲੀ ਹਸਪਤਾਲੋਂ ਛੁੱਟੀ- ਇਕ ਖ਼ਬਰ
ਹਸਪਤਾਲ ਕਾਹਨੂੰ ਜਾਣਾ ਸੀ, ਪੰਜਾਬ ਦੇ ਕਿਸੇ ਪਾਸਟਰ ਤੋਂ ਕਰਵਾ ਲੈਂਦੇ ਇਲਾਜ।
ਪੰਜਾਬ ਅਤੇ ਕੇਂਦਰ ਵਲੋਂ ਜਾਣ ਬੁੱਝ ਕੇ ਪੰਜਾਬ ਦਾ ਮਾਹੌਲ ਖ਼ਰਾਬ ਕੀਤਾ ਜਾ ਰਿਹੈ- ਸੰਯੁਕਤ ਕਿਸਾਨ ਮੋਰਚਾ
ਅੱਜ ਕੌਣ ਪੁੱਛੇ ਰਾਂਝੇ ਚਾਕ ਤਾਈਂ, ਬੇਗ਼ਮ ਹੀਰ ਤੇ ਸੈਦਾ ਨਵਾਬ ਹੋਇਆ।
ਪੰਜਾਬ ‘ਚ ਸਰਕਾਰੀ ਵਿਭਾਗਾਂ ਦੇ ਬਿਜਲੀ ਬਿੱਲਾਂ ਦਾ ਬਕਾਇਆ 2600 ਕਰੋੜ ਤੋਂ ਪਾਰ- ਇਕ ਖ਼ਬਰ
ਕੋਈ ਊਠਾਂ ਵਾਲ਼ੇ ਨੀਂ, ਲੁੱਟ ਕੇ ਸੇਜ ਸੱਸੀ ਦੀ ਲੈ ਗਏ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
28 ਮਾਰਚ 2023
ਜਥੇਦਾਰ ਹਰਪ੍ਰੀਤ ਸਿੰਘ ਨੇ 27 ਮਾਰਚ ਨੂੰ ਸੱਦੀ ‘ਸਾਂਝੀ ਵਿਸ਼ੇਸ਼ ਇਕੱਤਰਤਾ’- ਇਕ ਖ਼ਬਰ
ਤੈਨੂੰ ਵੇਖਣ ਕਈਆਂ ਨੇ ਆਉਣਾ, ਵਿਹੜੇ ਵਿਚ ਡਾਹ ਲੈ ਮੰਜੜੀ।
ਹਾਈ ਕੋਰਟ ਨੇ ਪਾਈ ਪੰਜਾਬ ਸਰਕਾਰ ਨੂੰ ਝਾੜ- ਇਕ ਖ਼ਬਰ
ਏਦਾਂ ਦੀ ਤਾਂ ਸਵੇਰ ਤੋਂ ਸ਼ਾਮ ਤੱਕ ਹੁੰਦੀ ਰਹਿੰਦੀ ਐ ਸਾਡੇ ਨਾਲ਼।
ਹਰ ਸਾਲ ਕੁਦਰਤ ਕਿਸਾਨ ਦੀ ਵੈਰੀ ਕਿਉਂ ਬਣ ਜਾਂਦੀ ਹੈ? ਇਕ ਸਵਾਲ
ਕਿਉਂਕਿ ਮਨੁੱਖ ਕੁਦਰਤ ਦਾ ਵੈਰੀ ਬਣਿਆ ਹੋਇਆ ਹੈ।
ਪੰਜਾਬ ਦੇ ਮੌਜੂਦਾ ਹਾਲਾਤ ਬਾਰੇ ਰਾਜਾ ਵੜਿੰਗ ਨੇ ਡੀ.ਜੀ.ਪੀ. ਨੂੰ ਲਿਖੀ ਚਿੱਠੀ-ਇਕ ਖ਼ਬਰ
ਚਿੱਠੀਆਂ ਸਾਹਿਬਾਂ ਜੱਟੀ ਨੇ, ਲਿਖ ਮਿਰਜ਼ੇ ਵਲ ਪਾਈਆਂ।
ਸਰਕਾਰ ਨੇ ਰਾਹੁਲ ਗਾਂਧੀ ਦੀ ਲੋਕ ਸਭਾ ਮੈਂਬਰਸ਼ਿੱਪ ਰੱਦ ਕੀਤੀ- ਇਕ ਖ਼ਬਰ
