ਤੇਰੇ ਅੰਦਰ ਜੋ ਤਾਕਤ ਹੈ, ਦੇ-ਦੇ ਆਪਣੀ ਰੀਝਾਂ ਨੂੰ ।
ਸਮਾਂ ਕੀਮਤੀ ਕਿਉਂ ਦਿੰਦਾ ਫਿਰਦਾ ? ਵਕਤ ਖਾਣੀਆਂ ਚੀਜ਼ਾਂ ਨੂੰ ।
ਆਪੇ ਪੂਰੀਆਂ ਕਰਦਾ ਫਿਰ ਮਾਲਕ, ਸੱਚੀਆਂ ਲਾਈਆਂ ਨੀਝਾਂ ਨੂੰ ।
ਹੰਕਾਰ ਕਰੇ ਤੂੰ ਰਾਵਣ ਜਿੰਨਾ, ਭੁੱਲਾ ਫਿਰੇ ਤਹਿਜੀਬਾਂ ਨੂੰ ।
ਪਤਾ ਨਹੀਂ ਕਦੋਂ ਮਾਰ ਸਮੇਂ ਦੀ, ਪੈ ਜਾਵੇ ਬਦਨਸੀਬਾਂ ਨੂੰ ।
ਜ਼ਿੰਦਗੀ ਵਿੱਚ ਸਫ਼ਲ ਜੇ ਹੋਣਾ, ਪਾਰ ਕਰ ਮੰਜ਼ਿਲ ਦੀਆਂ ਦਹਿਲੀਜਾਂ ਨੂੰ ।
ਅੰਤ ਸਭਨਾ ਮਿੱਟੀ ਦੀ ਢੇਰੀ, ਕਿਉਂ ਬਣਾਉਂਦਾ ਫਿਰੇ  ਤਜ਼ਵੀਜਾਂ ਨੂੰ।
 ਮਨ ਆਪਣਾ ਜੇ ਪਾਕ ਤੂੰ ਕਰਨਾ, ਛੱਡ ਧਾਗੇ ,ਝੂਠ, ਤਵੀਜਾਂ ਨੂੰ ।
ਯਾਦ ਰੱਖ ਗੁਰੂ ਦੀ ਸਿੱਖਿਆ,ਫ਼ਲ ਲੱਗਦੇ ਚੰਗਿਆਂ ਬੀਜਾਂ ਨੂੰ ।
 ਦੁਨੀਆ ਉਸ ਦਾ ਹੀ ਆਦਰ ਕਰਦੀ, ਜੋ ਭੁੱਲਦਾ ਨਹੀਂ ਤਮੀਜਾਂ ਨੂੰ ।
 ਐਵੇਂ ਕਾਹਨੂੰ ਰੋਜ਼ ਲਾਵੇ ਪਾਣੀ ਪਰਵਿੰਦਰ , ਵਕਤ ਖਾਣੀਆਂ ਚੀਜ਼ਾਂ ਨੂੰ।
 ਤੇਰੇ ਅੰਦਰ ਜੋ ਤਾਕਤ ਹੈ, ਦੇ-ਦੇ ਆਪਣੀਆਂ ਰੀਝਾਂ ਨੂੰ ।
ਦੇ-ਦੇ ਆਪਣੀ ਰੀਝਾਂ ਨੂੰ ।
 ਪਰਵਿੰਦਰ ਕੌਰ ਗਿੱਲ
 ਸ.ਮ.ਸ.ਸ.ਸਕੂਲ ਸ਼ੇਰੋੰ (ਸੰਗਰੂਰ)
ਮੋ.ਨੰ:79863-57337

ਅੱਜ ਮੈਂ ਨੂੰ ਮੈਂ ਮਿਲਿਆ ,
ਲੰਬੀਆਂ ਬਾਤਾਂ ਚੱਲੀਆਂ ਨੇ।
 ਮੇਰੇ ਦਿਲ ਦਾ ਵਿਹੜਾ ਸੀ ਸੁੰਨਾ,
ਖੁਸ਼ੀਆਂ ਨੇ ਅੱਜ ਥਾਵਾਂ ਮੱਲੀਆਂ ਨੇ।
ਕੁਝ ਕੁ ਪੁਰਾਣੇ ਵਖ਼ਤ ਦੀਆਂ,
ਅਸਾਂ ਯਾਦਾਂ ਠੱਲੀਆਂ ਨੇ।
ਮੇਰੇ ਦਿਲ ਵਿੱਚ ਜੋ ਵੱਸ ਰਹਿੰਦੀਆਂ,
ਮੇਰੇ ਪਿੰਡ ਦੀਆਂ ਗਲੀਆਂ ਨੇ।
ਬੇਫ਼ਿਕਰਾ ਜਿਹਾ ਬਚਪਨ ਮੇਰਾ,
 ਕਿੱਥੇ ਉਡਾਰੀ ਮਾਰ ਗਿਆ ?
ਸਭ ਦੇ ਚਿਹਰੇ ਦੀ ਰੌਣਕ,
ਪਤਾ ਨਹੀਂ ਕਿੱਥੇ ਹਾਰ ਗਿਆ?
ਜਿੰਨਾ ਯਾਰਾਂ ਨਾਲ ਫਿਰਦੇ ਸੀ,
ਕੰਮਾਂ- ਕਾਰਾਂ 'ਚ ਰੁੱਝ ਗਏ ਨੇ।
ਜਿਨ੍ਹਾਂ ਚਿਹਰਿਆਂ 'ਤੇ ਹਾਸੇ ਸੀ,
ਅੱਜ ਉਹ ਚਿਹਰੇ ਬੁੱਝ ਗਏ ਨੇ।
ਦੁਨੀਆਂ ਦੇ ਇਸ ਰੰਗਲੇ ਬਾਗ ਵਿੱਚ,
ਖਿੜਦੀਆਂ ਰੋਜ਼ ਨਵੀਆਂ ਕਲੀਆਂ ਨੇ ।
ਜ਼ਿੰਦਗੀ ਨੂੰ ਜਿੱਤਣ ਦੀ ਕੋਸ਼ਿਸ਼ ਵਿੱਚ,
 ਪਤਾ ਹੀ ਨਾ ਲੱਗਾ, ਕਦੋਂ ਉਮਰਾਂ ਢਲੀਆਂ ਨੇ।
ਬਚਪਨ ਸਾਥੋਂ ਖੁੰਝ ਗਿਆ,
ਜ਼ਿੰਮੇਦਾਰੀਆਂ ਆ ਰਲੀਆਂ ਨੇ।
ਅੱਜ ਮੈਂ ਨੂੰ ਮੈਂ ਮਿਲਿਆ,
ਲੰਬੀਆਂ ਬਾਤਾਂ ਚੱਲੀਆਂ ਨੇ।।
 ਪਰਵਿੰਦਰ ਕੌਰ ਗਿੱਲ
ਸ.ਮ.ਸ.ਸ.ਸਕੂਲ ਸ਼ੇਰੋੰ
    (ਸੰਗਰੂਰ)
ਮੋ.ਨੰ:79863 -57337