ਨਾ ਰਹੇ ਬਾਂਸ ਨਾ ਬਜੇ ਬੰਸਰੀ।
ਬਾਦਲਾਂ ਨੂੰ ਗ੍ਰਿਫ਼ਤਾਰ ਕਰੋ ਦੇ ਨਾਹਰੇ ਲਗਦਿਆਂ ਹੀ ਪੁਲਿਸ ਨੂੰ ਪਈਆਂ ਭਾਜੜਾਂ- ਇਕ ਖ਼ਬਰ
ਮੇਰੇ ਯਾਰ ਨੂੰ ਮੰਦਾ ਨਾ ਬੋਲੀਂ, ਮੇਰੀ ਭਾਵੇਂ ਜਿੰਦ ਕੱਢ ਲੈ।
ਮੋਦੀ ਨੇ ਅਡਾਨੀ ਨੂੰ ਵੱਡੇ ਕਾਰੋਬਾਰ ਸਸਤੇ ‘ਚ ਸੌਂਪੇ- ਹਰੀਸ਼ ਚੌਧਰੀ
ਅਸਾਂ ਜੇਠ ਨੂੰ ਲੱਸੀ ਨਹੀਂ ਦੇਣੀ, ਦਿਉਰ ਭਾਵੇਂ ਦੁੱਧ ਪੀ ਲਵੇ।
ਪੰਜਾਬ ‘ਚ ਕਿਸੇ ਵੇਲੇ ਵੀ ਲਾਵਾ ਫੁੱਟ ਸਕਦੈ, ਪਰ ਸਰਕਾਰ ਬੇਖ਼ਬਰ ਹੈ- ਜਸਟਿਸ ਸੋਢੀ
ਤੇਰਾ ਲੁੱਟਿਆ ਸ਼ਹਿਰ ਭੰਬੋਰ, ਨੀਂ ਸੱਸੀਏ ਬੇਖ਼ਬਰੇ।
ਮੇਰੇ ਉੱਪਰ ਇਰਾਦਾ ਕਤਲ ਦਾ ਝੂਠਾ ਕੇਸ ਬਣਾਇਆ ਗਿਆ-ਪਰਕਾਸ਼ ਸਿੰਘ ਬਾਦਲ
ਟੁੱਟ ਪੈਣੇ ਬਚਨੇ ਨੇ, ਕੰਧ ਢਾ ਕੇ ਚੁਬਾਰਾ ਪਾਇਆ।
ਪੰਜਾਬ ਦੀਆਂ ਤਾਜ਼ਾ ਘਟਨਾਵਾਂ ਤੋਂ ‘ਆਪ’ ਅਤੇ ਭਾਜਪਾ ਦੀ ਸਾਂਝ ਜੱਗ ਜ਼ਾਹਿਰ- ਡਾ.ਕਰੀਮਪੁਰੀ
ਝਾਂਜਰ ਪਤਲੋ ਦੀ, ਠਾਣੇਦਾਰ ਦੇ ਚੁਬਾਰੇ ਵਿਚ ਖੜਕੇ।
ਸਰਕਾਰ ਦੀ ਨਾਕਾਮੀ ਕਾਰਨ ਸੂਬੇ ਦਾ ਮਾਹੌਲ ਤਣਾਅਪੂਰਨ- ਬੀਬੀ ਜਾਗੀਰ ਕੌਰ
ਆ ਵੇ ਮਾਹੀ ਬਹਿ ਵੇ ਮਾਹੀ, ਦਿਲ ਦਾ ਹਾਲ ਸੁਣਾਵਾਂ।
ਅਕਾਲ ਤਖ਼ਤ ‘ਤੇ ਹੋ ਰਹੀ ਪੰਥਕ ਬੈਠਕ ‘ਜਥੇਦਾਰ’ ਲਈ ਪਰਖ ਦਾ ਸਮਾਂ- ਇਕ ਖ਼ਬਰ
ਘੱਲਿਆ ਸੀ ਮੈਂ ਮਹੀਂ ਖਰੀਦਣ, ਖਰੀਦ ਲਿਆਇਆ ਝੋਟੇ।
ਵਿਜੈ ਮਾਲਿਆ ਨੇ ਇੰਗਲੈਂਡ ਅਤੇ ਫਰਾਂਸ ‘ਚ 330 ਕਰੋੜ ਰੁਪਏ ਦੀਆਂ ਜਾਇਦਾਦਾਂ ਖਰੀਦੀਆਂ- ਸੀ.ਬੀ.ਆਈ.
ਲੱਡੂ ਖਾ ਕੇ ਚੁਬਾਰੇ ਵਿਚੋਂ ਨਿਕਲੀ, ਮੱਖੀਆਂ ਨੇ ਪੈੜ ਨੱਪ ਲਈ।
ਇਹ ਦੇਸ਼ ਅਡਾਨੀ ਦਾ ਨਹੀਂ, ਬਲਕਿ ਕਿਸਾਨਾਂ, ਮਜ਼ਦੂਰਾਂ ਅਤੇ ਗ਼ਰੀਬਾਂ ਦਾ ਹੈ- ਰਾਹੁਲ ਗਾਂਧੀ
ਬਾਣੀਆਂ ਨੇ ਅੱਤ ਚੁੱਕ ਲਈ, ਸਾਰੇ ਜੱਟ ਕਰਜ਼ਾਈ ਕੀਤੇ।
ਇਮਰਾਨ ਖ਼ਾਨ ਖ਼ਿਲਾਫ਼ ਅੱਤਵਾਦ ਦਾ ਮੁਕੱਦਮਾ ਦਰਜ-ਇਕ ਖ਼ਬਰ
ਜੇ ਕੋਈ ਹੋਰ ਲੈ ਆਇਆ ਤੇਰੀ ਜੰਞ ਨੀਂ, ਬਣੂੰ ਜੰਗ ਦਾ ਮੈਦਾਨ ਵੇਖੀਂ ਬੇਲਾ ਝੰਗ ਨੀਂ।
ਚੁੰਝਾਂ-ਪ੍ਹੌਂਚੇ - ਨਿਰਮਲ ਸਿੰਘ ਕੰਧਾਲਵੀ
20.03.2023
ਰਾਹੁਲ ਦੇ ਲੰਡਨ ‘ਚ ਦਿਤੇ ਬਿਆਨ ‘ਤੇ ਸੰਸਦ ਵਿਚ ਭਾਰੀ ਹੰਗਾਮਾ- ਇਕ ਖ਼ਬਰ
ਸੱਸ ਲੜਦੀ ਜਠਾਣੀ ਗੁੱਤ ਫੜਦੀ, ਦਿਉਰ ਮਾਰੇ ਮੇਹਣੇ ਵੀਰਨਾ।
ਚਲਾਨ ਦੀ ਕਾਪੀ ਲੈਣ ਸਬੰਧੀ ਸੁਖਬੀਰ ਬਾਦਲ ਦੀ ਅਰਜ਼ੀ ਰੱਦ-ਇਕ ਖ਼ਬਰ
ਛੜਿਆਂ ਦੇ ਗਈ ਅੱਗ ਨੂੰ, ਉਹਨਾਂ ਚੱਪਣੀ ਵਗਾਹ ਕੇ ਮਾਰੀ।
ਅਜੋਕੀਆਂ ਰਾਜਨੀਤਕ ਸਥਿਤੀਆਂ ‘ਚ ਰਾਹੁਲ ਗਾਂਧੀ ਕੀ ਕਰੇ?-ਇਕ ਸਵਾਲ
ਚਿੜੀ ਵਿਚਾਰੀ ਕੀ ਕਰੇ। ਠੰਡਾ ਪਾਣੀ ਪੀ ਮਰੇ?
ਭਾਰਤ ਦੁਨੀਆਂ ਦੇ ਸਭ ਤੋਂ ਵੱਧ ਪ੍ਰਦੂਸ਼ਿਤ ਦੇਸ਼ਾਂ ਦੀ ਸੂਚੀ ਵਿਚ ਅੱਠਵੇਂ ਨੰਬਰ ‘ਤੇ ਪਹੁੰਚਿਆ-ਇਕ ਰਿਪੋਰਟ
ਕਾਲ਼ੇ ਦਾ ਇਕ ਛੱਪੜ ਸੁਣੀਂਦਾ, ਪਾਣੀ ਜਿਸਦਾ ਖਾਰਾ।
ਕਾਂਗਰਸੀ ਆਗੂਆਂ ਵਲੋਂ ‘ਆਪ’ ਸਰਕਾਰ ਦੇ ਬਜਟ ਦੀ ਨਿੰਦਾ-ਇਕ ਖ਼ਬਰ
ਸੱਸ ਪਿੱਟਣੀ ਪੰਜੇਬਾਂ ਪਾ ਕੇ, ਜੱਗ ਭਾਵੇਂ ਮਾਰੇ ਬੋਲੀਆਂ।
ਨੋਟਬੰਦੀ ਵੇਲੇ ਹੋਈਆਂ ਮੌਤਾਂ ਦੀ ਕੋਈ ਅਧਿਕਾਰਿਤ ਰਿਪੋਰਟ ਨਹੀਂ-ਕੇਂਦਰ ਸਰਕਾਰ
ਚਿੜੀਆਂ ਦੀ ਮੌਤ, ਗਵਾਰਾਂ ਦਾ ਹਾਸਾ।
ਪ੍ਰਧਾਨ ਮੰਤਰੀ ਦੀ ਸਿਸੋਦੀਆ ਖ਼ਿਲਾਫ਼ ਝੂਠੇ ਮੁਕੱਦਮੇ ਚਲਾਉਣ ਦੀ ਯੋਜਨਾ ਹੈ- ਕੇਜਰੀਵਾਲ
ਤੇਰਾ ਕੱਖ ਨਹੀਂ ਬਚਨੀਏਂ ਰਹਿਣਾ, ਛੜਿਆਂ ਦਾ ਹੱਕ ਮਾਰ ਕੇ।
ਮੈਨੂੰ ਸਦਨ ‘ਚ ਬੋਲਣ ਨਹੀਂ ਦਿੰਦੇ, ਮੋਦੀ ਮੇਰੇ ਸਵਾਲਾਂ ਤੋਂ ਡਰਦੇ ਹਨ- ਰਾਹੁਲ ਗਾਂਧੀ
ਕਾਦਰਯਾਰ ਜੇ ਕੋਲ ਗਵਾਹ ਹੁੰਦੇ, ਕਹਿੰਦੇ ਖੋਲ੍ਹ ਹਕੀਕਤ ਸਾਰੀ।
ਰਾਹੁਲ ਗਾਂਧੀ ਵਿਰੋਧੀ ਤਾਕਤਾਂ ਦੀ ਭਾਸ਼ਾ ਬੋਲਦੇ ਹਨ- ਭਾਜਪਾ
ਹੋਰ ਰਾਹੁਲ ਗਾਂਧੀ ਤੁਹਾਡੇ ਸੋਹਿਲੇ ਗਾਵੇ।
ਸ਼੍ਰੋਮਣੀ ਅਕਾਲੀ ਦਲ ਹਮੇਸਾਂ ਪੰਜਾਬ ਦੇ ਹਿਤਾਂ ਦੀ ਪਹਿਰੇਦਾਰੀ ਕਰਦਾ ਰਹੇਗਾ- ਦਲਜੀਤ ਸਿੰਘ ਚੀਮਾ
ਚੀਮਾ ਸਾਹਿਬ ਇੰਜ ਕਹੋ ਕਿ ਬਾਦਲਾਂ ਦੀ ਪਹਿਰੇਦਾਰੀ ਕਰਦਾ ਰਹੇਗਾ ਅਕਾਲੀ ਦਲ ।
‘ਆਪ’ ਸਰਕਾਰ ਨੇ ਇਕ ਸਾਲ ‘ਚ ਪੰਜਾਬ ਦੇ ਲੋਕਾਂ ਨੂੰ ਮਾੜਾ ਪ੍ਰਸ਼ਾਸਨ ਦਿਤਾ- ਬਾਜਵਾ
ਕਾਹਨੂੰ ਮਾਰਦੀ ਚੰਦਰੀਏ ਤਾਹਨੇ, ਨੀਂ ਆਪਣੇ ਤੂੰ ਦਿਨ ਭੁੱਲ ਗਈ।
ਹਾਈ ਕੋਰਟ ਨੇ ਭਗਵੰਤ ਮਾਨ ਸਰਕਾਰ ਦੀ ਬਾਂਹ ਮਰੋੜੀ- ਇਕ ਖ਼ਬਰ
ਮੁੰਡਾ ਭੰਨਦਾ ਕਿਰਕ ਨਹੀਂ ਕਰਦਾ, ਮੇਰੀਆਂ ਬਰੀਕ ਚੂੜੀਆਂ।
ਕੁਦਰਤੀ ਖੇਤੀ ਅਪਨਾਉਣ ਨਾਲ ਕਿਸਾਨਾਂ ਦੀ ਆਮਦਨ ਵਧੇਗੀ- ਅਮਿਤ ਸ਼ਾਹ
ਕਿਸਾਨਾਂ ਦੀ ਆਮਦਨ ਤਾਂ ਪਹਿਲਾਂ ਹੀ ਸਰਕਾਰ ਨੇ ਦੁੱਗਣੀ ਕਰ ਦਿਤੀ ਹੈ, ਹੋਰ ਕਿੰਨੀ ਕੁ ਵਧਾਉਗੇ?
ਲਾਹੌਰ ਹਾਈ ਕੋਰਟ ਨੇ ਇਮਰਾਨ ਖ਼ਾਨ ਦੀ ਰੈਲੀ ’ਤੇ ਲਗਾਈ ਰੋਕ- ਇਕ ਖ਼ਬਰ
ਛੜੇ ਬੈਠ ਕੇ ਸਲਾਹਾਂ ਕਰਦੇ, ਰੱਬਾ ਹੁਣ ਕੀ ਕਰੀਏ?
ਸਾਂਸਦ ਹੋਣ ਦੇ ਨਾਤੇ ਸੰਸਦ ਵਿਚ ਬੋਲਣਾ ਮੇਰਾ ਹੱਕ- ਰਾਹੁਲ ਗਾਂਧੀ
ਜਾਣਾ ਦਰਬਾਰ ਮੈਂ ਦਲੀਲਾਂ ਧਾਰੀਆਂ, ਦੱਸਦਾ ਹਕੀਕਤਾਂ ਤਮਾਮ ਸਾਰੀਆਂ।
ਕੇਸ਼ੋਪੁਰ ਛੰਭ ਤੋਂ ਸਾਰੇ ਪਰਵਾਸੀ ਪੰਛੀ ਆਪੋ ਆਪਣੇ ਦੇਸ਼ਾਂ ਨੂੰ ਪਰਤੇ- ਇਕ ਖ਼ਬਰ
ਚਾਰੇ ਕੰਨੀਆਂ ਮੇਰੀਆਂ ਵੇਖ ਖ਼ਾਲੀ, ਅਸੀਂ ਨਾਲ਼ ਨਾਹੀਂ ਕੁਝ ਲੈ ਚੱਲੇ।
ਅਸੀਂ ਜਾਂਚ ਤੋਂ ਨਹੀਂ ਡਰਦੇ, ਈ.ਡੀ. ਨੇ ਜੋ ਕਰਨੈ ਕਰ ਲਵੇ- ਰਾਘਵ ਚੱਢਾ
ਕਾਦਰਯਾਰ ਅਨਹੋਣੀਆਂ ਕਰਨ ਜੇਹੜੇ, ਆਖਰ ਵਾਰ ਉਹਨਾਂ ਪੱਛੋਤਾਵਣਾ ਈ।
ਸੁਖਬੀਰ ਬਾਦਲ ਹੁਣ ਬਹਾਨੇ ਨਾ ਘੜੇ, ਤੁਰਤ ਅਕਾਲੀ ਦਲ ਤੋਂ ਅਸਤੀਫ਼ਾ ਦੇਵੇ- ਇਕ ਖ਼ਬਰ
ਲੋਟਣ ਪੱਚੀਆਂ ਦੇ, ਚਹੁੰ ‘ਚ ਵੇਚ ਗਿਆ ਵੈਲੀ।
===================
